1-3. (1) Ta eo Piter ear loe m̦oktal̦o̦k ilo kar raan eo? (2) Ta ko rar wal̦o̦k boñõn eo?

 PITER ej kamaat joñan im buul̦ aõn̦õn̦ ippãn ro jet. Ej pukot kilen bwe en maroñ em̦m̦an an lale im̦aan aolepen boñõn eo. Ke ej reilo̦k, ej lo juon meram ej ebbõl jãn iturearin wa eo. Meram in ej ke kakõl̦l̦en an jino raan? Kõn an to an Piter aõn̦õn̦, emetak diin im aeran. Im kõn an lukkuun l̦ap kõto, ear kõm̦m̦an an pok kool̦an bõran im bar kõm̦m̦an bwe en l̦ap n̦o ilo Lom̦al̦o in Galili. N̦o ko rejjab jem̦l̦o̦k aer buñut wa eo im jauni Piter im kõm̦m̦an an pio̦. Jekdo̦o̦n ak ej wõnm̦aanl̦o̦k wõt im aõn̦õn̦.

² Ke Piter im rũkal̦oor ro jet rar uwe ilo wa eo, Jijej ear pãdwõt ioon ãne. Ej kab m̦õj aer kar loe an Jijej naajdik to̦ujin armej kõn jejjo wõt pilawã im ek ilo kar raan eo. Ke armej ro rar loe menin kabwilõñlõñ in ear kõm̦m̦ane, rar kajjioñ kõm̦m̦an bwe Jijej en aer kiiñ. Bõtab, ear m̦akoko kõnke ear jab kõn̦aan bõk kun̦aan ilo m̦akũtkũt ko an kien ko an lal̦. Jijej ear kõn̦aan bar katakin rũkal̦oor ro an bwe ren jab bõk kun̦aaer ilo men in. Kõn an kõn̦aan ilo̦k jãn jarlepju eo, ear m̦õkaj im ba ñan rũkal̦oor ro an bwe ren uwe ilo wa eo im aõn̦õn̦l̦o̦k ñan jait eo juon. Im ear make ilo̦k ñan tõl ko bwe en jar.​—Mark 6:35-45, UBS; riit  Jon 6:14-17, UBS.

³ Ilo kar iien eo ke rũkal̦oor ro rar jino aõn̦õn̦, allõñ ekar pãd iol̦apl̦ap. Ak kiiõ allõñ epãd kapilõñ im epojak ñan an jakol̦o̦k. Mel̦el̦ein men in bwe rar aõn̦õn̦ aolepen boñõn eo. Meñe ear to aer aõn̦õn̦ ak ear lukkuun pen aer wõnm̦aanl̦o̦k jãn ijo rar jerak jãne. Ekar ejjel̦o̦k iien an Piter im rũkal̦oor ro jet kõnnaan ippãn  doon kõn aer poub in aõn̦õn̦, el̦aptata kõn an l̦ap n̦o im kõto. Innem ke Piter ej aõn̦õn̦, emaroñ kar lõñ men ko ej l̦õmn̦ak kaki.

4. Etke Piter ej juon joñak em̦m̦an ñan kõj?

⁴ Elõñ men ko Piter emaroñ kar l̦õmn̦ak kaki! Ruo iiõ kar m̦oktal̦o̦k Piter ear iioone Jijej, RiNazeret eo. Eñin iien eo jinointata ear jel̦ã kajjien Jijej im lo menin kabwilõñlõñ ko ear kõm̦m̦ani. Meñe elõñ men ko Piter ear ekkatak jãn iien ko m̦aantak, bõtab ear lõñ wõt men ko ear aikuj katak ñan kwal̦o̦ki. Piter ear m̦õn̦õn̦õ in kwal̦o̦k an kõttãik bũruon im ear kate e ñan jol̦o̦k an mijak im pere. Joñak eo an Piter ej juon joñak elukkuun em̦m̦an ñan kõj. Jen lale.

5, 6. Kar ewi wãween mour eo an Piter?

⁵ Piter ear jab mel̦o̦kl̦o̦k raan eo ear lo Jijej. E eo m̦oktata Andru ear ettõrl̦o̦k ñan ippãn im ba ñane kõn nuuj eo elukkuun em̦m̦an. L̦õm̦arein rej jemjein jemjati. Andru ear ba, “Kõmar lo Messaia eo.” Naan kein rar ukot mour eo an Piter. Im jãn kar iien in, wãween mour eo an ear jab bar maroñ ro̦o̦l im ãinwõt m̦okta.​—Jon 1:41, UBS.

⁶ Piter ear jokwe ilo Kaperneum, im jikin in epãd itueañin reba eo rej n̦aetan Lom̦al̦o in Galili. Piter im Andru rar jerbal ippãn Jemes im Jon, l̦õm̦aro nejin Zebedi. Ekar wõr juon wõt aer peejnej in eo̦ñõd me rar jipañ doon kake. Ekar wõr ro rar jokwe ilo m̦weo im̦õn Piter. Kar erro kõrã eo pãleen im lel̦l̦ap eo jinen kõrã eo pãleen ekoba Andru. Piter ear kabwe aikuj ko an baam̦le eo an ikijjeen an eo̦ñõd. Jerbalin eo̦ñõd ejjab pidodo, innem alikkar bwe ear aikuj kate e jerbal im lukkuun jel̦ã aolep kain kilen eo̦ñõd. Jemaroñ baj l̦õmn̦akel̦o̦k boñõn ko rellõñ me Piter im rijerbal ro an rej jerak kõn waan eo̦ñõd ko ruo ñan etal im eo̦ñõd. Rej doorlal̦l̦o̦k ok ko ikõtaan wa ko waaer im jabdewõt ek eko̦jek rej tõbwi lõñtak. Jemaroñ bar pijaikl̦o̦k aer kõjjemo̦o̦ji ek ko kon̦aer in raan im wiakaki, im aer bar karreoiki ok ko aer im bar kiiji.

7. Ta nuuj eo Piter ear roñ kake kõn Jijej, im etke men in ear juon nuuj em̦m̦an?

⁷ Baibõl̦ ej ba bwe Andru ear juon iaan rijjilõk ro an Jon RiPeptaij. Innem Andru ear kwal̦o̦k ñan Piter kõn ennaan eo ear roñ jãn Jon. Piter ear lukkuun itoklimo ke ear roñjake an kwal̦o̦k kake. Juon raan, Andru ear lo an Jon jitõñl̦o̦k Jijej, RiNazeret eo, im ba: “L̦aam̦ eo an Anij en!” Kõn men in, Andru ear m̦õkaj im l̦oore Jijej im ear m̦õkaj in ba ñan Piter kõn nuuj in elukkuun  em̦m̦an bwe em̦õj an Messaia eo itok! (Jon 1:35-40, UBS) Jeova ear kõm̦m̦ane juon kallim̦ur 4,000 iiõ ko remootl̦o̦k ãlikin an kar Adam im Iv jum̦aik e. Kõn men in, Jeova ear kallim̦ur bwe enaaj wõr juon eo ejejuwaan me enaaj bõktok kõjatdikdik eo em̦ool im em̦m̦an ñan armej otemjej. (Jen. 3:15) Ej kab m̦õj an Andru iioone armej in kar kallim̦ur kake me ej pojak in lo̦mo̦o̦ren armej otemjej. Armej in ej Messaia eo! Ke Piter ear roñ kõn men in, ear bar kaiurtok bwe en wõnm̦ae Jijej.

8. Ta mel̦el̦ein ãt eo Jijej ear lel̦o̦k etan Piter, im etke jet armej rej watõk bwe ejjab ekkar ãt in ñane?

⁸ M̦okta, armej rekõn ba Saimõn im jab Piter. Ak rar jino kũri im ba Piter jãn iien eo Jijej ear loe im ba: “‘Kwe Saimõn nejin Jon. Naaj likũt etam̦ Sipas.’ (Ãinwõt ba Piter).” (Jon 1:42, UBS) Ãt in “Sipas” ej mel̦el̦ein “ejm̦aan” ak “dekã.” Kõn men in, naan kein an Jijej rej naanin kanaan kõn ta eo enaaj wal̦o̦k ñan Piter. Ear kanaan bwe ãinwõt juon dekã eo epen im kajoor, Piter enaaj juon eo eperan im kajoor tõmak eo an. Im enaaj l̦ap an rũkal̦oor ro an Jijej reilo̦k ñan joñak eo an. Kar ke bar ãindein an Piter l̦õmn̦ak kõn e make? Bõlen ear jab. Jet armej ilo raan kein me rej riiti bokin Gospel ko, rej l̦õmn̦ak bwe ear m̦õjn̦o̦ tõmak eo an Piter. Bareinwõt, jet rej ba bwe ñe rej riit kõn mour eo an Piter ilo Baibõl̦, ej kwal̦o̦k bwe ekar juon eo em̦õkaj an kõm̦m̦an bõd im epidodo an oktak l̦õmn̦ak ko an.

9. (1) Ta ko Jeova im Jijej rej loi ippãd? (2) Etke jej aikuj tõmak im lõke wãween an Jeova im Jijej watõk im l̦õmn̦ak kõn kõj?

⁹ M̦ool bwe ekar wõr an Piter likjab im Jijej ear bar jel̦ã kõn likjab kein an. Ak Jijej ear ãinwõt Jemãn, Jeova. Ear l̦ap wõt an lale em̦m̦an ko an armej. Kõn men in, Jijej ear jel̦ã bwe elõñ men ko rem̦m̦an kõn Piter. Joñan ear kõn̦aan jipañe Piter ñan jel̦ã kilen kaalikkar wãween kein rem̦m̦an ippãn ilo aolepen men ko ej kõm̦m̦ani. Ilo raan kein, Jeova im Jijej rej bar kalimjek wãween ko rem̦m̦an kõn kõj. Emaroñ pen ad tõmak bwe elõñ men ko rem̦m̦an erro ej loi ippãd. Bõtab, jej aikuj tõmak im lõke erro kõn wãween aer l̦õmn̦ak kõn kõj. Bareinwõt, jej aikuj kwal̦o̦k bwe jej m̦õn̦õn̦õ in kõtl̦o̦k an Jeova katakin im kajim̦we kõj, ãinwõt kar Piter.​—Riit 1 Jon 3:19, 20.

10. (1) Ta eo Piter ear loe im roñ ke ear pãd ippãn Jijej? (2) Ak ta eo Piter ear bar ro̦o̦l im kõm̦m̦ane?

¹⁰ Piter ear etal ippãn Jijej ke ear itoitak im kwal̦o̦k naan. Emaroñ kar loe menin kabwilõñlõñ eo m̦oktata Jijej ear kõm̦m̦ane  ke ear ukot dãn eo bwe en erom wain. Ear kõm̦m̦ane menin kabwilõñlõñ in ilo kar juon kõjota in kõm̦are ilo Kena. Bareinwõt, ear roñ kõn ennaan eo eaorõktata kõn Aelõñ eo an Anij me ej letok juon kõjatdikdik em̦m̦an. Meñe Piter ear roñ ennaan in im loe menin kabwilõñlõñ eo Jijej ear kõm̦m̦ane, ak ear bar ro̦o̦l ñan peejnej in eo̦ñõd eo an. Bõtab jejjo allõñ tokãlik, Piter ear bar iioone Jijej. Ilo kar tõre in, Jijej ear ba ñan Piter bwe en l̦oore im kwal̦o̦k naan ippãn.

11, 12. (1) Ta ko rar wal̦o̦k ilo kar boñõn eo Piter ear eo̦ñõd? (2) Ta kajjitõk ko Piter emaroñ kar l̦õmn̦ak kaki ke ear roñjake an Jijej kwal̦o̦k katak eo an?

¹¹ Ilo kar aolepen boñõn eo, Piter ear kate e im eo̦ñõd ak ejjel̦o̦k kon̦an. Elõñ alen an kar Piter im rieo̦ñõd ro doorlal̦l̦o̦k ok ko aer ak ekar ejjel̦o̦k kon̦aer ñan jidik. Piter emaroñ kar kõjerbal jabdewõt kilen eo̦ñõd ko ejel̦ã kaki, im bar pukot ia eo em̦õñã ek ie. Ejjel̦o̦k pere, elõñ iien Piter emaroñ kar bõk ejja l̦õmn̦ak eo wõt an elõñ rieo̦ñõd ro. Ñe etal im ejjel̦o̦k kon̦aer, ekkã aer l̦õmn̦ak im ba, ‘Yokwe bwe in kar maroñ reilo̦k im lo baru in ek kan̦ meñe elim̦ lo̦jet, im kaam̦am̦tok ñan ok kã aõ.’ Piter emaroñ kar inepata im illu kõnke ejjel̦o̦k an maroñ ñan kõm̦m̦ane men in. Piter ear jab baj eo̦ñõd wõt kõnke em̦m̦an ippãn. Ro jet rar bõk aer mour jãn ek ko kon̦an. Ãliktata, ekar wõnãne kõnke etal im ejjel̦o̦k kon̦an. Ekkã an rieo̦ñõd ro karreoik ok ko aer ãlikin aer eo̦ñõd. Kõn men in, Piter ekar lukkuun poub in karreoik ok ko an ke Jijej ear kepaake im kõnnaan ippãn.

¹² Juon jarlepju in armej rar itok bwe ren roñjake Jijej. Kõn aer kar ko̦baje, Jijej ear kãlõñl̦o̦k ioon wa eo waan Piter im kajjitõk ñe emaroñ wõnmetol̦o̦k jidik jãn ãne. Innem ear jino kwal̦o̦k naan ñan armej ro. Ear el̦l̦aaj im alikkar ainikien ilo an kar kwal̦o̦k katak eo an. Piter ear kanooj roñjake ekoba armej ro ioon ãne. Piter ear jab m̦õk in roñjake an Jijej kwal̦o̦k kõn Aelõñ eo an Anij aolep iien. Emaroñ kar l̦õmn̦ak ippãn make, ‘Ej baj naaj juon jeraam̦m̦an ñe ibõk kun̦aõ im jipañ Kũraij ñan jiroñ armej ro kõn kõjatdikdik in em̦m̦an ilo aelõñ in! Ak ekkar im jim̦we ke aõ naaj kõm̦m̦ane men in ke ewõr aõ baam̦le? Elemen aõ naaj naajdik baam̦le e aõ ñe inaaj etal?’ Bar juon men emaroñ kar l̦õmn̦ak kake ej kõn an kar ejjel̦o̦k kon̦an ilo kar boñõn eo.​—Luk 5:1-3, UBS.

13, 14. (1) Ta menin kabwilõñlõñ eo Jijej ear kõm̦m̦ane ñan Piter? (2) Ta eo Piter ear kõm̦m̦ane ãlikin an kar loe menin kabwilõñlõñ in?

 ¹³ Ke ear m̦õj an Jijej kwal̦o̦k naan ñan armej ro, ear ba ñan Piter: “Kwõn lemetol̦o̦k jidik wa n̦e ñan ijo em̦wilal̦, im komeañ en doorl̦o̦k ok kan̦e im eo̦ñõd.” Piter ear pere im jab tõmak ñan jidik bwe enaaj wõr kon̦aer. Ear ba: “Rũkaki, kõmar eo̦ñõd aolepen boñ im ejjel̦o̦k kon̦am. Ak el̦aññe kwõj ba, eokwe inaaj doorl̦o̦k.” Ilo iien in, ej kab m̦õj an Piter kwal̦i ok ko an. Naan kein an rej kaalikkar bwe ekar jab kõn̦aan bar doorlal̦l̦o̦k ok ko im eo̦ñõd. El̦aptata ke ekar joda raan eo! Bõtab, ekar kõttãiki im jaal̦e rieo̦ñõd ro m̦õttan ilo wa eo juon bwe ren l̦oor er.​—Luk 5:4, 5, UBS.

¹⁴ Ke Piter ear lelal̦l̦o̦k wõt ok ko, ear eñjake aer eddo. Innem ear jino an tõbwi lõñtak. Ej buul̦ kanõki lõñtak ak ejjab tõmak  ñan jidik ke eko̦jek ek m̦ae iien eo ej lo an bwijin ek iddipikpik ilowaan ok ko. Kõn men in, ear kaiur im jaal̦e l̦õm̦aro ilo wa eo juon bwe ren itok im jipañ. Ke rar itok im jipañ rar loe bwe ejabwe juon wa ñan aer kanne kõn ek. Innem, rar kanne wa ko jim̦or ak joñan an lõñ ek enañin kar douj wa kein wõt jidik. Piter ear kanooj bwilõñ im l̦o̦kjenaan. M̦oktal̦o̦k, ear loe menin kabwilõñlõñ ko Kũraij ear kõm̦m̦ani ñan jipañ ro jet. Bõtab ilo tõre in, Jijej ekar kõm̦m̦ane juon menin kabwilõñlõñ me ear jipañ e im baam̦le eo an. Armej eo wõt ewõr an maroñ ñan kõm̦m̦an bwe ek ko ren ko̦jek ilo ok ko ear jutak iturin! Piter ear jino mijak im lõl̦ño̦ñ. Ear bukwelõlõ im̦aan Jijej im ba: “Irooj, kwõn ilo̦k jãn eõ, bwe ña rijjerawiwi!” Ear l̦õmn̦ak bwe ejjel̦o̦k tokjãn im ejekkar ñan an pãd ippãn Eo ekajoor im wõr an maroñ ñan kõm̦m̦ani men kein rekabwilõñlõñ.​—Riit Luk 5:6-9, UBS.

15. Ta eo Jijej ear ba ñan jipañ Piter bwe en jol̦o̦k an pere im mijak?

¹⁵ Jijej ear kõnono ilo jouj ñane im ba: “Kwõn jab mijak; jãn kiiõ im ilo̦k kwõnaaj rieo̦ñõd armej.” (Luk 5:10, UBS) Iien in ear jab juon iien ñan pere im mijak. Piter ear aikuj jol̦o̦k an pere im l̦õmn̦ak kõn wãween an naaj maroñ kabwe aikuj ko an baam̦le eo an ñe ejjab eo̦ñõd. Ear bar aikuj jol̦o̦k an mijak ñe ekõm̦m̦an bõd ak ñe eban jejjet an kwal̦o̦k naan. Ear aikuj l̦õmn̦ak kõn aorõkin jerbalin kwal̦o̦k naan. Jerbal eo in el̦ap Jijej ear aikuj kõm̦m̦ane im enaaj kar jelõt ilju im jekl̦aj eo an armej otemjej. Bareinwõt, Jijej ear jerbal ñan Anij eo me enaaj kanooj l̦ap an jol̦o̦k bõd ko. (Ais. 55:7) Jeova enaaj kar jipañ Piter ñan kabwe aikuj ko an baam̦le eo an im jipañe ñan kajejjet jerbalin kwal̦o̦k naan.​—Matu 6:33.

16. (1) Ta eo Piter, Jemes, im Jon rar kõm̦m̦ane ke Jijej ear ba ren l̦oore? (2) Etke pepe eo an Piter, Jemes, im Jon ear juon pepe eo em̦m̦antata?

¹⁶ Piter im bareinwõt Jemes im Jon rar m̦õkaj im pokake Jijej ke ear ba ren l̦oore. “Rar erki ãnel̦o̦k wa ko, im likũt men otemjej im l̦oor Jijej.” (Luk 5:11, UBS) Piter ear tõmak ilo Jijej im Eo ear jilkintoke. Eñin pepe eo em̦m̦antata ear kõm̦m̦ane ilo mour eo an. Kũrjin ro ilo raan kein me rar jol̦o̦k aer pere im mijak bwe ren jerbal ñan Anij rej bar kwal̦o̦k aer tõmak. Ro rej kwal̦o̦k aer lõke Jeova, rejãmin lo aer aikuj.​—Sam 22:4, 5.

17. Ta ko Piter emaroñ kar l̦õmn̦ak kaki ilo kar iiõ kein ruo ear iioone Jijej?

¹⁷ Enañin ruo iiõ tokãlik jãn iien eo Piter ear iioone Jijej, Piter ear pãd ilo Lom̦al̦o in Galili im buul̦ aõn̦õn̦ aolepen boñõn eo kõnke ear buñ juon kõto el̦ap. Boñõn eo in jaar jino bwebwenato in kake. Ilo m̦ool jejjab jel̦ã ta ko Piter ear l̦õmn̦ak kaki ilo  boñõn eo. Ebwe an lõñ iien ko remaroñ kar jiktok ilo l̦õmn̦ak eo an ilo tõre in ej aõn̦õn̦ ilo Lom̦al̦o in Galili! Juon, emaroñ kar l̦õmn̦ake an kar Jijej kãjmour lel̦l̦ap eo jinen kõrã eo pãleen. Emaroñ kar bar l̦õmn̦ak kõn Katak eo an Jijej ioon Tõl eo. Elõñ alen, ilo aolepen katak ko an im jerbal ko ear kõm̦m̦ani, rar kaalikkar bwe E eo Jeova ear Kããlõte ak Messaia eo. M̦oktal̦o̦k Piter ear kwal̦o̦k an pere im mijak ak jet allõñ tokãlik ear maroñ katak ñan kadikl̦o̦k m̦õjn̦o̦ kein ippãn. Ke Jijej ear kããlõte rijjilõk ro 12, ear bar kããlõt Piter bwe en juon iaaer! Bõtab, ear jab lukkuun jako an Piter pere im mijak. Ilo ad katak lal̦tak wõt jenaaj loe an Piter kar kile ippãn make bwe ear jab jako an pere im mijak.

18, 19. (1) Ta eo Piter ear loe ilo Lom̦al̦o in Galili? (2) Ta kar uwaak eo an Jijej ñan Piter?

¹⁸ Ilo kar lukwõnl̦o̦k boñõn eo, bõlen ikõtaan 3 awa l̦o̦k ñan 6 awa jimmarok, Piter ear ilbõk im bõjrak an aõn̦õn̦. Ear kã im jab m̦akũtkũt. Ke ej reilo̦k, ej lo miroun juon men ej em̦m̦akũtkũt! Ear ke baj jãdbũtbũt in n̦o ke rej buñut doon im el̦ak meram tok jãn allõñ ekõm̦m̦an bwe en ãinwõt ñe ewõr miroun juon men ej em̦m̦akũtkũt? Ear jab. Men eo rar loe ej jutak wõt im ejjab jako! Kar jekjekin juon armej ej etetal ioon lo̦jet! Ke ej epaaktok ear ãinwõt ñe ear itõn el̦l̦ãl̦o̦k wõt jãn er. Innem, rũkal̦oor ro rar abwinmake. Rar l̦õmn̦ak bwe ej juon jetõb. Kõn men in, armej eo ej kõnnaanl̦o̦k im ba: “Kom̦win peran! Ña e, kom̦win jab mijak!” Armej in ej Jijej!​—Matu 14:25-27, UBS.

¹⁹ Piter ear uwaak im ba: “Irooj el̦aññe lukkuun kwe n̦e, kwõn ba ñan eõ bwe in iwõj ioon dãn wõj ñan ippam̦.” (Matu 14:28, UBS) Ilo jinoin, Piter ear m̦õkaj im kwal̦o̦k an peran. Joñan an kar Piter bwilõñ im m̦õn̦õn̦õ kõn menin kabwilõñlõñ in, ear kõn̦aan bar etetal ioon dãn ñan kakajoorl̦o̦k tõmak eo an. Innem, Jijej ear ba ñan Piter bwe en etal. Kõn men in, Piter ear to jãn wa eo im jino an jutak ioon lo̦jet! Baj l̦õmn̦akel̦o̦k m̦õk eñjake eo an Piter ke ej jutak ioon lo̦jet, ak el̦ak juuri ej ãinwõt ñe ear jutak ioon juon men epen. Emaroñ kar bwilõñ bwe emaroñ etetal ioon lo̦jet l̦o̦k ñan ippãn Jijej. Bõtab, juon men ear wal̦o̦k im kõm̦m̦an bwe en m̦õkaj an oktak eñjake eo an Piter.​—Riit Matu 14:29, UBS.

20. (1) Ta ko rar kõm̦m̦an an Piter m̦ad, im ta eo ear wal̦o̦k ñane? (2) Ta kajjitõk eo an Jijej me ear kõm̦m̦an menin an Piter l̦õmn̦ak?

²⁰ Piter ear aikuj kalimjek wõt Jijej. Etke? Kõnke Jijej eo ear kamaroñe Piter ñan an etetal ioon dãn meñe ekar l̦ap an lim̦aajn̦on̦o. Ear kõm̦m̦ane men in ikijjeen kajoor eo an Jeova kõn an kar Piter kwal̦o̦k an tõmak. Piter ejab kalimjek wõt Jijej ak em̦ad. Baibõl̦ ej ba: “Ke ej lo kõto eo, emijak.” Kõn men in, ke Piter ear  bõk mejãn im lo an n̦o ko rel̦l̦ap buñut itõrerein wa eo im an kãlõñl̦o̦k dãn, ear jino lõl̦ño̦ñ. Emaroñ kar l̦õmn̦akel̦o̦k an rũm̦lal̦l̦o̦k im mal̦oñ. El̦ak l̦apl̦o̦k an ikkũm̦kũm̦ im mijak, edikl̦o̦k an tõmak. Kõn men in, ear jino an tũm̦m̦wilal̦l̦o̦k. Em̦m̦aan in me Jijej ear n̦aetan Dekã kõn an kar loe bwe enaaj peran im kajoor, ear jino an mijak im dikl̦o̦k an tõmak. Im meñe Piter ear lukkuun jel̦ã aõ ak ear jab lõke e make. Ear lam̦õj im ba: “Irooj lo̦mo̦o̦ren eõ!” Jijej ear jibwe pein im kanõke lõñtak. Innem eba ñane: “Edik wõt am̦ tõmak! Etke kwõj pere?” Kajjitõk in ear kõm̦m̦an an Piter l̦õmn̦ak.​—Matu 14:30, 31, UBS.

21. (1) Etke ekauwõtata ñe jej pere? (2) Ta eo jemaroñ kõm̦m̦ane ñan jol̦o̦k ad pere?

²¹ Ejejjet wõt an kar Jijej ba, “Etke kwõj pere?” Pere ej juon eñjake ejjab em̦m̦an im emaroñ lukkuun l̦ap an jelõt im ko̦kkure juon armej. El̦aññe jej kõtl̦o̦k bwe en jelõt kõj im men ko jej kõm̦m̦ani, emaroñ kam̦õjn̦o̦ im ko̦kkure tõmak eo ad. Kõn men in, jej aikuj kate kõj bwe eñjake in en jab jelõt kõj! Ewi wãween ad maroñ kõm̦m̦ane men in? Ej ilo ad reilo̦k wõt ñan Jeova im Nejin. El̦aññe el̦ap wõt ad l̦õmn̦ak kõn men ko rej kaamijak kõj, kabbeer kõj, im kõm̦ad kõj jãn ad karejar ñan Jeova im Nejin, jenaaj kile ad jino pere. El̦aññe jej reilo̦k wõt ñan Jeova im Nejin im kõl̦mãnl̦o̦kjen̦ kõn men ko rar kõm̦m̦ani, im men ko rej kõm̦m̦ani kiiõ, ekoba ta ko renaaj kõm̦m̦ani ñan ro rej yokwe er, jenaaj maroñ jol̦o̦k l̦õmn̦ak ko rej kõm̦m̦an ad pere.

22. Etke ewõr tokjãn ñan ad katak jãn joñak eo an Piter?

²² Ke Piter ej l̦oorel̦o̦k Jijej ñan wa eo, ear lo an jino dikl̦o̦k kõto eo. Im ejino lur Lom̦al̦o in Galili. Kõn men in, Piter im rũkal̦oor ro rar ba ñan Jijej: “Lukkuun m̦ool kwe Nejin Anij!” (Matu 14:33, UBS) Ke ear joraantak, emaroñ kar l̦ap an Piter kam̦m̦oolol. Ear katak ñan jab kõtl̦o̦k bwe mijak en kõm̦m̦an an pere Jeova im Jijej. Em̦ool bwe ear lõñ wõt men ko Piter ear aikuj kakõm̦anm̦anil̦o̦k im kõm̦m̦an oktak ie bwe en maroñ erom juon Kũrjin eo eperan im kajoor ãinwõt juon dekã. Eñin kar kanaan eo an Jijej kõn Piter. Piter ear jab bõjrak jãn an kate e im ear wõnm̦aanl̦o̦k wõt ilo an kõm̦m̦an oktak ko ilo mour eo an. Ãindein ke bar kwe? Ñe kwõnaaj kõm̦m̦ane men in, kwõnaaj make kile bwe elukkuun wõr tokjãn ñan ad l̦oore joñak in an Piter.