1-3. (1) Ta eo ear kõm̦m̦an bwe jorrããn eo en kar itõn wal̦o̦k ñan ro ilo m̦weo im̦õn Abigeil? (2) Ta eo jenaaj katak kake kõn kõrã in em̦m̦an?

 ABIGEIL ej lo an likao eo mijak. Likao in elukkuun lõl̦ño̦ñ kõnke ej pojak in wal̦o̦k juon jorrããn el̦ap. Ilo iien in, 400 rũttarin̦ae ro rej itok wõt ilo ial̦ eo aer bwe ren itõn m̦an aolep em̦m̦aan ilo m̦weo im̦õn Nebal, l̦eo ippãn Abigeil. Etke ear wal̦o̦k apañ in?

² Unin an kar wal̦o̦k ej kõn Nebal. L̦ein elukkuun lãj im nana an kõm̦m̦an ñan armej. Ak ilo tõre in, ebõd armej eo Nebal ear nana an kõm̦m̦an ñane im kalluuki. Armej in ej juon rũtõlin juon jarin tarin̦ae im rũttarin̦ae ro an rekajoor im jel̦ã tarin̦ae. Bareinwõt, el̦ap an rũttarin̦ae ro an tiljek im m̦ool ñane. Eñin unin an likao in kar jibadektok Abigeil. Likao in ej jerbal ñan Nebal im bõlen ej juon iaan rũlale jiip ro an. Ej tõmak bwe Abigeil emaroñ jel̦ã ta eo en kõm̦m̦ane ñan kõjparok er. Ak kiiõ ta eo juon kõrã emaroñ kõm̦m̦ane ñan kabõjrak juon jarin tarin̦ae?

³ Eokwe m̦okta, jen kal̦apl̦o̦k ad jel̦ã kõn kõrã in elukkuun em̦m̦an. Wõn in kar Abigeil? Ta eo ear kõm̦m̦an bwe jorrããn eo en kar itõn jino wal̦o̦k? Im ta eo jemaroñ katak jãn tõmak eo an Abigeil?

4. Kar kain armej rot Nebal?

⁴ Abigeil im Nebal rar lukkuun jekkar ñan doon. Abigeil ear juon kõrã em̦m̦an ak Nebal ear juon em̦m̦aan enana. Im  Nebal ear juon armej elõñ an jããn. Eñin unin an kar l̦õmn̦ak bwe eutiej im em̦m̦anl̦o̦k jãn ro jet. Ak kar ta l̦õmn̦ak an ro jet kõn e? Ñe Baibõl̦ ej kwal̦o̦k bwebwenatoun armej ro, ekkã an ba men ko rem̦m̦an kõn er. Ak el̦ak kõnnaan kõn Nebal, ej kwal̦o̦k naan ko reddo kõn e. Ãt eo etan ej mel̦el̦ein “Bwebwe.” Eñin ke kar ãt eo etan jãn jinen im jemãn? Ke ta, kar ke ãt eo etan in jãn armej ro kõn an lukkuun nana? Jejjab lukkuun jel̦ã. Men eo de in jejel̦ã ej bwe ejejjet ãt in ñane. Nebal ear “juon armej earõk im illulu.” Elãj an kõm̦m̦an ñan armej im ekkadekdek. Im elõñ rar mijake im dike.​—1 Sa. 25:2, 3, 17, 21, 25, UBS.

5, 6. (1) Ta men ko rem̦m̦antata ippam̦ kõn Abigeil? (2) Etke Abigeil ear pãleek Nebal meñe l̦ein ear juon armej nana?

⁵ Ear l̦ap oktak ikõtaan Abigeil im Nebal. Mel̦el̦ein etan Abigeil ej “Jema Ear Kõm̦m̦an Menin An M̦õn̦õn̦õ.” Elõñ em̦m̦aan ro rej m̦õn̦õn̦õ im utiej bũrueer kõn an ledik ro nejier deo̦. Bõtab, em̦m̦aan ro remãlõtlõt rejjab baj m̦õn̦õn̦õ wõt kõn an deo̦ im em̦m̦an mejãn ledik ro nejier. El̦apl̦o̦k aer m̦õn̦õn̦õ ñe em̦m̦an bũrueer im rej armej em̦m̦an. Enañin aolep iien, ro em̦m̦an mejãer rejjab kile bwe el̦ap an aorõk ñan aer kwal̦o̦k lol̦o̦kjen̦, mãlõtlõt, peran, im tõmak ilo Anij. Ak ekar jab ãindein Abigeil. Baibõl̦ ej nõbare kõnke ear jab deo̦ wõt ak ear bar mãlõtlõt.​—Riit 1 Samuel 25:3, UBS.

⁶ Bõlen jet armej remaroñ l̦õmn̦ak etke kõrã in emãlõtlõt ear pãleek l̦ein enana. Keememej bwe ilo iien ko etto ilo Baibõl̦, rekõn karõk ruo armej bwe ren pãlele. Ekkã an kar rũtto ro kããlõt wõn ro ajri ro nejier remaroñ m̦areik er. Bõtab, el̦aññe ruo armej rar make kõn̦aan bõk doon, ear kanooj in aorõk bwe ren kajjitõk wõt mãlim ippãn rũtto ro jineer im jemãer. Jinen im jemãn Abigeil rar ke karõke Abigeil ak m̦õn̦õn̦õ in kõtl̦o̦k an pãleek Nebal kõnke em̦weiie im utiej? Unin aer kar kõm̦m̦ane men in ej ke kõn aer jeram̦õl im pãd ilo aikuj? Eokwe, jejjab lukkuun jel̦ã taunin. Bõtab, meñe Nebal ear lõñ an jããn, ejjab mel̦el̦ein bwe ear juon armej em̦m̦an.

7. (1) Ñe rũtto ro rej kakapilõk ajri ro nejier kõn m̦are, ta ko ren kõjparok bwe ren jab kõm̦m̦ani? (2) Ta eo Abigeil ear kate wõt e ñan kõm̦m̦ane?

⁷ Rũtto ro me rej kwal̦o̦k aer mãlõtlõt rej kakapilõk ajri ro nejier bwe en jim̦we un ko unin aer m̦are. Rejjab rõjañ ajri ro nejier bwe ren m̦areik ro wõt ewõr aer jããn. Bareinwõt, rejjab iuun er bwe ren m̦õkaj im m̦are ñe rej dik wõt im rejjañin pojak ñan kõm̦m̦ani eddo ko an juon rippãlele. (1 Ko. 7:36; Ekl.  5:2-5, UBS) Ak Abigeil ear jab maroñ kiiõ l̦õmn̦ak kõn men kein kõnke ekõptata an pãleek Nebal. Jekdo̦o̦n ta un eo unin an kar Abigeil m̦areik Nebal, ak ear kate wõt e ñan mour ippãn l̦ein.

8. (1) Wõn eo Nebal ear kajjirere kake im kalluuki? (2) Im etke jemaroñ ba bwe ebõd armej eo Nebal ear kõm̦m̦ane men in ñane?

⁸ Ak kiiõ ewõr juon apañ Nebal ear kõm̦m̦ane im kõm̦m̦an menin an penl̦o̦k wõt mour eo an Abigeil. Armej eo Nebal ear kajjirere kake im kalluuki ej Devid. Em̦m̦aan in ej juon eo ear tiljek ilo an karejar ñan Jeova. Im Samuel ear kapiti im ba bwe e eo em̦õj an Anij kããlõte bwe en kiiñ im bõk jikin Saul. (1 Sa. 16:1, 2, 11-13, UBS) Kiiñ Saul ear ebbanbane Devid im ear kõn̦aan m̦ane. Kõn men in, Devid ear aikuj ko im tilekek jãne. Im kiiõ e kab rũttarin̦ae ro an 600 rej mour ilo ãne jem̦aden.

9, 10. (1) Ia ko Devid im l̦õm̦aro doon rekõn pukot kilen aer mour ie? (2) Etke Nebal en kar kam̦m̦oolole Devid im l̦õm̦aro doon? (Bar lale kõmel̦el̦e jidikdik eo an pãrokõrããp 10.)

⁹ Nebal ear jokwe ilo Meon. Bõtab, ekõn jerbal ilo juon bukwõn epaak etan Karmel me emaroñ kar wõr an bwidej ie. a (Lale kõmel̦el̦e eo itulal̦.) Bukwõn kein rej pãd ilo jikin ko reutiej im el̦ap aer ujooje im em̦m̦an ñan nãjnej jiip. Im ekar em̦m̦an ñan lale jiip ko 3,000 nejin Nebal ie. Bõtab, jikin ko iturin bukwõn kein rej ãne jem̦aden. Ñan waanjoñak, ilo turõkin bukwõn kein epãd ãne jem̦aden in Peran. Im ilo turear, epãd lom̦al̦o eo etan Lom̦al̦o in Jo̦o̦l̦ (rainin rej n̦aetan Lom̦al̦o in Mej), im jikin ko ie ewõr kom̦lal̦ im ro̦ñin tol̦ ko. Jikin ko kein Devid im l̦õm̦aro doon rar mour ie. Kõnke ear pen mour ijekein, elõñ apañ ko Devid im l̦õm̦arein doon rar aikuj kijenmej kaki. Ejjel̦o̦k pere bwe ke rar kakkidudu im kappok kijeer m̦õñã, ekkã aer kar iioone likao ro rar lale jiip ko an em̦m̦aan in em̦weiie, Nebal.

¹⁰ Ak ke rũttarin̦ae rein rar iioone rũlale jiip rein, ewi wãween aer kar kõm̦m̦an ñan er? Eokwe, emaroñ kar pidodo an Devid im l̦õm̦arein doon itok jabdewõt iien im ko̦o̦t kijeer jiip. Ak rar jab ãindein. Ijello̦kun aer kar kõm̦m̦ane men in, rar kõjparok rijerbal rein an Nebal im jiip kein nejin. (Riit 1 Samuel 25:15, 16, UBS.) Ekkã an kar jiip ko im rũlale jiip ro iioon elõñ  kain men ko rekauwõtata. Etke? Kõnke elõñ menninmour ko rawiia im rellãj remaroñ itok im ko̦kkure er. Ejjab men in wõt, ak jikin in me rar lale jiip kein an Nebal ie ej jem̦l̦o̦kin ãneo ãneen RiIsrael ro. Joñan an epaakel̦o̦k ijoko jikin riaelõñ ko jet, rinana ro jãn aelõñ kein rekõn del̦o̦ñetok ñan ko̦o̦t im m̦anm̦an armej. b​—Lale kõmel̦el̦e eo itulal̦.

11, 12. (1) Ewi wãween an kar Devid kwal̦o̦k an jel̦ã m̦anit im kautiej ke ear jilkinl̦o̦k l̦õm̦aro doon ñan ippãn Nebal? (2) Etke jemaroñ ba bwe elukkuun kar nana wãween an Nebal uwaake kajjitõk eo an Devid?

¹¹ Emaroñ kar pen an Devid kajjioñ naajdik aolepen l̦õm̦aro doon ke rar pãd ilo ãne jem̦aden. Innem, juon raan Devid ear jilkinl̦o̦k 10 iaan l̦õm̦aro doon ñan kajjitõk jipañ ippãn Nebal. Ke ear jilkinl̦o̦k er ñan Nebal, ear kããlõte juon iien ejejjet im em̦m̦an. Iien in ekar juon iien kwõjkwõj in m̦wijbar jiip ko. Ilo tõre ko, ear juon m̦anit ñan kõm̦m̦an m̦õñã ko rel̦l̦ap ilo iien m̦wijbar jiip im kwal̦o̦k jouj ñan ro jet. Devid ear bar lukkuun kããlõt naan ta ko l̦õm̦aro doon ren ilen ba ñan Nebal. Ear kõjerbal naan ko rejouj im rej kwal̦o̦k an kautiej Nebal. Joñan, ear ba naan kein ñan Nebal, “nejũm̦ Devid.” Bõlen ear ba men in ñan kwal̦o̦k an kautieje Nebal bwe ej juon eo erũtto. Ak ta eo Nebal ear kõm̦m̦ane?​—1 Sa. 25:5-8.

¹² Ear lukkuun illu! Likao eo ear etal im kõnnaanek Abigeil kõn men ko rar wal̦o̦k, ear ba bwe Nebal “ear kajjirere kake” Devid im l̦õm̦aro doon. Ear lam̦õj im ba bwe ejãmin aji bũreet ko kijen, dãn ko limen, im kanniõk ko kijen. Nebal ear kajjirere kake Devid im watõke bwe ej juon armej ejjel̦o̦k tokjãn. Ear ba bwe Devid ej ãinwõt rũkõm̦akoko ro me rar ko jãn irooj ro aer. Wãween an kar Nebal watõk Devid emaroñ kar ãinwõt Saul, l̦eo ear kõjdate Devid. Ear oktak l̦õmn̦ak kein an l̦õm̦arein ruo jãn Jeova. Anij ear yokwe Devid im ear watõke ãinwõt kiiñ eo an Israel im jab ãinwõt juon rũkõm̦akoko me ej jum̦ae irooj eo an.​—1 Sa. 25:10, 11, 14, UBS.

13. (1) Kar ta eñjake eo an Devid ilo jinoin ke ear roñ kõn naanin kajjirere ko an Nebal? (2) Ta eo Jemes 1:20 ej katakin kõj kõn men eo Devid ear itõn kõm̦m̦ane?

¹³ Ke l̦õm̦aro doon Devid rar jepl̦aaktok im kõnnaanek e kõn aolep men ko rar wal̦o̦k, Devid ear kanooj illu. Ear ba ñan  er: “Kom̦win kañũrñũr kõn jãje ko ami.” Innem, ear kõn̦ak kein tarin̦ae ko an im ãñin 400 em̦m̦aan ippãn bwe ren ilen tarin̦ae. Devid ear jek ilo bũruon bwe rej etal im m̦an aolep em̦m̦aan ro ilo m̦weo im̦õn Nebal. (1 Sa. 25:12, 13, 21, 22, UBS) Jemel̦el̦e kõn unin an kar Devid illu, ak men in ear itõn kõm̦m̦ane ejjab jim̦we. Baibõl̦ ej ba: “Illu an armej eban katõprak kõn̦aan ko rekkwõjarjar an Anij.” (Jem. 1:20, UBS) Ak kiiõ ta eo Abigeil emaroñ kõm̦m̦ane ñan kõjparok rũm̦weo im̦õn jãn jorrããn in ej pojak in wal̦o̦k?

14. (1) Ta buñtõn ne eo m̦oktata Abigeil ear kõm̦m̦ane bwe en maroñ kõm̦adm̦õde apañ eo ear wal̦o̦k kõn Nebal? (2) Ta eo jemaroñ katak kõn oktak eo ikõtaan Abigeil im Nebal?

¹⁴ Ilo jinoin katak in, jaar lo buñtõn ne eo m̦oktata Abigeil ear kõm̦m̦ane ñan an maroñ kõm̦adm̦õde apañ eo ear wal̦o̦k kõn Nebal. Ta in? Ear m̦õn̦õn̦õ in roñjake. Ear jab ãinwõt Nebal, l̦eo pãleen. Likao eo me ear kõjjel̦ãiki kõn men ko rar wal̦o̦k, ear ba bwe Nebal ear “juon armej enana im ejjab kõn̦aan roñjake jabdewõt.” Eñin unin ear jab kõn̦aan kõnnaanekl̦o̦k Nebal kõn jorrããn eo ej pojak in wal̦o̦k. (1 Sa. 25:17, UBS) Kõn an Nebal l̦õmn̦ak bwe eutiej im em̦m̦anl̦o̦k jãn ro jet, men in ear kõm̦m̦an bwe en jab kõn̦aan roñjake jabdewõt armej. Elõñ armej ro ilo raan kein relukkuun bar utiej bũrueer ãinwõt kar Nebal. Bõtab, Abigeil ear jab utiej bũruon. Likao eo ear jel̦ã bwe Abigeil enaaj m̦õn̦õn̦õ in roñjake e. Eñin unin an kar kepaake im kõnnaanek e kõn apañ eo ear wal̦o̦k.

15, 16. (1) Ta eo Abigeil ear kõm̦m̦ane im ej kaalikkar an ãinwõt kõrã eo epol̦õmãn ilo bokin Jabõn Kõnnaan? (2) Etke men eo Abigeil ear kõm̦m̦ane ear jab kwal̦o̦k an jum̦aik maroñ eo an l̦eo pãleen?

¹⁵ Abigeil ear kõl̦mãnl̦o̦kjen̦ kõn apañ eo im m̦õkaj in kõm̦adm̦õde. Ilo jinoin 1 Samuel 25:18 (UBS) ej ba bwe “Abigeil ear kaiur.” Emãn alen an bwebwenato in ilo Baibõl̦ ba bwe kõrã in ear “kaiur.” Abigeil ear kõpooj jet an menin lel̦o̦k ñan Devid im l̦õm̦aro doon. Menin lel̦o̦k ko rar kitibuj pilawã, wain, jiip ko em̦õj kõmatti, wiit, keek in kũreep m̦õrã, im keek in fig. Alikkar bwe Abigeil ear jel̦ã ta ko ewõr ilo m̦weo im̦õn  im e eo ear bõk eddon aolep jerbal ko ilowaan m̦weo. Ej ãinwõt kõrã eo epol̦õmãn me bokin Jabõn Kõnnaan ej kwal̦o̦k kake. (JK. 31:10-31) Ear lel̦o̦k m̦õñã ko ñan rijerbal ro an bwe ren bũki im etal im̦aan. Innem tokãlik, ear etal il̦okwaerl̦o̦k. Bõtab, Baibõl̦ ej ba bwe “ear jab kõnnaanek Nebal, l̦eo pãleen.”​—1 Sa. 25:18, 19, UBS.

¹⁶ Mel̦el̦ein ke bwe Abigeil ear jum̦aik maroñ eo an l̦eo pãleen, eo ej bõran baam̦le eo aerro? Ilo m̦ool, ear jab. Keememej bwe ear nana an Nebal kõm̦m̦an ñan armej eo Jeova ear kapiti bwe en kiiñ. Men in enana Nebal ear kõm̦m̦ane ear jab baj jelõt wõt e ak ear bar jelõt mour ko an elõñ iaan ro ilo m̦weo im̦õn meñe ejjel̦o̦k rueer. Kõn men in, el̦aññe Abigeil ear jab kõm̦m̦an jabdewõt ñan kõjparok ro ilo m̦weo im̦õn bwe ren jab mej, emaroñ nãj kar wõr ruõn kõn bõd eo an l̦eo pãleen. Innem ilo wãween in, Abigeil ear aikuj kõttãik e ñan Anij el̦apl̦o̦k jãn an kar kõttãiki ñan l̦eo pãleen.

17, 18. (1) Ta eo Abigeil ear kõm̦m̦ane ke ear wõnm̦ae Devid? (2) Ta ko Abigeil ear ba ñan Devid, im etke naan ko an rar kõm̦akũt bũruon Devid?

¹⁷ Ejjabto, Abigeil ear iioon Devid im l̦õm̦aro doon. Ilo iien in, ear bar kaiur ilo an kar m̦õkaj im to jãn ioon to̦o̦ñke eo im buñpedo im̦aan Devid. (1 Sa. 25:20, 23, UBS) Innem, ear jino lutõkl̦o̦k aolepen bũruon im akwel̦ap ñan Devid bwe en tũriam̦o kõn l̦eo pãleen im ro ilo m̦weo im̦õn. Ta ko Abigeil ear ba im rar kõm̦akũt bũruon Devid?

¹⁸ Abigeil ear n̦aruon make ke ear ba ñan Devid bwe en jouj im jab n̦aruon Nebal ak en n̦aruon. Im ear kajjitõk ippãn Devid bwe en jol̦o̦k an bõd. Ear ba ñan Devid bwe en jab el̦l̦o̦k ñan Nebal bwe ejettokjãn im bwebwe ãinwõt ãt eo etan. Bõlen ear ba men in ñan kaalikkar bwe el̦ap an em̦m̦an im utiej Devid ñan an itõn m̦anm̦an im kajorrããn etan kõn juon armej ejjel̦o̦k tokjãn. Ear kwal̦o̦k an kile im kautiej Devid ilo an ba bwe ej “tarin̦ae ilo tarin̦ae ko an” Jeova. Naan kein an Abigeil rar kwal̦o̦k an lõke Devid bwe Jeova ej pãd ippãn im kõjerbale. Bareinwõt, ear ba ñane bwe ejel̦ã kõn kallim̦ur eo an Jeova kõn e, ke ear ba: “[Jeova] enaaj . . . kõm̦m̦an bwe kwõn kiiñ in Israel.” Innem, ear wõnm̦aanl̦o̦k wõt im rõjañe Devid bwe en jab m̦anm̦an armej kõnke enaaj wõr ruõn im enaaj “bũrom̦õj ak ajl̦o̦k” tokãlik. (Riit 1 Samuel 25:24-31, UBS.) El̦ap wõt an kar jouj naan kein an Abigeil im lukkuun kõm̦akũt bũruon Devid!

19. (1) Ta eo Devid ear kõm̦m̦ane ãlikin an Abigeil kõnnaan ippãn? (2) Im etke ear nõbare Abigeil?

 ¹⁹ Ta eo Devid ear kõm̦m̦ane? Ear m̦õn̦õn̦õ in bũki menin lel̦o̦k ko an Abigeil im ear ba: “Jen nõbar [Jeova], Anij in Israel, eo ear jilkintok eok rainin bwe kwõn wõnm̦ae eõ! Kam̦m̦oolol Anij kõn an em̦m̦an am̦ lol̦o̦kjen̦ im kõn men in kwaar kõm̦m̦ane rainin ilo am̦ bõbrae eõ jãn aõ naaj kar uror im idenon̦e ñan eõ make.” Devid ear nõbar Abigeil kõn an kar peran im m̦õkaj in wõnm̦aik e. Im ear bar kam̦m̦oolole kõn an kar kabõjrake jãn an nãj kar m̦anm̦an armej. Ear ba: “Kwõn jepl̦aak ñan ijo jikũm̦ im jab inepata. Inaaj kõm̦m̦an ãinwõt am̦ kõn̦aan.”​—1 Sa. 25:32-35, UBS.

20, 21. (1) Etke em̦m̦an joñak eo an Abigeil kõn an kar m̦õn̦õn̦õ in jepl̦aak ñan ippãn l̦eo pãleen? (2) Etke Abigeil ear kwal̦o̦k an peran im mãlõtlõt ke ear kããlõt iien eo em̦m̦an ñan an kõnnaan ippãn Nebal?

²⁰ Ke Abigeil ear ro̦o̦l, emaroñ kar l̦õmn̦ak kõn iien eo ej kab m̦õj an kõnnaan ippãn Devid. Bõlen ear kile joñan an kar Devid oktak jãn l̦eo pãleen. Emaroñ kar lo bwe Devid ear juon em̦m̦aan ejouj im etiljek ñan Jeova, ak l̦eo pãleen ear juon armej nana im ekõbbo̦o̦jo̦j. Bõtab, Abigeil ear jab wõnm̦aanl̦o̦k wõt im l̦õmn̦ak kõn men kein. Baibõl̦ ej ba: “Abigeil ear jepl̦aak ñan ippãn Nebal.” Aet, ear jepl̦aak ñan ippãn l̦eo pãleen. Im ear l̦apl̦o̦k wõt an kate jãn kar m̦okta ñan kajejjeti eddo ko an ãinwõt ke ej lio pãleen Nebal. Ear aikuj ba ñan Nebal kõn menin lel̦o̦k ko ear lil̦o̦ki ñan Devid im l̦õm̦aro doon. Ear wõr an Nebal maroñ ñan jel̦ã kõnke ej pãleen. Ear bar aikuj ba ñane kõn an kar kabõjrake jorrããn eo ear itõn wal̦o̦k m̦okta jãn an Nebal roñ jãn ro jet. Abigeil ear jel̦ã bwe enaaj l̦apl̦o̦k an Nebal jook ñe eroñ men kein jãn ro jet im jab jãn e. Meñe Abigeil ear jel̦ã kõn men kein, ak ear jab maroñ ba ñan l̦eo pãleen ilo tõre in. Etke? Kõnke ilo iien in, Nebal ear lukkuun kadek kõn an kar kõm̦m̦ane juon iien m̦õñã el̦ap ãinwõt an kiiñ ran̦.​—1 Sa. 25:36, UBS.

²¹ Abigeil ear kwal̦o̦k wõt an peran im mãlõtlõt kõnke ear jab kijer in kõnnaanek l̦eo pãleen kõn men ko rar wal̦o̦k. Ak ear kõttar wõt ñan jibboñõnin raan eo tok juon ke ear jako an Nebal kadek. Abigeil ejel̦ã bwe ñe ejako an Nebal kadek, enaaj em̦m̦an an mel̦el̦e kõn men ko ej ba ñane. Ak ilo ejja iien eo wõt, enãj kar l̦apl̦o̦k an kauwõtata kõnke Nebal emaroñ nãj kar  jaje dãpij an illu. Meñe ãindein, ak Abigeil ear kepaake im ba ñane aolep men ko rar wal̦o̦k. Ejjel̦o̦k pere bwe Abigeil ear kõtmãne bwe l̦ein enãj kar lukkuun illu im bõlen kõm̦m̦an jorrããn. Ak ke ear kõnnaan, l̦ein ear baj jijet wõt im jab m̦akũtkũt.​—1 Sa. 25:37, UBS.

22. (1) Ta eo ear wal̦o̦k ñan Nebal? (2) Ta eo bwebwenatoun Abigeil ej kakeememej kõj kake kõn em̦m̦aan ro enana im lãj aer kõm̦m̦an ñan ro pãleer im ajri ro nejier?

²² Ta in ewal̦o̦k ñan Nebal? Ear ‘mej ãnbwinnin im jaje em̦m̦akũtkũt.’ Bõlen ear stroke ak mej rãjetin ãnbwinnin. Im enañin 10 raan ãlikin iien in, ear mej. Bõtab, ear jab mej kõn wõt nañinmej eo an kõnke Baibõl̦ ej ba: “[Jeova] ear m̦an Nebal im emej.” (1 Sa. 25:38, UBS) Ke Anij ear m̦an Nebal, Abigeil ear lukkuun kakkije jãn an kar eñtaan m̦aantak ippãn l̦ein pãleen enana ium̦win elõñ iiõ ko. Rainin, Jeova ejjab kõm̦m̦ani men ko  rekabwilõñlõñ ñan m̦an armej ro renana bwe ren mej. Bõtab, bwebwenato in ej kakeememej kõj bwe Jeova ej loe an em̦m̦aan ro nana im lãj aer kõm̦m̦an ñan ro pãleer im ajri ro nejier. Innem, juon raan ilo iien eo em̦õj an karõke, enaaj bõktok ekajet ioon armej rein renana im kabõjrak er.​—Riit Luk 8:17, UBS.

23. (1) Ta jeraam̦m̦an eo me tokãlik ear wal̦o̦k ñan Abigeil? (2) Etke jejel̦ã bwe ear jab oktak im utiej bũruon kõn jeraam̦m̦an in?

²³ Abigeil ear jab baj anemkwõj wõt jãn juon mour in pãlele enana, ak ear bar wal̦o̦k juon jeraam̦m̦an ñane. Ke Devid ear roñ bwe Nebal emej, ear jilkinl̦o̦k jet iaan em̦m̦aan ro doon bwe ren lel̦o̦k an pepe ñan Abigeil ñe em̦õn̦õn̦õ in pãleeke. Ta kar uwaak eo an Abigeil? Ear ba: “Ñaij karejeran, im ipojak in kwal̦ neen ro karejeran.” Naan kein an rej kaalikkar bwe ear jab oktak im utiej bũruon Abigeil kõn an nãj pãleek Devid. Joñan, ear ba bwe enaaj jerbal ñan ro karejeran Devid! Ãlikin an ba men in, bwebwenato in ej ba bwe ear bar kaiur. Ak ilo iien in, ej kaiur bwe en ilo̦k ñan ippãn Devid.​—1 Sa. 25:39-42, UBS.

24. (1) Ta apañ ko Abigeil ear iiooni ke ear pãleek Devid? (2) Ewi wãween an kar Devid im Anij watõk Abigeil?

²⁴ Ke Abigeil ear pãleek Devid, ejjab mel̦el̦ein bwe ejjel̦o̦k apañ enaaj kar iioone. Ekar wõr kadede pãleen Devid kõnke ear m̦areik Ehinoam. Ilo kar tõre in, Anij ear kõtl̦o̦k bwe armej ro ren pãleek elõñl̦o̦k jãn juon. Meñe ãindein, ak ejjel̦o̦k pere bwe ear jab pidodo ñan kõrã ro rej koba ippãn l̦õm̦aro elõñl̦o̦k jãn juon pãleer, el̦aptata ñe kõrã rein rej lukkuun tiljek ñan Jeova. Im ilo kar tõre in, Devid ejjañin jino an kiiñ. Mel̦el̦ein men in bwe elõñ apañ im wãween ko reppen renaaj kar iiooni. Bõtab, Abigeil ear jipañ im rejetak wõt Devid toon wõt an kar mour ippãn. Ejjabto tokãlik, ear l̦otak juon nejierro l̦addik. Abigeil ear kile bwe Devid ear kaorõke im kõjparoke. Bareinwõt, juon iien, ke jet rinana rar itok im ko̦o̦te Abigeil, Devid ear jibadekl̦o̦k im lo̦mo̦o̦rene! (1 Sa. 30:1-19, UBS) Men in Devid ear kõm̦m̦ane ej kaalikkar an l̦oore joñak eo an Jeova Anij, eo el̦ap an yokwe im kaorõk kõrã ro me remãlõtlõt, reperan, im retiljek ñane.