1, 2. (1) Ke Jijej ear kõnono ilo Kaperneum, ta eo Piter emaroñ kar kõjatdikdik bwe enaaj ewal̦o̦k? (2) Ak ta eo ear wal̦o̦k?

 PITER ej mejãn inepata ke ej kalimjek mejãn armej ro rej roñjake Jijej. Ijin rej pãd ie ej ilowaan im̦õn kweilo̦k eo ilo Kaperneum. Eñin bukwõn eo an Piter im ijo peejnej eo an ear pãd ie. Im ilo itueañin Lom̦al̦o in Galili, elõñ ro m̦õttan, ro nukũn, im ro jet ewõr aer peejnej im ejel̦ã kajjier rar jokwe ie. Ejjel̦o̦k pere, Piter ear kõjatdikdik bwe armej in bukwõn in an renaaj bar tõmak bwe Jijej ej Messaia eo. Ear l̦õmn̦ak bwe renaaj m̦õn̦õn̦õ in roñjake an Jijej kwal̦o̦k kõn Aelõñ in Anij kõnke ej rũkaki eo el̦aptata iaan aolep rũkaki. Bõtab, ekar jab ãindein men ko rar wal̦o̦k ilo kar raan eo.

² Elõñ iaan armej ro rar bõjrak aer roñjake. Jet iaaer ear l̦ap ainikien aer wũnojidikdik im kwal̦o̦k aer jab errã kõn katak eo Jijej ej kwal̦o̦ke. Ak men eo ear l̦apl̦o̦k an Piter inepata kake ej kõn rũkal̦oor ro jet an Jijej. Piter ej reilo̦k im loe an oktak turin mejãer. Ejako kiiõ aer m̦õn̦õn̦õ im itoklimo in kõn̦aan jel̦ã kõn katak eo an Jijej. Bareinwõt ejako aer m̦õn̦õn̦õ in jel̦ã kõn m̦ool eo. Turin mejãer ear oktak im alikkar aer inepata im illu. Jet iaaer rar ba bwe katak eo an Jijej ear kaillibõkbõk. Kõnke rar jab kõn̦aan wõnm̦aanl̦o̦k wõt im roñjake, rũkal̦oor rein rar diwõj im ilo̦k jãn im̦õn kweilo̦k eo. Im ear bar bõjrak aer l̦oore Jijej.​—Riit Jon 6:60, 66, UBS.

3. Ta eo tõmak eo an Piter ear jipañe ñan kõm̦m̦ane?

³ Iien in ear kanooj pen ñan Piter im rijjilõk ro jet. Piter ear jab bar lukkuun mel̦el̦e kõn katak eo an Jijej. Im ejjel̦o̦k pere bwe emaroñ kar mel̦el̦e unin an kar katak eo an Jijej kal̦õkatip ro jet. Etke? Kõnke rar jab mel̦el̦e kõn mel̦el̦ein naan ko an. Ta eo Piter enaaj kõm̦m̦ane? Eokwe, ear bar wõr iien m̦oktal̦o̦k Piter ear aikuj kam̦ool an tiljek ñan Irooj in an, Jijej. Im tõre in ear jab iien eo ãliktata kar mãlejjoñe el̦aññe  enaaj tiljek wõt. Jen lale kiiõ wãween an kar tõmak eo an Piter jipañe ñan tiljek wõt meñe ear jelm̦ae mãlejjoñ ko.

4, 5. Ta ko Jijej ear kõm̦m̦ani me armej ro rar jab kõtmãne kaki?

⁴ Piter ekõn bwilõñ kõn ta ko Jijej ear ba im kõm̦m̦ani. Jet iien naan im kõm̦m̦an ko an Irooj in an rar oktak jãn ta ko armej ro rej kõtmãne bwe en kar ba im kõm̦m̦ani. Ilo kar raan eo m̦oktal̦o̦k, Jijej ear kõm̦m̦ane juon menin kabwilõñlõñ ke ear naajdik to̦ujin armej ro. Kõn men in, rar kajjioñ kõm̦m̦an bwe en aer kiiñ. Ak rar bwilõñ ke Jijej ear ilo̦k jãn er, im ear jiroñ rũkal̦oor ro an bwe ren uwe ilo wa eo im jerak ñan Kaperneum. Innem ke rũkal̦oor ro rar aõn̦õn̦ ilo boñõn eo, rar bar bwilõñ ke Jijej ear etetal ioon n̦o ko rel̦l̦ap ilo Lom̦al̦o in Galili. Menin bwilõñ in Jijej ear kõm̦m̦ane ear bar katakin Piter kõn aorõkin an tõmak.

⁵ Ilo jibboñõn eo, Jijej im rũkal̦oor ro an rar lo bwe jar ko rar bar uwe ioon wa ko im anõke er. Ilo m̦ool, unin an kar armej ro kõn̦aan itok ñan ippãn Jijej ej kõnke rar kõn̦aan bar loe an naajdik er ilo kabwilõñlõñ. Ejjab kõnke rar kõn̦aan roñjake katak ko rem̦ool. Innem Jijej ear kauweik er kõn aer l̦õmn̦ak wõt kõn men ko an kanniõk. (Jon 6:25-27, UBS) Armej ro rar wõnm̦aanl̦o̦k wõt im kõnnaan kake men in ilo im̦õn kabuñ eo ilo Kaperneum, ilo iien eo Jijej ear kajjioñ katakin er kõn juon katak eaorõk. Eñin katak eo armej ro ilo Kaperneum rar ilbõk im illu kake, im rar jab kõtmãne bwe renaaj kar roñ men ko ear ba.

6. Waanjoñak ta eo Jijej ear kõjerbale, im ta kar l̦õmn̦ak eo an ro rar roñjake?

⁶ Jijej ear kõn̦aan bwe armej ro ren jibadektok kõnke rej kile bwe Anij enaaj lel̦o̦k mour indeeo ñan er el̦aññe renaaj tõmak ilo katok in mour eo an im anõke joñak eo an. Ear jab kõn̦aan bwe ren itok ñan ippãn kõnke ear naajdik er. Kõn men in, ear kwal̦o̦k juon waanjoñak im keidi e make ñan manna eo ear wõtlo̦k jãn lañ ilo tõre ko an Moses. Ke jet rar jab errã kõn men in, ear kaalikkarl̦o̦k wõt waanjoñak in ñan kwal̦o̦k bwe emenin aikuj ñan aer kañ kanniõkin im idaak bõtõktõkin bwe ren maroñ bõk mour indeeo. Ke ear ba naan kein, armej ro rar lukkuun illu. Jet iaaer rar ba: “Katak kein el̦ap aer pen. Wõn emaroñi?” Joñan elõñ iaan rũkal̦oor ro an rar  bõjrak jãn aer l̦oore. a (Lale kõmel̦el̦e eo itulal̦.)​—Jon 6:48-60, 66, UBS.

7, 8. (1) Ta eo Piter ejjañin kar mel̦el̦e kake kõn eddo eo an Jijej? (2) Ewi wãween an kar Piter uwaake kajjitõk eo an Jijej ñan kar aolep rijjilõk ro?

⁷ Ta eo Piter enaaj kõm̦m̦ane kiiõ? E bareinwõt emaroñ kar pok im jab mel̦el̦e kõn naan ko an Jijej. Ejjañin kar lukkuun mel̦el̦e bwe Jijej ear aikuj mej ñan an kajejjet ankilaan Anij. Piter ear ke l̦õmn̦ak in bõjrak jãn an l̦oore Jijej ãinwõt rũkal̦oor ro jet me rar ilo̦k ilo kar raan eo? Ear jab. Ewõr juon men ear kõm̦m̦an bwe Piter en oktak jãn em̦m̦aan ro rar ilo̦k jãn Jijej. Ta in?

⁸ Eokwe, ke Jijej ear reilo̦k ñan rijjilõk ro an im ba: “Ak komeañ kom̦ kõn̦aan ke bareinwõt ilo̦k?” (Jon 6:67, UBS) Piter eo jinointata ear uwaak meñe Jijej ear kõnnaan ñan aolepen rijjilõk ro 12. Enañin aolep iien, ekkã an kar Piter eo m̦oktata ej kwal̦o̦k l̦õmn̦ak ko an. Bõlen kar e eo erũttotata iaaer. Meñe jejjab lukkuun jel̦ã, ak ear juon eo ekõn kõnnaan im kwal̦o̦k an l̦õmn̦ak. Ejeja an kar dãpij l̦õmn̦ak ko an. Eñin men eo elukkuun kar em̦m̦an kõn e. Kõn men in, ear uwaake Jijej kõn naan kein me enañin aolep rej keememeji ñan rainin: “Irooj, wõn eo kõm naaj ilo̦k ñan ippãn? Ewõr ippam̦ naan ko rej letok mour indeeo.”​—Jon 6:68, UBS.

9. Ewi wãween an kar Piter kwal̦o̦k an tiljek wõt ñan Jijej?

⁹ Naan kein rejjab ke tõpar bũruom̦? An kar Piter tõmak ilo Jijej ear jipañe ñan kwal̦o̦k juon men ekanooj aorõk. Ta in? Ej tiljek. Piter ear kile bwe Jijej ej Rũlo̦mo̦o̦r eo Jeova ear letok bwe en lo̦mo̦o̦ren armej. Ear bar kile bwe naan ko wõt an me ear katakin armej kaki ikijjeen Aelõñ eo an Anij remaroñ letok mour indeeo. Ear jel̦ã bwe meñe ewõr jet men ear jab mel̦el̦e kaki, ak ejjel̦o̦k bar juon jikin emaroñ etal ñane bwe en maroñ kabuñbũruon Anij im bõk jeraam̦m̦an eo kõn mour indeeo.

10. Ewi wãween ad maroñ tiljek wõt ãinwõt kar Piter?

¹⁰ Eñin ke bar eñjake eo am̦? Ekabũrom̦õjm̦õj bwe elõñ rej ba rej yokwe Jijej ak rejjab tiljek wõt ñane. Ñan kwal̦o̦k bwe jej m̦ool ilo ad tiljek ñan Jijej, jej aikuj kaorõki katak ko an ãinwõt kar Piter. Jet iien jemaroñ jab mel̦el̦e kake katak ko an Jijej im emaroñ jab ekkar ñan kõn̦aan ko ad ak men ko jej  kõtmãne kaki. Bõtab, jej aikuj katak kõn men kein, kate kõj ñan mel̦el̦e kaki, im l̦oori ilo mour ko ad. Eaorõk bwe jen kwal̦o̦k ad tiljek kõnke men eo de in emaroñ tõll̦o̦k kõj ñan mour indeeo. Im eñin ej kõn̦aan eo an Jijej ñan kõj.​—Riit  Sam 97:10.

11. Ia eo Jijej ear tõl rũkal̦oor ro an ñane?

¹¹ Ejjabto ãlikin wõt aer kar poub, Jijej ear ãñin rijjilõk ro an im jet iaan rũkal̦oor ro ilo juon ial̦ aetok ñan ijoko ituiõñ. Tol̦ Hermon ear pãd ituiõñ tata in Ãneen Kallim̦ur eo im ear jin̦o ioon tol̦ in. Jet iien kwõmaroñ reilo̦k jãn Lom̦al̦o in Galili im loe tol̦ in. Ilo tõre in me Jijej im rũkal̦oor rein rar etetal ilo bukwõn ko ilo Seseria Pilippai, rar epaaketok Tol̦ Hermon. Ijin rar pãd ie ear aiboojoj im rar maroñ lo ijoko iturõkin Ãneen Kallim̦ur eo. Eñin ijo me Jijej ear kajjitõk ippãn rũkal̦oor rein an kõn juon kajjitõk eaorõk.

12, 13. (1) Etke Jijej ear kõn̦aan jel̦ã ta l̦õmn̦ak ko an armej ro kõn wõn e? (2) Ilo an kar Piter uwaake Jijej, ewi wãween an men in kwal̦o̦k bwe ear m̦ool tõmak eo an?

¹² “Wõn ña ilo an armej ro ba?” Jijej ear kõn̦aan jel̦ã ewi wãween an kar armej ro l̦õmn̦ak kõn e. Jemaroñ l̦õmn̦akel̦o̦k an Piter lukkuun kalimjek mejãn Jijej im kile an Irooj in an jouj, im joñan an l̦ap im alikkar an mãlõtlõt. Jijej ear kõn̦aan jel̦ã ta l̦õmn̦ak ko an armej ro kõn wõn e. Rũkal̦oor ro an Jijej rar uwaake im kwal̦o̦k l̦õmn̦ak ko rebõd me enañin aolep armej rar ba kõn e. Bõtab, ear kõn̦aan jel̦ã ta l̦õmn̦ak ko aer. Ear kõn̦aan lale el̦aññe kar bar ãindein l̦õmn̦ak ko an rũkal̦oor ro an. Innem ear kajjitõk ippãer: “Ak kom̦, wõn ña ilo ami ba?”​—Luk 9:18-20, UBS.

¹³ Piter ear bar m̦õkaj an uwaak im ba: “Kwe kwõj Messaia eo, Nejin Anij emour.” E eo ear ba naan kein me elõñ iaaer rar bar errã ippãn kaki. Jemaroñ baj pijaikl̦o̦k an Jijej mejãn m̦õn̦õn̦õ ke Ej nõbare kõn an jim̦we uwaak eo an. Jijej ear kakeememej Piter bwe Jeova Anij eo ear kaalikkar m̦ool in ñan ro em̦ool aer tõmak. Jeova ear kamaroñ Piter ñan kile bwe Jijej ej Messaia eo kar kallim̦ur kake. Eñin ej juon iaan men ko rel̦l̦ap me Jeova ear kaalikkar ñan ro doon.​—Riit Matu 16:16, 17, UBS.

14. Eddo ta ko raorõk Jijej ear lil̦o̦k ñan Piter?

¹⁴ Eñin ej Messaia eo kar kanaan kake bwe ej dekã eo rũkkal  ro rar jol̦o̦ke. (Sam 118:22, UBS; Luk 20:17, UBS) Jijej ear jitõñl̦o̦k ñan kanaan kein ke ear kwal̦o̦k kõn an Jeova naaj kajutak juon eklejia ioon dekã in. Dekã eo in ej kab m̦õj an Piter ba bwe ej Messaia eo. Innem, Jijej ear lel̦o̦k jet eddo raorõk ñan Piter ilo eklejia in. Ejjab mel̦el̦ein bwe ear kautieje Piter jãn rijjilõk ro jet ãinwõt an ro jet l̦õmn̦ak. Ear baj lel̦o̦k wõt elõñl̦o̦k eddo bwe Piter en loloorjaki. Ear lel̦o̦k ñan Piter “ki ko ki in aelõñ in lañ.” (Matu 16:18, 19) Ear juon jeraam̦m̦an ñan Piter ñan an kõpel̦l̦o̦k kõjatdikdik eo ñan ro jet bwe ren del̦o̦ñe Aelõñ eo an Anij. Kõjatdikdik in ear pel̦l̦o̦k m̦okta ñan RiJu ro, innem tokãlik RiSameria ro, im ãliktata ñan riaelõñ ko ak ro rejjab RiJu.

15. Etke Piter ear kauweik Jijej, im ta eo ear ba ñane?

¹⁵ Bõtab tokãlik, Jijej ear ba bwe eo ej bõk el̦ap enaaj aikuj in kwal̦o̦k el̦ap, im Piter kar m̦õttan armej ro Jijej ej kwal̦o̦k kake er. (Luk 12:48, UBS) Jijej ear wõnm̦aanl̦o̦k wõt im kwal̦o̦k katak ko raorõk im rem̦ool kõn Messaia eo, ekoba kõn iien eo enaaj eñtaan im mej ilo Jerusalem. Piter ear inepata ke ear roñ kõn men kein. Innem, ear ãñin Jijej im kattol̦o̦k jidik erro jãn armej ro im jino an kauweiki. Ear ba ñane bwe en jab kõnono rot in kõn e make im bwe men in eban wal̦o̦k ñane.​—Matu 16:21, 22, UBS.

16. (1) Ewi wãween an kar Jijej kajim̦we Piter? (2) Ta eo jemaroñ katak jãn naan ko an Jijej ñan Piter?

¹⁶ Piter ear l̦õmn̦ak ej jipañe Jijej. Kõn men in, Piter emaroñ kar lukkuun ilbõk kõn naan ko Jijej ej ba ñane. Jijej ear oktakl̦o̦k jãn Piter im kalimjek rũkal̦oor ro jet me remaroñ kar bar bõk ejja l̦õmn̦ak rot eo wõt an Piter. Ear ba: “Kwõn ilo̦k ilikũ, Setan! Kwõj itõn l̦atipñõl Eõ; bwe kwõjjab l̦õmn̦ak kõn men ko an Anij, a kõn men ko an armej ran̦.” (Matu 16:23; Mark 8:32, 33, UBS) Ebar wõr tokjãn naan kein an Jijej ñan kõj aolep. Epidodo ñan kõtl̦o̦k bwe l̦õmn̦ak ko ad make im an armej ro ren aorõkl̦o̦k jãn l̦õmn̦ak ko an Anij. Kõn men in, meñe jej kõn̦aan jipañ juon armej ak jemaroñ jab kile bwe jej rõjañe ñan kõm̦m̦ane juon men ej  kabuñbũruon Setan im jab Anij. Bõtab, ta eo Piter ear kõm̦m̦ane ke Jijej ear kajim̦weiki?

17. Ta mel̦el̦ein an kar Jijej ba ñan Piter, “Kwõn ilo̦k ilikũ, Setan”?

¹⁷ Piter emaroñ kar kile bwe Jijej ear jab keidi e ñan Setan Tepil̦ eo. Unin ej kõnke ear oktak an kõnono ñan Piter jãn kar Setan. Ilo iien eo Setan ear kajjioñ kapoiki, ear kajju ba, “Kwõn ilo̦k, Setan.” Bõtab, ilo iien in ke ear kõnnaan ñan Piter, ear ba: “Kwõn ilo̦k ilikũ, Setan.” (Matu 4:10) Ke Jijej ear ba naan kein, ear jab mel̦el̦ein bwe ear jilkinl̦o̦k rijjilõk in an me ear lo elõñ men ko rem̦m̦an kõn e. Ear baj kajim̦we wõt l̦õmn̦ak eo ebõd an Piter. Elukkuun alikkar bwe Piter ear ãinwõt juon kein l̦atipñõl ñan irooj in an. Kõn men in ear aikuj pãd ilikin ãinwõt juon rũkal̦oor eo em̦m̦an im ej rejetake.

18. Ewi wãween an kar Piter kaalikkar bwe ear tiljek wõt, im ewi wãween ad maroñ anõk joñak in an?

¹⁸ Piter ear ke akwããl, illu, im jememe? Ear jab. Ear kõttãik wõt bũruon im roñjake ke kar kajim̦weiki. Juon in iien ear bar kaalikkar an tiljek. Enaaj wõr iien ro rũkal̦ooran Kũraij renaaj aikuj bõk naan in kauwe ko. Innem ñe renaaj kõttãik bũrueer im pokake kab katak jãni, renaaj epaakel̦o̦k Jijej Kũraij im Jemãn, Jeova Anij.​—Riit Jabõn Kõnnaan 19:20, UBS.

19. Ta eo Jijej ear ba me ear kabwilõñ rũkal̦oor ro, im ta eo Piter emaroñ kar l̦õmn̦ake?

¹⁹ Tokãlik, Jijej ear bar ba jet naan ko im rar kailbõk er. Ear ba: “Em̦ool Ij ba ñan kom̦, jet iaan ro rej jutak ijin, rejãmin edjoñ mej ñan iien eo renaaj lo Nejin armej ej itok ilo An aelõñ.” (Matu 16:28) Ejjel̦o̦k pere bwe Piter emaroñ kar lukkuun kõn̦aan jel̦ã ta mel̦el̦ein naan kein an Jijej. Bõlen ear l̦õmn̦ak bwe kõn an kar Jijej kauweik e enaaj kiiõ jako an bõk jeraam̦m̦an ko ak eddo ko kar ba bwe enaaj kõm̦m̦ani.

20, 21. (1) Ta pijen eo Piter ear loe? (2) Ta eo armej ro ruo ilo pijen eo rej ba ñan Jijej me ear jipañ Piter ñan kajim̦we kar l̦õmn̦ak eo an?

²⁰ Juon wiik tokãlik, Jijej ear bõk Jemes, Jon, im Piter ñan  “juon tol̦ eutiej.” Emaroñ kar bõk er ñan Tol̦ Hermon me ekar 15 m̦ail̦ ettol̦o̦k jãn ijo rar itok ñane. Ear boñ ilo iien in kõnke l̦õm̦arein jilu rar kate er bwe ren jab mejki. Bõtab ke Jijej ej jar, ear wõr juon men ear wal̦o̦k im ear kõm̦m̦an bwe en kajju jako aer m̦õk im mejki.​—Matu 17:1, UBS; Luk 9:28, 29, 32, UBS.

²¹ Ke Jijej ej jar, ear jino oktakl̦o̦k nemãmeen. Ear jino an ejjatõltõl turin mejãn im ear meraml̦o̦k wõt ãinwõt meram in al. Nuknuk ko an rar bar ejjatõltõl im mouj. Innem ke erjel ej reilo̦k, rej lo ruo armej rej jutak iturin Jijej. Armej rein rej kõkkar kõn Moses im Ilaija. Im erro ej kõnono ippãn Jijej kõn “an naaj m̦õkaj in kajejjet pepe eo an Anij kõn an mej ilo Jerusalem.” Alikkar men in ej jitõñl̦o̦k ñan mej im jerkakpeje eo an Jijej. Piter ear kiiõ kile bwe ear bõd l̦õmn̦ak eo an kõn Jijej ke ear ba bwe eban eñtaan im mej.​—Luk 9:30, 31, UBS.

22, 23. (1) Ewi wãween an kar Piter kwal̦o̦k bwe ear juon eo ejouj im em̦õn̦õn̦õ in lale armej? (2) Jeraam̦m̦an ta eo juon ear bar wal̦o̦k ñan Piter, Jemes, im Jon ilo boñõn eo?

 ²² Piter ear l̦õmn̦ak bwe ej aikuj bõk ijo kun̦aan im jipañ ilo wãween eo ekabwilõñlõñ ear wal̦o̦k. Emaroñ kar kõn̦aan kõm̦m̦ane men in ñan kaetokl̦o̦k pijen eo. Etke? Kõnke el̦ak lale ãinwõt Moses im Ilaija rej pojak in em̦m̦akũt im etal jãn Jijej. Eñin unin Piter ear ba: “Rũkaki, em̦m̦an wõt ad pãd ijin, kõm naaj kõm̦m̦ane jilu em̦ nuknuk, juon im̦õm̦, juon im̦õn Moses, juon im̦õn Ilaija.” Jejel̦ã bwe rũkarejar rein ruo retiljek an Jeova, Moses im Ilaija, rar mej wõt ilo iien ko etto. Kõn men in, rejjab aikuj jikin aer jokwe. Ilo m̦ool, Piter ear jab lukkuun kõl̦mãnl̦o̦kjen̦ m̦okta jãn an kõnnaan. Bõtab, men in Piter ear kõm̦m̦ane ej kaalikkar ñan kõj bwe ear juon eo ejouj im em̦õn̦õn̦õ in lale armej.​—Luk 9:33, UBS.

²³ Ilo boñõn eo, ear bar wal̦o̦k juon jeraam̦m̦an ñan Piter, Jemes, im Jon. Juon kõdo̦ ear wal̦o̦k im kalbubuuk ioon tol̦ eo. Innem, juon ainikien ear itok jãn kõdo̦ in. Ainikien eo kar ainikien Jeova Anij! Ear ba: “Eñin Nejũ eo em̦õj aõ kããlõte kom̦win roñjake e!” Ear jem̦l̦o̦k pijen eo im rar bar make iaaer ippãn Jijej ioon tol̦ eo.​—Luk 9:34-36, UBS.

24. (1) Ta tokjãn ko Piter ear bõki jãn kar pijen eo ear loe? (2) Ewi wãween pijen in emaroñ bar jipañ kõj?

²⁴ Ear juon jeraam̦m̦an ñan Piter ke ear loe pijen eo, im ej bar juon jeraam̦m̦an ñan kõj! Jejjo iiõ ko tokãlik, Piter ear jeje kõn jeraam̦m̦an eo ear wal̦o̦k ñane ilo boñõn eo. Ear juon jeraam̦m̦an ñan an kar loe jidikin aiboojojin an Jijej naaj Kiiñ ilañ im ‘epãd ijo ke Anij ear lel̦o̦k ñan Jijej utiej im aiboojoj.’ Pijen in ear kam̦ool elõñ iaan kanaan ko jãn Naanin Anij im ear kakajoor tõmak eo an Piter bwe en maroñ kijenmej wõt ium̦win mãlejjoñ ko rar wal̦o̦k ñane tokãlik. (Riit 2 Piter 1:16-19, UBS.) Pijen in emaroñ bar jipañ kõj im kal̦apl̦o̦k ad tõmaki kanaan ko kõn Jijej im Aelõñ eo an Anij. Jenaaj amãni jeraam̦m̦an ko jãn Aelõñ eo an Anij el̦aññe jenaaj tiljek wõt ñan Jijej, katak jãne, pokake naanin kauwe ko an, im kõttãik bũruod ilo ad anõke joñak eo an raan otemjej.