UNIN AN AORÕK KÕL IN: Aolep bok, tũrããk, im men ko jet ilo Nien Kein Jerbal ko Ad ilo Kwal̦o̦k Naan rej jitõñl̦o̦k ñan jw.org. Ilo m̦ool, unin kar kõm̦m̦ane kaat jidikdik eo im tũrããk eo etan Epãd Ia Uwaakin Kajjitõk ko me Ekkã an Armej ro Kajjitõk Kaki? ej ñan jitõñl̦o̦k ñan weepjait eo ad. Kwõmaroñ kõjerbal jw.org ñan bar bwini bok ko im men ko jet jej kõjerbali ilo kwal̦o̦k naan. Ewi wãween? Ilo am̦ taunl̦outi juon iaan men kein jãn weepjait eo ad im jilkinl̦o̦k ilo e-mail ñan ro jet ak jipede ijo ej ba, Jilkinl̦o̦k ñan Ro Jet. El̦ap an nãj kein jerbal kein bar jipañ ñe kokõn̦aan kwal̦o̦k naan ñan juon armej me ej kõnono bar juon kajin. Bareinwõt, jet iien armej ro remaroñ kwal̦o̦k kajjitõk ko me uwaak ko rejjab pãd ilo bok ko im men ko jet ilo Nien Kein Jerbal ko Ad ilo Kwal̦o̦k Naan. Kõn men in, el̦aññe jejel̦ã kilen kõjerbal weepjait eo ad, enaaj l̦apl̦o̦k ad lo tõprak ilo jerbalin kwal̦o̦k naan.

KILEN KÕM̦M̦ANE:

• Kwõmaroñ kõjerbal ijo ej ba “BIBLE TEACHINGS” ilo weepjait eo ad ilo kajin Pãlle. Jen ba bwe kwõj kwal̦o̦k naan ñan juon jemãn ak jinen ajri ro im ekõn̦aan kal̦apl̦o̦k an jel̦ã kõn kilen katakin ajri ro nejin. Kwõmaroñ etal im jipede ijo ej ba BIBLE TEACHINGS > MARRIAGE & FAMILY.

• Kwõmaroñ kõjerbal ijo ej ba “BOK IM KEIN KATAK” ilo weepjait eo ad ilo kajin M̦ajel̦. Jen ba bwe kwõj kwal̦o̦k naan ilo jikin jikuul̦ im kokõn̦aan kwal̦o̦k ñan juon iaan rijikuul̦ ro kõn brochure eo etan Uwaak ko ñan 10 Kajjitõk ko Jo̦dikdik Ro Rej Kajjitõk. Kwõmaroñ etal im jipede ijo ej ba BOK IM KEIN KATAK > BOK IM BROCHURE.

• Kwõmaroñ kõjerbal ijo ej ba “ABOUT US” ilo weepjait eo ad ilo kajin Pãlle. Jen ba bwe kwõj kwal̦o̦k naan ñan juon m̦õttam̦ rijerbal me em̦õn̦õn̦õ in riiti kõmel̦el̦e ko ilo tukadu kõn tõmak eo ad. Kwõmaroñ etal im jipede ijo ej ba ABOUT US > FREQUENTLY ASKED QUESTIONS.

ALWÕJE PIJA EO ETAN NAVIGATING JW.ORG, INNEM L̦ÕMN̦AK KÕN IA EO ILO WEEPJAIT EO KWÕMAROÑ ETAL ÑANE ÑAN JIPAÑ ARMEJ REIN:

• Juon eo ej pere bwe ewõr Anij

• Juon armej me ej kab iioon juon wãween enana im ekabũrom̦õjm̦õj

• Juon jeid im jatid me ejako an kwal̦o̦k naan im itok ñan kweilo̦k ko

• Juon armej kwõj jepl̦aak ippãn im ekõn̦aan jel̦ã ia eo jej bõk jããn jãne ñan kõm̦m̦ane jerbal in ad

• Juon armejin aelõñ ko jet me ekõn̦aan jel̦ã ia eo emaroñ etal im kweilo̦k ie ilo aelõñ eo an