1. Ta eo ej kõm̦m̦an am̦ lukkuun tõmak bwe Naanin Anij ej jerbal wõt? (Lale pija eo itulõñ.)

 EL̦AP an armej ro an Jeova tõmak bwe naan ko an Jeova ak ennaan eo an ñan kõj, “ej mour im jerbal wõt.” (Hi. 4:12) Em̦õj ad loe wãween an kajoor eo an Naanin Anij jipañ kõj ilo mour ko ad im mour ko an ro jet. Ewõr ro jeid im jatid me m̦okta rekõn ko̦o̦t, bũki im añũri uno ko rekajoor, im mourin l̦õñ. Ro jet rekar lukkuun buñbuñ im lõñ aer jããn bõtab rar kile bwe rar jab lukkuun m̦õn̦õn̦õ ilo mour ko aer. (Ekl. 2:3-11) Ak jelukkuun m̦õn̦õn̦õ bwe ro me ejjañin kar wõr aer kõjatdikdik im rar jebwãbwe, kiiõ ewõr aer kõjatdikdik im naanin tõl ko ñan er. Ium̦win elõñ iiõ, jaar m̦õn̦õn̦õ in riiti elõñ bwebwenato in armej rein ilo katak eo ilo Naan in Keeañ me ej ba, “Baibõl̦ Eo Ej Ukot Mour Ko.” Im meñe em̦õj an rein erom Kũrjin, ak rej aikuj kate wõt er im kõtl̦o̦k bwe Naanin Anij en jipañ er ñan kõkajoor kõtaan eo aer ippãn Jeova.

2. Ewi wãween an kar Naanin Anij jelõt Kũrjin ro jinoin?

² Elõñ armej rar kõm̦m̦an oktak ko rel̦l̦ap ilo mour ko aer ãlikin aer katak im jel̦ã m̦ool eo. Jej aikuj ke bwilõñ kõn men in? Ejjab ñan jidik! Kũrjin rũkkapit ro jeid im jatid ilo jinoin rar bar aikuj kõm̦m̦an oktak ko. (Riit 1 Korint 6:9-11, UBS.) Ke rijjilõk  Paul ear kwal̦o̦k kõn ro me reban jolõt Aelõñ eo an Anij, ear ba ñan Kũrjin ro jinoin im ba: “Jet iaami rar ãindein.” Bõtab, Kũrjin rein rar kõm̦m̦an oktak kõn an kar Naanin Anij im jetõb kwõjarjar eo jipañ er. Im meñe em̦õj aer kar erom Kũrjin, ak jet iaaer rar bar kõm̦m̦ani bõd ko rel̦l̦ap me rar jelõt kõtaan eo aer ippãn Jeova. Ñan waanjoñak, Baibõl̦ ej kwal̦o̦k kõn aer kar aikuj bukwel̦o̦ke juon em̦m̦aan me ear rũkkapit. Ak tokãlik, em̦m̦aan in ear kõm̦m̦an oktak im ear bar m̦õttan eklejia eo. (1 Ko. 5:1-5; 2 Ko. 2:5-8, UBS) Kõn men in, ad jel̦ã bwe Naanin Anij ear jipañ ro jeid im jatid bwe ren maroñ kõm̦m̦an oktak ko, el̦ap an rõjañ im kõkajoor kõj.

3. Ta ko jenaaj etale ilo katak in?

³ Naanin Anij elukkuun kajoor. Im kõnke Jeova ear letok Naan kein an ñan kõj, jekõn̦aan bwe en lukkuun em̦m̦an wãween ad kõjerbale. (2 Ti. 2: 15, UBS) Ilo katak in, jenaaj lale ta eo jemaroñ kõm̦m̦ane ñan kõtl̦o̦k bwe Naanin Anij en jerbal im jipañ kõj ilo (1) mour ko ad, (2) ilo ad jerbalin kwal̦o̦k naan, im (3) ñe jej kwal̦o̦k katak ko ad ijo im̦aan ilo iien kweilo̦k ko. Ilo ad etale men kein, enaaj jipañ kõj bwe jen kwal̦o̦k ad yokwe im kam̦m̦oolol Jemãd ilañ, eo im ej katakin kõj kõn men ko rem̦m̦an.​—Ais. 48:17, UBS.

4. (1) Ta eo jemaroñ kõm̦m̦ane bwe Naanin Anij en maroñ jipañ kõj? (2) Ta eo kwõj kõm̦m̦ane bwe en wõr am̦ iien ñan riiti Baibõl̦?

⁴ El̦aññe jekõn̦aan kõtl̦o̦k bwe Naanin Anij en jipañ kõj, jaikuj kate kõj bwe jen riiti kajjojo raan. (Jos. 1:8, UBS) Em̦ool bwe kõj aolep elukkuun l̦ap ad poub, bõtab jejjab aikuj kõtl̦o̦k bwe jabdewõt men ekoba eddo ko ad ren kabõjrak kõj jãn ad riit Baibõl̦. (Riit Epesõs 5:15, 16, UBS.) Bõlen emaroñ wõr iien ñan ad riit ilo jibboñ, ilo jota, ak ilo iien ko jet repel̦l̦o̦k ilo juon raan. Jej ãinwõt rijeje sam eo ke ear ba: “O enañin l̦ap aõ yokwe kien ko Am̦! I kõl̦mãnl̦o̦kjen̦ kake ium̦win aolepen raan.”​—Sam 119:97.

5, 6. (1) Etke eaorõk ñan ad aikuj kõl̦mãnl̦o̦kjen̦? (2) Ewi wãween bwe jen lo tõprak ilo ad kõl̦mãnl̦o̦kjen̦? (3) Ta tokjãn ko kwaar loi jãn am̦ kar riiti Baibõl̦ im kõl̦mãnl̦o̦kjen̦ kake?

⁵ Bõtab ejabwe ñan ad baj riiti wõt Baibõl̦. Ebar aorõk bwe jen lukkuun kõl̦mãnl̦o̦kjen̦ kõn men ko jej riiti. (Sam 1:1-3) Eñin ej wãween eo wõt me enaaj jipañ kõj ñan jerbali naanin kakapilõklõk ko jãn Baibõl̦ ilo mour ko ad. Innem jekdo̦o̦n ñe jej riiti Baibõl̦ eo ilo bok ak jej riiti jãn tablet ak jeel̦boon ko nejid, jekõn̦aan kõtl̦o̦k bwe Naanin Anij en tõpar bũruod im kõm̦akũt kõj ñan kõm̦m̦an oktak.

⁶ Ewi wãween bwe jen lo tõprak ilo ad kõl̦mãnl̦o̦kjen̦ kõn men ko jej riiti? Eokwe, ñe jej riiti Baibõl̦ eo, em̦m̦an ñe jej bõjrak jidik im kajitũkin kõj make: ‘Ta eo men in ej katakin  eõ kõn Jeova? Ewi wãween aõ jerbali men ko ij riiti ilo mour e aõ? Ta oktak ko ij aikuj wõnm̦aanl̦o̦k im kõm̦m̦ani?’ Ñe jej kõl̦mãnl̦o̦kjen̦ kõn Naanin Anij im jar kõn men ko jej riiti, jenaaj kõn̦aan jerbali ilo mour ko ad. Innem jenaaj lo wãween an Naanin Anij jerbal im jipañ kõj ilo mour ko ad.​—2 Ko. 10:4, 5, UBS.

7. Ewi wãween bwe en em̦m̦an im jim̦we wãween ad kõjerbale Naanin Anij ilo ad jerbalin kwal̦o̦k naan?

⁷ Elukkuun aorõk bwe jen kõjerbale Naanin Anij aolep iien ñe jej kwal̦o̦k naan im katakin armej ro. Juon jeid im jatid em̦m̦aan ear ba: “Ñe kwõn kar kwal̦o̦k naan jãn em̦ ñan em̦ ippãn Jeova, en ke kar kwe eo el̦ap wõt an kõnono ak kwõnaaj ke kar kõtl̦o̦k bwe Jeova en kõnono?” Ñe jej riiti eoon ko jãn Baibõl̦ ñan bar juon armej, jej kõtl̦o̦k bwe Jeova eo en kõnono ñane. El̦apl̦o̦k an kajoor ñe ejejjet eoon eo jaar kããlõte ñan riitil̦o̦k ñan juon armej jãn jabdewõt men ko jenaaj kar ba. (1 Te. 2:13, UBS) Ñe kwõj kwal̦o̦k naan, kwõj ke kate eok ñan kõjerbale Baibõl̦ eo aolep iien joñan wõt am̦ maroñ?

8. Etke ejjab bwe ñe jej baj riiti wõt eoon ko ñan armej ro ñe jej kwal̦o̦k naan?

⁸ Bõtab, ejjab bwe ñe jej baj riiti wõt eoon ko ilo Baibõl̦ ñan ro jej kwal̦o̦k naan ñan er. Etke? Kõnke enañin aolep armej rejjab lukkuun mel̦el̦e kõn men ko rej riiti ilo Baibõl̦. Men in ear wal̦o̦k ilo iien ko an rijjilõk ro im ej bar wal̦o̦k ilo raan kein. (Rom 10:2, UBS) Jejjab aikuj m̦õkaj im l̦õmn̦ak bwe rũm̦weo emel̦el̦e kõn eoon ko jej riiti ñane. Ak jej aikuj jipañe ilo ad bar ãliji boin ko raorõk jãn eoon eo im kõmel̦el̦eiki. Ilo wãween in, Naanin Anij enaaj tõpar l̦õmn̦ak im bũruon armej eo.​—Riit Luk 24:32, UBS.

9. Ewi wãween jemaroñ jipañ armej ro ñan kautiej Baibõl̦ eo ikijjeen men ko jej ba m̦okta jãn ad riitil̦o̦k juon eoon? Kwal̦o̦k juon waanjoñak.

⁹ Men ko jej ba m̦okta jãn ad riiti juon  eoon remaroñ bar jipañ rũm̦weo ñan kautiej Baibõl̦ eo. Ñan waanjoñak, jemaroñ ba, “Jen lale ta eo Rũkõm̦anm̦an eo ad ej ba kõn men in.” Ak bõlen ñe jej kõnono ippãn juon armej me kabuñ eo an ejjab Kũrjin, jemaroñ ba, “Jen lale ta eo Jeje in etto ko me Rekkwõjarjar rej ba.” Bareinwõt, ñe jej iioone juon armej me el̦apl̦o̦k an kaorõk jel̦ãl̦o̦kjen̦ ko an lal̦ in, jemaroñ kajjitõk im ba, “Em̦õj ke am̦ roñ kõn jabõn kõnnaan in jãn iien ko etto?” El̦aññe jenaaj keememej bwe eoktak tõmak ko an kajjojo armej im wãween aer kar dik im rũttol̦o̦k, jenaaj kate kõj joñan wõt ad maroñ ñan kõm̦m̦an bwe naanin ijjino ko ad ren kãitoklimoik er.​—1 Ko. 9:22, 23, UBS.

10. (1) Ta eo ear wal̦o̦k ñan juon jeid im jatid em̦m̦aan? (2) Ewi wãween am̦ kar lo an Naanin Anij lukkuun kajoor ke kwaar kõjerbale ilo jerbalin kwal̦o̦k naan?

¹⁰ Elõñ rar lo bwe Naanin Anij elukkuun kajoor im el̦ap an tõpar bũruon armej ro rar kwal̦o̦k naan ñan er. Ñan waanjoñak, juon jeid im jatid em̦m̦aan ear lol̦o̦k juon l̦al̦l̦ap me elõñ iiõ in an riiti bok ko ad. Juon raan, ijello̦kun an kar em̦m̦aan in etal im lel̦o̦k juon Naan in Keeañ ekããl ñan l̦al̦l̦ap eo, ear pepe in riitil̦o̦k juon eoon. Ear riiti eoon eo ilo 2 Korint 1: 3, 4, me ej ba: “Jemãn tũriam̦okake, im Anij in aenõm̦m̦an otemjej . . . ej kaenõm̦m̦ane kõm ilo am jorrããn otemjej.” Joñan an kar naan kein lukkuun tõpar bũruon l̦al̦l̦ap in, ear kajjitõk ippãn em̦m̦aan eo jeid im jatid bwe en bar riiti eoon in. Innem ear ba bwe e im kõrã eo pãleen erro lukkuun aikuj kaenõm̦m̦an. Im ãlikin an kar roñjake eoon in, ear kiiõ kõn̦aan kal̦apl̦o̦k an jel̦ã kõn Baibõl̦. Kõn men in, elukkuun alikkar bwe ilo ad kõjerbal Naanin Anij ilo jerbalin kwal̦o̦k naan elukkuun kajoor im enaaj l̦ap an jipañ kõj!​—Jrb. 19:20, UBS.

11. Ta eddo eo an em̦m̦aan ro jeid im jatid me rej kwal̦o̦k katak ko aer ijo im̦aan ilo iien kweilo̦k ko?

¹¹ El̦ap an em̦m̦an ippãd ñe jej pãd ilo iien kweilo̦k ko ad im kweilo̦k ko rel̦l̦ap. Unleplepin ad etal im pãd ilo iien kein ej bwe jen kabuñ ñan Jeova. Im el̦ap ad bar bõk tokjãn jãn men ko jej katak. Eñin unin ej juon jeraam̦m̦an el̦ap ñan em̦m̦aan ro jeid im jatid me rej kwal̦o̦k katak ko aer ijo im̦aan ilo iien kweilo̦k ko, ak rej aikuj bar kile bwe men in ej juon aer eddo el̦ap. (Jem. 3:1, UBS) Mel̦el̦ein bwe katak ko rej kwal̦o̦ki rej aikuj in pedped ioon Naanin Anij. Kõn men in, ñe kwõj juon iaan ro rej bõk jeraam̦m̦an in, ewi wãween kwõmaroñ kõjerbale Baibõl̦ eo bwe en jipañ im tõpar bũruon armej ro rej roñjake?

12. Ewi wãween an juon rũkõnono maroñ lale bwe katak eo an en pedped wõt ioon Baibõl̦?

¹² Ilo katak eo kwõj kwal̦o̦ke, elukkuun aorõk bwe en l̦ap wõt am̦ kõjerbali eoon ko. (Jon 7:16) Kõn men in, kwõj aikuj lukkuun kõjparok wãween am̦ kwal̦o̦ke katak eo, im bwe en jab l̦ap wõt am̦ kõjerbali bwebwenato im waanjoñak ko jãn am̦ kõjerbale Baibõl̦ eo. Bareinwõt, keememej bwe ewõr oktak ilo am̦ riit wõt jãn Baibõl̦ ñan armej, jãn ñe kwõj katakin er jãne. Ilo m̦ool, ñe elukkuun lõñ eoon ko kwõj riiti, emaroñ pen ñan an armej ro keememeji aolepeer. Kõn men in, em̦m̦an ñe kwõj l̦õmn̦ak m̦okta im kããlõt eoon ta ko kwõnaaj kõn̦aan kõjerbali. Innem, kwõn bõk iien ñan am̦ riiti eoon kein, kõmel̦el̦eiki, kwal̦o̦k waanjoñak ko, im kwal̦o̦k ewi wãween rukweilo̦k ro remaroñ l̦oori ilo mour ko aer. (Nih. 8:8, UBS) Ñe katak eo am̦ ej pedped ioon juon outline, kanooj in lale bwe kwõn katak im kõpooji eoon ko kajjojo. Kajjioñ in mel̦el̦e ewi wãween an outline eo im eoon ko ie ekkejell̦o̦k  ippãn doon. Innem, kõjerbal jet iaan eoon kein ñan kwal̦o̦k boin ko ilo outline eo. (Kwõmaroñ lo jet iaan wãween ko rem̦m̦an im remaroñ jipañ eok ilo katak 21 ñan 23 ilo bok eo etan, Benefit From Theocratic Ministry School Education.) Im men eo el̦aptata an aorõk, kwõn kajjitõk ippãn Jeova bwe en jipañ eok ilo am̦ kwal̦o̦k l̦õmn̦ak im katak ko an raorõk jãn Baibõl̦.​—Riit Ezra 7:10; Jabõn Kõnnaan 3:13, 14.

13. (1) Ewi wãween an juon eoon kar jelõte bũruon juon jeid im jatid kõrã ke ear roñ kake ilo juon iien kweilo̦k? (2) Ewi wãween am̦ bõk tokjãn jãn eoon ko rej kwal̦o̦ki ilo iien kweilo̦k ko?

¹³ Ke juon jeid im jatid kõrã ilo Aujtõrõlia ear dik, ear wõr men ko renana im rekabũrom̦õjm̦õj rar wal̦o̦k ñane. Meñe tokãlik ear katak im jel̦ã kõn Jeova, ak ear pen ippãn ñan an lukkuun tõmak bwe Jeova ej yokwe e. Bõtab ilo juon kweilo̦k, kõrã in jeid im jatid ear roñ juon eoon me el̦ap an kar jelõte bũruon. Ear kõl̦mãnl̦o̦kjen̦ kõn eoon in im pukoti mel̦el̦e ko rel̦l̦apl̦o̦k, im men in ear kõm̦m̦an bwe en riiti eoon ko jet ilo Baibõl̦. Tokjãn men in, kiiõ ear lukkuun tõmak bwe Jeova ej yokwe e. * (Lale kõmel̦el̦e eo itulal̦.) Em̦õj ke am̦ roñ juon eoon ilo kweilo̦k ko, im ilo kweilo̦k ko rel̦l̦ap me ear l̦ap an jelõt bũruom̦?​—Nih. 8:12, UBS.

14. Ewi wãween jemaroñ kwal̦o̦k ad kam̦m̦oolol kõn Naan eo an Jeova?

¹⁴ Jej lukkuun kam̦m̦oolole Jeova kõn Naan eo an, Baibõl̦ eo. Em̦õj an kar kallim̦ur bwe Naan eo an enaaj pãdwõt im ear kajejjet kallim̦ur in. (1 Pi. 1:24, 25, UBS) Kõn men in, jekõn̦aan bwe jen riiti Baibõl̦ kajjojo raan, jerbali men ko jej riiti ilo mour ko ad, im kõjerbale ñan jipañ ro jet. Ñe jej kõm̦m̦ane men in, jej kwal̦o̦k ad lukkuun yokwe im kam̦m̦oolol kõn menin letok in eaorõk, im el̦aptata Jeova Anij, eo ear Je.