Jorrããn ko rel̦l̦ap jãn l̦añ ko im men ko ãierl̦o̦kwõt ekkã aer l̦apl̦o̦k aer wal̦o̦k rainin. Ñe ej wal̦o̦k jorrããn, ej juon menin aikuj bwe en lukkuun laajrak im kon̦ wãween ko ñan lel̦o̦k jipañ. Kõn men in, Kumi eo Ej Lale Aolep Eklejia ko an Ri Kõnnaan ro an Jeova ear karõk bwe en wõr juon Disaster Relief Department ilo kajjojo ra ko.

Ñe ro jeid im jatid ilo department in rejel̦ã bwe ewõr jorrããn ear wal̦o̦k, rej m̦õkaj im kepaak em̦m̦aan ro rej lale eklejia eo ñan lale ta ko ro jeid im jatid rej aikuji. El̦aññe jorrããn eo elukkuun l̦ap im ro jeid im jatid rejjab maroñ make kõm̦adm̦õde, ra eo enaaj jitõñ em̦m̦aan ro rekkar ñan tõl jerbalin jipañ ilo jikin eo ej wal̦o̦k jorrããn ko rel̦l̦ap ie. Rein jeid im jatid remaroñ kajjitõk ñe ewõr rekõn̦aan volunteer ak kajjitõk kõn jabawõt ko me rej aikuji, ak remaroñ wia im ajej menin aikuj ko ilo jikin eo.

Elukkuun lõñ wãween ko rem̦m̦an remaroñ wal̦o̦k jãn wãween in. Ej kõjparok bwe en jab l̦ap jerbal, poktak, im ko̦kkure jããn im men ko kõbwebweien ad jipañ, im men kein remaroñ wal̦o̦k ñe ro jeid im jatid rej make em̦m̦akũt im jipañ ippãer make.

Ro jeid im jatid me ra eo ear jitõñ er remaroñ pepe kõn joñan jããn eo im jete volunteer ro renaaj aikuji ñan jerbal eo. Remaroñ bar kepaak reutiej ro an jikin eo, me remaroñ jipañ kõj bwe en m̦õkajl̦o̦k an m̦õj jerbal eo. Kõn men in, kõj kajjojo jejjab aikuj m̦õkaj im ebbõk jããn, jilkinl̦o̦k m̦weiuk ko, ak etal ñan jikin ko rejorrããn ijello̦kun wõt ñe kar kajjitõk ippãd bwe jen kõm̦m̦ani men kein.

Ak meñe ãindein, ñe ewal̦o̦k jorrããn, jekõn̦aan jipañ. (Hi 13:16) Jej yokwe ro jeid im jatid! Ta eo jemaroñ kõm̦m̦ane? Men eo aorõktata, jemaroñ jar kõn ro rej iioon jorrããn im kõn ro rej jipañ. Jemaroñ bareinwõt jabawõt ñan jerbal eo ad ipel̦aakin lal̦ in. Ium̦win tõl eo an Kumi eo Ej Lale Aolep Eklejia ko an Ri Kõnnaan ro an Jeova, ra ko rejel̦ã wãween eo em̦m̦antata im ia eo em̦m̦antata ñan kõjerbal jabawõt kein ie. Im ñe jekõn̦aan jipañ im bõk kun̦aad ilo jerbal in, jemaroñ kwal̦o̦k bwe jemaroñ jipañ ikijjeen ad kanne Local Design/Construction Volunteer Application (DC-50).

KÕJO̦E PIJA EO ETAN DEVASTATING FLOODING IN BRAZIL, IM UWAAKE KAJJITÕK EO ITULAL̦:

Ta eo em̦m̦an ippam̦ kõn an Ri-Kõnnaan ro an Jeova jipañ jeier im jatier ilo jikin ko rejorrããn, ãlikin an ibwiji Brazil ilo 2020 eo?