L̦õmn̦ake m̦õk am̦ mour ilo kar raan ko an Jesus im jen ba bwe kwõj jokwe ilo Galili. Kwaar etetal jãn Galili ñan Jerusalem bwe kwõn pãd ilo Kwõjkwõj in Im̦õn Kõppãd ko. Jikin kweilo̦k in eobrak kõn armej ro rar itok jãn jikin ko rettol̦o̦k bwe ren bar kabuñ ñan Jeova. Kiiõ kokõn̦aan ajel̦o̦k juon menin katok ñan Jeova. Kõn men in, kwõj bõk juon koot ippam̦ im jino am̦ etetal kake ibul̦õn armej ro l̦o̦k ñan tampel̦ eo. Ejjab juon ial̦ epidodo kõnke eobrak kõn armej. Kwõl̦ak tõparl̦o̦k tampel̦ eo, kwõj lo an obrak kõn armej ro rej l̦ain me rebar kõn̦aan ajel̦o̦k menin katok ko aer. Ãliktata, kwõj tõpar bũrij ro im eiien am̦ itõn lel̦o̦k ko̦o̦t eo ñan er. Bõtab ilo iien in, kwõj keememej bwe ewõr ruom̦ ippãn juon jeim̦ ak jatũm̦, im kwõjaje ñe epãd ibul̦õn armej ro ke ak ilo jikin kweilo̦k eo. Jesus ear kwal̦o̦k ta eo kwõj aikuj in kõm̦m̦ane. (Riit Matu 5:24, UBS.) Ekkar ñan naan ko an Jesus, ta eo kwe im eo jeim̦ ak jatũm̦ emaroñ kõm̦m̦ane ñan kõm̦m̦an aenõm̦m̦an? Jouj im kõkal̦l̦eiki uwaak eo ejim̦we ilo bo̦o̦k ko ruo itulal̦.

KWÕJ AIKUJ . . .

• kõnono wõt ippãn eo jeim ak jatũm̦ ñe elukkuun wõr unin an inepata ippam̦

• kajjioñ kajim̦we l̦õmn̦ak eo an eo jeim̦ ak jatũm̦ ñe kwõj lo ke el̦ap an baj m̦õkaj an illu ak ba bwe ebar wõr an bõd

• meanwõd wõt im roñjake an eo jeim̦ ak jatũm̦ kwal̦o̦k eñjake ko an, im jekdo̦o̦n ñe kwõjjab lukkuun mel̦el̦e ak kwõj m̦ool ilo am̦ ba jol̦o̦k bõd kõn am̦ kar kõmetak eñjake ko an ak kõn men eo kwaar kõm̦m̦ane

EO JEIM̦ AK JATŨM̦ EJ AIKUJ . . .

• kappok rirejetake ilo eklejia eo ilo an ba ñan er kõn ta eo kwaar kõm̦m̦ane ñane

• bũroñe eok im tipdiki men ko kwaar kõm̦m̦ani ñan kainepataiki, innem kõtmãne bwe kwõn kwal̦o̦k ke kwõbõd

• kile an ettã bũruom̦ im am̦ kar kate eok ñan kepaake e, im m̦õn̦õn̦õ in jol̦o̦k am̦ bõd jãn aolepen bũruon

Meñe jejjab ajel̦o̦k menin katok ko ilo ad kabuñ ñan Jeova rainin, ak ewi wãween an naan ko an Jesus katakin kõj bwe ad kõm̦m̦an aenõm̦m̦an ippãn ro jeid im jatid im ad kabuñ ñan Anij rej ekkejell̦o̦k wõt ippãn doon?