Jeova ekõn̦aan bwe kwõn jel̦ãl̦o̦k kajjien. Etke? Kõnke ej kõjatdikdik bwe ñe kwõnaaj kal̦apl̦o̦k am̦ jel̦ã kõn kadkad ko an, kõm̦m̦an ko an, im ankilaan, enaaj l̦apl̦o̦k am̦ kõn̦aan jem̦jerãiki. Kwõmaroñ ke lukkuun jem̦jerãik Anij? (Riit Sam 25:​14, UBS.) Ta eo kwõmaroñ kõm̦m̦ane bwe kwõn erom jeran? Baibõl̦ eo ej uwaake kajjitõk kein, im ej bar kaalikkar etke ad jem̦jerãik Jeova ej jem̦jerã eo eaorõktata.

1. Ta eo Jeova ej kũrtok eok ñan kõm̦m̦ane?

“Kom̦win kõm̦m̦an bwe kom̦win epaake Anij, im enaaj epaake waj kom̦.” (Jemes 4:8) Ta mel̦el̦ein men in? Jeova ej kũrtok eok bwe kwõn erom jeran. Emaroñ pen ñan an jet tõmak bwe remaroñ jem̦jerãik Anij kõnke rejjab maroñ loe. Ijoke, ilo Baibõl̦ eo, Jeova ej kwal̦o̦k aolep men ko jej aikuj in jel̦ã kõn e bwe jen maroñ ruwaakl̦o̦k ñane. Ñe jej riiti ennaan eo an Anij ñan kõj ilo Baibõl̦ eo, jem̦jerã eo ad Ippãn ej eddekl̦o̦k meñe jejjab loe.

2. Etke Jeova ej eo em̦m̦antata kwõmaroñ jem̦jerãiki?

Ejjel̦o̦k en̦ el̦apl̦o̦k an yokwe eok jãn Jeova. Ekõn̦aan bwe kwõn m̦õn̦õn̦õ im bwe kwõn reilo̦k ñane jabdewõt iien kwõj aikuj jipañ. Kwõmaroñ ‘likũt ippãn aolepen men ko kwõj eddodo kaki, kõnke ej kaorõk eok.’ (1 Piter 5:7) Aolep iien Jeova ej pojakin jipañ, kaenõm̦m̦an, im roñjake ro jeran.​—Riit Sam 94:18, 19.

3. Ta ko Jeova ej kõtmãne jãn ro jeran?

Jeova ej yokwe aolep armej, ijoke ‘Ej jerãik ro rewãnõk.’ (Jabõn Kõnnaan 3:32) Jeova ej kõtmãne bwe ro jeran ren kate er ñan kõm̦m̦ani men ko ej watõk bwe rem̦m̦an im jab kõm̦m̦ani men ko ej watõk bwe renana. Bõtab jet armej rej eñjake bwe rejjab maroñ mour ekkar ñan aolep kien ko an Jeova ikijjeen ta eo em̦m̦an im enana. Ijoke, Jeova ej juon eo me el̦ap an tũriam̦o. Ej buñbũruon kõn ro rej m̦ool ilo aer yokwe E im rej kate er joñan wõt aer maroñ ñan kabuñbũruon.​—Sam 147:11; Jerbal 10:34, 35.

 KAM̦WILAL̦L̦O̦K AM̦ MEL̦EL̦E

4.Ebream ear jerãik Jeova

Bwebwenato eo kõn Ebream ilo Baibõl̦ (ãt eo juon, Ebram) ej letok jidik mel̦el̦e ñan kõj kõn ta mel̦el̦ein ñan jem̦jerãik Anij. Riiti bwebwenato eo kõn Ebream ilo Jenesis 12:1-4. Innem bwebwenato kake kajjitõk kein:

• Ta eo Jeova ear kajjitõk bwe Ebream en kõm̦m̦ane?

• Ta eo Jeova ear kallim̦uri Ebream kake?

• Ewi wãween an kar Ebream em̦m̦akũt ñan naanin tõl ko an Jeova?

5. Men ko Jeova ej kajjitõk jãn ro jeran

Ekkã ad kõtmãne jet men ko jãn ro jerad.

• Ta jet iaan men ko kokõn̦aan bwe ro jeram̦ ren kõm̦m̦ane ñan kwe?

Riit 1 Jon 5:3, innem bwebwenato kake kajjitõk in:

• Ta eo Jeova ej kõtmãne jãn ro jeran?

Bwe jen maroñ pokake Jeova, jemaroñ aikuj kõm̦m̦an oktak ko ilo m̦antid ak kadkad ko ippãd. Riit Aiseia 48:17, 18, innem bwebwenato kake kajjitõk in:

• Etke Jeova ej kajjitõk bwe ro jeran ren kõm̦m̦an oktak ko?

 6. Men ko Jeova ej kõm̦m̦ani ñan ro jeran

 TARLEP IN KATAK EO ILO TUKADU

Jeova ekõn̦aan jem̦jerãik kwe, im enaaj jipañ eok ñan am̦ ruwaakl̦o̦k ñane.

Ãlij

• Ewi wãween an Jeova jipañ ro jeran?

• Etke Jeova ej jiroñ ro jeran ñan kõm̦m̦an oktak ko?

• Kwõl̦ak lale etarjen joñan ke men ko Jeova ej kõtmãne jãn ro jeran? Etke kwõj ba men in?