Jej kõjerbal kajoor ko ad ilo mãlõtlõt ñe jej jibadek mejãnkajjik ko ilo ad karejar ñan Jeova. (1Ko 9:26) Mejãnkajjik ko rej jipañ kõj ñan kõjerbal iien kein ãliktata ilo mãlõtlõt m̦okta jãn an jem̦l̦o̦k jukjukun pãd in. (Ep 5:15, 16) Ilo iien kabuñ an baam̦le eo am̦, etke kwõjjab kõm̦m̦an mejãnkajjik ko ñan iiõ in kwal̦o̦k naan eo tok juon? Ñan jipañ eok kõm̦m̦ane men in, ewõr katak ko ilo kein katak in an allõñ in me rej kwal̦o̦k kõn jet mejãnkajjik ko me kwõmaroñ l̦õmn̦ak kaki im jar kaki.​—Jem 1:5.

Ñan waanjoñak, aolep ro ilo baam̦le eo remaroñ ke jerbal ippãn doon ñan jipañ bõlen juon iaaer ñan erom rekũl̦ar bainier? El̦aññe kwõjjab jel̦ã joñan maroñ eo am̦ ñan tõpar awa ko kwõj aikuj kajejjete, kõnono ippãn jet bainier ro me rej bar pãd ilo ejja wãween eo wõt kwõj iioone. (JK 15:22) Bõlen, kwõmaroñ interpiu ki juon bainier ilo iien kabuñ an baam̦le eo am̦. Innem je jikejuul̦ ko me kwõmaroñ kajejjeti. El̦aññe kwaar bainier m̦okta, l̦õmn̦ak kõn wãween ko kwõj iiooni im lale el̦aññe kwõmaroñ kõm̦m̦ane men in kiiõ.

Ewõr ke jet ilo baam̦le eo am̦ me remaroñ akjel̦õri bainier ilo juon ak elõñl̦o̦k allõñ? El̦aññe ewõr joñan maroñ ko am̦, kwõmaroñ akjel̦õri bainier ilo am̦ jol̦o̦k jidik iien kajjojo raan ilo kwal̦o̦k naan. El̦aññe ejabwe am̦ iien ñan etal im kwal̦o̦k naan ilo lukwõl̦pãn juon wiik, kõnke kwõj jerbal fulltime ak kwõj jikuul̦, bõlen kwõmaroñ kããlõt juon allõñ me ewõr holiday ie ak juon allõñ ewõr 5 wiikããn ko ie. Ilo juon kõl̦õn̦ta, je ñããt eo kwõj pepe in jino akjel̦õri bainier im kõm̦m̦ane juon am̦ jikejuul̦.​—JK 21:5.

ALWÕJE PIJA EO ETAN BE A COURAGEOUS . . . PIONEER, INNEM UWAAKE KAJJITÕK IN ITULAL̦:

• Ta eo joñak eo an jeid im jatid Aamand ej katakin kõj kõn an Jeova yokwe im kea kõn ro me rej kaarmejjeteik er make ñan aer maroñ bainier?