1, 2. Etke eaorõk bwe en wõr ad tõmak kiiõ kiiõ wõt? Kwal̦o̦k waanjoñak eo.

 TÕMAK. Naan in tõmak ej juon naan ekanooj in em̦m̦an im ej kareel bũruon armej. Bõtab, ñe jej lo ak roñ naan in, ejiktok bar juon men ilo l̦õmn̦ak eo ad. Ta in? Ej bwe ej aikuj wõr ad tõmak kiiõ kiiõ wõt! El̦aññe ejjel̦o̦k, jej aikuj m̦õkaj im kate kõj bwe en wõr ad tõmak. Im el̦aññe ewõr ad tõmak, jej aikuj m̦õkaj in kõjparoke im kakajoore. Etke?

² Baj l̦õmn̦akel̦o̦k m̦õk am̦ etetal ilo ãne jem̦aden im el̦ap am̦ maro. Im ñe kwõj ellolo dãn, kwõj lukkuun kõjparoke jãn al̦ bwe en jab jorome. Bareinwõt, kwõj aikuj teiñi kein daak eo am̦ aolep iien bwe en jab maat m̦okta jãn am̦ tõpare jikin eo kwõj jibadekl̦o̦k. Rainin, jej mour ilo juon lal̦ me ej ãinwõt ãne jem̦aden im ejjel̦o̦k an armej ro ie itoklimo in kabuñ ñan Jeova. Ilo lal̦ in, epen ad lo tõmak eo em̦ool me ej ãinwõt dãn eo jej aikuj kõjparoke jãn al̦ im teiñi aolep iien bwe en jab maat. Tõmak ej juon menin aikuj. Etke? Kõnke ãinwõt ad ban maroñ mour ilo ãne jem̦aden ñe ejjel̦o̦k limed dãn, ãindein enaaj m̦õjn̦o̦l̦o̦k jem̦jerã eo ad ippãn Jeova el̦aññe ejjel̦o̦k ad tõmak ilo e.​—Rom 1:17.

3. (1) Ta ko Jeova ear litok ñan jipañ kõj bwe en wõr ad tõmak? (2) Ta ko ruo jej aikuj keememej ñan kõm̦m̦ani?

³ Jeova ejel̦ã bwe emenin aikuj bwe en wõr ad tõmak. Im ejel̦ã joñan an pen ñan an juon armej wõr an tõmak im an kõjparok tõmak eo an ilo raan kein. Eñin unin ear letok waanjoñak ko an rũttõmak ro retiljek bwe jen anõke er. Jeova ear kõm̦akũt rijjilõk Paul bwe en je naan kein: “Kom̦win rikajjioñe ro rej bõk aer jolõt menin kallim̦ur ko, kõn tõmak im kijenmej.” (Hi. 6:12) Eñin unin doulul eo an Jeova ej rõjañ kõj aolep iien bwe jen kate kõj ñan l̦oore joñak ko an em̦m̦aan im kõrã ro rar tiljek ñan Anij ãinwõt ro jaar katak kake er ilo bok in. Ak kiiõ, ta eo jej aikuj kõm̦m̦ane? Eokwe jen keememej men kein ruo: (1) Jej aikuj wõnm̦aanl̦o̦k wõt im kakajoor tõmak eo ad im (2) jej aikuj keememej wõt kõjatdikdik eo ad.

4. (1) Ewi wãween an Setan kaalikkar bwe el̦ap an dike ñe ewõr ad tõmak? (2) Ak etke jejjab aikuj mijak?

⁴ Wõnm̦aanl̦o̦k wõt im kakajoor tõmak eo am̦. Ewõr juon eo im el̦ap an dike ñe ewõr ad tõmak. Wõn in? Ej Setan. E eo ej irooj in lal̦ in im em̦õj an ukot lal̦ in bwe en juon ãne jem̦aden ak juon jikin me epen ñan ad kõjparok tõmak eo ad. Setan el̦apl̦o̦k an kajoor jãn kõj. Ak jej aikuj ke mijak im l̦õmn̦ak bwe eban wõr ad tõmak im jeban maroñ kakajoor tõmak eo ad? Ejjab ñan jidik! Jeova ej Jeran ro otemjej rej kate er bwe en m̦ool aer tõmak ilo E. Ej kallim̦ur bwe ñe enaaj pãd iturid im jipañ kõj, jenaaj maroñ jum̦ae Tepil̦ eo im enaaj ko jãn kõj! (Jem. 4:7) Jej jum̦aiki ilo ad kõm̦m̦an ad iien kajjojo raan ñan kakajoor im kal̦apl̦o̦k ad tõmak. Ewi wãween ad kõm̦m̦ane men in?

5. Ta ko rar jipañ em̦m̦aan im kõrã ro ilo Baibõl̦ bwe en wõr aer tõmak? Jouj im kõmel̦el̦e.

 ⁵ Jaar katak bwe em̦m̦aan im kõrã ro ilo Baibõl̦ rar jab l̦otaktok im kajju tiljek ñan Anij. Wãween kar mour ko aer rej kam̦ool bwe kajoor eo an Jeova ear jipañ er bwe en wõr aer tõmak. (Ga. 5:22, 23) Rar jar ñan Jeova bwe en jipañ er, im tokjãn men in Jeova ear wõnm̦aanl̦o̦k wõt im kakajoor tõmak eo aer. Jen kõm̦m̦ane ejja men in wõt rar kõm̦m̦ane. Jen jab mel̦o̦kl̦o̦k bwe Jeova ej m̦õn̦õn̦õ in lel̦o̦k kajoor eo an ñan ro rej kajjitõk ippãn im rej l̦oore jar ko aer. (Luk 11:13) Ebar wõr ke men en̦ jej aikuj kõm̦m̦ane?

6. Ewi wãween ad maroñ bõk tokjãn jãn ad katak kõn bwebwenato ko ilo Baibõl̦?

⁶ Ilo bok in, jaar etale jejjo wõt bwebwenato ko an ro rar kwal̦o̦k aer tõmak. Bõtab, ekanooj in bar lõñ ro ilo Baibõl̦ im rar kwal̦o̦k aer tõmak ilo Anij! (Riit Hibru 11:32.) Kõn men in, elukkuun lõñ men ko jemaroñ katak jãn kajjojo iaan rũttõmak rein ñe jej katak ippãd make im kõl̦mãnl̦o̦kjen̦ kõn joñak ko aer. El̦aññe jej ekkaiuriur im riiti bwebwenato ko ilo Baibõl̦ kõn ro rar tõmak ilo Anij, men in eban kakajoor tõmak eo ad. Bwe jen lukkuun bõk tokjãn jãn men ko jej riiti, jej aikuj bõk ad iien im kũbwij mel̦el̦e ko jet kõn bwebwenato ko jej riiti ilo Baibõl̦. Ñe aolep iien jej keememej bwe em̦m̦aan im kõrã rein rar bar “armej ãinwõt kõj,” enaaj l̦apl̦o̦k wõt an bwebwenato ko aer tõpar bũruod. (Jem. 5:17, UBS) Ñe jenaaj l̦õmn̦ak kõn bwebwenato kein im l̦õmn̦ak ñe en kar kõj er, eokwe jenaaj mel̦el̦e kõn eñjake ko aer ke rar iioon apañ im mãlejjoñ ko. Men kein rar iiooni emaroñ ejja men ko wõt jej bar iiooni.

7-9. (1) Enaaj kar ewi wãween an rũttõmak ro etto l̦õmn̦ak kõn kilen ad kabuñ ñan Jeova ilo raan kein? (2) Etke jej aikuj wõnm̦aanl̦o̦k wõt im kakajoor tõmak eo ad?

⁷ Kõm̦m̦an im pepe ko ad rej bar kakajoor tõmak eo ad. Em̦ool men in kõnke ñe ewõr ‘tõmak ak ejjel̦o̦k jerbal, emej.’ (Jem. 2:26, UBS) Baj l̦õmn̦ak m̦õk kõn joñan an naaj kar em̦m̦aan im kõrã rein jaar katak kake er lukkuun m̦õn̦õn̦õ el̦aññe Jeova ear kajjitõk ippãer bwe ren kõm̦m̦ani jerbal ko jej kõm̦m̦ani raan kein!

⁸ Ñan waanjoñak, Ebream ear kabuñ ñan Jeova kõn lokatok ko rejjab lukkuun em̦m̦an jekjekier me rej kõm̦m̦an jãn dekã ko rekkillep im kar kajutaki ilo ãne jem̦aden. Bõtab, ta el̦aññe Jeova ear ba en kabuñ ñane ilo an kobal̦o̦k ippãn rũkarejar ro jet ilo Im̦õn Kweilo̦k ko rem̦m̦an? Bareinwõt en kobal̦o̦k ilo kweilo̦k ko rel̦l̦ap ñan an roñ im jel̦ã kõn tipdikin kallim̦ur ko ear “loi jãn etol̦o̦k”? (Riit Hibru 11:13.) Im l̦õmn̦ak m̦õk kõn Ilaija. Ilaija ear m̦ane rũkanaan ro reriab an Beal im kate ñan karejar ñan Jeova ium̦win maroñ eo an kiiñ eo ej jum̦ae Jeova. Ak ta el̦aññe Jeova ear ba en kamaat an maroñ ilo an kwal̦o̦k naan ñan armej ro kõn kõjatdikdik eo enaaj kaenõm̦m̦ane er? Ejjel̦o̦k pere bwe em̦m̦aan im kõrã rein ilo Baibõl̦ renaaj kar m̦õkaj im bũki jerbal kein jej kõm̦m̦ani ñan kabuñ ñan Jeova ilo raan kein.

⁹ Jen wõnm̦aanl̦o̦k wõt im kakajoor tõmak eo ad ilo ad mour ekkar ñan men ko jej tõmak kaki. Ilo ad kõm̦m̦ane men in, jej l̦oore joñak ko an em̦m̦aan im kõrã ro ilo Baibõl̦ me ear wõr  aer tõmak. Ãinwõt kar kaalikkar ilo jinoin bok in, ñe jej katak kõn rein jenaaj epaakel̦o̦k er im renaaj erom ro m̦õttad. Bõtab, m̦õttan jidik renaaj lukkuun ro m̦õttad me jenaaj loe er kõn mejãd.

10. Ta eo jenaaj lañlõñ kake ilo Pedetaij?

¹⁰ Keememej wõt kõjatdikdik eo am̦. Em̦m̦aan im kõrã ro retiljek rar lo bwe rar kajoorl̦o̦k wõt itok wõt jãn kõjatdikdik eo aer ilo Anij. Ak kwe? Ñan waanjoñak, baj pijaikl̦o̦k m̦õk joñan am̦ naaj lañlõñ ñe kwõnaaj loe rũkarejar ro an Anij me rar tiljek im renaaj bar mour ilo iien eo “ro rem̦m̦an . . . renaaj jerkak jãn mej.” (Riit Jerbal 24:15, UBS.) Ta jet iaan kajjitõk ko kokõn̦aan naaj kajjitõk ippãer kaki?

11, 12. Ilo naaj Pedetaij, ta kajjitõk ko kwõnaaj kõn̦aan kajjitõk ippãn (1) Ebel? (2) Noa? (3) Ebream? (4) Rut? (5) Abigeil? (6) Ester?

¹¹ Ñe kwõnaaj iioone Ebel kwõnaaj ke kijooror in kajjitõk kõn kar rũtto ro jemãn im jinen? Ak kwõmaroñ kajjitõk im ba: “Kwaar ke kõnnaan ippãn kerub ro rar baare jikin kallib in Iden? Im rar ke uwaake eok?” Ak ta kõn Noa? Kwõmaroñ kajjitõk ippãn im ba: “Kwaar ke mijak riineea ro nejin enjel̦ ro renana? Ewi wãween am̦ kar lale menninmour ko ilo aolepen iiõ eo rar pãd ilowaan wa eo?” Ñe kwõnaaj iioone Ebream, kwõmaroñ kajjitõk ippãn im ba: “Kwaar ke bwebwenato ippãn Shem? Wõn ar katakin kwe kõn Jeova? Ear ke pen ñan am̦ em̦m̦akũt jãn Õr?”

¹² Bareinwõt l̦õmn̦ak m̦õk kõn jet iaan kajjitõk ko kwõnaaj kajjitõk ippãn kõrã ro rar tiljek im renaaj bar mour. Kwõmaroñ kajjitõk, “Rut, ta eo ear kõm̦m̦an bwe kwõn erom juon eo ej kabuñ ñan Jeova?” “Abigeil, kwaar ke mijak in jiroñ Nebal kõn am̦ kar jipañ Devid?” “Ester, ta eo ear wal̦o̦k ñan komiro Mordikeai ãlikin wõt an jem̦l̦o̦k bwebwenato eo kõn komiro ilo Baibõl̦?”

13. (1) Ta jet iaan kajjitõk ko ro renaaj bar mour renaaj kajjitõk ippam̦ kaki? (2) Ewi wãween am̦ l̦õmn̦ak kõn iien eo ñe kwõnaaj iioone em̦m̦aan im kõrã ro rar tiljek ilo iien ko etto?

¹³ Ejjel̦o̦k pere enaaj bar lukkuun lõñ an em̦m̦aan im kõrã rein kajjitõk ñan kwe. Kwõnaaj lukkuun m̦õn̦õn̦õ in ba ñan er kõn aolep men ko kar kanaan kaki im rar wal̦o̦k ilo raan kein ãliktata im wãween an kar Jeova kajeraam̦m̦an armej ro an ilo iien ko reppen! Alikkar bwe enaaj lukkuun tõpar bũrueer ñe rejel̦ã bwe Jeova ear kajejjet wõt aolepen kallim̦ur ko an. Ilo naaj Pedetaij, jeban bar aikuj kõl̦mãnl̦o̦kjen̦ kõn rũkarejar ro retiljek an Anij me Baibõl̦ ej kwal̦o̦k kake er. Etke? Kõnke renaaj pãd ippãd ilo Pedetaij! Innem, kwõn wõnm̦aanl̦o̦k wõt im kõm̦m̦an bwe rein rar tiljek ren ãinwõt ñe rej mour im pãd ippãd kiiõ. Wõnm̦aanl̦o̦k im kajjioñe tõmak eo aer. Jej kõjatdikdik bwe kwõj m̦õn̦õn̦õ ilo am̦ karejar ñan Jeova ãinwõt kar rũkarejar rein rar tiljek me rej ro m̦õttam̦ ñan indeeo!