KATAK 37
Men eo Baibõl̦ Ej Ba kõn Jerbal im Jããn
Kwõnañin ke kar eddodo kõn am̦ inepata kõn jerbal im jããn? Emaroñ jab pidodo ñan kabwe aikuj ko ad im ñan bareinwõt kabuñ ñan Jeova ilo wãween eo ej tõllo̦kũn ñan ad kabuñ ñane. Baibõl̦ eo ej letok naanin kakapilõklõk ko remaroñ jipañ kõj.
1. Ta eo Baibõl̦ ej ba kõn jerbal?
Anij ekõn̦aan bwe jen m̦õn̦õn̦õ kõn jerbal ko ad. Baibõl̦ ej ba bwe “ejjel̦o̦k men em̦m̦an ñan juon armej jãn an . . . m̦õn̦õn̦õ kõn em̦m̦an ilo jerbal eo an.” (Ekklisiastis 2:24) Jeova ej juon eo ej niknik ilo an jerbal. Ñe jej anõke e ilo ad niknik ilo ad jerbal, jej kabuñbũruon im ejubũruod.
Jerbal ej juon men eaorõk. Bõtab jejjab aikuj kõtl̦o̦k bwe en aorõkl̦o̦k jãn ad kabuñ ñan Jeova. (Jon 6:27) Jeova ej kallim̦ur bwe ñe jej likũt e m̦oktata, enaaj kabwe aikuj ko ad.
2. Ta l̦õmn̦ak eo epel̦an im jim̦we kõn jããn?
Meñe Baibõl̦ ej kwal̦o̦k bwe jããn ej juon menin kõjparok, ak ej bar kakkõl kõj bwe jããn ejjab maroñ kam̦õn̦õn̦õik kõj. (Ekklisiastis 7:12) Eñin unin em̦õj rõjañ kõj ñan jab yokwe jããn ak bwe jen “jokwane kõn men ko ewõr [ippãd].” (Riit Hibru 13:5.) Ñe jej jokwane wõt kõn men ko ewõr ippãd, jej karõl̦o̦k kõj jãn ad inepata kõnke jekõn̦aan bwe en lõñl̦o̦k men ko ippãd. Jej kõjparok kõj jãn m̦uri. (Jabõn Kõnnaan 22:7) Im jej kõjparok kõj jãn menin kauwõtata ko rej itok jãn gamble im jãn ad po ilo ad pukot wãween ko rem̦õkajtata ñan kõm̦m̦an jããn ak edik ad jerbal.
3. Ewi wãween jemaroñ kwal̦o̦k jouj ikijjeen jããn ko ad?
Jeova ej juon Anij ejouj im em̦õn̦õn̦õ in lel̦o̦k, im jej anõke e ñe jej “jouj, im pojakin jipañ ro jet.” (1 Timote 6:18) Jemaroñ kwal̦o̦k ad jouj im m̦õn̦õn̦õ in kõjerbal jããn ko ad ilo ad rejetake eklejia eo im ilo ad jipañ ro rej pãd ilo aikuj, el̦aptata rũttõmak ro m̦õttad. Men eo el̦aptata an Jeova itoklimo kake ej unin ad lel̦o̦k, ejjab joñan eo jej lel̦o̦k. Ñe jej lel̦o̦k jãn bũruod, jenaaj m̦õn̦õn̦õ im jenaaj kabuñbũruon Jeova.—Riit Jerbal 20:35.
KAM̦WILAL̦L̦O̦K AM̦ MEL̦EL̦E
Lale tokjãn ko rej wal̦o̦k jãn ad bõk l̦õmn̦ak eo ejim̦we kõn jerbal im ad jokwane kõn men ko ewõr ippãd.
4. Nõbar Jeova ikijjeen wãween am̦ jerbal
Jem̦jerã eo ad ippãn Jeova ej aikuj in jelõt wãween ad watõk jerbal. Kõjo̦e PIJAIN ALWÕJ eo, innem bwebwenato kake kajjitõk kein:
-
Ilo pijain alwõj eo, ta eo em̦m̦an ippam̦ kõn wãween an kar Jason l̦õmn̦ak im kõm̦m̦an ilo jikin jerbal eo an?
-
Ta eo ear kõm̦m̦ane bwe en jab kaorõkl̦o̦k jerbal eo an jãn men ko raorõkl̦o̦k?
Riit Kolosse 3:23, 24, innem bwebwenato kake kajjitõk in:
-
Etke eaorõk wãween ad watõke jerbal?
Eaorõk jerbal. Ak jejjab aikuj in kõtl̦o̦k bwe en aorõkl̦o̦k jãn ad kabuñ ñan Jeova
5. Ad jokwane kõn men ko ewõr ippãd ewõr tokjãn ñan kõj
Elõñ armej rej kajjioñ kallõñlõñ aer jããn joñan wõt aer maroñ. Bõtab eoktak ta eo Baibõl̦ ej rõjañ kõj ñan kõm̦m̦ane. Riit 1 Timote 6:6-8, innem bwebwenato kake kajjitõk in:
-
Ta eo Baibõl̦ ej rõjañ kõj ñan kõm̦m̦ane?
Meñe emaroñ lukkuun dik men ko ippãd, ak jemaroñ m̦õn̦õn̦õ. Kõjo̦e PIJAIN ALWÕJ eo, innem bwebwenato kake kajjitõk in:
-
Meñe emaroñ jidik wõt aer jããn, ak ta eo ej kõm̦m̦an bwe baam̦le kein ren m̦õn̦õn̦õ?
Bõtab ta el̦aññe elõñ men ko ippãd ak jekõn̦aan bwe en lõñl̦o̦k wõt? Jesus ear kwal̦o̦k juon waanjoñak me ej kwal̦o̦k joñan an kauwõtata l̦õmn̦ak rot in. Riit Luk 12:15-21, innem bwebwenato kake kajjitõk in:
-
Ta eo kwõj katak jãn waanjoñak eo Jesus ear kwal̦o̦ke?—Lale eoon 15.
Riit im keidi Jabõn Kõnnaan 10:22 im 1 Timote 6:10. Innem bwebwenato kake kajjitõk kein:
-
Kwõl̦ak lale ta eo eaorõkl̦o̦k? Ad jem̦jerãiki Jeova ke ak ad koorl̦o̦k jããn? Etke kwõj ba men in?
-
Ta apañ ko rej wal̦o̦k itok jãn ad lukkuun kate kõj koorl̦o̦k jããn?
6. Jeova enaaj kabwe aikuj ko ad
Apañ ko ikijjeen jerbal im jããn remaroñ lukkuun mãlejjoñe tõmak eo ad ilo Jeova. Kõjo̦e PIJAIN ALWÕJ eo ñan lale ta eo jemaroñ kõm̦m̦ane ñe jej iioon men kein me rej mãlejjoñe tõmak eo ad, innem bwebwenato kake kajjitõk kein:
-
Ilo pijain alwõj eo, ta mãlejjoñ ko em̦m̦aan eo jeid im jatid ear iiooni?
-
Ta ko ear kõm̦m̦ani ñan kõm̦adm̦õde mãlejjoñ kein ear iiooni?
Riit Matu 6:25-34, innem bwebwenato kake kajjitõk in:
-
Ta eo Jeova ej kallim̦ur in kõm̦m̦ane ñan ro rej likũt e m̦oktata?
JET ARMEJ REJ BA: “Ij aikuj buul̦ kate eõ ñan jerbal bwe in maroñ kabwe aikuj ko an baam̦le eo aõ. Ijjab maroñ etal ñan kweilo̦k ko kajjojo wiik.”
-
Eoon ta eo ej kam̦ool ñan eok bwe am̦ likũt am̦ kabuñ eo ñan Jeova m̦oktata, ej aolep iien pepe eo em̦m̦antata?
TARLEP IN KATAK EO ILO TUKADU
Jerbal im jããn rej menin aikuj, ak ren jab kõm̦ad kõj jãn ad karejar ñan Jeova.
Ãlij
-
Ta eo emaroñ jipañ eok ñan bõk l̦õmn̦ak eo epel̦an im jim̦we kõn jerbal?
-
Ñe kwõj jokwane kõn men ko ewõr ippam̦, ewi wãween an men in jipañ eok?
-
Ewi wãween kwõmaroñ kwal̦o̦k am̦ lõke kallim̦ur eo an Jeova ñan kabwe aikuj ko an armej ro an?
KAL̦APL̦O̦K AM̦ MEL̦EL̦E
Etale im lale el̦aññe Baibõl̦ eo ej ba bwe enana jããn.
Katak kõn ewi wãween jemaroñ kõjerbal men ko ippãd ñan kabuñbũruon Anij.
“What Does the Bible Say About Giving?” (Katak eo ilo online)
Ewõr ke jorrããn ñe jej gamble?
Lale ta eo ear kõm̦akũt juon eo el̦ap an kar gamble im ko̦o̦t ñan ukote mour eo an.
“I Was Passionate About Racehorses” (The Watchtower, November 1, 2011)
