1. Etke Marta ear bũrom̦õj im ewi joñan an kar bũrom̦õj?

 MARTA ej keememej wõt jikin eo im iien eo rar pinejl̦o̦k mejãn lõb eo libõn l̦eo jatin kõn juon dekã kileplep. Ear kanooj l̦ap an eddo bũruon im bũrom̦õje Lazerõs. Emaroñ kar pen an tõmak bwe em̦m̦aan in jatin me ejitõnbõro ippãn em̦õj an jako. Ilo tõre in, em̦õj an mootl̦o̦k de emãn raan in an Lazerõs mej. Im ilo aolepen raan kein emãn, ear lõñ armej ro rar bũrom̦õjl̦o̦k ippãn baam̦le in im kaenõm̦m̦an er.

2, 3. (1) Ta eo Marta emaroñ kar kõm̦m̦ane ke ear loe Jijej? (2) Naan ko rekanooj aorõk an Marta rej kaalikkar ta kõn e?

² Im kiiõ, em̦m̦aan eo Lazerõs ekar kanooj epaake ej jutak im̦aan mejãn Marta. Bõlen ke Marta ej loe Jijej ej kab baj l̦apl̦o̦k wõt an bũrom̦õj im eddo bũruon. Etke? Kõnke Jijej wõt iaan aolep armej ioon lal̦ in emaroñ kar kõmouri l̦eo jatin jãn nañinmej eo an ak ear jab pãd ilo iien eo ear nañinmej. Ak meñe Marta ear bũrom̦õj, ear aenõm̦m̦anl̦o̦k bũruon ke ear wõnm̦ae Jijej ilo bukwõn in me epaake Betani. Meñe ear jab aetok an pãd ijin ippãn Jijej ak ke ear lo an Jijej jouj ñane im kwal̦o̦k an mel̦el̦e kõn eñjake ko an, men in ekar kakajoore. Jijej ear kõjerbal kajjitõk ko ñan jipañe Marta ñan kõjparok wõt tõmak eo an im ñan l̦õmn̦ak kõn kõjatdikdik eo kõn ro remej. Eñin iien eo Marta ear ba naan kein rekanooj aorõk: ‘Aet Irooj! Ij tõmak bwe kwe Messaia eo, Nejin Anij, eo ear itok ñan lal̦.’​—Jon 11:27, UBS.

³ Naan kein an rej kaalikkar bwe ear l̦ap an Marta tõmak. Meñe jidik wõt an Baibõl̦ kwal̦o̦k kõn mour eo an Marta, ak elõñ men ko jemaroñ katak jãne im remaroñ kakajoor tõmak eo ad. Bwe jen jel̦ã ta kein, em̦m̦an jen kiiõ lale jinoin bwebwenatoun Marta ilo Baibõl̦.

4. (1) Kar Marta ãt eo ilo baam̦le eo an? (2) Ewi joñan an kar baam̦le in jel̦ã kajjien Jijej?

⁴ Jet allõñ ko m̦oktal̦o̦k ke Lazerõs ear ãjmour wõt, ekar wõr juon armej elukkuun aorõk im ear itok ñan m̦weo im̦õn ilo Betani. Wõn in? Ej Jijej Kũraij. Lazerõs, Marta, im Meri rar jemjein jemjati im erjel wõt jilu ilo kar m̦weo im̦weer. Ilo kar tõre eo, ekar jeja an ro rerũtto im rej jemjein jemjati jokwe ilo juon wõt em̦. Jet rũmmãlõtlõt rej ba bwe Marta emaroñ kar rũttotata kõnke e eo el̦ap an kar jerbal im kõpooje aolep men ko ñan rilotok in aer. Im enañin aolep iien ñe Baibõl̦ ej kwal̦o̦k kõn erjel ekkã an ba etan Marta m̦oktata. (Jon 11:5, UBS) Jejjab jel̦ã el̦aññe ear wõr aer make baam̦le im em̦õj aerjel m̦are. Men eo de in jejel̦ã ej bwe rar lukkuun epaake Jijej. Ke Jijej ear kwal̦o̦k naan ilo Judia ekkã an kar jokwe ippãer. Armej ro ilo kar jikin in rar lukkuun jum̦ae Jijej im dike. Innem, ejjel̦o̦k pere bwe ear l̦ap an kam̦m̦oolol ke ear pãd ilo m̦wiin me ear lo aenõm̦m̦an im aer rejetake.

5, 6. (1) Etke ear l̦ap an Marta poub ilo iien eo Jijej ear lotok er? (2) Ta eo Meri ear kõm̦m̦ane ke Jijej ear lotok er?

⁵ Marta ear l̦ap an loloorjake m̦weo im̦weer bwe en juon jikin eaenõm̦m̦an im pojak ñan rilotok ro aer. Ear juon eo ejjerbalbõl im l̦ap wõt an poub. Innem ke Jijej ear lotok er, ear bar l̦ap an Marta poub. Ear kõpooj elõñ m̦õñã ñan rilotok in aer ej make wõt aorõktata, im bõlen bar jet iaan ro rar itok ippãntok. Ilo tõre ko, elukkuun kar aorõk ñan kwal̦o̦k karwainene ñan rilotok ro. Ñe juon ej etal ñan juon em̦ im lol̦o̦k rũm̦weo, ekkã aer wõnm̦ae im mejenmaik e, utũk juuj ko an, kwal̦e neen, im kapit bõran kõn weil̦ ñaj. (Riit Luk 7:44-47, UBS.) Ekar juon m̦anit bwe en em̦m̦an aer lale ro rej lol̦o̦k er im ren kõpooj jikin aer kakkije im kijeer m̦õñã.

⁶ Marta im Meri rar poub in kõpooji men ko ilo m̦weo ñan iien lotok in an Jijej. Meñe elõñ rej l̦õmn̦ak wõt bwe Meri ekar juon eo ekijooror in roñjake im katak, ak ekar bar jel̦ã jerbal kõnke ilo jinoin ear jipañ Marta. Bõtab ke Jijej ear tõkeaktok, ear bõjrak jãn an jerbal. Unin ej kõnke Jijej ear watõk iien lotok in an bwe ej juon iien ñan an katakin ro  rar pãd ilo m̦weo. Jijej ear oktak jãn rũtõl in kabuñ ko ilo tõre eo. Etke? Kõnke ear kaorõk kõrã ro im katakin er kõn men eo ear kwal̦o̦k kake ke ear kwal̦o̦k naan. Ta in? Ej Aelõñ eo an Anij. Meri ear lukkuun m̦õn̦õn̦õ ilo iien in bwe ear maroñ jijet turin neen Jijej im roñjake an katakin.

7, 8. Etke Marta ear jino l̦apl̦o̦k an illu im inepata, im ewi wãween an kar kwal̦o̦k an illu?

⁷ Baj l̦õmn̦ake m̦õk an Marta jino l̦apl̦o̦k an illu im inepata. Kõn an lõñ m̦õñã ko ear aikuj kõpooji im lõñ jerbal ko ear aikuj kadedel̦o̦k ñan aer pojak ñan rilotok ro aer, ear jino l̦apl̦o̦k wõt an inepata im m̦adjaki men kein. Ke ej itoitak ilowaan m̦weo im loe an lio jatin jijet wõt ak ejjab jipañe, ear ke illu, kõrraat, ak kajjememe? Eokwe, jemel̦el̦e ñe ekar ãindein kõnke ear make iaan im kõm̦m̦ani aolep jerbal ko.

⁸ Ear etal im Marta ejjab maroñ dãpij an illu im inepata. Jijej ej baj bwebwenato wõt ak Marta eba ñane: “Irooj, lio jatũ ej likũt bwe in make kõm̦m̦ani jerbal ko otemjej ta ãinwõt juon ippam̦ ke? Kwõn ba ñane bwe en itok in jipañ eõ!” (Luk 10:40, UBS) Wãween an kar kõnnaan ear lukkuun eddo im kajju. Elõñ ukok in Baibõl̦ ko rel̦ak ukote kajjitõk in an Marta rej ba: “Irooj kwõjjab kea ke . . . ?” Innem ear kajjitõk ippãn Jijej bwe en kauweik Meri im jiroñe bwe en etal im jerbal.

9, 10. (1) Ewi wãween an kar Jijej uwaake Marta? (2) Etke jejel̦ã bwe Jijej ear jab kõjekdo̦o̦n an kar Marta eñtaan im kõpooj elõñ m̦õñã ko?

⁹ Uwaak eo an Jijej emaroñ kar kailbõke Marta. Im ejjab Marta wõt ak enañin aolep ro rar riiti bwebwenato in ilo Baibõl̦ rar bar ilbõk kake. Jijej ear uwaake ilo jouj im ba: “Marta, Marta! Kwõj inepata im abn̦õn̦õ kõn elõñ men ko, ak juon wõt men eo kwõj aikuji. Ejim̦we an Meri kããlõt men in, im ijãmin bõke jãne.” (Luk 10:41, 42, UBS) Kar ta mel̦el̦ein an Jijej ba men in? Ear ke ba bwe el̦ap wõt an kar Marta m̦adjaki men ko ej kõpooji jãn an kaorõk men ko an Anij? Ear ke kõjekdo̦o̦n an kar eñtaan im kõpooje juon kõjota ekanooj in em̦m̦an?

 ¹⁰ Jaab. Jijej ear lo bwe em̦m̦an men in Marta ear kõm̦m̦ane im bwe ear itok jãn bũruon. Bareinwõt, ear jab l̦õmn̦ak bwe enana ñan kõm̦m̦an elõñ m̦õñã ko ñan kwal̦o̦k karwainene ñan ro jet. Etke jej ba men in? Kõnke m̦oktal̦o̦k Jijej ear etal ñan juon iien m̦õñã el̦ap me rar kõpooje ñane ilo im̦weo im̦õn Matu. (Luk 5:29, UBS) Likjab eo an Marta ilo kar iien in ejjab kõn an kar kõm̦m̦an m̦õñã. Men eo ekar likjab kake ej bwe ear jab likũt men ko raorõk bwe ren m̦oktata. Joñan an kar poub kõn m̦õñã ko, ear mel̦o̦kl̦o̦k men eo aorõktata en kar kõm̦m̦ane. Ta in?

11, 12. Ewi wãween an kar Jijej kajim̦we Marta ilo jouj?

¹¹ Baj l̦õmn̦ak m̦õk! Jijej, eo ej make wõt Nejin Jeova  Anij, ear pãd ilo m̦weo im̦õn Marta im katakin er kõn katak ko rem̦ool. Kõn men in, m̦õñã ko renno̦ im men ko rar kõpooji rar jab men ko kein me relukkuun aorõk ilo iien in. Ejjel̦o̦k pere bwe Jijej ear bũrom̦õj bwe Marta ear jab jijet ippãer ilo iien in eaorõk ñan an kakajoorl̦o̦k tõmak eo an. Bõtab, ear kõtl̦o̦k bwe Marta en make pepe kõn ta eo en kõm̦m̦ane. a (Lale kõmel̦el̦e eo itulal̦.) Kõn men in, ekar bar wõr an Meri maroñ ñan kããlõt ta eo en kõm̦m̦ane. Innem, ear jab jim̦we an Marta kajjitõk ippãn Jijej bwe en jiroñe Meri ñan jutak jãn iien in em̦m̦an me Jijej ej kwal̦o̦k katak ko an.

¹² Kõn men in, Jijej ear jouj ilo an kar kajim̦we Marta. Ear mera an ba etan Marta im men in ear kadikl̦o̦k an Marta inepata im illu. Ear bar kaenõm̦m̦an bũruon im ba ñane bwe ejjel̦o̦k unin an “inepata im abn̦õn̦õ kõn elõñ men ko.” Jekdo̦o̦n ñe en kar jidik wõt m̦õñã eo ear kõpooje, bõlen bõkan wõt juon ak ruo pileij, bõtab en kar baj bwe wõt. El̦aptata, kõnke el̦apl̦o̦k an aorõk men ko Jijej ear pojak in katakin er kaki im rej ãinwõt m̦õñã ilo kõkkar. Jijej ear jel̦ã bwe el̦apl̦o̦k an aorõk iien eo ñan roñjake katak ko an. Innem, ear jab kõn̦aan luuki Meri kõn an kar kããlõt bwe en jijet im roñjake an katakin.

13. Ta ko jemaroñ katak jãn ta eo Jijej ear ba ñan Marta?

¹³ Elõñ men ko rũkal̦oor ro an Kũraij ilo raan kein remaroñ katak jãn bwebwenato in. Ta kein? Jejjab aikuj kõtl̦o̦k bwe jabdewõt men en bõk jikin men ko raorõkl̦o̦k, ãinwõt “roñjake naan in Anij im pokake.” (Luk 11:28, UBS) Jekõn̦aan l̦oor joñak eo em̦m̦an an Marta kõn an kar jouj im kijejeto ilo an jerbal. Ak jen jab kõtl̦o̦k bwe ñe jej kwal̦o̦k karwainene ñan ro jet, en l̦ap wõt ad “inepata im abn̦õn̦õ” kõn men ko edik tokjãer. Ñe jej pãd ippãn rũttõmak ro m̦õttad, ej juon iien ñan ad bwebwenato im kakajoor tõmak ko an doon. Eñin men eo eaorõkl̦o̦k. Ejjab lukkuun unleplep in ad koba ippãn doon ej ñan m̦õñã im ebbõk kijed. (Riit Rom 1:11, 12, UBS.) Meñe jej kõm̦m̦an wõt jidik m̦õñã ak iien in emaroñ juon iien ekam̦õn̦õn̦õ im juon iien enaaj kakajoor kõj.

14. Etke jemaroñ ba bwe Marta ear likũt juon joñak em̦m̦an ñan kõj ilo an kar kwal̦o̦k an kõttãik bũruon ke kar kajim̦we?

¹⁴ Ke Jijej ear kajim̦we Marta, Marta ear ke kõttãik e im katak jãn bõd eo an? Eokwe, jejel̦ã bwe ear kõm̦m̦ane men in. Ke rijjilõk Jon ear jino kwal̦o̦k bwebwenato eo ekabwilõñlõñ kõn l̦eo jatin Marta, ear ba: “Jijej ear yokwe Marta im lio jatin im Lazerõs.” (Jon 11:5, UBS) Emootl̦o̦k de jet allõñ jãn iien eo Jijej ekar pãd ippãer ilo Betani ãinwõt kar kwal̦o̦k kake m̦okta. Ak Marta ear jab kajjememe im jab kerorol̦o̦k ñan Jijej kõn an kar kajim̦we. Bareinwõt, ear jab illu ak likũt wõt men in ilo bũruon. Ear kwal̦o̦k an kõttãik bũruon im roñjake naanin kauwe eo an kar Jijej. Ilo wãween in ear likũt juon joñak em̦m̦an ñan kõj kõnke kõj aolep jej kõm̦m̦an bõd, im ewõr iien jenaaj aikuj naanin kauwe jãn ro jet.

15, 16. (1) Ta ko Marta emaroñ kar kõm̦m̦ani ke em̦m̦aan eo jatin ear do̦o̦lol? (2) Etke ear rup bũruon Marta im Meri?

¹⁵ Ke Lazerõs ear nañinmej, ejjel̦o̦k pere bwe Marta ear lukkuun poub in lale im kauuki. Ear kate e joñan wõt an maroñ ñan pãd iturin l̦ein jatin ke ear eñtaan. Im ear kajjioñ jipañe bwe en jako an nañinmej. Meñe ekar ãindein ak Lazerõs ear l̦apl̦o̦k wõt an do̦o̦lol. Marta im Meri rar jab ñate aer pãd iturin ium̦win elõñ raan im kauuki. Baj l̦õmn̦akel̦o̦k m̦õk an Marta kalimjek turin mejãn rinañinmej in jatin im keememejtok iiõ ko rar dik im rũttol̦o̦k ippãn doon im iien ko rar m̦õn̦õn̦õ im bũrom̦õj ippãn doon!

¹⁶ Ke ear lukkuun do̦o̦lol Lazerõs im itõn mej, Marta im Meri rar ijjilõkl̦o̦k ennaan ñan Jijej im kõjjel̦ãiki kõn men in. Jijej ear kwal̦o̦k naan ilo juon jikin ettol̦o̦k me ekar bõk ruo raanin an naaj kar tõparl̦o̦k er. Kar naan ko de kein rar ba: “Irooj, jitõnbõro eo am̦ enañinmej.” (Jon 11:1, 3, UBS) Marta im Meri rar jel̦ã bwe Jijej ear yokwe Lazerõs, im rar tõmak bwe enaaj kõm̦m̦an jabdewõt men ñan jipañ l̦ein jeran im m̦õttan. Rar ke lukkuun l̦õmn̦ak bwe Jijej enaaj m̦õkajtok m̦okta jãn an mej Lazerõs? El̦aññe kar l̦õmn̦ak eo aer in, ejjel̦o̦k pere bwe ear rup bũrueer kõnke Jijej ear jab m̦õkajtok im kiiõ Lazerõs ear mej.

17. (1) Etke Marta emaroñ kar jino bwilõñ? (2) Ta eo Marta ear kõm̦m̦ane ke ear roñ bwe m̦õttan jidik Jijej etõpartok bukwõn eo aer?

¹⁷ Marta im Meri rar kanooj bũrom̦õje l̦ein jeier im jatier.  Rar jipañ doon im kõpooji aolep men ko ñan iien kallib eo an Lazerõs. Bareinwõt, rar kwal̦o̦k karwainene ñan armej ro ilo Betani im jãn bukwõn ko repaak me rar bũrom̦õjtok ippãerro. Bõtab, rejjañin roñ ennaan jãn Jijej. Marta emaroñ kar jino bwilõñ bwe emootl̦o̦k de jet raan ak rejjañin roñ jãne. Ãlikin emãn raan tokãlik jãn iien eo Lazerõs ear mej, Marta ear roñ bwe Jijej ej itok im m̦õttan jidik etõpar bukwõn in aer. Meñe ekar bũrom̦õj wõt kõn an Lazerõs mej, ak Marta ear jutak, im ejjab ba jabdewõt men ñan Meri, ak ear ekkaiuriurl̦o̦k im ear pojak in wõnm̦ae Jijej.​—Riit Jon 11:18-20, UBS.

18, 19. Naan ko an Marta rar kaalikkar an tõmak ilo ta, im etke elukkuun em̦m̦an joñak in an?

¹⁸ Ke Marta ear loe Irooj in an, ear ba ñane kõn men eo eto aerro Meri inepata kake im kõn̦aan jel̦ã. Ear ba: “Irooj, el̦aññe kwaar pãd ijin jatũ ejãmin kar mej!” Bõtab, ear wõr wõt an Marta tõmak im kõjatdikdik bwe Jijej emaroñ jipañ. Ear wõnm̦aanl̦o̦k wõt im ba: “Ijoke ijel̦ã bwe kiiõ Anij enaaj lewaj jabdewõt men eo kwõnaaj kajjitõk ippãn kake.” Jijej ear m̦õkaj im ba naan kein ñan kakajoore tõmak eo an Marta: “Jatũm̦ enaaj bar mour.”​—Jon 11:21-23, UBS.

¹⁹ Marta ear l̦õmn̦ak bwe Jijej ear kõnnaan kõn juon iien tokãlik ñe ro remej renaaj bar mour. Innem ear ba: “Aet, ijel̦ã bwe enaaj jerkakpeje im mour ilo raan eo ãliktata.” (Jon 11:24, UBS) Marta ej juon joñak em̦m̦an kõn an kar lukkuun tõmak bwe ro remej renaaj bar jerkak im mour. Jet rũtõl in kabuñ an RiJu me rej n̦aetaer Saddusi, rar ba ejjel̦o̦k jerkakpeje. Jekdo̦o̦n ñe katak in ear alikkar ilo Jeje ko Rekkwõjarjar ak rũtõl in kabuñ rein rar kariabe. (Dan. 12:13, UBS; Mark 12:18) Bõtab, unin an kar Marta jel̦ã men in ej kõnke Jijej ear katakin armej ro kõn kõjatdikdik eo bwe ro remej renaaj bar mour. Ear bar jel̦ã bwe Jijej ear kõm̦m̦ani menin kabwilõñlõñ ko ilo an kar kõmour ro rar mej. Bõtab armej rein ear kõmour er ear jab to aer mej ãinwõt kar Lazerõs. Marta ear ejjel̦o̦k an jel̦ã ñan jidik kõn ta eo ej pojak in wal̦o̦k.

20. Ta mel̦el̦ein kar naan ko an Jijej im uwaak eo an Marta ilo Jon 11:25-27?

²⁰ Innem, Jijej ear ba naan ko me aolep rej keememejitok ñan rainin, ear ba: “Ña jerkakpeje eo im mour eo.” Mel̦el̦ein  bwe em̦õj an Jeova lel̦o̦k maroñ ñan Nejin bwe en kõmour ro remej. Kõn men in, ewõr an Jijej maroñ ñan kõmour aolep armej ro rar mej ipel̦aakin lal̦ in ilo naaj ilju im jekl̦aj. Jijej ear kajjitõk ippãn Marta: “Kwõj tõmak ke men in?” Eñin iien eo Marta ear uwaake Jijej kõn naan ko ilo pãrokõrããp ko jinointata ilo katak in. Ear tõmak bwe Jijej ej Kũraij ak Messaia eo. Im ear bar tõmak bwe Jijej ej Nejin Jeova Anij im e eo rũkanaan ro rar kanaan kake bwe enaaj itok ñan lal̦ in.​—Jon 5:28, 29, UBS; riit  Jon 11:25-27, UBS.

21, 22. (1) Ewi wãween an kar Jijej kwal̦o̦k an bũrom̦õjl̦o̦k ippãn ro rar bũrom̦õj kõn an Lazerõs mej? (2) Ta ko rar wal̦o̦k ilo iien eo Jijej ear kõmour Lazerõs?

²¹ Jeova Anij im Nejin, Jijej Kũraij, rej ke kaorõk tõmak  rot in an kar Marta? Eokwe, ñan uwaake kajjitõk in, jen lale ta ko jet rar wal̦o̦k. Marta ear kaiurl̦o̦k bwe en bõktok kõrã eo jatin. Tokãlik, ear loe an Jijej bũrom̦õj ke ear kõnono ñan Meri im armej ro rar pãd ippãn Meri. Marta ear loe an Jijej jino lim̦õ im dãnnin kõmjaal̦al̦ im lukkuun jañ kõnke eddo bũruon kõn an Lazerõs mej. Innem tokãlik, ear roñ an Jijej ba bwe ren kadãpill̦o̦k dekã eo jãn mejãn lõb eo libõn l̦eo jatin.​—Jon 11:28-39, UBS.

²² Kõn an Marta jel̦ã bwe emootl̦o̦k de emãn raan in an Lazerõs mej, ear ba bwe joñan n̦e em̦õj an kõt ãnbwinnin im wõr bwiin. Jijej ear kakeememeje im ba: “Iar jab ba ñan eok ke bwe el̦aññe kwõj tõmak kwõnaaj lo aiboojoj eo an Anij?” Marta ear tõmak im ear loe aiboojoj eo an Jeova Anij. Ilo iien eo wõt, Jeova ear kamaroñ Nejin bwe en kõmour Lazerõs! Baj pijaikl̦o̦k m̦õk menin kabwilõñlõñ in ear wal̦o̦k im Marta ear jab mel̦o̦kl̦o̦ke ñan tõre eo ear mej! Marta ear loe an Jijej kũr Lazerõs im ba, “Lazerõs, kwõn diwõjtok!” Im ear roñ ainikien em̦m̦akũtkũt ilowaan lõb eo libõn Lazerõs ke Lazerõs ej jerkak. L̦ak ilbõk Lazerõs ej diwõjtok! Ak jidik wõt an diwõjtok kõn nuknuk ko kar kũtimi kaki. Innem, Jijej ear ba bwe ren “jel̦at nuknuk ko jãne im kõtl̦o̦ke.” Ejjel̦o̦k kajjitõk bwe Marta im Meri rar lukkuun m̦õn̦õn̦õ im atbo̦kwõjtok Lazerõs. (Riit Jon 11:40-44, UBS.) Ear kajju jako an eddo bũruon Marta ke l̦ein jatin ear bar mour!

23. Ta eo Jeova im Jijej rekõn̦aan kõm̦m̦ane ñan kwe, im ta eo kwõj aikuj kõm̦m̦ane?

²³ Bwebwenato in ej kam̦ool bwe ro remej renaaj bar mour im men in ejjab juon ettõn̦ak bajjek. Ej juon kõjatdikdik me Baibõl̦ ej kwal̦o̦k kake im bwebwenatoun ro rar mej im bar mour rej kam̦oole. (Job 14:14, 15) Jeova im Nejin rej kajeraam̦m̦an ro rej kwal̦o̦k aer tõmak ãinwõt aer kar kõm̦m̦ane ñan Marta, Meri, im Lazerõs. Renaaj bar kajeraam̦m̦an eok el̦aññe enaaj kajoor tõmak eo am̦.

24. Ta eo ãliktata Baibõl̦ ear kwal̦o̦k kake kõn Marta?

²⁴ Ebar wõr juon iien Baibõl̦ ej kwal̦o̦k kõn Marta im ede in alen an kwal̦o̦k kake. Iien in ear wal̦o̦k juon wiik m̦okta jãn an kar Jijej mej. Jijej ear jel̦ã bwe tokãlik renaaj kaeñtaane  im m̦ane. Kõn men in, ear bar etal ñan m̦weo im̦õn ro jeran im m̦õttan ilo Betani. Ãlikin an pãd ijin, ear etetall̦o̦k ñan Jerusalem me ebbõk ruo m̦ail̦ ñan tõpare. Jijej im Lazerõs rar kõjota ilo m̦weo im̦õn em̦m̦aan eo ear lõba etan Saimõn. Eñin iien eo ãliktata jej loe an Baibõl̦ kwal̦o̦k kõn Marta. Baibõl̦ ej ba: “Marta ear jipañ riajej ro.”​—Jon 12:2.

25. Etke eklejia ko ilo raan kein rejeraam̦m̦an kõn kõrã ro rej ãinwõt Marta?

²⁵ Marta ear juon kõrã el̦ap an niknik ilo jerbal im ejel̦ã kun̦aan! Ke jaar riiti jinoin bwebwenatoun Marta ilo Baibõl̦, ej jerbal. Jel̦ak bar riiti jem̦l̦o̦kin bwebwenato in an ej bar jerbal im kate e jipañ im loloorjake aikuj ko an ro jet. Ejeraam̦m̦an eklejia ko an rũkal̦oor ro an Kũraij rainin kõn kõrã ro me reperan im rejouj ãinwõt kar Marta. Aolep iien kõrã rein rej kwal̦o̦k aer tõmak im lõke Jeova ikijjeen aer kijejeto ilo aer jerbal ñane im jipañ ro jet. Marta ear ke wõnm̦aanl̦o̦k wõt ilo an kõm̦m̦ane men in? Ejjel̦o̦k pere bwe ear. Elukkuun aorõk bwe en kar kaalikkar an tõmak ilo wãween in kõnke men in enaaj kar jipañe tokãlik ñan kijenmej wõt ium̦win mãlejjoñ ko reppen.

26. Ta eo tõmak eo an Marta ear jipañe ñan kõm̦m̦ane?

²⁶ Jet raan tokãlik, Jijej ear mej. Marta ear aikuj kijenmej wõt meñe ear bũrom̦õje Irooj in an me el̦ap an kar yokwe im kautieje. Ejjab men in wõt ak bũrij ro im ruutiej ro retao me rar m̦ane Jijej, rar bar pepe in m̦ane Lazerõs. Etke? Kõnke an kar Lazerõs jerkak im bar mour ear kõm̦m̦an bwe en l̦apl̦o̦k wõt an armej ro tõmak. (Riit Jon 12:9-11, UBS.) Jejel̦ã bwe tokãlik mej ear kõjepel Marta jãn ro jatin. Meñe jejjab jel̦ã ñããt im ewi wãween an kar men in wal̦o̦k ak jejel̦ã bwe tõmak eo an Marta ear jipañe bwe en kijenmej wõt ñan jem̦l̦o̦kin. Eñin unin Kũrjin ro raan kein rej aikuj l̦oore joñak in an Marta.