1, 2. (1) Kar jerbal rot eo an Rut? (2) Ta eo Rut ear katak im jel̦ã kõn kien ko an Jeova im armej ro an?

 BAJ pijaikl̦o̦k m̦õk an Rut jijet lal̦l̦o̦k kõn bukwien iturin baarl̦i ko ear aini aolepen raan eo. Ej jotal̦o̦k im elõñ iaan rijerbal ro rej jino wanlõñl̦o̦k ñan Betleem. Rut em̦õk im bõlen emetak ãnbwinnin kõnke ear jerbal jãn ke ear jibboñ. Meñe em̦õk, ak ear wõnm̦aanl̦o̦k wõt im deñõti baarl̦i ko kõn juon al̦al̦ edik bwe en diwõjtok kobbaer. Ear juon raan em̦m̦an ippãn im ear lo el̦ap tõprak.

² Ear em̦m̦anl̦o̦k ke mour eo an Rut? Ilo kar katak eo m̦oktal̦o̦k, ear kwal̦o̦k bwe Rut ear lukkuun yokwe Neomi im ear pepe ñan pãdwõt ippãn. Bareinwõt, ear kããlõt bwe Anij eo an Neomi, Jeova, en bar Anij eo an. Erro kar jim̦or em̦m̦akũttok ñan Betleem jãn Moab. Rut ear katak bwe elukkuun em̦m̦an kien ko an Jeova kõnke el̦ap aer jipañ ro rejeram̦õl im ruwamãejet ro. Rut ej kiiõ kile bwe elõñ iaan armej ro an Jeova rej mour ium̦win kien ko an im l̦oori rej kaalikkar aer yokwe kien kein. Rej kaalikkare ilo kõm̦m̦an ko aer im ilo aer jouj ñan Rut. Wãween in ear lukkuun kaenõm̦m̦ane Rut.

3, 4. (1) Ewi wãween an kar Boaz kakajoor Rut? (2) Ewi wãween joñak eo an Rut emaroñ jipañ kõj ilo raan kein epen mour ie?

³ Juon iaan armej rein ej em̦m̦aan eo em̦weiie etan Boaz. Em̦m̦aan eo in Rut ear ae baarl̦i ilo jikin kallib eo an. Ear lukkuun em̦m̦an an Boaz kõm̦m̦an ñan Rut ilo aolepen raan eo ke ear jerbal ilo jikin kallib eo an. Ear watõk Rut ãinwõt nejin. Im Rut ej ettõñ ippãn make ke ej l̦õmn̦aketok an kar Boaz nõbare kõn an em̦m̦an an lale Neomi im kõn an reilo̦k wõt ñan Jeova bwe en kõjparoke.​—Riit Rut 2:11-14, UBS.

 ⁴ Meñe ãindein ak Rut emaroñ kar l̦õmn̦ak kõn ta eo enaaj wal̦o̦k ilju im jekl̦aj. Emaroñ kar l̦õmn̦ak kõn ewi wãween an naaj kabwe aikuj ko aerro Neomi ilo iiõ ko rej pãd im̦aan ke e juon ruwamãejet ejerata im ejjel̦o̦k pãleen im nejin. Bõlen ear bar l̦õmn̦ak el̦aññe enaaj bwe aikuj ko aerro kõn wõt an ae baarl̦i ilo jikin kallib eo. Joñan in ear bar l̦õmn̦ak kõn wõn eo enaaj lale e ñe elel̦l̦ap. Jemel̦el̦e unin an kar Rut inepata kõn men kein. Ilo raan kein epen mour ie, elõñ rej bar inepata kõn ejja men kein wõt Rut ear inepata kaki. Ilo ad naaj katak kõn wãween an kar tõmak eo an Rut jipañe ñan kijenmej wõt ium̦win apañ ko reppen, enaaj lõñ men ko jebar ekkatak.

5, 6. (1) Ilo raan eo kein kajuon ke Rut ear ae baarl̦i ilo jikin kallib eo an Boaz, ta tõprak ko ear loi? (2) Ta eo ear wal̦o̦k ke Neomi ear loe Rut?

⁵ Ilo iien eo ke ej dedel̦o̦k an Rut deñõti baarl̦i ko, el̦ak aini ippãn doon ewõr tarrin 25 bo̦un. Ãlikin an aini baarl̦i ko, emaroñ kar kanni ilowaan juon m̦õttanin nuknuk im likũt ioon bõran im etal ñan Betleem ke ej jino tulo̦k al̦.​—Rut 2:17, UBS.

⁶ Ke Neomi ear loe Rut ear m̦õn̦õn̦õ. Im bõlen ear bwilõñ ke ej loe joñan baarl̦i eo ippãn. Ear bar wõr m̦õñã ippãn Rut, kar bween m̦õñã ko kijen me ear bũki jãn m̦õñã ko Boaz ear kõpooji ñan rijerbal ro an. Ear bũkitok im erro Neomi kar kañi. Neomi ear kajjitõk ippãn Rut im ba: “Kwaar ae baarl̦i ia rainin? An wõn jikin kallib eo kwaar jerbal ie? Anij en kajeraam̦m̦an l̦eo ear jouj ñan eok!” (Rut 2:19, UBS) Ke Neomi ear lo joñan baarl̦i eo ippãn Rut, ear jel̦ã bwe ewõr juon ear kwal̦o̦k jouj ñane.

7, 8. (1) Wõn eo Neomi ear kile bwe ear kõm̦akũt Boaz ñan kwal̦o̦k jouj, im etke? (2) Ta eo ej kaalikkar bwe ear m̦ool an Rut yokwe Neomi?

⁷ Ilo an Rut im Neomi bwebwenato, Rut ear ba ñan Neomi kõn an Boaz kar jouj ñane. Kõn an kar Neomi m̦õn̦õn̦õ ear ba: “[Jeova], eo ej kõjparok kallim̦ur ko an iien otemjej ñan ro rej mour im ñan ro remej, en kajeraam̦m̦an Boaz.” (Rut 2:20, UBS) Neomi ear kile bwe Jeova eo ear kõm̦akũt Boaz ñan an kwal̦o̦k jouj ñan Rut. Em̦ool men in kõnke Jeova ej katakin armej ro an bwe ren kwal̦o̦k jouj  ñan ro jet. El̦aññe rej ãindein, Jeova ej kallim̦ur bwe enaaj kajeraam̦m̦an er.​—Riit Jabõn Kõnnaan 19:17.

⁸ Neomi ear rõjañ Rut bwe en roñjake Boaz ilo an etal wõt im jerbal ilo jikin kallib eo an im pãdwõt ippãn jiroñ ro kõnke em̦m̦aan ro ren jab kaabn̦õn̦õiki. Rut ear ke pokake Neomi? Aet. Ear bareinwõt “jokwe wõt ippãn” Neomi. (Rut 2:22, 23, UBS) Men in ej kaalikkar bwe ear m̦ool an Rut yokwe Neomi. Joñak in an Rut ej jipañ kõj ñan lale el̦aññe jej kwal̦o̦k ad yokwe ro uwaan baam̦le ko ad ilo ad rejetak im jipañ er ilo iien ko rej aikuj jipañ. Aolep iien Jeova ejel̦ã el̦aññe jej kwal̦o̦k yokwe eo em̦ool.

9. Ta eo jemaroñ katak kõn baam̦le jãn bwebwenatoun Rut im Neomi?

⁹ Baam̦le eo an Rut im Neomi ear ke m̦ool in baam̦le? Eokwe, jet armej rej ba bwe ro uwaan juon baam̦le ej l̦eo im lio pãlele, l̦addik im leddik eo nejier, jibwier im jim̦m̦aer, ak ro rej bõtõktõkier. Bõtab, bwebwenato eo an Rut im Neomi rej kwal̦o̦k bwe ñe armej ro an Jeova rej kwal̦o̦k aer jouj im yokwe doon im repaake doon, remaroñ watõk doon ãinwõt juon baam̦le. Waanjoñak in aerro ej bar kaalikkar bwe meñe emaroñ ruo wõt armej ilo juon baam̦le, remaroñ juon wõt baam̦le. Kwõj ke kaorõk baam̦le eo kwõj pãd ie? Jijej ear kakeememej rũkal̦oor ro an bwe meñe emaroñ wõr iaaer ejjel̦o̦k aer baam̦le, ak rũttõmak ro m̦õttaer rej bar aer baam̦le.​—Mark 10:29, 30, UBS.

10. Ta eo Neomi ear kõn̦aan kõm̦m̦ane ñan jipañ Rut?

¹⁰ Rut ear jerbal wõt ilo jikin kallib eo an Boaz jãn ke ear jino iien m̦adm̦õd baarl̦i l̦o̦k ñan iien m̦adm̦õd wiit. Iien m̦adm̦õd kein rar wal̦o̦k ilo allõñ in Eprõl̦ ñan Juun. Im Neomi ej jino lale ta eo emaroñ kõm̦m̦ane ñan jipañ Rut. Ke rar pãd Moab, Neomi ear ba ñan Rut bwe eban kar maroñ jipañe ñan kappok bar pãleen. (Rut 1:11-13, UBS) Ak kiiõ eoktak an l̦õmn̦ak. Neomi ear ba ñan Rut im ba: “Iaikuj pukot juon pãleem̦, kõnke en wõr juon im̦õm̦ make.”  (Rut 3:1, UBS) Ilo kar tõre ko, ekkã an rũtto ro kappok pãleen ro nejier. Kõnke Neomi ear watõk Rut ãinwõt nejin, ear kõn̦aan pukotl̦o̦k juon pãleen bwe en lale im kõjparoke im bwe en wõr m̦õn make. Innem, ta eo Neomi ear kõm̦m̦ane?

11, 12. (1) Ke Neomi ear ba bwe Boaz ej aerro Rut rũkõjparok, karõk ta eo an Anij ear jitõñl̦o̦k ñane? (2) Ta uwaak eo an Rut kõn pepe eo an Neomi?

¹¹ Ke Rut ear bwebwenato kake Boaz, Neomi ear ba: ‘L̦eo ej m̦õttan ro nukurro epaak, im ej juon iaan ro renaaj kõjparok kõjro.’ (Rut 2:20, UBS) Ta mel̦el̦ein naan kein an Neomi? Eokwe ilo tõre ko, ear wõr juon karõk jãn Anij ñan RiIsrael ro kõn baam̦le ko rejeram̦õl im ro emej uwaan baam̦le ko aer. El̦aññe ej wõr juon kõrã emej l̦eo pãleen im ejjel̦o̦k nejin, el̦ap an bũrom̦õj kõnke ejel̦ã bwe eban wõnm̦aanl̦o̦k etan baam̦le eo an kar l̦eo pãleen im aolep men ko m̦weien renaaj etal ñan ro jet. Bõtab, juon iaan kien ko an Anij ear kõtl̦o̦k an l̦eo jein ak jatin l̦eo emej m̦areiki lio kar pãleen. Etke? Kõnke en maroñ wõr nejin lio im bwe en jab l̦õt ak jako bwij eo an l̦eo kar ippãn emej. Im ñe ajri eo erũttol̦o̦k enaaj lali men ko m̦weien baam̦le eo. a (Lale kõmel̦el̦e eo itulal̦.)​—Dt. 25:5-7, UBS.

 ¹² Neomi ear ba ñan Rut kõn pepe eo an ñan kõm̦areik e. Jemaroñ pijaikl̦o̦k an Rut ilbõk im bwilõñ ke Neomi ej ba men in ñane. Kien ko an RiIsrael ro rar kããl wõt ñan Rut, im ear jab lukkuun jel̦ã kõn m̦anit ko aer. Meñe ear ãindein ak kõn an lukkuun kautiej Neomi, ear roñjake aolepen naan ko ear ba. Men eo Neomi ear ba bwe Rut en kab kõm̦m̦ane emaroñ kar kajjookok, ak Rut ear errã ilo pepe eo an. Kõn an ettã bũruon ear ba, “Inaaj kõm̦m̦ane jabdewõt men eo kwõj ba.”​—Rut 3:5, UBS.

13. Ta eo jemaroñ katak jãn an kar Rut roñjake naanin kakapilõk ko an Neomi? (Bar lale Job 12:12.)

¹³ Jet iien epen an jo̦dikdik ro im ro reddik roñjake naanin kakapilõk ko an ro rerũtto meñe elõñl̦o̦k men ko ro rerũtto rejel̦ã kaki jãn er. Epidodo ñan l̦õmn̦ak im ba bwe ro rerũtto rejjab mel̦el̦e kõn apañ ko jo̦dikdik ro im ro reddik rej iiooni. Bõtab, joñak eo an Rut kõn ettã bõro ej kakeememej kõj bwe ewõr tokjãn ñan kõj el̦aññe jej pokake ro rerũtto me rej lukkuun yokwe im kea kõn kõj. (Riit Sam 71:17, 18.) Ta eo Neomi ear ba bwe Rut en kõm̦m̦ane? Im ta jeraam̦m̦an ko Rut ear bũki kõn an kar roñjake Neomi?

14. Kar ewi wãween jikin kõm̦m̦an baarl̦i ko, im ta ko rekõn kõm̦m̦ani ijin?

¹⁴ Ke ear jota, Rut ear etal ñan ijo jikin aer kõm̦m̦an baarl̦i. Ijin ear jepaan wõt juon im pen bwidej eo ie. Rũkallib  ro rej bõktok baarl̦i ko aer ñan ijin bwe ren deñõti im bõk jãn kobbaer. Ekkã aer kããlõt itõrerein ak ioon juon tol̦ edik me ekkõtoto ñe ej raelep im jota. Innem bwe ren bõk kobban baarl̦i ko rej kõjerbal jabõl̦ im reek aen, im rel̦ak julõñl̦o̦k, kilin baarl̦i ko rej kãlo̦k ippãn kõto eo, im ej wõtlo̦k kobbaer ioon bwidej.

15, 16. (1) Ta eo ear wal̦o̦k ilo jo̦teen eo ke ej m̦õj an Boaz jerbal? (2) Ta eo ear kõm̦m̦an bwe Boaz en lo an Rut ear babu iturin neen?

¹⁵ Rut ear lale an rijerbal ro kadedel̦o̦k aer jerbal ke ej jota. Boaz ej lale aer kõm̦m̦ani baarl̦i ko an im ej loe an l̦ap tõprak ko rej kõm̦m̦ani. Ke ej m̦õj an m̦õñã, ear babul̦o̦k iturin bael̦ ak ejojin baarl̦i ko. Ilo kar tõre ko, rar aikuj kiki iturin baarl̦i ko ñe ej m̦õj aer bõk jãn kobbaer kõnke rũko̦o̦t im rinana ro ren jab itok im ko̦o̦ti. Ke Rut ear loe an Boaz itõn kiki boñõn eo, ear pojak in kõm̦m̦ane men eo Neomi ear ba ñane.

¹⁶ Rut ear jino ajjãdikdikl̦o̦k ñan turin Boaz ak elukkuun ikkũm̦kũm̦. Ke ej epaakel̦o̦k Boaz ej lo bwe ettoñ. Innem kiiõ ej kõm̦m̦ane men eo Neomi ear ba en kõm̦m̦ane. Ej ãlõkl̦o̦k ko̦o̦j eo jãn neen Boaz im babul̦o̦k iwan neen. Innem ej kõttar an ruj. Bõlen ippãn Rut elukkuun kar to an kõttar. Ak ilo kar lukwõnl̦o̦k boñõn eo, Boaz ej jino em̦m̦akũtkũt kõn an pio̦ im ej jerkak bwe en bar kako̦o̦joje neen. Ke ej kõm̦m̦ane men in, ej lo bwe ewõr juon armej iturin. Baibõl̦ ej ba bwe ear “kanooj bwilõñ ke ej lo juon kõrã ej babu” iturin neen.​—Rut 3:8, UBS.

17. Etke jejel̦ã bwe ear jab jekkar im nana men eo Rut ear kõm̦m̦ane?

¹⁷ Boaz ear kajjitõk im ba, “Wõn kwe?” Ke Rut ear uwaake bõlen ear wũdiddid ainikien. Ear ba: “Ña, Rut. Kõnke kwõj nukũ kiiõ, im kwõj juon iaan ro raikuj kõjparok eõ, innem kwõn bõk eõ bwe in pãleem̦.” (Rut 3:9, UBS) Jet rukok in raan kein ettoon aer l̦õmn̦ak kõn men in Rut ear kõm̦m̦ane. Rej ba bwe wãween an kar Rut m̦akũtkũt im kõnnaan boñõn eo ejekkar im nana. Bõtab, ewõr ruo kein kam̦ool ko me armej rein rejjab l̦õmn̦ak kaki. Kein kajuon,  Rut ear baj l̦oore wõt m̦anit eo me ilo kar tõre ko ekar ejjel̦o̦k jorrããn ie. Ak armej in raan kein rej watõk bwe enana. Kein karuo, uwaak eo an Boaz ñan Rut ej kaalikkar bwe ear jab l̦õmn̦ak bwe enana m̦wilin Rut im ear lukkuun nõbare.

18. (1) Ta eo Boaz ear ba me ear kaenõm̦m̦ane Rut? (2) Ta wãween ko ruo rar kaalikkar bwe Rut ej juon eo ejouj im ear jab l̦õmn̦ak kõn e make?

¹⁸ Ke Boaz ear kõnono ilo jouj ñan Rut, ejjel̦o̦k pere bwe men in ear kaenõm̦m̦ane Rut. Boaz ear ba: “Kwõn jeraam̦m̦an jãn Jeova, nejũ. Kwaar kwal̦o̦k jouj el̦apl̦o̦k ilo jem̦l̦o̦kin jãn ilo jinoin, bwe kwaar jab l̦oor likao ran̦, rijjeram̦õl ak rũm̦weiie.” (Rut 3:10) Ke Boaz ear kwal̦o̦k kõn an kar Rut ‘kwal̦o̦k jouj ilo jinoin,’ men in ej jitõñl̦o̦k ñan iien eo Rut ear l̦oortok Neomi ñan Israel im mour ippãn im lale e. Im ke ej kwal̦o̦k kõn an Rut ‘kwal̦o̦k jouj ilo jem̦l̦o̦kin,’ ej jitõñl̦o̦k ñan men in Rut ej pojak in kõm̦m̦ane. Ta in? Ej ilo an m̦õn̦õn̦õ in m̦areik Boaz meñe Boaz elukkuun rũtto jãne kõnke ñe ewõr nejin, eban jako bwij eo bwijjin l̦eo kar pãleen emej im ebar kitibuj bwijjin l̦al̦l̦ap eo kar pãleen Neomi me ebar emej. Boaz ear kile bwe men in Rut ej pojak in kõm̦m̦ane ej kaalikkar an jab l̦õmn̦ak kõn e make.

19, 20. (1) Etke Boaz ear jab m̦õkaj im m̦areik Rut? (2) Ta ko Boaz ear kõm̦m̦ani rej kwal̦o̦k an jouj ñan Rut im an jab kõn̦aan bwe en nana etan Rut?

¹⁹ Boaz ear wõnm̦aanl̦o̦k im ba: “Kiiõ Rut, kwõn jab inepata. Armej otemjej ãnin rejel̦ã ke kwe juon kõrã em̦m̦an. Inaaj kõm̦m̦ane jabdewõt men eo kwõj kajjitõk.” (Rut 3:11, UBS) Boaz ear m̦õn̦õn̦õ in m̦areik Rut im bõlen ear jab bwilõñ ke Rut ear kajjitõk bwe en rũkõjparok e. Ak Boaz ear juon armej eo ejim̦we im ejjab l̦õmn̦ak in kõm̦m̦an ekkar ñan kõn̦aan ko an make. Ear ba ñan Rut bwe ebar wõr juon em̦m̦aan epaakl̦o̦k kadkad eo an ñan l̦eo kar pãleen Neomi. Im Boaz enaaj kar kepaake em̦m̦aan in m̦okta im kajjitõk ippãn ñe ekõn̦aan bõk Rut bwe en pãleen.

²⁰ Boaz ear ba ñan Rut bwe en bar babu im kakkije ijo im l̦ak jimmarok emaroñ jepl̦aak ñan m̦weo im̦õn. Ilo wãween in ro jet reban loe. Ear jiroñl̦o̦ke men in kõnke ejjab kõn̦aan bwe en nana etan Rut ippãn armej ro im ear bar  kõn̦aan kõjparok etan. Etke? Kõnke ñe ro jet ren kar loe erro, renaaj kar l̦õmn̦ak bwe ewõr juon men ejekkar erro ar kõm̦m̦ane. Rut ear roñjake Boaz ilo an bar babul̦o̦k iturin neen. Ejjel̦o̦k pere bwe ear jako an Rut mijak jãn wõt an kar em̦m̦an im jouj an Boaz kõnnaan ñane. Ke ej jino raantak, Rut ear ruj bwe en ro̦o̦l ñan Betleem. Bõtab, m̦okta jãn an ro̦o̦l, Boaz ear kannel̦o̦k libooror eo an kõn baarl̦i. Innem, ear jepl̦aak ñan Betleem.​—Riit Rut 3:13-15, UBS.

21. (1) Ta ko Rut ear kõm̦m̦ani me rar kõm̦m̦an an armej ro kile bwe ej juon kõrã em̦m̦an? (2) Ta eo jemaroñ kõm̦m̦ane ñan l̦oore joñak eo an Rut?

²¹ Rut emaroñ kar lukkuun m̦õn̦õn̦õ ke ej l̦õmn̦ak kõn an kar Boaz ba armej ro rejel̦ã bwe e kõrã em̦m̦an. Ejjel̦o̦k pere bwe kõn an kar kõn̦aan jel̦ã kõn Jeova im karejar ñane, men in ear kõm̦m̦an bwe armej ro ren kile bwe e juon kõrã em̦m̦an. Ear bareinwõt kwal̦o̦k jouj ñan Neomi im armej ro an, im ear m̦õn̦õn̦õ in l̦oor m̦anit im imminene ko aer meñe ear jab lukkuun mel̦el̦e kaki. Jemaroñ l̦oor joñak eo an Rut ilo ad kate kõj bwe jen kwal̦o̦k ad kautiej armej ro jet im m̦anit im imminene ko aer. El̦aññe jenaaj kõm̦m̦an ãindein, enaaj em̦m̦an etad ippãn ro jet.

22, 23. (1) Etke Neomi ear ba “Nejũ, em̦m̦an ke am̦ kar pãd ijo?” (2) Ta eo Neomi ear ba Rut en kõm̦m̦ane?

²² Ke Rut ear ro̦o̦l, Neomi ear ba: “Nejũ, em̦m̦an ke am̦ kar pãd ijo?” Bõlen Neomi ear kõn̦aan jel̦ã el̦aññe ear tõprak men eo Rut ear kõm̦m̦ane im el̦aññe enaaj m̦are ak jaab. Rut ear ba ñan Neomi kõn men ko Boaz ear ba ñane. Im ear bar kwal̦o̦k baarl̦i ko Boaz ear lil̦o̦ki m̦okta jãn an ro̦o̦l bwe en kab lil̦o̦k ñan Neomi.​—Rut 3:16, 17, UBS.

²³ Neomi ear kwal̦o̦k an lol̦o̦kjen̦ kõnke ear ba bwe Rut en pãdwõt m̦weo im jab etal in jerbal ilo jikin ae baarl̦i ko. Ear ba ñan Rut: “L̦eo ejãmin kakkije, m̦ae iien an kam̦õjl̦o̦k men eo rainin.”​—Rut 3:18.

24, 25. (1) Ewi wãween an kar Boaz kaalikkar bwe ear juon armej ejim̦we im ejjab l̦õmn̦ak kõn e make? (2) Ta jeraam̦m̦an ko Rut ear loi?

²⁴ Ear jim̦we l̦õmn̦ak eo an Neomi kõn ta eo Boaz ear ilen kõm̦m̦ane. Etke jej ba men in? Kõnke Boaz ear etal ñan jikin kweilo̦k eo, ijo ekkã an em̦m̦aan ro rerũtto ilo jikin  in koba ippãn doon ie. Boaz ear itok ñan ijin im kõttar l̦eo epaakel̦o̦k kadkad eo an ñan l̦eo kar ippãn Neomi. Ke ear itok, Boaz ear kajjitõk ippãn im̦aan mejãn rũtto ro el̦aññe ekõn̦aan m̦areik Rut im kõjparoke. Bõtab, l̦ein ear jab kõn̦aan kõnke ear jel̦ã bwe ñe ekõm̦m̦ane men in, men ko nãj kar an im ajri ro nejin renãj kiiõ an baam̦le eo an l̦eo kar pãleen Neomi. Innem, Boaz ear ba im̦aan mejãn rũtto ro bwe enaaj wiaik bwidej eo an l̦eo kar ippãn Neomi im enaaj m̦areiki Rut. Boaz ear ba bwe men in ej pojak in kõm̦m̦ane “enaaj kõm̦m̦an bwe wãto eo an l̦eo emej en jab ilo̦k jãn ro nukũn, im ro ineen.” (Rut 4:1-10, UBS) Boaz ear juon armej eo ejim̦we mour eo an im ejjab l̦õmn̦ak kõn e make.

²⁵ Boaz ear wõnm̦aanl̦o̦k im m̦areiki Rut. Ejjabto tokãlik, Baibõl̦ ej ba kõn Rut: “[Jeova] ear kajeraam̦m̦ane im ear bõro̦ro im keotak juon nejin l̦addik.” Kõrã ro ilo Betleem rar kajeraam̦m̦an Neomi im rar nõbar Rut. Kõrã ro rar ba bwe em̦m̦anl̦o̦k an Rut kõm̦m̦an ñan Neomi jãn ñe en kar wõr 7 nejin Neomi em̦m̦aan. Im jejel̦ã bwe tokãlik, l̦ein nejin Rut ear erom jim̦m̦aan Kiiñ Devid. (Rut 4:11-22, UBS) Bareinwõt, Devid ear erom juon iaan ro jim̦m̦aan Jijej Kũraij.​—Matu 1:1, UBS. b (Lale kõmel̦el̦e eo itulal̦.)

26. Joñak eo an Rut im Neomi rej kakeememej kõj kõn ta?

²⁶ Ear lukkuun l̦ap an Rut im Neomi jeraam̦m̦an. Neomi ear lale ajri eo nejin Rut ãinwõt ñe lukkuun bõtõktõkin. Men ko rar wal̦o̦k ilo kar mour ko an Rut im Neomi rej kakeememej kõj bwe Jeova Anij ej lo ro rej jerbal im kate er ñan kabwe aikuj ko aer, im rej tiljek ilo aer kobal̦o̦k ippãn armej ro im karejar ñane. Eban likjab in kajeraam̦m̦an ro rej tiljek ñane, ãinwõt kar Boaz, Neomi, im Rut.