IAR l̦otak ilo iiõ eo 1926 ilo Crooksville, Ohio, ilo Amedka. Jinõ im Jema rekõn jab etal im jar, bõtab rekõn ba ñan ña im ajri ro 7 jeiũ im jatũ bwe kõmin etal im jar. Ikõn etal im jar ilo juon kabuñ etan Methodist. Ke ear 14 aõ iiõ, rũkaki eo ear letok juon aõ kawiinin kõnke ium̦win 1 iiõ iar jab jako jãn aolep iien jar ko ilo Jabõt.

Ilo kar ejja tõre in wõt, juon kõrã etan Margaret Walker me ej juon iaan Ri Kõnnaan ro an Jeova im ej jokwe iturin m̦weo, ear jino lotok M̦am̦a im bwebwenato ippãn kõn Baibõl̦. Juon raan, iar etal im roñjake aerro katak. M̦am̦a ear l̦õmn̦ak bwe inaaj kar ko̦kkure aerro katak, kõn men in ear jiroñ eõ bwe in diwõj jãn m̦weo. Bõtab, il̦akkar kajjioñ etal im roñjake. Ãlikin jejjo alen in an Margaret itok, ear kajjitõk ippa im ba, “Kwõjel̦ã ke etan Anij?” Im iar ba, “Aolep rejel̦ã bwe etan in Anij.” Innem ear ba, “Bõktok Baibõl̦ en̦ am̦ im lale Sam 83:18.” Iar kõm̦m̦ane men eo ear ba, im iar loe bwe etan Anij ej Jeova. Iar ettõr nabõjl̦o̦k im ba ñan ro m̦õtta: “Ñe kom̦ ro̦o̦l buñniin, lale Sam 83:18 ilo Baibõl̦ im lale etan Anij.” Jemaroñ ba bwe iar jino kwal̦o̦k naan ilo iien eo wõt.

 Iar katak Baibõl̦ im peptaij ilo iiõ eo 1941. Ejjabto tokãlik, kar kajjitõk ippa bwe in tõl juon kweilo̦k (book study). Iar rõjañ M̦am̦a im ro jeiũ im jatũ bwe ren itok, im aolepeer rar jino kobatok ñan kweilo̦k eo iar kõm̦m̦ane. Bõtab, Baba ear jab itoklimo.

Elõñl̦o̦k eddo ko iar bũki ilo eklejia, im iar kõm̦m̦ane juon aõ l̦ãibrãre ilo m̦weo ñan aolep bok ko aõ. Juon raan, Baba ear jitõñl̦o̦k bok ko aõ im ba: “Kwõj ke loe aolep men kan̦e? Ikõn̦aan bwe ren jako jãn m̦wiin, im kwe kwõmaroñ bar diwõjl̦o̦k ippãer.” Iar em̦m̦akũt jãn m̦weo ñan juon bukwõn epaak etan Zanesville me epãd wõt ilo Ohio. Iar jokwe ilo juon ruum̦ ilo juon em̦. Bõtab, ikõn jam̦bol̦o̦k ñan m̦weo im rõjañ baam̦le eo aõ.

Baba ear kajjioñ kabõjrak M̦am̦a jãn an kweilo̦k. Jet iien, ñe ej etal, Baba ej kõpl̦e im karo̦o̦le ñan m̦weo. Bõtab, M̦am̦a ekõn ko ilo kõjãm eo juon im etal im kweilo̦k. Iar ba ñan M̦am̦a: “Jab inepata. Enaaj etal im m̦õk in kabõjrak eok.” Tokãlik, Baba ear m̦õk in kajjioñ kabõjrake M̦am̦a. Kõn men in, ear maroñ in etal wõt ñan kweilo̦k ko.

Ilo 1943 eo, eklejia eo ammim ear jino kõm̦m̦ane Jikuul̦in Kwal̦o̦k Naan eo, im iar jino kõm̦m̦an katak ilo jikuul̦ eo. Naanin kakapilõk ko iar bũki ãlikin katak ko aõ rar lukkuun jipañ eõ bwe in jel̦ãl̦o̦k kilen kõm̦m̦an katak.

Ilo kar tõre eo, ear iien Pata eo an Lal̦ Kein Karuo. Ilo iiõ eo 1944, rar kajjitõk bwe in etal in tarin̦ae. Iar etal ñan ijo jikin rũttarin̦ae etan Fort Hayes ilo Columbus, Ohio. Ke iar pãd ijin, rar kakõlkõle ña im iar kanne jet peba. Iar bareinwõt ba ñan ruutiej ro bwe iban tarin̦ae, im rar kõtl̦o̦k eõ. Jet raan tokãlik, juon bwilijmããn̦ ear itok ñan m̦weo im̦õ im ba: “Corwin Robison, ewõr aõ mãlim ñan kalbuuji eok.”

Ruo wiik tokãlik ilo im̦õn ekajet eo, riekajet eo ear ba: “Ñe en kar ña eo ij kõm̦m̦ane pepe eo, in kar jilkinl̦o̦k eok bwe kwõn kalbuuj toon wõt am̦ mour. Ewõr ke men en kokõn̦aan ba?” Ilo kautiej, iar ba ñan riekajet eo: “Ren kar likũt ña ãinwõt juon rukwal̦o̦k kõn Baibõl̦. Ij kwal̦o̦k naan ñan aolep ilo im̦aan kõjãm ko aer, im elõñ armej em̦õj aõ kwal̦o̦k kõn ennaan eo em̦m̦an kõn Aelõñ eo an Anij ñan er.” Riekajet eo ear jiroñ kumi in armej ro me kar kããlõt er bwe ren pepe kõn keej eo im ba: “Kom̦ar jab itok bwe kom̦win lale el̦aññe l̦ein ej juon rukwal̦o̦k ke ak jaab. Kom̦ar itok in lale el̦aññe ewõr ruõn kõn an jab bõk kun̦aan ilo tarin̦ae.” Ium̦win enañin 30 minit tokãlik, kumi in ear itok kõn pepe eo aer. Rar ba bwe ewõr ruõ. Innem, riekajet eo ear ba bwe inaaj kalbuuj 5 iiõ ilo im̦õn kalbuuj eo el̦ap ilo Ashland, Kentucky.

M̦oktata, iar pãd 2 wiik ilo juon im̦õn kalbuuj ilo Columbus, Ohio, im raan eo m̦oktata iar pãdwõt ilo ruum̦ eo iar pãd ie. Iar jar ñan Jeova im ba: “Ijjab maroñ pãd ilowaan kalbuuj ium̦win 5 iiõ. Ijaje ta eo in kõm̦m̦ane.”

Raan eo tok juon, ruwaj ro rar kõtl̦o̦k eõ bwe in diwõj jãn ruum̦ eo. Iar etal im jutak iturin juon em̦m̦aan elukkuun aetok im em̦m̦ajel̦jel̦ im kõm̦ro kar reinabõjl̦o̦k jãn juon wũntõ. Ear kajjitõk ippa im ba: “Kwõjaam̦ kalbuuj l̦e L̦õkkadudu?” Iar ba,  “Ña juon iaan Ri Kõnnaan ro an Jeova.” Im ear ba, “M̦ool ke? Im kwõjaam̦ kalbuuj?” Iar ba, “Ri Kõnnaan ro an Jeova rejjab tarin̦ae im m̦anm̦an armej.” Innem ear ba, “Rar kalbuuji eok kõnke kwõjjab m̦anm̦an armej, ak rar kalbuuji l̦õm̦arã jet kõn aer kar m̦anm̦an armej. Ãinwõt ijjab mel̦el̦e.” Im iar ba, “Bar ña.”

Innem ear ba, “Ium̦win 15 iiõ iar pãd ilo bar juon im̦õn kalbuuj, im iar riiti jet iaan bok ko ami ijo.” Ke ej ba men eo, iar jar im ba, “Jeova, jouj im kõm̦m̦an bwe l̦ein en jipañ im lale eõ.” Ilo ejja iien eo wõt, Paul, etan l̦ein, ear ba: “Ñe jabdewõt iaan l̦õm̦arã ijin renaaj el̦waj ñan kwe, kab lam̦õj bwe in lale er.” Kõn men in ke iar pãd ijo, ejjel̦o̦k apañ ear wal̦o̦k ikõtaaõ im rũkalbuuj ro 50.

Ke rar kõm̦akũt eõ ñan Ashland, iar loe bwe elõñ jeiũ im jatũ rũttõmak ijo. Rein rar lukkuun epaake Jeova, im aõ kar kobal̦o̦k ippãer ear lukkuun jipañ eõ im ro jet bwe kõmin epaake wõt Jeova. Rar letok jebta ko kajjojo wiik bwe kõmin riiti, im kõm kõn kõppojak kajjitõk im uwaak ñan kweilo̦k ko ammim me kõmar n̦aetaer Baibõl̦ Bees. Ear bareinwõt wõr juon em̦m̦aan me kar jitõñe bwe en bõk eddon ijoko kõmij kwal̦o̦k naan ie. Kõmar pãd ilo juon em̦ kileplep me aolep peet ko rej pãd ilo kiin m̦weo. Em̦m̦aan eo ej bõk eddon ijoko kõmij kwal̦o̦k naan ie ekõn kwal̦o̦k peet ta ko inãj kwal̦o̦k naan ie. Ekõn ba: “Robison, jabdewõt eo enãj pãd ilo peet en̦, kwõnaaj kwal̦o̦k naan ñane. Lale bwe kwõn kwal̦o̦k naan ñane m̦okta jãn an em̦m̦akũt ñan bar juon jikin.” Eñin wãween ammim kar kwal̦o̦k naan ilo laajrak.

Meñe ear jem̦l̦o̦k Pata eo an Lal̦ Kein Karuo ilo iiõ eo 1945, ak iar pãdwõt ilo kalbuuj. Iar inepata kõn baam̦le eo aõ kõnke Baba ear ba bwe ñe enaaj maroñ kadiwõjl̦o̦k eõ jãn m̦weo, enaaj maroñ kabbeer ro jet ilo baam̦le eo. Ãlikin aõ kar diwõj jãn kalbuuj, iar lukkuun m̦õn̦õn̦õ kõnke meñe Baba ear lukkuun jum̦ae, ak 7 iaan ro ilo baam̦le eo aõ rar kweilo̦k wõt im juon iaan ledik ro jatũ em̦õj an peptaij.

Ilo iiõ eo 1950, ear jino pata eo ilo Korea me Amedka ear bar bõk kun̦aan ie. Kõn men in, rar bar ba bwe in etal ñan Fort Hayes. Ãlikin aõ kar bõk juon teej ñan lale joñan kapeel ko ippa, juon iaan rũttarin̦ae ro reutiej ear ba, “Kwe juon iaan ro eutiejtata boin ko aer ilo teej eo.” Iar ba, “Em̦m̦an, ak iban tarin̦ae.” Innem iar kwal̦o̦k kõn  kobban bokin 2 Timote 2:3 im iar ba, “Ña juon rũttarin̦ae kadede an Kũraij.” Ke iar ba men in, elukkuun to an jab keroro. Innem ear ba, “Kwõmaroñ ro̦o̦l.”

Ejjabto tokãlik, ilo juon kweilo̦k el̦ap ilo Cincinnati, Ohio, iar etal ñan kweilo̦k eo ñan ro rekõn̦aan jerbal ilo Betel̦. Jeid im jatid Milton Henschel ear ba bwe ñe ewõr en̦ ekõn̦aan kal̦apl̦o̦k kun̦aan, doulul in emaroñ kõjerbale ilo Betel̦. Iar kanne aõ peba in jerbal ilo Betel̦ im iar etal im jerbal ilo Betel̦ eo ilo Brooklyn ilo O̦kwõj 1954. Jãn iien eo, il̦akkar jerbal ilo Betel̦.

Elõñ jerbal ko iar kõm̦m̦ani ilo Betel̦. Ium̦win jet iiõ, jerbal eo aõ ear ñan kõjo̦ mijjin in kaan ko ñan kein bũriin ko im kein jerbal ko ilo opij ko. Ikõn kõjparok im kõkããli kein jerbal ko rekkillep im kõm̦m̦ani l̦ak ko rejorrããn. Iar bar jerbal ilo Im̦õn Kweilo̦k ko Rel̦l̦ap ilo New York City.

Ear em̦m̦an ippa bũrookraam̦ ko ilo Betel̦. Men kein rekitibuj ammim lale unin tõl eo aolep jibboñ im katak Naan in Keeañ ãinwõt juon baam̦le, im bareinwõt ammim bõk kun̦aam ilo kwal̦o̦k naan ippãn eklejia ko ammim. Ilo m̦ool, aolep baam̦le ko rej Ri Kõnnaan ro an Jeova rej aikuj keini aer kõm̦m̦ani men kein. Ñe rũtto ro im ajri ro nejier rej etale unin tõl eo ippãn doon, keini aer kõm̦m̦ane Iien Kabuñ an Baam̦le, im bõk kun̦aaer ilo kweilo̦k ko im kwal̦o̦k naan kõn ennaan eo em̦m̦an, enaaj epaak jem̦jerã eo aer ippãn Jeova.

Elõñ m̦õtta ilo Betel̦ im ilo eklejia eo. Jet iaaer rar rũkkapit im em̦õj aer bõk jinõkjeej eo aer ñan mour ilañ. Ro jet rar jab rũkkapit. Bõtab, aolep rũkarejar ro an Jeova, ekoba ro rej jerbal ilo Betel̦, rejjab weeppãn. Ñe ej wal̦o̦k apañ ikõtaaõ ippãn bar juon, aolep iien ij kate eõ ñan kõm̦m̦an aenõm̦m̦an. Ij l̦õmn̦ak kõn Matu 5:23, 24 im wãween ad aikuj kõm̦adm̦õd apañ ko ikõtaad im ro jet. Ejjab pidodo ñan ba jol̦o̦k bõd. Bõtab, elukkuun jeja ad lo an wõnm̦aanl̦o̦k apañ ko ãlikin ad ba jol̦o̦k bõd.

Kõnke irũtto kiiõ, epen aõ etetal jãn em̦ ñan em̦. Bõtab, ijjab ebbeer. Iar katak jidik kajin Jaina  (Mandarin), im em̦m̦an ippa kwal̦o̦k naan ñan RiJaina ro ilo tõrerein ial̦. Jet jibboñ ij ajej tarrin 30 ak 40 Naan in Keeañ im Awake! ippãn ro rej itoklimo.

Joñan, iar kwal̦o̦k naan ñan juon eo im ej pãd ilo Jaina! Juon raan, juon leddik ear ettõñdikdik tok ke ej ajej peba in karreelel ñan juon jikin wia leen wõjke. Iar ettõñdikdik l̦o̦k ñane im lel̦o̦k an Naan in Keeañ im Awake! ilo kajin Jaina. Ear bũki im ba bwe etan in Katie. Ãlikin iien in, Katie ekõn itok im bwebwenato ippa aolep iien ñe ej loe eõ. Iar katakini etan leen wõjke im keinikkan ko ilo kajin Pãlle, im ekõn ãliji etaer ãlikin aõ ba. Iar bareinwõt kõmel̦el̦eiki kobban eoon ko ilo Baibõl̦, im ear bõk juon an bok eo etan Katak ko Rem̦ool. Bõtab, ãlikin jet wiik, iar jab bar loe ledik in.

Elõñ allõñ tokãlik, ear bar wõr juon leddik ej ajej peba in karreelel, im iar bar lel̦o̦k an Naan in Keeañ im Awake! Wiik eo tok juon, ear letok jeel̦boon eo nejin im ba, “Kwe kõnnaan ñan Jaina.” Iar ba, “Ejjel̦o̦k en̦ ijel̦ã kajjien ilo Jaina.” Ak el̦akkar letok jeel̦boon eo nejin. Kõn men in, iar bõke im ba, “Al̦o, Robison in.” Im armej eo eba, “Robby, Katie in. Ipãd ilo Jaina.” Iar ba, “Ilo Jaina?” Im eba, “Aet. Robby, kwõjel̦ã ke wõn ledik n̦e ear lewaj jeel̦boon n̦e? Jatũ. Elõñ men ko rem̦m̦an kwaar katakin eõ kaki. Jouj im bar katakini ãinwõt am̦ kar katakin eõ.” Iar ba, “Katie, inaaj kate eõ joñan wõt aõ maroñ. Kom̦m̦ool kõn am̦ kwal̦o̦k kwõpãd ia.” Ejjabto tokãlik, iar kõnnaan ippãn ledik eo jatin Katie, im ãlikin iien in iar jab bar loe. Ijaje ledik rein repãd ia kiiõ, ak ij tõmak im kõjatdikdik bwe renaaj kal̦apl̦o̦k aer katak kõn Jeova.

Iar jerbal ñan Jeova ium̦win 73 iiõ. Im̦õn̦õn̦õ kõnke ear jipañ eõ bwe in jab bõk kun̦aõ ilo tarin̦ae im bwe in tiljek wõt ke iar kalbuuj. Bareinwõt, ajri ro jeiũ im jatũ rar ba ñan ña bwe el̦ap aõ kar rõjañ im kakajoor er ilo aõ kar jab ebbeer ke Baba ear jum̦ae. M̦am̦a im 6 iaan ro jeiũ im jatũ rar peptaij. Ejakol̦o̦k an kar Baba jum̦ae, im jet iien ekõn kweilo̦k m̦okta jãn an kar mej.

Ñe ankilaan Anij, ro uwaan baam̦le eo aõ im ro m̦õtta me remej renaaj bar mour ilo jukjukun pãd eo ekããl. L̦õmn̦ake m̦õk joñan ad naaj lañlõñ ilo ad kabuñ ñan Jeova ñan indeeo ippãn ro jej yokwe er! *—Lale kõmel̦el̦e eo itulal̦.