Ãinwõt am̦ kar katak ilo bok in, elukkuun lõñ naan in kakapilõk ko ilo Baibõl̦ me remaroñ jipañ eok im baam̦le n̦e am̦. Jeova ekõn̦aan bwe kwõn m̦õn̦õn̦õ. Im ej kallim̦ur bwe ñe kwõnaaj kõm̦m̦an bwe am̦ kabuñ ñane en men eo eaorõktata ippam̦, enaaj jipañ eok ilo men otemjej kwõj kõm̦m̦ani. (Matu 6:33) Jeova elukkuun kõn̦aan bwe kwõn epaake E. Kõn men in, kwõn kate eok joñan wõt am̦ maroñ bwe en l̦apl̦o̦k am̦ jel̦ã kajjien im epaake. Juon iaan jeraam̦m̦an ko rel̦l̦aptata me kõj armej jemaroñ bõki ej ñe jej epaake Anij.​—Matu 22:37, 38.

EKKAR ÑAN BAIBÕL̦: Jeova ej ba: “Inaaj Jememi, im kom̦ naaj ro nejũ m̦aan im kõrã.” (2 Korint 6:18) Anij ekõn̦aan bwe kwõn lukkuun epaake E. Juon iaan men ko remaroñ jipañ eok ñan epaakel̦o̦k Anij ej ilo am̦ jar ñane. Jeova ekõn̦aan bwe kwõn ‘jar ñane iien otemjej.’ (1 Tessalonika 5:17, UBS) Elukkuun kijooror in roñjake am̦ kwal̦o̦k l̦õmn̦ak im eñjake ko am̦ ñane. (Pilippai 4:6) Ñe kwõj jar ippãn eo pãleem̦ im ajri ran̦e nejũm̦, renaaj kile bwe el̦ap am̦ tõmak im lõke Anij.

Ejabwe ñan baj jar wõt ñan Anij. Kwõj aikuj bar roñjake E. Juon wãween kwõj roñjake Anij ej ilo am̦ katak Baibõl̦ im bok ko jet me rej pedped wõt ioon Baibõl̦. (Sam 1:1, 2, UBS) Im kwõj aikuj kõl̦mãnl̦o̦kjen̦ kõn men ko kwõj katak kaki. (Sam 77:11, 12, UBS) Bar juon wãween kwõmaroñ roñjake Anij ej ilo am̦ pãd ilo iien kweilo̦k ko an Ri Kõnnaan ro an Jeova.​—Sam 122:1-4.

Juon iaan men ko remaroñ jipañ eok ñan epaakel̦o̦k wõt Jeova ej ilo am̦ bwebwenato kõn E ñan ro jet. El̦aññe eokkutkut am̦ kõm̦m̦ane men in, kwõnaaj kile am̦ epaakel̦o̦k wõt E.​—Matu 28:19, 20.

MEN KO KWÕMAROÑ KÕM̦M̦ANI:

• Kwõn kõm̦m̦an iien am̦ jar im riit Baibõl̦ kajjojo raan

• Eaorõk ñan kõm̦m̦ani men ko relimo im kõm̦m̦an iien ñan ami kakkije. Bõtab, men kein ren jab aorõkl̦o̦k jãn men ko me baam̦le n̦e am̦ ej aikuj kõm̦m̦ani ilo ami karejar ñan Anij

EKKAR ÑAN BAIBÕL̦: “Kom̦win ruwaakl̦o̦k ñan Anij, im enaaj ruwaakwaj ñan kom̦.” (Jemes 4:8) Kwõj aikuj kõm̦m̦an an baam̦le n̦e am̦ iien ñan katak Baibõl̦ kajjojo wiik im kate eok ñan kajejjete. (Jenesis 18:19, UBS) Bareinwõt, kwõj aikuj kaalikkar ilo kõm̦m̦an ko am̦ kajjojo raan bwe kwõj yokwe Anij. Kwõn bwebwenato kõn Anij ñan eo pãleem̦ im ajri ran̦e nejũm̦ “ñe kwõj etetal ilo ial̦, im ñe kwõj babu, im ñe kwõj jerkak.” Mel̦el̦ein men in bwe kwõj aikuj ekkeini am̦ kõnnaan kõn Anij ñan er bwe ren maroñ epaakel̦o̦k wõt E. (Duteronomi 6:6, 7) Kwõn kate eok bwe kwõn ãinwõt Joshua, eo me ear ba bwe e kab baam̦le eo an renaaj “jerbal ñan Jeova.”​—Joshua 24:15. *

MEN KO KWÕMAROÑ KÕM̦M̦ANI:

• Kwõn kõm̦m̦an an baam̦le n̦e am̦ iien ñan katak Baibõl̦ im kwõn kate eok ñan kajejjete. Kããlõt katak ko me rekkar ñan aikuj ko an kajjojo iaan ro ilo baam̦le n̦e am̦