L̦õmn̦ak m̦õk kõn bo ro me relukkuun jejir jãn doon, kõtaan eo aerro ippãn doon elukkuun epaak im relukkuun yokwe doon. Juon kõrã etan in Nancy Segal im ebar wõr an bo, im ej jerbal ilo juon jikin rej kõm̦m̦an ekkatak kõn bo ro, ej ba bwe ewõr jet bo rot in “ñe rej kõnono ippãn doon relukkuun mel̦el̦e kõn doon.” Juon kõrã ej kõmel̦el̦e kõn kõtaan eo aerro bo eo an, ej ba: “Kom̦ro lukkuun jel̦ã im mel̦el̦e kake doon.”

Etke bo rein rej ãindein? Eokwe, ro rej kõm̦m̦an etale ko im rej ekkatak kõn men in, rej ba bwe ej kõn wãween aer kar dik im rũttol̦o̦k im wãween an jineer im jemãer kar lale er, bõtab men eo el̦aptata ej kõm̦m̦an aer ãindein ej kõnke juon wõt wãween aer kar ejaak.

L̦ÕMN̦AK KÕN MEN IN: Eo ear ejaake im kõm̦anm̦an kõj elukkuun l̦ap an jel̦ã ak mel̦el̦e kõn kõj kajjojo jãn jabdewõt armej. Rijeje sam eo Devid, ear kaalikkarel̦o̦k men in ke ear ba: “Kwaar booj ãnbwinnũ ilo̦jien jinõ. Kwaar lo di ko diũ ke rar jino ejaak . . . ke iar eddek ijo ettino. Kwaar lo eõ m̦okta jãn aõ kar l̦otak. Ilo bok eo am̦ em̦õj am̦ je.” (Sam 139:13, 15, 16, UBS) Anij wõt elukkuun jel̦ã kõn wãween an ãnbwinnid ejaak, ejjab men in wõt ak ebar jel̦ã im mel̦el̦e kõn wãween ko jaar iiooni ilo mour ko ad me rej jelõt wãween ad mour. Kõn an Anij jel̦ã kõn kõj im wãween ad kar ejaak, men in ej kõm̦m̦an ad tõmak bwe elukkuun mel̦el̦e kake kõj jãn men en̦ edik ñan men en̦ el̦ap.

Devid ear jar im ba: “O Irooj, kwaar etale eõ, im kwõjel̦ã wãweeõ. Kwõjel̦ã men otemjej ij kõm̦m̦ani; Jãn ijo ettol̦o̦k kwõjel̦ã l̦õmn̦ak ko aõ otemjej. Aet, m̦okta jãn aõ kõnono etto wõt ke kwaar jel̦ã men eo inaaj ba.” (Sam 139:1, 2, 4, UBS) Bareinwõt, Jeova ejel̦ã kõn eñjake ko ad, joñan “ejel̦ã kõn pepe im l̦õmn̦ak otemjej.” (1 Kronikel 28:9; 1 Samuel 16:6, 7) Ta ko eoon kein rej kwal̦o̦k kake kõn Anij?

Meñe emaroñ jab wal̦o̦k ainikied ñe jej jar im kwal̦o̦k aolep eñjake im l̦õmn̦ak ko ad ñan Anij, bõtab ejel̦ã kõn kõm̦m̦an ko ad im bareinwõt emel̦el̦e etke jej kõm̦m̦ani. Ejjab men in wõt ak emel̦el̦e kõn men ko rem̦m̦an bũruod ekõn̦aan kõm̦m̦ani meñe ewõr apañ ko ippãd me rej kautam̦weik ad wõnm̦aanl̦o̦k im kõm̦m̦ani. Em̦ool Anij ear likũt yokwe ilo bũruod ke ear kõm̦anm̦an kõj. Eñin unin em̦õn̦õn̦õ im elukkuun kõn̦aan jel̦ã im mel̦el̦e kõn l̦õmn̦ak ko ad im bũruod.​—1 Jon 4:7-10, UBS.

 Eoon ko rej kaenõm̦m̦an kõj

• Jeova ej “kalimjek ro rewãnõk im iien otemjej ej roñjake jar ko aer.”​—1 PITER 3:12, UBS.

• Anij ej kallim̦ur im ba: “Inaaj katakin eok kõn ial̦ eo kwõn etal iel̦o̦k. Inaaj katakin eok im kakapilõk eok.”​—SAM 32:8, UBS.

Ilo ad jel̦ã bwe Anij emel̦el̦e kõn eñjake ko ad im men ko jej iiooni, men in emaroñ ke jipañ kõj ñan kijenmej wõt ilo apañ ko jej jelm̦aiki? Jen lale ta eo ear wal̦o̦k ñan Anna, jãn Nigeria. Ej kõmel̦el̦e im ba, “Ke iar iioon apañ ko rel̦l̦ap, iar l̦õmn̦ak el̦aññe ewõr tokjãn aõ mour. Iar make iaõ im lale ledik eo nejũ, eo ear del̦o̦ñ ilo hospital kõnke ear wõr dãn ilo kõmãlij eo an (hydrocephalus). Ilo ejja iien in wõt, iar bõk nañinmej in cancer ilo ittũ, im iar aikuj m̦wijm̦wij im bareinwõt bõk kõm̦adm̦õd ko jet ãinwõt chemotherapy im radiotherapy. Ear lukkuun pen ñan ña kõnke kom̦ro jim̦or ledik eo nejũ enañinmej kar pãd ilo hospital.”

Ta eo ear jipañ Anna ñan an kijenmej wõt? “Iar kõl̦mãnl̦o̦kjen̦ kõn eoon ko ãinwõt Pilippai 4:6, 7, eo ej ba ‘aenõm̦m̦an jãn Anij, eo ej el̦l̦ã jãn jel̦ã otemjej, enaaj kõjparok bũruomi im l̦õmn̦ak ko ami.’ Aolep iien ñe ij l̦õmn̦ak kõn eoon in, ij eñjake aõ epaakel̦o̦k wõt Jeova kõn aõ jel̦ã bwe el̦apl̦o̦k an mel̦el̦e kõn ña jãn aõ mel̦el̦e kõn ña make. Bareinwõt, ro jeiũ im jatũ ilo eklejia eo el̦ap aer kar jipañ im kõkajoor eõ.

“Meñe ij kijenmej wõt kõn nañinmej eo aõ, bõtab em̦m̦anl̦o̦k wãween am̦ro ledik eo nejũ mour. Kom̦ro ar katak bwe en jim̦we wõt am̦ro l̦õmn̦ak ñe kom̦ro ej iioon apañ kõnke Jeova ej pãd ippemro. Jemes 5:11 ej kõkajoor kõj ilo an ba: ‘Jej likũt er rem̦õn̦õn̦õ ro rar kijenmej. Kom̦ar roñ kõn an Job kijenmej, im kom̦ar lo jem̦l̦o̦k eo jãn Irooj, ekõjkan Irooj ekanooj jouj im tũriam̦okake.’” Ear l̦ap an Jeova mel̦el̦e kõn wãween ko Job ear iiooni, im jemaroñ bar lõke im tõmak bwe ebar mel̦el̦e kõn jabdewõt apañ jej jelm̦aiki.