Ta apañ ko kwõj iiooni kajjojo raan? Kwõj ke juon bõran baam̦le me elukkuun lõñ eddo ko me kwõj bõk eddoier? Kwõj ke jemãn ak jinen juon baam̦le me emake iaan im ej kajjioñ kabwe aikuj ko an baam̦le eo an? Kwõj ke juon jo̦dikdik eo me ri-jikuul̦ ro jet rej ũrõje ilo jikin jikuul̦? Kwõj ke juon eo me ejjab em̦m̦an ãjmour eo an ak juon eo me kõn an rũtto elõñ wãween ko rej jelõte? Aolep im wõr aer apañ. Elõñ Kũrjin ro rej jelm̦ae elõñl̦o̦k jãn juon apañ ilo juon wõt iien. Meñe ãindein ak jejel̦ã bwe m̦õttan jidik jenaaj anemkwõj jãn apañ kein.​—2Ko 4:16-18.

M̦ae tõre en̦, jemaroñ lo aenõm̦m̦an ilo ad jel̦ã bwe Jeova emel̦el̦e kõn apañ ko ad, im bwe ej kam̦m̦oolol kõn ad tiljek im kijenmej wõt, im ewõr jeraam̦m̦an ko rel̦l̦ap em̦õj an kõpooji ñan kõj ilo raan ko rej pãd im̦aan. (Jrm 29:11, 12) Jesus ej bar itoklimo kõn kõj. Ilo ad kajejjet eddo ko ad ãinwõt juon Kũrjin, jemaroñ lõke naan kein an me ear ba: “Inaaj pãd ippemi.” (Mt 28:20) Ñe jej bõjrak im kõl̦mãnl̦o̦kjen̦ kõn anemkwõj eo jenaaj bõke ilju im jekl̦aj ium̦win Aelõñ eo an Anij, jej kõkajoor kõjatdikdik eo ad im ad kate kõj ñan kijenmej ium̦win mãlejjoñ ko jej iiooni ilo raan kein.​—Rom 8:19-21.

ALWÕJE PIJA EO ETAN ÑE EJ WAL̦O̦K L̦AÑ KO REL̦L̦AP, REILO̦K WÕT ÑAN JIJEJ!​—JERAAM̦M̦AN KO ILJU IM JEKL̦AJ AELÕÑ EO ENAAJ KAJEJJETI, INNEM UWAAKI KAJJITÕK KEIN ITULAL̦:

• Ta eo ear kõm̦m̦an bwe armej ren jenolo̦k jãn Anij, im ta eo ear wal̦o̦k jãn wõt men in?

• Ta ilju im jekl̦aj eo me epojak ñan ro me rej tiljek ñan Jeova?

• Ewi wãween an jeraam̦m̦an in elukkuun em̦m̦an kõn ilju im jekl̦aj maroñ wal̦o̦k?

• Ta jeraam̦m̦an ko kwõj kijooror in loi ilo jukjukun pãd eo ekããl me kar kallim̦ur kake?