Epidodo an apañ ko kabbweer kõj, el̦aptata ñe eto aer pãd. Devid ear jel̦ã bwe apañ eo an ippãn Kiiñ Saul enaaj kar jem̦l̦o̦k wõt im bwe enaaj erom kiiñ, ãinwõt an kar Jeova kallim̦ur. (1Sa 16:13) Tõmak eo an Devid ear jipañe ñan kijenmej im kõttar wõt Jeova.

Ñe jej iioon apañ, jemaroñ kõjerbal mãlõtlõt, jel̦ãl̦o̦kjen̦, ak lol̦o̦kjen̦ ñan kõm̦adm̦õde im ukot wãween eo jej iioone. (1Sa 21:12-14; JK 1:4) Bõtab, jet apañ ko renaaj wõnm̦aanl̦o̦k wõt jekdo̦o̦n ñe em̦õj ad kate kõj joñan wõt ad maroñ ñan kõm̦adm̦õdi ekkar ñan naanin kakapilõk ko ilo Baibõl̦. Ilo wãween rot kein, jej aikuj kwal̦o̦k kijenmej im kõttar wõt Jeova. M̦õttan jidik enaaj jol̦o̦k aolep men ko jej eñtaan kaki im ‘kõm̦õrãik jãn mejãd dãnnin kõmjaal̦al̦ otemjej.’ (Rev 21:4) El̦aññe jej bõk jipañ ikijjeen juon men me Jeova enaaj kõm̦m̦ane ak kõn bar jet un ko, jemaroñ kõtmãne bwe: Ewõr juon iien aolep apañ ko renaaj jem̦l̦o̦k. Ad jel̦ã men in em̦ool emaroñ kaenõm̦m̦an kõj.

KÕJO̦E PIJA EO ETAN A UNITED PEOPLE IN A DIVIDED WORLD, INNEM UWAAKE KAJJITÕK KEIN ITULAL̦:

• Ta wãween ko reppen Kũrjin ro iturõkin Amedka rar iioone?

• Ewi wãween aer kar kwal̦o̦k kijenmej im yokwe?

• Ewi wãween aer kar wõnm̦aanl̦o̦k im “lukkuun lale ta ko raorõkl̦o̦k”?​—Pil 1:10