‘Em̦m̦an kom̦win ro rej ri-katakin.’ (Hi. 5:12) Baj l̦õmn̦ak m̦õk kõn men in, Jeova ej ri-Kaki eo em̦m̦antata ijoko otemjej, im ej letok jeraam̦m̦an eo ñan ad katakin ro jet kõn e! Ñe jej katakin ro jet m̦ool eo kõn Jeova, bõlen ilo baam̦le eo ad, ilo eklejia eo, ak ilo jerbalin kwal̦o̦k naan, men in ej juon jeraam̦m̦an eaorõk im juon eddo el̦ap. Ak ta eo jej aikuj kõm̦m̦ane bwe jen lo tõprak?

Jemaroñ lo uwaak eo ilo naan ko an rijjilõk Paul ñan Timote ke ear ba bwe en wõnm̦aanl̦o̦k wõt im kate e ilo an riit ak “kõnono ilo bok, im kauwe, im katakin.” Ear bareinwõt ba: “Am̦ kõm̦m̦an ãindein, kwõnaaj make lo̦mo̦o̦ren eok, kab ro rej roñjake eok.” (1 Ti. 4:13, 16) Ennaan eo kwõj kwal̦o̦ke ej lo̦mo̦o̦ren armej. Kõn men in, eaorõk bwe kwõn kate eok ñan kakõm̦anm̦anl̦o̦k wãween am̦ riit im katakin. Eñin unin kar kõm̦m̦ane bok in bwe en maroñ jipañ eok ilo men in. Erkein ej jet iaan men ko repãd ilo bok in.

Jeova ej “ri-kaki eo eutiejtata.” (Job 36:22, UBS) Innem, meñe bok in enaaj jipañ eok ñan kakõm̦anm̦anl̦o̦k am̦ riit im katakin, bõtab jab mel̦o̦kl̦o̦k bwe ennaan eo jej kwal̦o̦k kake ej an Jeova im e eo ej karuwaaktok armej ro ñan ippãn. (Jon 6:44) Kõn men in, kwõn niknik ilo am̦ jar im kajjitõk kõn jetõb kwõjarjar eo an. Bareinwõt, kwõn kõjerbal Naanin Anij aolep iien. Jipañ armej ro ñan l̦õmn̦ak kõn Jeova im jab kwe. Kate eok ñan jipañ armej ro bwe en l̦apl̦o̦k aer yokwe Jeova jãn bũrueer.

Anij ear lewaj jeraam̦m̦an eo ñan am̦ katakin armej ro kõn ennaan eo ej make wõt aorõk me ear letok ñan kõj. Innem kõmij lukkuun lõke bwe ilo am̦ atartar ioon ‘kajoor eo Anij ej letoke,’ kwõnaaj lo tõprak.​—1 Pi. 4:11.

Ri-kwal̦o̦k ro m̦õttami,

Kumi eo Ej Lale Aolep Eklejia ko an Ri Kõnnaan ro an Jeova