Jesus ear maroñ kwal̦o̦k naan ilo iien em̦m̦antok ñan kõrã in Sameria eo kõnke ear jino bwebwenato ippãn. Ewi wãween ad maroñ kakõm̦anm̦anl̦o̦k kilen ad jino bwebwenato ippãn armej ro jej kab iioon er?

• Kwal̦o̦k jouj im bwebwenato ippãn armej ro. Meñe Jesus ear m̦õk, ak ear jino bwebwenato ippãn kõrã eo ilo an baj kajjitõk wõt limen aebõj. Kõn men in, kwõmaroñ kwal̦o̦k jouj ilo am̦ yokyokwe armej ro im kajjioñ bwebwenato ippãer, bõlen kõn an em̦m̦an ak nana lañ, ak kõn juon men ear wal̦o̦k ilo bukwõn eo am̦. Keememej bwe ilo jinoin, kõttõpar eo am̦ ej ñan jino bwebwenato ippãn juon armej. Kõn men in, kwõn bwebwenato kõn jabdewõt men me armej eo emaroñ itoklimo kake. Im el̦aññe ejjab itoklimo in bwebwenato, jab ebbeer. Kwõmaroñ kajjioñ bwebwenato ippãn bar juon armej. Em̦m̦an kwõn jar im kajjitõk ippãn Jeova bwe en kaperan eok.​—Nih 2:4, UBS; Jrb 4:29, UBS.

• Pojak in kwal̦o̦k naan ilo jabdewõt iien epel̦l̦o̦k im jab ekkaiuriur in kõm̦m̦ane men in. Kwõmaroñ baj bwebwenato bajjek wõt ippãn armej eo. El̦aññe kwõj kajju kwal̦o̦k naan ippãn, emaroñ bõjrak im jab kõn̦aan bwebwenato ippam̦. Jab nana am̦ mour ñe ejem̦l̦o̦k amiro bwebwenato m̦okta jãn am̦ maroñ kwal̦o̦k naan ippãn. El̦aññe kwõmijak in kwal̦o̦k naan ilo iien em̦m̦antok, kwõmaroñ kõmmãlmel wõt kilen jino bwebwenato ippãn armej ro ilo am̦ bwebwenato bajjek ippãer im jab m̦õkaj im l̦õmn̦ak bwe kwõj aikuj kwal̦o̦k naan ñan er. [Kõjo̦e im etale pija eo kein kajuon.]

• Kajjioñ ejaake juon iien epel̦l̦o̦k ñan am̦ kwal̦o̦k naan ippãn ilo am̦ kõnnaan kõn men ko kwõj kaorõki kõn tõmak eo am̦. Men in emaroñ kõm̦akũt armej eo ñan kõm̦m̦an kajjitõk. Jesus ear kwal̦o̦k jet naan ko rekãitoktoklimo me rar kõm̦akũt kõrã eo ñan kwal̦o̦k kajjitõk ko. Im tokãlik ke ear kiiõ kwal̦o̦k naan ñane, men eo wõt ear kõm̦m̦ane ej uwaaki kajjitõk ko an. [Kõjo̦e im etale pija eo kein karuo, im tokãlik kõjo̦e im etale pija eo kein kajilu.]