Ãlikin amiro eo pãleem̦ m̦are im jino mour ippãn doon, enaaj wal̦o̦k apañ ko. Enaaj wal̦o̦k apañ ko itok wõt jãn amiro oktak jãn doon. Bõtab, jet iien enaaj wal̦o̦k apañ ko ñan komiro kõn wõt armej ro jet im kõn wãween ko jet me komiro ejjab maroñ el̦l̦ã ioer.

Elõñ rippãlele ro rejjab kõn̦aan kõm̦adm̦õdi apañ ko rej wal̦o̦k ñan er im rej kõtl̦o̦k wõt bwe men kein ren wal̦o̦k. Bõtab, Baibõl̦ ej rõjañ kõj bwe jen kõm̦adm̦õde jabdewõt apañ ko rej wal̦o̦k. (Matu 5:23, 24) Ñe ej wal̦o̦k apañ ko ikõtaamiro, wãween eo em̦m̦antata ñan kõm̦adm̦õdi apañ kein ej ilo amiro l̦oore naan in kakapilõk ko jãn Baibõl̦. Jen lale ta ko kwõmaroñ kõm̦m̦ani ñe komiro eo pãleem̦ ej iioone juon apañ.

EKKAR ÑAN BAIBÕL̦: “Ewõr iien ñan . . . kõnono.” (Ekklisiastis 3:1, 7) Komiro ej aikuj kõm̦m̦an amiro iien ñan kõnnaan kõn apañ eo. Kwõn kwal̦o̦k bũruom̦ im l̦õmn̦ak ko am̦ kõn apañ eo ñan eo pãleem̦. Aolep iien kwõj aikuj “kõnono m̦ool” ñan eo pãleem̦. (Epesõs 4:25) Jekdo̦o̦n ñe kwõj illu ak inepata ñe komiro ej kõnnaan ippãn doon, kwõj aikuj kate eok bwe kwõn jab akwããl. El̦aññe ejouj wãween am̦ kõnnaan, men in enaaj kõjparok bwe komiro en jab oktak im akwããl kõn apañ eo.​—Jabõn Kõnnaan 15:4, UBS; 26:20, UBS.

Jekdo̦o̦n ñe komiro ejjab errã ippãn doon ñe komiro ej kõnnaan, ak kwõj aikuj kwal̦o̦k wõt jouj. Keememej bwe kwõj aikuj kwal̦o̦k wõt yokwe im kautiej ñan eo pãleem̦. (Kolosse 4:6) M̦õkaj im kõm̦adm̦õde apañ eo im jab kõtl̦o̦k an wõnm̦aanl̦o̦k wõt. Ejjab jim̦we ñe komiro ejjab kõnnaan ñan doon im ñe ejako amiro el̦l̦o̦k ñan doon.​—Epesõs 4:26, UBS.

MEN KO KWÕMAROÑ KÕM̦M̦ANI:

• Karõke juon iien me enaaj em̦m̦an ñan amiro kõnnaan kõn apañ eo

• Ñe eo pãleem̦ ej kõnnaan, kwõn roñjake wõt im jab ko̦kkure ak pukwõje an kõnnaan. Ñe em̦õj an kõnnaan, kwõmaroñ kiiõ kwal̦o̦k l̦õmn̦ak ko am̦

EKKAR ÑAN BAIBÕL̦: “Kom̦win kanooj yokwe doon . . . im kom̦win kwal̦o̦k ami m̦õn̦õn̦õ in kautiej doon.” (Rom 12:10, UBS) Elukkuun aorõk bwe kwõn lukkuun roñjake ñe eo pãleem̦ ej kõnnaan. Kwõn kõttãik bũruom̦ im kate eok bwe kwõn mel̦el̦e kõn l̦õmn̦ak ko an. (1 Piter 3:8, UBS; Jemes 1:19) Kwõn jab riab in roñjake. El̦aññe ewõr men en̦ kwõj kõm̦m̦ane, kwõn bõjrak im lukkuun roñjake an eo pãleem̦ kõnnaan. El̦aññe kwõlukkuun poub im ejjab em̦m̦an iien eo ñan kõnnaan, kwõn kajjitõk ippãn ñe komiro maroñ kõnnaan kake men eo bar juon iien. Kwõj aikuj watõke eo pãleem̦ ãinwõt juon eo me kwõlukkuun epaake im yokwe im jab ãinwõt juon eo me ej kajjioñ jum̦aik eok. Ilo wãween in, ñe komiro ej kõnnaan ippãn doon, eban m̦õkaj am̦ illu.​—Ekklisiastis 7:9.

MEN KO KWÕMAROÑ KÕM̦M̦ANI:

• Roñjake ta ko eo pãleem̦ ej ba im m̦õn̦õn̦õ in kõm̦m̦an oktak, jekdo̦o̦n ñe kwõjjab errã ippãn

• Jab baj roñjake wõt ta ko eo pãleem̦ ej ba. Kwõn bar lale turin mejãn, men ko ej kõm̦m̦ani ñe ej kõnnaan, im joñan ainikien. Men kein rej bar kaalikkar kõn ta l̦õmn̦ak im eñjake ko an eo pãleem̦

EKKAR ÑAN BAIBÕL̦: “Kwõn jerbal im enaaj pol̦õmãn am̦ mour, ak el̦aññe kwõj jijet im kõnono kõjak wõt, innem kwõnaaj jeram̦õl.” (Jabõn Kõnnaan 14:23, UBS) Ejabwe ñan amiro baj kõnnaan wõt im errã kõn wãween amiro naaj kõm̦adm̦õde apañ eo. Komiro ej aikuj l̦oore men eo komiro kar pepe kake. Emaroñ bõk iien im emaroñ pen, bõtab ñe komiro naaj kate wõt komiro, enaaj em̦m̦anl̦o̦k pãd n̦e amiro. (Jabõn Kõnnaan 10:4, UBS) Komiro naaj lo tõprak ñe komiro naaj jipañ doon ñan kõm̦adm̦õde jabdewõt apañ ko komiro ej iiooni.​—Ekklisiastis 4:9, UBS.

MEN KO KWÕMAROÑ KÕM̦M̦ANI:

• Pepe ippãn doon kõn ta ko komiro jim̦or naaj kõm̦m̦ani ñan kõm̦adm̦õde apañ eo

• Aolep iien komiro en lale el̦aññe em̦m̦anl̦o̦k men otemjej ak ñe ebar wõr men en̦ komiro ej aikuj kõm̦m̦ane ñan kõm̦adm̦õde apañ eo