Jesus ear kakien rũkal̦oor ro an ñan ilo̦k im kõm̦m̦an rũkal̦oor. (Mt 28:19, UBS) Men in ej kitibuj kwal̦o̦k naan im katakin. Ikijjeen wãween kein ruo me raorõk ñan kõm̦m̦an rũkal̦oor, em̦m̦an bwe jãn iien ñan iien jen kajitũkin kõj make, ‘Ta eo ij aikuj kõm̦m̦ane ñan kakõm̦anm̦anl̦o̦k wãween aõ kwal̦o̦k naan im katakin?’

Ijello̦kun ad kõttar bwe armej ren itok ñan ippãd, jej aikuj kijejeto ilo ad kappukot ro em̦ool bũrueer. (Mt 10:11, UBS) Ñe jej bõk kun̦aad ilo jerbalin kwal̦o̦k naan, jej ke pukot iien ko repel̦l̦o̦k ñan ad kõnono ippãn ‘jabdewõt ro jej iioon er’? (Jrb 17:17) Kõrã eo etan Lidia, ear maroñ erom juon rũkal̦oor itok jãn an kar rijjilõk Paul niknik ilo kwal̦o̦k naan.​—Jrb 16:13-15.

ALWÕJE PIJA EO ETAN, CONTINUE PREACHING “WITHOUT LETUP”​—INFORMALLY AND FROM HOUSE TO HOUSE, IM UWAAKI KAJJITÕK KEIN:

• Kajjojo raan, ewi wãween an kar Samuel kwal̦o̦k bwe ear kijejeto ilo an kajjioñ kallibin ine in m̦ool eo?

• Etke jej aikuj kate kõj ilo jabdewõt kilen kwal̦o̦k naan ko jej kõm̦m̦ani?

• Ippãn wõn ro jemaroñ kwal̦o̦k ennaan eo kõn Aelõñ eo ñan er kajjojo raan?

Ñan kõm̦m̦an rũkal̦oor, ewõr men ko jet jej aikuj in kõm̦m̦ani ijello̦kun ad baj lel̦o̦k wõt bok ko ñan armej ro. Jej aikuj in bar jepl̦aak im katak Baibõl̦ ippãer. Men in enaaj jipañ er ñan eddekl̦o̦k ilo tõmak im kõm̦m̦an wõnm̦aanl̦o̦k. (1Ko 3:6-9, UBS) Bõtab, ta el̦aññe emaat joñan ad kate kõj ñan katak Baibõl̦ ippãn juon armej ak jidik wõt tõprak jej loe? (Mt 13:19-22) Eokwe, jej aikuj in wõnm̦aanl̦o̦k wõt im pukot ro me bũrueer ej ãinwõt ‘bwidej eo em̦m̦an.’—Mt 13:23; Jrb 13:48.

ALWÕJE PIJA EO ETAN, CONTINUE PREACHING “WITHOUT LETUP”​—PUBLICLY AND MAKING DISCIPLES, IM UWAAKI KAJJITÕK KEIN:

• Ewi wãween an kar Solomon im Mary utdikdiki ine in m̦ool eo ilo bũruon Ezekiel im Abigail?

• Ta mejãnkajjik eo ad ñe jej bõk kun̦aad ilo jabdewõt wãween kwal̦o̦k naan, ekoba ñe jej kwal̦o̦k naan ilo̦bwilej?

• Ta eo jemaroñ kõm̦m̦ane ñan kal̦apl̦o̦k ad kaorõke jerbal eo ñan katakin ro jet m̦ool eo jãn Baibõl̦?