UNIN AN AORÕK KÕL IN: Bokin 1 Korint ej juon iaan lõta ko 14 jãn rijjilõk Paul me ear jei ñan kõkajoore Kũrjin ro jein im jatin. Ñe juon ej je juon lõta, emaroñ bõk an iien ñan kõl̦mãnl̦o̦kjen̦ kõn wãween eo ejejjet ñan jei naan ko an, im armej eo ej jejel̦o̦k ñane emaroñ riiti lõta eo elõñ alen ñe ekõn̦aan. Ad jeje lõta ej juon wãween em̦m̦an ñan kwal̦o̦k naan ñan ro nukũd im ro jejel̦ã kajjier. Ej bar juon wãween jemaroñ kõjerbale ñan tõpare ro me jejjab maroñ iioon er im kõnono ippãer. Ñan waanjoñak, bõlen ewõr en̦ jaar iioone ilo kwal̦o̦k naan im ear kwal̦o̦k an itoklimo ak epen ad tõpare ilo m̦weo im̦õn. Ewõr jet epen tõpar er kõnke rej jokwe ilo jikin ko me epen del̦o̦ñ ie, ak bukwõn eo aer ewõrwõr, ak bõlen ijo rej jokwe ie relukkuun ettol̦o̦k. Ta jet iaan men ko jej aikuj keememej ñe jej jejel̦o̦k ñan juon eo jejaje kajjien?

KILEN KÕM̦M̦ANE:

• Kwõn jei men ko kwõn kar ba ñan armej eo ñe kwaar iioone im kõnono ippãn. Ilo jinoin lõta eo, kwõn kwal̦o̦k etam̦ im unin am̦ jejel̦o̦k ñane. Kwõmaroñ lel̦o̦k juon kajjitõk me emaroñ l̦õmn̦ak kake, im kwal̦o̦k kõn weepjait eo ad. Innem kõmel̦el̦e ilo tukadu kõn wãween ad katak Baibõl̦ ippãn ro jet, ak kwal̦o̦k jet iaan taitõl̦in katak ko jãn juon iaan bok ko jej katak ippãn armej. Kwõmaroñ bar kobaiki juon iaan kein lel̦o̦k ko ad, ãinwõt kaat jidikdik eo ad, juon peba in kũr, ak juon tũrããk

• En jab aetok. Ejjab aikuj aetok lõta eo am̦ kõnke emaroñ jako an ri-m̦weo itoklimo in riiti.​—Lale waanjoñak eo kõn kilen je juon lõta

• Riiti im lale el̦aññe ewõr jabdewõt men kwõj aikuj kajim̦we im ñe epidodo im alikkar am̦ riiti. Bar lale ñe ejouj im em̦m̦an naan ko am̦. Bareinwõt, lale el̦aññe ebwe joñan jitaam̦ ko kwõj likũti ilo kilin lõta eo