KATAK 16
Ta eo Jesus Ear Kõm̦m̦ane ke Ear Pãd Ijin Ioon Lal̦?
Elõñ armej rej l̦õmn̦ak kõn Jesus ãinwõt juon niñniñ, juon ri-kanaan emãlõtlõt, ak juon em̦m̦aan me ear eñtaan im mej. Bõtab jemaroñ ke kal̦apl̦o̦k ad jel̦ã kõn e ilo ad etale ta ko ear kõm̦m̦ani ke ear pãd ijin ioon lal̦? Ilo katak in, jenaaj etale jet iaan men ko raorõk Jesus ear kõm̦m̦ani im wãween aer maroñ jelõt eok.
1. Ta jerbal eo eaorõktata Jesus ear kõm̦m̦ane?
Jerbal eo eaorõktata an Jesus, ej an kar “kwal̦o̦k kõn ennaan eo em̦m̦an kõn Aelõñ eo an Anij.” (Riit Luk 4:43.) Ear kwal̦o̦k kõn juon ennaan em̦m̦an bwe Anij enaaj kajutak juon aelõñ ak kien me enaaj n̦amejal̦an aolep apañ ko an armej. a Jesus ear lukkuun kate joñan wõt an maroñ ñan kwal̦o̦k kõn ennaan in em̦m̦an ium̦win jilu jimattan iiõ.—Matu 9:35.
2. Ta unleplepin an kar Jesus kõm̦m̦ani menin kabwilõñlõñ ko?
Baibõl̦ eo ej kwal̦o̦k kõn elõñ “jerbal ko rel̦l̦ap im menin kabwilõñlõñ ko im kõkal̦l̦e ko” Anij ear kõm̦m̦ani ikijjeen Jesus. (Jerbal 2:22) Ikijjeen kajoor eo an Anij, ear wõr an Jesus maroñ ioon mejatoto, ear naajdik elõñ to̦ujin armej ro, kõmour ro renañinmej, im ear kõjerkakpejeik ro rar mej. (Matu 8:23-27; 14:15-21; Mark 6:56; Luk 7:11-17) Menin kabwilõñlõñ ko Jesus ear kõm̦m̦ani rar kaalikkar bwe Anij ear jilkintok e. Rar bareinwõt kwal̦o̦k bwe ewõr an Jeova maroñ im kajoor ñan n̦amejal̦an aolep apañ ko ad.
3. Ta eo jemaroñ katak jãn wãween an kar Jesus mour?
Jesus ear pokake Jeova ilo aolep wãween ko ear iiooni. (Riit Jon 8:29.) Meñe Jesus ear iioon jum̦ae, ak ear tiljek wõt im pokake aolep men ko Jemãn ear ba m̦ae iien eo ear mej. Ear kam̦ool bwe ewõr an armej maroñ ñan wõnm̦aanl̦o̦k wõt im karejar ñan Anij meñe rej iioon wãween ko reppen. Kõn men in, Jesus ear likũt “juon joñak ñan [kõj] bwe [jen] kanooj anõke jenkwan neen.”—1 Piter 2:21.
KAM̦WILAL̦L̦O̦K AM̦ MEL̦EL̦E
Lale wãween an kar Jesus kwal̦o̦k kõn ennaan eo em̦m̦an im kõm̦m̦ani menin kabwilõñlõñ ko.
4. Jesus ear kwal̦o̦k kõn ennaan eo em̦m̦an
Jesus ear etetal ium̦win elõñ bukwi m̦ail̦ ko ilo ial̦ ko el̦ap bũñal ie bwe en kwal̦o̦k kõn ennaan eo em̦m̦an ñan aolep armej ro joñan wõt an maroñ. Riit Luk 8:1, innem bwebwenato kake kajjitõk kein:
-
Jesus ear ke kwal̦o̦k naan ñan armej ro wõt me rar kepaake im roñjake e?
-
Ewi wãween an kar Jesus kate ñan pukot armej ro?
Anij ear kanaan bwe Messaia eo enaaj kwal̦o̦k kõn ennaan eo em̦m̦an. Riit Aiseia 61:1, 2, innem bwebwenato kake kajjitõk kein:
-
Ewi wãween an kar Jesus kajejjet kũtien kanaan in?
-
Kwõl̦ak lale armej ro rainin rej aikuj ke eo̦roñ ennaan in em̦m̦an?
5. Jesus ear kwal̦o̦k kõn katak ko raorõk
Kobal̦o̦k ippãn an kar kwal̦o̦k kõn ennaan eo em̦m̦an kõn Aelõñ eo an Anij, Jesus ear katakin armej ro kõn men ko remaroñ jipañ er ilo mour ko aer kajjojo raan. L̦õmn̦ak kõn jet iaan waanjoñak ko ilo Katak eo an Ioon Tol̦ Eo me elõñ armej rejel̦ã kake. Riit Matu 6:14, 34 im 7:12, innem bwebwenato kake kajjitõk kein:
-
Ta naanin tõl ko Jesus ear kwal̦o̦ki ilo eoon kein?
-
Kwõl̦ak lale naanin tõl kein remaroñ ke jipañ wõt armej rainin?
6. Jesus ear kõm̦m̦ani menin kabwilõñlõñ ko
Jeova ear lel̦o̦k kajoor ñan Jesus bwe en maroñ kõm̦m̦an elõñ menin kabwilõñlõñ ko. Ñan lale juon waanjoñak, riit Mark 5:25-34 ak kõjo̦e PIJAIN ALWÕJ eo. Innem bwebwenato kake kajjitõk kein:
-
Ilo pijain alwõj eo, ta eo kõrã eo enañinmej ear lukkuun tõmake?
-
Ta eo em̦m̦an ippam̦ kõn menin kabwilõñlõñ in?
Riit Jon 5:36, innem bwebwenato kake kajjitõk in:
-
Menin kabwilõñlõñ ko Jesus ear kõm̦m̦ani rej “kam̦ool” ta kõn e?
Kwaar jel̦ã ke?
Elõñ iaan men ko jejel̦ã kõn Jesus rej itok jãn emãn iaan bok ko ilo Baibõl̦ etan Gospel ko—Matu, Mark, Luk, im Jon. Kajjojo iaan ri-jeje Gospel ro rar kwal̦o̦k kõn kõmel̦el̦e ko reoktak jãn doon kõn Jesus. Aolep kõmel̦el̦e kein rej jipañ kõj ñan ad maroñ pijaikl̦o̦k im mel̦el̦e kõn mour eo an Jesus.
-
MATU
ear je bokin Gospel eo an m̦oktata. El̦ap an kwal̦o̦k kõn katak ko an Jesus, el̦aptata men ko Jesus ear katakin kõn Aelõñ eo an Anij.
-
MARK
ear je Gospel eo ekadutata. El̦ap an kwal̦o̦k kõn men ko rekãitoktoklimo rar wal̦o̦k.
-
LUK
ej eo me el̦ap an kar kaalikkar kõn aorõkin jar im kõn wãween an Jesus kar kõm̦m̦an ñan kõrã ro.
-
JON
el̦ap an kõnono kõn kain armej rot Jesus ilo an kwal̦o̦k kõn elõñ iaan men ko Jesus ear bwebwenato kaki ippãn ro jeran im ro jet.
JET ARMEJ REJ BA: “Jesus ej Anij eo Ekajoor Bõtata.”
-
Ta am̦ l̦õmn̦ak?
TARLEP IN KATAK EO ILO TUKADU
Jesus ear kwal̦o̦k naan kõn Aelõñ eo an Anij, kõm̦m̦ani menin kabwilõñlõñ ko, im ear pokake Jeova ilo aolep wãween ko ear iiooni.
Ãlij
-
Ta jerbal eo eaorõktata Jesus ear kõm̦m̦ane ke ear pãd ijin ioon lal̦?
-
Menin kabwilõñlõñ ko Jesus ear kõm̦m̦ani rej kam̦ool ta?
-
Ta ko Jesus ear katakin me emaroñ jipañ armej ro ilo mour ko aer kajjojo raan?
KAL̦APL̦O̦K AM̦ MEL̦EL̦E
Ta eo el̦aptata an kar Jesus kõnono kake?
“Unin An Aelõñ Eo An Anij—Aorõk Ippãn Jijej” (Naan in Keeañ, Oktoba 1, 2014)
Lale etke jemaroñ tõmak bwe menin kabwilõñlõñ ko an Jesus rar lukkuun wal̦o̦k.
“Men In Bwilõñ Ko An Jesus Ta Eo Kwomaroñ Katak Jeni?” (Imõniaroñroñ, November 1, 2004)
Riit im lale ewi wãween an kar joñak eo an Jesus kõn an kar kaarmejjeteik e make, jipañe juon em̦m̦aan.
“My Life Was All About Me” (The Watchtower, October 1, 2014)
Lale laajrakin men ko rel̦l̦ap Jesus ear kõm̦m̦ani jãn jinoin jerbalin kwal̦o̦k naan eo an l̦o̦k ñan jem̦l̦o̦kin.
“Men ko Rar Wal̦o̦k ke Jijej Ear Mour Ioon Lal̦” (Kein Jipañ ñan Katak Naanin Anij, Katak 4B-4H)
a Katak 31-33 enaaj l̦apl̦o̦k an kõmel̦el̦e kõn Aelõñ eo an Anij.
