Jino jãn iiõ in, enaaj l̦apl̦o̦k iien ñan ad kõppojak ñan raanin Kwõjkwõjin mej eo an Christ. Ñe enaaj jejjet Kwõjkwõj eo ilo juon iaan raan ko ilo M̦ande ñan Bõl̦aide, innem enaaj ejjel̦o̦k kweilo̦k eo ilo lukwõl̦pãn wiik etan Jerbal eo Ad im Wãween Ad Mour. Ak ñe Kwõjkwõj eo enaaj jejjet ilo wiikããn, innem enaaj ejjel̦o̦k public talk im katak eo jãn Naan in Keeañ. Kwõnaaj ke lukkuun kortokjãn iien kein repel̦l̦o̦k ñan kwe? Ãinwõt ilo kar tõre ko an Kũrjin ro jinoin, jej aikuj bar kõm̦m̦an karõk ko ñan kõppojak ñan iien in eaorõk. (Luk 22:7-13, UBS; km 3/15 1) Ak ebar wõr men ko jet me jej aikuj kõm̦m̦ani ñan kõpooj bũruod. Ewi wãween ad maroñ kõm̦m̦ane men in?

• Kõl̦mãnl̦o̦kjen̦ kõn etke aorõk bwe kwõn pãd ilo iien in.​—1Ko 11:23-26

• Jar im etale ewi joñan an kajoor kõtaan eo am̦ ippãn Jeova.​—1Ko 11:27-29, UBS; 2Ko 13:5, UBS

• Riit im kõl̦mãnl̦o̦kjen̦ kõn katak ko me rej kwal̦o̦k unin an Kwõjkwõj in lukkuun aorõk.​—Jon 3:16, UBS; 15:13

Jet ri-kwal̦o̦k naan rej riit im kõl̦mãnl̦o̦kjen̦ kõn eoon ko kar kããlõti bwe jen riiti ilo raan ko m̦okta l̦o̦k ñan ãlikin Kwõjkwõj eo, im repãd ilo bokin unin tõl eo Liñõri Baibõl̦ Raan Otemjej. Ak ro jet rej riiti eoon ko ilo jaat eo kar kobaiki ippãn katak in. Im bar jet rej ãliji katak ko ilo Naan in Keeañ me rej kwal̦o̦k kõn Kwõjkwõjin mej eo an Jesus im kõn yokwe eo Jeova im Jesus rar kwal̦o̦k ñan kõj. Jabdewõt men eo kwõj kããlõt ñan kõjerbale ilo am̦ riit im katak, en karuwaakl̦o̦k eok ñan Jeova im Nejin.