Ilo jet m̦anit, armej rej tõmak bwe juon armej ejjab maroñ m̦õn̦õn̦õ el̦aññe ejjab m̦are. Ijoke ejjab aolep armej ro me em̦õj aer m̦are rej m̦õn̦õn̦õ. Bareinwõt, ejjab aolep ro ejjel̦o̦k rejetaer rejjab m̦õn̦õn̦õ. Ilo m̦ool Baibõl̦ ej ba bwe an juon ejjel̦o̦k rejetan im an juon m̦õj an m̦are, men kein jim̦or rej menin letok jãn Jeova.

1. Ta jet iaan tokjãn ko ñe ejjel̦o̦k rejetan juon armej?

Baibõl̦ ej ba: “eo ej m̦are, enaaj l̦ap an jeraam̦m̦an. Bõtab, eo ejjab m̦are, enaaj l̦apl̦o̦k an jeraam̦m̦an.” (Riit 1 Korint 7:32, 33, 38.) Ilo wãween et juon eo ejjañin m̦are emaroñ “l̦apl̦o̦k an jeraam̦m̦an”? Kũrjin ro rejjañin m̦are rejjab aikuj lale aikuj ko an juon rejetaer. Kõn men in, elõñl̦o̦k aer maroñ ñan anemkwõj. Ñan waanjoñak, jet remaroñ kal̦apl̦o̦k ijo kun̦aaer ilo jerbalin kwal̦o̦k naan ilo elõñ wãween ko rem̦m̦an, ãinwõt aer maroñ ito-itak ñan bar juon aelõñ bwe ren kwal̦o̦k naan kõn ennaan eo em̦m̦an. Men eo el̦aptata ej bwe remaroñ jol̦o̦k el̦apl̦o̦k iien ñan aer epaakel̦o̦k Jeova.

2. Ta jet iaan tokjãn ko rej wal̦o̦k itok jãn an juon m̦are ekkar ñan kien?

Mourin m̦are, ãinwõt mour eo an juon eo ejjel̦o̦k rejetan, ej bõktok tokjãn ko rejejuwaan. Baibõl̦ ej ba bwe “ruo rem̦m̦anl̦o̦k jãn juon.” (Ekklisiastis 4:9) El̦aptata an m̦ool men in kõn Kũrjin ro rej jerbali naanin kakapilõklõk ko jãn Baibõl̦ ilo mourin m̦are eo aerro. Rippãlele ro me rej kõm̦m̦an aer peba in m̦are rej kõm̦m̦an kallim̦ur ñan yokwe, kautiej, im kaorõke doon. Tokjãn aer ãindein, ekkã an l̦apl̦o̦k aer eñjake aer jokwane jãn armej ro rej baj jokwe wõt ippãn doon ak rejjañin m̦are. Im m̦are ej letok juon pedped epen ñan ejaake juon baam̦le.

3. Ewi wãween an Jeova watõk mourin m̦are?

Ke Jeova ear kõm̦m̦ane kõm̦are eo jinointata, ear ba: “L̦eo enaaj likũt jemãn im jinen, im eddãp n̦a ippãn lio pãleen.” (Jenesis 2:24) Jeova ekõn̦aan bwe juon em̦m̦aan im juon kõrã me em̦õj aerro m̦are ren yokwe doon im eddãp wõt ñan doon toon wõt aerro mour. Un eo wõt unin an Jeova kamãlim an ruo rippãlele jepel ej ñe juon iaaer ej lejãn ak l̦õñ. Ñe ej wal̦o̦k men in, Jeova ej lel̦o̦k jim̦we im maroñ eo ñan eo ear jab l̦õñ ñan kããlõt el̦aññe enaaj jepel jãn eo pãleen. a (Matu 19:9) Jeova ejjab kõtl̦o̦k bwe en lõñl̦o̦k jãn juon pãleen Kũrjin ro.​—1 Timote 3:2.

 KAM̦WILAL̦L̦O̦K AM̦ MEL̦EL̦E

5. Kããlõt eo pãleem̦ ilo mãlõtlõt

Am̦ kããlõt wõn eo kwõnaaj m̦areiki ej juon iaan pepe ko raorõktata ilo mour eo am̦. Riit Matu 19:4-6, 9, innem bwebwenato kake kajjitõk in:

• Etke juon Kũrjin ejjab aikuj m̦õkaj in m̦are?

Baibõl̦ eo emaroñ jipañ eok jel̦ã kadkad ta ko rem̦m̦an me rej kõm̦m̦an bwe juon armej en juon eo em̦m̦an ñan m̦areiki. Men eo aorõktata, pukot juon eo ej yokwe Jeova. b Riit 1 Korint 7:39 im 2 Korint 6:14. Innem bwebwenato kake kajjitõk kein:

• Etke jej aikuj m̦areiki Kũrjin ro m̦õttad wõt?

• Kwõl̦ak lale en kar ewi wãween an Jeova eñjake ñe jen kar kããlõt in m̦areiki juon eo ejjab yokwe E?

 6. Watõk mourin m̦are ãinwõt an Jeova watõke

Ilo Israel eo etto, jet em̦m̦aan rar jepel ak kõm̦m̦an aer peba in jepel jãn lim̦aro pãleer kõn un ko rekũbbon̦. Riit Malakai 2:13, 14, 16, innem bwebwenato kake kajjitõk in:

• Etke Jeova edike ñe rippãlele ro rej jepel kõn un ko rekũbbon̦ im rejjab jim̦we?

Kõjo̦e PIJAIN ALWÕJ eo, innem bwebwenato kake kajjitõk in:

• El̦aññe eo pãleem̦ ejjab karejar ñan Jeova, ta ko kwõmaroñ kõm̦m̦ani ñan kõm̦m̦an bwe mourin m̦are eo amiro en lem̦õn̦õn̦õ?

7. Jerbale kien ko an Jeova ikijjeen mourin m̦are

 TARLEP IN KATAK EO ILO TUKADU

An juon ejjel̦o̦k rejetan im an juon m̦are, men kein jim̦or rej menin letok jãn Jeova. Wãween kein ruo remaroñ bõktok lañlõñ im jubõro el̦aññe jej mour ekkar ñan ankilaan Jeova.

Ãlij

• Ewi wãween an juon armej maroñ kortokjãn iien eo ejjel̦o̦k rejetan?

• Etke Baibõl̦ ej ba ñan m̦areik wõt juon eo ej m̦õttam̦ ilo tõmak?

• Ta un eo wõt me Baibõl̦ ej ba ej unin an ruo armej kõm̦m̦an aer peba in jepel?