Ãinwõt aolep kweilo̦k ko an eklejia, kweilo̦k in kwal̦o̦k naan ej menin letok jãn Jeova bwe jen maroñ rõjañ doon ñan kwal̦o̦k yokwe im jerbal ko rekanooj in em̦m̦an. (Hi 10:24, 25) Ej aikuj l̦alem ñan jimjuon minit aetokin, men in ej kitibuj aer karõk ri-kwal̦o̦k naan ro, lel̦o̦k teretore, im jar. (El̦aññe kweilo̦k in kwal̦o̦k naan eo ej wal̦o̦k ãlikin juon kweilo̦k an eklejia, innem ej aikuj kadul̦o̦k.) Eo me ej tõl ej aikuj kõpooje juon men me enaaj jipañ ro rej kwal̦o̦k naan ilo raan eo. Ñan waanjoñak, ilo raanin Jãdede, ñe elõñ iaan ri-kwal̦o̦k naan ro rejjañin kwal̦o̦k naan jãn wiikããn eo l̦o̦k, emaroñ juon menin jipañ ñan kõnono kõn ta ko jemaroñ kõnnaan kaki. Ta jet iaan men ko jemaroñ kõnono kaki me remaroñ bar jipañ?

• Juon waanjoñak kõn kilen bwebwenato ippãn armej jãn Jerbal eo Ad im Wãween Ad Mour​—Kein Katak

• Kilen kõjerbale nuuj ko ak men ko rej wal̦o̦k kiiõ ñan jino bwebwenato ippãn armej

• Kilen uwaake juon iaan naan ko ekkã an armej ba ñan kabõjrak ad kwal̦o̦k naan ñan er

• Kilen uwaake juon eo ejjab tõmak bwe ewõr Anij, juon eo ej tõmak bwe aolep men rar jide im wal̦o̦k, juon eo ej kõnono ilo bar juon kajin, ak juon eo ej m̦õttan juon kabuñ me ejeja an armej jel̦ã kake ilo teretore eo am̦

• Kilen kõjerbal weepjait eo jw.org, JW Library^® app eo, ak Baibõl̦ eo

• Kilen kõjerbal juon iaan kein jerbal ko jãn Nien Kein Jerbal eo Ad ñan Katakin

• Kilen bõk kun̦aam ilo juon iaan wãween ko jej kwal̦o̦k naan ãinwõt, kwal̦o̦k naan ilo talboon, jeje lõta, kwal̦o̦k naan ilo̦bwilej, kõm̦m̦an bar jepl̦aak ko, ak katak Baibõl̦ ippãn armej ro

• Naanin kakeememej ko kõn kõjparok, jel̦ã ukoktak, jel̦ã m̦anit, bõk l̦õmn̦ak ko rem̦m̦an, ak men ko ãierl̦o̦kwõt

• Juon katak ak pija jãn bok eo etan Kate Eok ñan Kal̦apl̦o̦k Am̦ Jel̦ã Kilen Riit im Katakin

• Kilen kõketak ak jipañ ri-kwal̦o̦k naan eo m̦õttam̦

• Juon eoon me ej ekkejell̦o̦k ñan jerbalin kwal̦o̦k naan ak juon bwebwenato eo ekõketak kõn juon men ear wal̦o̦k ilo jerbalin kwal̦o̦k naan