1, 2. (1) Etke Hanna ear jab m̦õn̦õn̦õ ke ear kõppojakl̦o̦k im̦aan ñan tũreep eo aer? (2) Etke bwebwenatoun Hanna emaroñ jipañ eok?

 EL̦AP an Hanna poub in kõppojakl̦o̦k im̦aan ñan tũreep eo aer. Ej kate e bwe en jab l̦õmn̦ake apañ ko ej iiooni. Iien in ej juon iien ekam̦õn̦õn̦õ. Etke? Kõnke kajjojo iiõ, Elkena, l̦eo pãleen Hanna ekõn bõk aolepen baam̦le eo an bwe ren etal im kabuñ ilo im̦õn kõppãd eo ilo Shailo. Jeova ear kõn̦aan bwe iien kein ren jet iien ko rekam̦õn̦õn̦õ. (Riit Duteronomi 16:15.) Im ejjel̦o̦k pere bwe ke Hanna ear dik im rũttol̦o̦k, ear em̦m̦an ippãn iien kwõjkwõj kein im ekõn kar reim̦aanl̦o̦k in etal ñani. Bõtab kiiõ, Hanna ejjab lukkuun m̦õn̦õn̦õ. Ewõr men ko rej wal̦o̦k ñane im rej kõm̦m̦an an bũrom̦õj.

² Hanna ear lukkuun jeraam̦m̦an bwe l̦eo pãleen ear yokwe e. Bõtab, ear bar wõr juon pãleen Elkena. Etan kõrã eo ej Penina. Kõrã in el̦ap an kajoor kainepataik Hanna. Ejel̦ã ta eo en kõm̦m̦ane bwe en nana an Hanna mour ilo iien ko rej etal ñan Shailo im kabuñ. Ta ko Penina ekõn kõm̦m̦ani? Ewi wãween an kar tõmak eo an Hanna jipañe bwe en kijenmej wõt kõn apañ ko ear iiooni? Ñe kwõj iiooni apañ ko me rej kõm̦m̦an bwe en dikl̦o̦k am̦ m̦õn̦õn̦õ, bwebwenatoun Hanna emaroñ jipañ eok.

3, 4. Ta apañ ko ruo Hanna ear iiooni, im etke rar jet apañ ko rel̦l̦ap?

³ Baibõl̦ ej kwal̦o̦k kõn ruo apañ ko rel̦l̦ap Hanna ear iiooni ilo mour eo an. Apañ eo kein kajuon ej bwe ear bar wõr juon pãleen l̦eo ippãn, im kõrã in el̦ap an kar dike Hanna. Ear wõr an Hanna maroñ ñan kõm̦adm̦õd apañ in. Bõtab, ear ejjel̦o̦k an maroñ ñan kõm̦adm̦õd apañ eo kein  karuo. Ta apañ eo kein karuo? Apañ eo kein karuo ej bwe ear wõrañe. Aolep kõrã ro rej iioone wãween in rej bũrom̦õj, el̦aptata ñe relukkuun kõn̦aan bwe en wõr nejier. Bõtab, ilo tõre ko an Hanna, ñe juon kõrã ejjab maroñ neje, men in el̦apl̦o̦k an kar nana im kabũrom̦õjm̦õj. Etke? Kõnke rejjab kõn̦aan bwe en jako etan baam̦le ak bwij ko aer. Ear juon menin kajjookok ñe juon kõrã ejjab maroñ wõr nejin.

⁴ Emaroñ kar l̦ap an Hanna kate ñan kijenmej wõt kõn apañ eo ear iioone jãn Penina. Elõñ apañ ko rej wal̦o̦k ñe ej lõñl̦o̦k jãn juon pãleen juon armej. Ñan waanjoñak, ekkã an wal̦o̦k dike doon, jiãiik doon, im kõmetak bũruon doon. M̦anit in ñan pãleek elõñl̦o̦k jãn juon ear jab m̦õttan karõk eo an Anij kõn pãlele. (Jen. 2:24, UBS) Baibõl̦ ej kaalikkar bwe ejjab em̦m̦an ñan pãleek elõñl̦o̦k jãn juon. Apañ ko rar wal̦o̦k ilowaan baam̦le eo an Elkena rej kaalikkar bwe ejjab em̦m̦an m̦anit in.

5. Etke Penina ear kõn̦aan kõmetak bũruon Hanna, im ewi wãween an kar kõm̦m̦ane men in?

⁵ El̦apl̦o̦k an kar Elkena yokwe Hanna jãn Penina. Ekkar ñan bwebwenato ko an RiJu ro, rej ba bwe Elkena ear m̦areik Hanna m̦okta, im jet iiõ tokãlik ej kab m̦areik Penina. Jekdo̦o̦n ñe em̦ool men in ak jaab, jejel̦ã bwe Penina ear lukkuun ebbanbane Hanna. Im ear jel̦ã ta en kõm̦m̦ane ñan kainepataiki im kananaik an mour. Juon iaan men ko ekõn kainepataik Hanna kake ej kõn an jab maroñ wõr nejin. Kõn an kar lõñ nejin Penina, men in ear kõm̦m̦an an utiej bũruon im l̦õmn̦ak bwe el̦apl̦o̦k an aorõk jãn Hanna. Aolep iien ej wõr nejin, ej l̦apl̦o̦k wõt an utiej bũruon. Ke Hanna ear bũrom̦õj im inepata kõn an jab maroñ wõr nejin, Penina ear jab bũrom̦õj kake im kaenõm̦m̦ane. Ear kal̦apl̦o̦k wõt an Hanna bũrom̦õj im inepata ilo iien ko ejjab em̦m̦an an mour. Baibõl̦ ej ba bwe “ekõn kakũtõtõiki im kainepataiki Hanna.” (1 Sa. 1:6, UBS)  Penina ear lo tõprak ilo an jel̦ã ta en kõm̦m̦ane ñan kõmetak bũruon Hanna.

6, 7. (1) Meñe Elkena ear kajjioñ kaenõm̦m̦an Hanna, etke Hanna ear jab kwal̦o̦k aolep apañ ko rar wal̦o̦k? (2) Kõnke ejjab maroñ wõr nejin Hanna, mel̦el̦ein ke bwe Jeova ear jab buñbũruon ippãn? Kõmel̦el̦e. (Lale kõmel̦el̦e jidikdik eo.)

⁶ Iien eo el̦aptata an em̦m̦an ippãn Penina ñan kakũtõtõik Hanna ej ñe aolepen baam̦le eo ej etal im kabuñ ilo Shailo. Ilo iien kein rej etal im kabuñ, Elkena ej lel̦o̦k an ro uwaan baam̦le eo an kõj ak kein katok ñan Jeova. Kõnke ear lõñ nejin Penina, Elkena ear lel̦o̦k kõj eo an Penina im kõj ko an aolep ajri ro nejin. Ak kõnke ear ejjel̦o̦k nejin Hanna, ear juon wõt an kõj. Penina ear lukkuun utiej bũruon kõn men in. Ekõn kõbbo̦o̦jo̦j im nana an kõm̦m̦an ñan Hanna, im kakeememeje bwe ewõrañe. Kõn an kar kõl rot in ñan Hanna, Hanna ear lukkuun bũrom̦õj im jañ, im ear m̦akoko in m̦õñã. Elkena ear kile an Hanna inepata im jab kõn̦aan m̦õñã, im ear kajjioñ kaenõm̦m̦ane. Ear ba: “Hanna, etke kwõj jañ? Etke kwõjjab m̦õñã? Etke kwõj inepata? Ta ejjab joña ippam̦ wõt joñoul nejũm̦ m̦aan ke?”​—1 Sa. 1:4-8, UBS.

⁷ Jejaje wãween an kar Elkena kõm̦adm̦õde apañ eo kõn Penina. Bõtab, jejel̦ã bwe ear kile an Hanna inepata im bũrom̦õj kõn an jab maroñ wõr nejin. Im Hanna ear kile an Elkena lukkuun yokwe e. a (Lale kõmel̦el̦e eo itulal̦.) Bõtab, Elkena ear jab ba jabdewõt kõn an Penina nana an kõm̦m̦an ñan Hanna. Bareinwõt, Baibõl̦ ejjab kwal̦o̦k bwe Hanna ear kwal̦o̦k ruõn Penina ñan Elkena. Bõlen Hanna ear kile bwe ñe enaaj kwal̦o̦k men ko renana Penina ej kõm̦m̦ani, enaaj l̦apl̦o̦k apañ eo. Emaroñ kar l̦õmn̦ak ippãn make im ba bwe ñe enaaj kwal̦o̦k ruõn Penina, Elkena emaroñ jab kõm̦m̦an jabdewõt men ñan kõm̦adm̦õde apañ eo. Emaroñ kar bar l̦õmn̦ak im ba bwe ñe ekõm̦m̦ane men in, ajri ro nejin Penina im rijerbal ro aer renaaj dike im jep ippãn Penina. Kõn men in, aolep ro ilo m̦weo im̦õn renaaj dike im kõjekdo̦o̦ne.

8. Ñe ejjab em̦m̦an an ro jet kõm̦m̦an ñan kwe im rej kalijekl̦o̦k, etke kwõj aikuj lõke Jeova?

 ⁸ Jejaje ñe Elkena ear jel̦ã kõn aolep men ko Penina ear kõm̦m̦ani ñan Hanna. Meñe ãindein, ak jejel̦ã bwe Jeova Anij ear loe aolep men ko rar wal̦o̦k. Naan ko an ilo Baibõl̦ rej kakkõl kõj bwe enana ebbanban im kõjdate ro jet. Ej bar kwal̦o̦k bwe ro rem̦m̦an im rekõn̦aan kõm̦m̦an aenõm̦m̦an ãinwõt Hanna, remaroñ lõke Anij bwe enaaj kõm̦adm̦õde apañ ko ilo iien eo ejejjet im em̦õj an karõke. (Riit Duteronomi 32:4, UBS.) Hanna emaroñ kar jel̦ã kõn men in kõnke ear reilo̦k wõt ñan Jeova bwe en jipañe.

9. Ta eo jemaroñ katak jãn an kar Hanna etal wõt etal ippãn baam̦le eo an ñan Shailo meñe ear jel̦ã kadede bwe enaaj nana an Penina kõm̦m̦an ñane?

⁹ Elõñ jerbal ko baam̦le eo ear kõm̦m̦ani ke ear epaak aer etal ilo tũreep eo aer ñan Shailo. Aolep rar bõk kun̦aaer im kõppojak ñan tũreep in aer, ekoba ajri ro. Elkena im baam̦le eo an rar jokwe ilo Rema. Mel̦el̦ein bwe aolepen baam̦le eo an renaaj aikuj etetal elõñl̦o̦k jãn 20 m̦ail̦ ilo tol̦ ko ilo Ipreim ñan Shailo. Enaaj kar bõk juon ak ruo raanin aer etetal. Hanna ear etal ippãn baam̦le eo an ñan Shailo meñe ear jel̦ã kadede bwe enaaj nana an Penina kõm̦m̦an ñane. Joñak in an elukkuun em̦m̦an ñan rũkarejar ro an Anij ilo raan kein. Ñe jejjab m̦õn̦õn̦õ kõn kõm̦m̦an ko an juon ilo eklejia eo, ejjab em̦m̦an ñan kõtl̦o̦k bwe wãween in en bõbraik ad karejar ñan Anij. El̦aññe jejjab kweilo̦k im kwal̦o̦k naan, enaaj pen ad bõk jipañ ñan kijenmej wõt ilo wãween eo epen jej iioone.

10, 11. (1) Etke Hanna ear m̦õkaj im etal ñan im̦õn kõppãd eo? (2) Ewi wãween an kar Hanna jar im kwal̦o̦k aolepen bũruon ñan Jemãn ilañ?

¹⁰ Baam̦le eo ear etetal aolepen raan eo ilo ial̦ ko rekam̦m̦õkm̦õk ioon tol̦ ko, im kiiõ m̦õttan jidik retõpar Shailo. Jikin in ej pãd ilo juon tol̦ im ebar wõr tol̦ ko rekkillepl̦o̦k rej kaapool̦e. Ilo aer epaakel̦o̦k jikin in, ejjel̦o̦k pere bwe Hanna ear jino l̦õmn̦ake ta ko enaaj ba ilo an nãj jar ñan Jeova. Ãlikin an baam̦le eo tõparl̦o̦k ijo, rar m̦õñã ippãn doon. Hanna ear ekkaiuriur im etal ñan im̦õn kõppãd eo an Jeova. Bũrij L̦apl̦ap eo etan Ilai, ear pãd ilo im̦õn kõppãd eo im ear jijet iturin kõjãm eo. Hanna ear jab kile bwe  Ilai ej pãd ijo kõn an kar poub in jar ñan Anij. Hanna ear tõmak bwe Anij enaaj roñjake an kwal̦o̦k bũruon ilo im̦õn kõppãd eo. Ear jel̦ã bwe meñe ejjel̦o̦k en̦ emel̦el̦e kõn apañ ko ej iiooni, ak Jemãn ilañ enaaj mel̦el̦e. Innem, ear jino jañ kõn an lukkuun bũrom̦õj im eddo bũruon.

¹¹ Hanna ear kanooj m̦õtato ke ej jar im kwal̦o̦k bũruon ñan Jeova. Ke ej jar im kwal̦o̦k inepata ko an, tien wõt ear em̦m̦akũtkũt ak ejjel̦o̦k ainikien. Ear aetok jar eo an kõn an kwal̦o̦k aolepen bũruon ñan Jemãn ilañ. Hanna ear jab kajjitõk wõt bwe Anij en jipañe bwe en wõr nejin. Ak ear bar kõm̦m̦ane juon an kallim̦ur ñan Anij bwe ñe ewõr juon nejin l̦addik, enaaj ajel̦o̦k ajri in ñan Jeova bwe en jerbal ñane toon wõt an mour. Unin an kar kõm̦m̦ane men in ej kõnke ear jab baj kõn̦aan wõt bõk jeraam̦m̦an ko jãn Anij, ak ear bar kõn̦aan lel̦o̦k ñane.​—1 Sa. 1:9-11, UBS.

12. Ñe jej jar ñan Anij, ta eo jen kõm̦m̦ane ãinwõt kar Hanna?

¹² Hanna ear kwal̦o̦k juon joñak em̦m̦an ñan aolep rũkarejar ro an Anij kõn ta eo ren kõm̦m̦ane ñe rej jar. Jeova ekõn̦aan bwe armej ro an ren m̦õkaj im kepaake im jar ñane jãn aolepen bũrueer. Ekõn̦aan bwe ren kwal̦o̦k aolepen inepata ko aer ñane ãinwõt an juon ajri lõke jinen ak jemãn im kwal̦o̦k inepata ko an ñan er. (Riit Sam 62:8; 1 Tessalonika 5:17, UBS.) Jeova ear kõm̦akũt Piter ñan kwal̦o̦k ta eo jemaroñ kõm̦m̦ane ñe jej jar. Ear ba: “Kom̦win likũt ami inepata otemjej n̦a Ippãn, bwe kwõaorõk Ippãn.”​—1 Pi. 5:7.

13, 14. (1) Ta l̦õmn̦ak eo ebõd an kar Ilai kõn Hanna, im etke ear bõk l̦õmn̦ak in? (2) Etke wãween an kar Hanna uwaake Ilai ej juon joñak em̦m̦an ñan kõj?

¹³ Armej ro roktak jãn Jeova kõnke rejjab mel̦el̦e kõn aolep men ko rej wal̦o̦k. Jet iien rejjab mel̦el̦e kõn eñjake ko an ro jet. Lukwõl̦pãn wõt an kar Hanna jar, ak eilbõk kõn an roñ ainikien an juon armej kõnnaanl̦o̦k ñane. Armej in ej Bũrij l̦apl̦ap eo etan Ilai im eto an kar kalimjeke men eo Hanna ej kõm̦m̦ane. Ear ba ñan Hanna im ba: “Kwõn jab kwal̦o̦k am̦ kadek! Kwõn jab bar idaak wain bwe kwõn jab kadek!” Ilai ear lo an em̦m̦akũtkũt tien Hanna, im an m̦õtato im l̦õmãn bũrom̦õj. Ijello̦kun an kajjitõk ippãn Hanna kõn ta eo ear wal̦o̦k ñane, ear kajju l̦õmn̦ak bwe ekadek.​—1 Sa. 1:12-14, UBS.

 ¹⁴ Baj l̦õmn̦ak m̦õk kõn joñan an kar naan kein kõmetak bũruon Hanna! Ilo kar tõre in, ear inepata im eddo bũruon. Ak ke ej roñ naan kein rejjab m̦ool jãn juon eo el̦ap eddo ko an ilo jerbal eo an Jeova, ejjel̦o̦k pere bwe ear lukkuun metak kaki. Meñe ãindein, ak ear kwal̦o̦k wõt juon joñak em̦m̦an. Ear jab kõtl̦o̦k bwe l̦õmn̦ak eo ebõd an armej in ejjab weeppãn en kabbeere jãn an kabuñ ñan Jeova. Ear uwaake ilo kautiej im kõmel̦el̦eiki kõn apañ ko ej iiooni. Ilai ear kile bwe ear bõd l̦õmn̦ak eo an kõn Hanna, im emaroñ kar kiiõ jouj an kõnnaan ñane ke ear ba naan kein: “Kwõn ilo̦k ilo aenõm̦m̦an, im Anij an Israel en lewaj ñan eok men eo kwaar kajjitõk ippãn kake.”​—1 Sa. 1:15-17, UBS.

15, 16. (1) Ta eo ear wal̦o̦k ñan Hanna ãlikin an kar jar ñan Jeova im kabuñ ñane ilo im̦õn kõppãd eo? (2) El̦aññe jej inepata im bũrom̦õj, ta eo jemaroñ kõm̦m̦ane ñan l̦oore joñak eo an Hanna?

¹⁵ Ta eo ear wal̦o̦k ñan Hanna ãlikin an kar jar im kwal̦o̦k aolepen bũruon ñan Jeova im kabuñ ñane ilo im̦õn kõppãd eo? Baibõl̦ ej ba: “Innem ear etal im m̦õñã, im ejako an inepata.” (1 Sa. 1:18, UBS) Ear kiiõ em̦m̦an an Hanna mour. Ej ãinl̦o̦k wõt ñe ear lel̦o̦k aolep men ko reddo ear kotaki ñan aeran juon eo ekajoorl̦o̦k bwe en kotaki ñane. Aet, Hanna ear jol̦o̦k aolep inepata ko an ñan Jemãn ilañ. (Riit Sam 55:22.) Ewõr ke apañ en̦ Jeova ebane? Ejjel̦o̦k!

¹⁶ Ñe ewõr men en̦ ej nana ad mour kake im ekõm̦m̦an ad inepata im bũrom̦õj, em̦m̦an joñak in an Hanna ñan kõj. Jemaroñ l̦oore joñak in an ilo ad jar im kwal̦o̦k aolepen bũruod ñan Eo Baibõl̦ ej ba ej “roñjake jar.” (Sam 65:2) El̦aññe jej kõm̦m̦ane men in, “aenõm̦m̦an jãn Anij, eo ej el̦l̦ã jãn jel̦ã otemjej” enaaj kõm̦m̦an bwe en jako ad bũrom̦õj im inepata.​—Pil. 4:6, 7.

17, 18. (1) Ewi wãween an kar Elkena rejetake kallim̦ur eo an Hanna ñan Jeova? (2) Ta eo Penina emaroñ kar kile bwe ejjel̦o̦k tokjãn an kõm̦m̦ane?

¹⁷ Ilo rujlo̦kin raan eo tok juon, Hanna ear etal ippãn Elkena l̦o̦k ñan im̦õn kõppãd eo. Ejjel̦o̦k pere bwe ear ba ñan Elkena kõn kajjitõk eo an ñan Anij im an kar kõm̦m̦ane juon kallim̦ur ñane. Kõnke ekkar ñan kien ko an Anij ñan kar RiIsrael ro, ear wõr an l̦eo maroñ ñan kabõjrake  kallim̦ur eo an kõrã eo pãleen el̦aññe kõrã eo ear jab kajjitõk mãlim ippãn kake m̦okta. (Bõn. 30:10-15, UBS) Bõtab, jejel̦ã bwe Elkena ear jab kabõjrake kallim̦ur eo an Hanna. Ear rejetake Hanna kõnke m̦okta jãn aerro kar ro̦o̦l ñan kapijukuneer, erro kar etal im kabuñ ñan Jeova ilo im̦õn kõppãd eo.

¹⁸ Ñããt eo Penina ear kile bwe ejjel̦o̦k tokjãn an kakũtõtõik im kainepataik Hanna? Baibõl̦ ejjab kaalikkar men in, bõtab ej ba wõt bwe ear ‘jako an Hanna inepata.’ Mel̦el̦ein bwe jãn kar tõre eo m̦aanl̦o̦k, Hanna ear m̦õn̦õn̦õ im jab bar inepata. Bõlen ejjabto tokãlik, Penina ear kile bwe ejjel̦o̦k tokjãn an wõnm̦aanl̦o̦k wõt im kainepataik Hanna kõnke el̦ak lale ejjel̦o̦k tõprak ej loe. Baibõl̦ ear jab bar kõnnaan kõn Penina ãlikin iien in.

19. Ta jeraam̦m̦an eo ear wal̦o̦k ñan Hanna, im ewi wãween an kar kwal̦o̦k an kam̦m̦oolole Anij, eo ear lel̦o̦k jeraam̦m̦an in ñane?

¹⁹ Hanna ear kwal̦o̦k wõt an ineem̦m̦an ium̦win allõñ ko m̦aantak. Im kiiõ ear wal̦o̦k juon jeraam̦m̦an ñane. Ear bõro̦ro, im ear lukkuun m̦õn̦õn̦õ kõn men in! Ear jab mel̦o̦kl̦o̦k bwe Anij eo ear lel̦o̦k jeraam̦m̦an in ñane. Ke ear l̦otak l̦adik eo nejin, ear n̦aetan Samuel. Mel̦el̦ein ãt in ej “Etan Anij,” im ej jitõñl̦o̦k ñan juon ñe ej kũr etan Anij. Ãt in ej jitõñl̦o̦k ñan iien ko me Hanna ekõn kũr etan Anij. Ilo iiõ eo Samuel ear l̦otak, Hanna ear jab etal ippãn Elkena im baam̦le eo aer ñan Shailo. Ium̦win jilu iiõ, ear pãdwõt m̦weo im lale ajri eo nejin m̦ae iien eo ear bõjrak an kaninnini. Innem ilo  tõre eo ear bõjrak an kaninnini, meñe emaroñ kar bũrom̦õj ak ear kõpooje bwe en bõkl̦o̦ke ñan im̦õn kõppãd eo.

20. Ewi wãween an kar Hanna im Elkena kajejjet kallim̦ur eo aer ñan Jeova?

²⁰ Hanna emaroñ kar lukkuun bũrom̦õj in lel̦o̦k l̦adik eo nejin. Bõtab, ear jel̦ã bwe enaaj em̦m̦an aer lale Samuel ilo Shailo im bwe jet iaan kõrã ro rej jerbal ilo im̦õn kõppãd eo renaaj lale. Meñe ãindein ak emaroñ kar pen ñane kõnke Samuel ear dik wõt. Ãindein eñjake eo an aolep kõrã ro ewõr nejier ñe rej ettol̦o̦k jãn turin ajri jidik ro nejier. Hanna im Elkena rar lel̦o̦k l̦adik eo nejierro ilo m̦õn̦õn̦õ. Rar ebbõkl̦o̦k aer kein katok ñan im̦õn  kõppãd eo an Anij, im rar lel̦o̦k Samuel ñan Ilai. Erro ar kakeememej Ilai kõn kallim̦ur eo Hanna ear kõm̦m̦ane ilo im̦õn kõppãd in jet iiõ ko remootl̦o̦k.

21. Ewi wãween an kar jar eo an Hanna kwal̦o̦k bwe ear l̦ap an tõmak ilo Jeova Anij? (Bar lale bo̦o̦k eo etan “ Jar ko Ruo Rekanooj Em̦m̦an.”)

²¹ Tokãlik, Hanna ear bar jar ñan Anij. Jar in an Hanna eaorõk kõnke Anij ear likũti ilo Naan ko an ilo Baibõl̦. Ñe kwõnaaj riiti naan ko an rej pãd ilo bokin 1 Samuel 2:1-10 (UBS), kwõnaaj kile bwe ear l̦ap an tõmak ilo Anij. Ear nõbar Jeova kõn an kwal̦o̦k an kajoor ilo an kõttãik ro reutiej bũrueer, im kõn an kajeraam̦m̦an ro rej iioon apañ im lo̦mo̦o̦ren er. Ear nõbar Jemãn ilañ kõn an kwõjarjar, jim̦we an ekajet, im tiljek. Eñin unin an kar Hanna ba: “Ejjel̦o̦k rũkõjparok ãinwõt adwõj Anij.” Ro rej iioon apañ im wãween ko reppen remaroñ lõke Jeova im reilo̦k wõt ñane bwe en jipañ er.

22, 23. (1) Etke jejel̦ã bwe Samuel ear jel̦ã bwe jemãn im jinen rej yokwe e? (2) Ewi wãween an kar Jeova bar kajeraam̦m̦ane Hanna?

²² Samuel ear lukkuun jeraam̦m̦an kõnke jinen ear juon kõrã em̦m̦an im el̦ap an tõmak ilo Jeova Anij. Meñe Samuel ear oñkake jinen kõn an jako jãn iturin ke ej rũtto m̦aantak, ak ear jel̦ã bwe jinen ear jab mel̦o̦kl̦o̦ke. Etke? Kõnke kajjojo iiõ, Hanna ekõn kõm̦m̦ane juon an Samuel kopã ekadu pein im bõkl̦o̦k ñan Shailo bwe en kõn̦ake im jerbal kake ilo im̦õn kõppãd eo. An make kõm̦m̦an an l̦addik in nejin kopã ej kaalikkar an lukkuun yokwe im kaorõke. (Riit 1 Samuel 2:19, UBS.) Jemaroñ pijaikl̦o̦k an Hanna kõkõn̦ake Samuel kõn kopã eo im kalimjeke an em̦m̦an an kõn̦ake. Im ejja iien eo wõt, ej nõbar l̦adik eo nejin. El̦ap wõt an kar Samuel jeraam̦m̦an kõn jinen. Bareinwõt ke Samuel ear rũttol̦o̦k, Elkena im Hanna kab aolep armej in Israel rar jeraam̦m̦an kake e.

²³ Ak kõn Hanna, Jeova ear jab mel̦o̦kl̦o̦ke. Ear kajeraam̦m̦ane bwe en maroñ wõr wõt nejin. Tokãlik, ear bar wõr l̦alem nejierro Elkena ajri. (1 Sa. 2:21, UBS) Men eo el̦aptata an kar Hanna jeraam̦m̦an kake ej bwe ear lukkuun epaake Jemãn ilañ, Jeova. Kajjojo iiõ ear l̦apl̦o̦k wõt an epaakel̦o̦k Jeova. Kõjatdikdik bwe jem̦jerã n̦e am̦ ippãn Jeova enaaj bar epaakl̦o̦k wõt ilo am̦ anõke tõmak eo an Hanna.