Ejjabto kijenmej im meanwõd eo an Jeova kõn lal̦ in enaaj jem̦l̦o̦k. Naaj ko̦kkure kabuñ ko rewaan, kumi in elõñ aelõñ ko renaaj ko̦kkure armej ro an Anij, im Jeova enaaj m̦an armej ro renana ilo Armagedon. Kũrjin ro rej reim̦aanl̦o̦k ñan iien kein raorõk im rekabwilõñlõñ.

Ilo m̦ool, jejjab jel̦ã tipdikin aolep men ko renaaj wal̦o̦k ilo eñtaan eo el̦ap. Ñan waanjoñak, jejjab lukkuun jel̦ã ñããt eo enaaj ijjino. Jejjab jel̦ã ta unin an kien ko rekajoor an lal̦ naaj pepe in ko̦kkure kabuñ ko. Jejjab jel̦ã ewi toon an naaj aelõñ ko ko̦kkure armej ro an Anij ak ta ko renaaj wal̦o̦k. Jejjab bar lukkuun jel̦ã ta eo Jeova enaaj kõjerbale ñan ko̦kkure ro renana ilo Armagedon.

Bõtab, Baibõl̦ eo ej letok ñan kõj aolep mel̦el̦e ko jej aikuji bwe en wõr ad peran im lõke kõn ilju im jekl̦aj. Ñan waanjoñak, jejel̦ã bwe jej mour ilo jem̦l̦o̦kin “raan ko ãliktata.” (2Ti 3:1) Jejel̦ã bwe naaj “kakadul̦o̦k iien” ñan ko̦kkure kabuñ ko bwe kabuñ eo em̦ool en jab bõk ko̦kkure. (Mt 24:22) Jejel̦ã bwe Jeova enaaj lo̦mo̦o̦ren armej ro an. (2Pi 2:9) Im jejel̦ã bwe Eo me Jeova ear kããlõte ñan ko̦kkure ro renana im lo̦mo̦o̦ren jar eo el̦ap ilo Armagedon ewãnõk im l̦ap an kajoor.​—Rev 19:11, 15, 16.

Men ko renaaj wal̦o̦k ilju im jekl̦aj enaaj lukkuun kõm̦m̦an bwe armej ren “l̦otl̦o̦k kõn aer lõl̦ño̦ñ.” Bõtab, ilo ad riit im kõl̦mãnl̦o̦kjen̦ kõn men ko Jeova ear kõm̦m̦ani m̦okta ke ear lo̦mo̦o̦ren armej ro an im ta ko enaaj kõm̦m̦ani ilju im jekl̦aj, jemaroñ “jutak im reilõñl̦o̦k,” im lõke bwe epaaktok iien ad bõk lo̦mo̦o̦r.​—Lk 21:26, 28.