L̦ÕMN̦AK m̦õk kõn raan eo ear l̦aptata am̦ m̦õn̦õn̦õ ilo mour n̦e am̦. Ear ke l̦aptata am̦ m̦õn̦õn̦õ ilo raan eo kwaar m̦are ak raan eo me ear l̦otak ajri eo nejũm̦ kein kajuon? Ke ta, ear ke l̦aptata am̦ m̦õn̦õn̦õ ilo raan eo kwaar peptaij im kaalikkar ñan aolep bwe em̦õj am̦ ajel̦o̦k mour eo am̦ ñan Jeova? Bõlen kwõj l̦õmn̦ak bwe raan eo in el̦aptata an aorõk ippam̦ im ear l̦ap am̦ kar m̦õn̦õn̦õ ie. Rũttõmak ro jeim̦ im jatũm̦ rar lukkuun m̦õn̦õn̦õ in loe am̦ kaalikkar ñan aolep bwe kwõj yokwe Anij kõn aolepen bũruom̦, aolepen am̦, aolepen am̦ l̦õmn̦ak, im aolepen am̦ kajoor!​—Mark 12:30.

Ejjel̦o̦k pere bwe emaroñ l̦ap am̦ lañlõñ ilo am̦ karejar ñan Jeova jãn iien eo kwaar peptaij. Bõtab, ewõr jet rukwal̦o̦k naan ro ejakol̦o̦k aer m̦õn̦õn̦õ ãinwõt kar m̦okta. Etke edikl̦o̦k aer m̦õn̦õn̦õ? Im etke jej aikuj m̦õn̦õn̦õ wõt ilo ad karejar ñan Jeova?

Ennaan eo kõn Aelõñ eo me jej kwal̦o̦k kake ej kõm̦m̦an ad m̦õn̦õn̦õ. Ennaan in ekitibuj kallim̦ur eo bwe m̦õttan jidik Jeova enaaj jol̦o̦k jukjukun pãd in enana im kõm̦m̦an bwe lal̦ in en juon pedetaij. Bareinwõt, bokin Zepanaia 1:14 ej kallim̦uri kõj im ba: “Raan eo el̦ap an Jeova epaak; epaak im em̦õkajtok.” Bõtab, el̦ak to l̦o̦k ad kõttar jãn iien eo jej kõtmãne kake, men in emaroñ kõm̦m̦an bwe en dikl̦o̦k ad m̦õn̦õn̦õ im niknik ilo ad jerbal ñan Anij.​—Jabõn Kõnnaan 13:12, UBS.

Rũttõmak ro jeid im jatid ipel̦aakin lal̦ in rej bar kõm̦m̦an bwe jen m̦õn̦õn̦õ ilo ad karejar ñan Jeova. Ilo m̦ool, bõlen ewõr iaad jaar reel in katak kõn m̦ool eo im jino karejar ñan Anij ilo m̦õn̦õn̦õ kõn wõt ad kar loe an em̦m̦an kõm̦m̦an ko an rũkarejar ro an Jeova. (1 Piter 2:12, UBS) Ak ta eo emaroñ wal̦o̦k ñe juon iaan Kũrjin rein ej bõk kaje kõn wõt an jab l̦oori kien ko an Anij? Ñe ej wal̦o̦k men in, jet iaan ro im rar itok ñan m̦ool eo kõn aer kar reel kõn kõm̦m̦an ko rem̦m̦an an armej ro an Jeova, remaroñ jino ebbeer im dikl̦o̦k aer m̦õn̦õn̦õ.

Menin karreelel ko an jukjukun pãd in an Setan remaroñ bar kõm̦m̦an bwe en dikl̦o̦k ad m̦õn̦õn̦õ. Tepil̦ eo ej kõjerbal jukjukun pãd in an ñan kõm̦m̦an ad l̦õmn̦ak bwe jej aikuji men ko me ejjel̦o̦k tokjãer. Bõtab, em̦m̦an ñe jej keememej naan ko an Jijej me rej ba: “Ejjel̦o̦k armej emaroñ pokake ruo irooj; bwe enaaj kõjdate juon im yokwe eo juon; ak enaaj dãpij juon im kõjekdo̦o̦n eo juon. Kom̦ ban rũkarejeran Anij im m̦weiuk.” (Matu 6:24) Jeban maroñ karejar  ñan Jeova ilo m̦õn̦õn̦õ im ilo ejja iien eo wõt kajjioñ kõm̦m̦an bwe jen m̦weiie ilo jukjukun pãd in.

Ro rej yokwe Jeova rejjab l̦õmn̦ak bwe aer karejar ñane ej juon men epen ak eddo. (1 Jon 5:3) Keememej bwe Jijej ear ba: “Kom̦win itok ñan Ippa, kom̦ otemjej rej jerbal im ban, im Inaaj kakkijeik kom̦. Kom̦win bõk Aõ ine im likũti iaerami, im katak Ippa, bwe Ij ineem̦m̦an im ettã bũruõ, im kom̦ naaj lo an ami kakkije. Bwe Aõ ine ej em̦m̦an, im men eo Ij ineeke emera.” (Matu 11:28-30) Ad l̦oore Kũraij ej kakajoor kõj im kalañlõñ kõj. Bareinwõt, elõñ unin ad aikuj lukkuun m̦õn̦õn̦õ ilo ad jerbal ñan Jeova. Jen lale jilu un ko raorõk unin ad maroñ lañlõñ ilo ad karejar ñan Anij, eo ej ‘ad rũlo̦mo̦o̦r.’​—Habakkuk 3:18.

Jej karejar ñan Eo ear letok mour ñan kõj, im ej juon Anij in m̦õn̦õn̦õ. (Jerbal 17:28; 1 Timote 1:11) Jej kile bwe Jeova eo ear kõm̦anm̦an kõj im letok mour ñan kõj. Eñin unin, jej wõnm̦aanl̦o̦k im karejar ñane ilo m̦õn̦õn̦õ, jekdo̦o̦n jete iiõ remootl̦o̦k jãn iien eo jaar peptaij.

L̦õmn̦ak m̦õk kõn Héctor, eo im ear jerbal ñan Jeova ãinwõt juon eo ej lol̦o̦k eklejia ko ium̦win 40 iiõ. Meñe ear etal im ‘rũtto,’ ak ear kajoor wõt. (Sam 92:12-14) Kõn an kar lel̦l̦ap eo ippãn Héctor nañinmej, men in ear kõm̦m̦an bwe en dikl̦o̦k an Héctor kõm̦m̦ani men ko ekõn kõm̦m̦ani ilo an jerbal ñan Anij. Bõtab, men in ear jab kadikl̦o̦k an m̦õn̦õn̦õ ilo an karejar ñan Anij. Ej ba: “Meñe ibũrom̦õj ñe ij loe an nanal̦o̦k ãjmour e an lel̦l̦ap in ippa im ejjab pidodo ñan kauuki im lale, iar jab kõtl̦o̦k bwe men in en kadikl̦o̦k aõ m̦õn̦õn̦õ ilo aõ karejar ñan Anij eo em̦ool. Ij kile bwe Jeova eo ear letok mour ñan eõ, im bwe ewõr unin an kar kõm̦anm̦an armej. Aõ kile men in ej kõm̦m̦an bwe in lukkuun yokwe im karejar ñane kõn aolepen bũruõ. Ij kate eõ joñan wõt aõ maroñ ñan niknik wõt ilo kwal̦o̦k naan im kõm̦m̦an bwe kõjatdikdik eo kõn Aelõñ eo en men eo m̦oktata ilo l̦õmn̦ak e aõ kõnke en jipañ eõ bwe en jab dikl̦o̦k aõ m̦õn̦õn̦õ.”

Jeova ear letok Nejin bwe en aje mour eo an kõn kõj im kõpel̦l̦o̦k juon ial̦ bwe jen maroñ lo lañlõñ ilo mour ko ad. Baibõl̦ ej ba bwe “kõn an Anij yokwe lal̦, Ear letok juon wõt Nejin Ear keotak, bwe jabdewõt eo ej lõke E en jab jako, a en mour indeeo.” (Jon 3:16) Anij emaroñ jeorl̦o̦k jerawiwi ko ad im jemaroñ bõk mour indeeo el̦aññe jej tõmak ilo katok in mour eo an Jijej. Ejjab ke juon men em̦m̦an ñan ad kwal̦o̦k kam̦m̦oolol? Im ad kam̦m̦oolol en kar ke kõm̦akũt kõj bwe jen karejar ñan Jeova ilo m̦õn̦õn̦õ?

Juon jeid im jatid etan Jesús, me ej pãd ilo  Mexico, ej ba: “Iar juon rũkõm̦akoko ñan jerbal eo aõ. Ewõr iien ikõn jerbal ium̦win elõñ awa im jab kakkije, meñe ejjab menin aikuj. Unin aõ jerbal wõt ej kõnke ikõn̦aan kõm̦m̦an jããn. Bõtab, tokãlik iar katak kõn Jeova im kõn an kar letok Nejin eo ej make wõt bwe en aje mour eo an kõn armej. Iar lukkuun kõn̦aan karejar ñane. Kõn men in, iar ajel̦o̦k mour eo aõ ñan Jeova, im ãlikin aõ kar jerbal ilo kom̦bani eo ium̦win 28 iiõ, iar pepe in kam̦õj eõ im jino bainier.” Jãn iien in m̦aanl̦o̦k ear lo m̦õn̦õn̦õ ilo an karejar ñan Anij ium̦win elõñ iiõ.

Wãween ad mour ej kõm̦m̦an bwe jen lañlõñ im jab bũrom̦õj. Kwõj ke keememej wãween mour eo am̦ m̦okta ke kwaar jab jel̦ã kõn Jeova? Rijjilõk Paul ear kakeememej Kũrjin ro ilo Rom bwe ilo kar m̦okta rar “rũkõm̦akoko ñan jerawiwi,” bõtab em̦õj aer oktak im kiiõ rej “rũkõm̦akoko ñan wãnõk.” Men ko rar kõm̦m̦ani rar em̦m̦an im kwõjarjar, im men in enaaj tõll̦o̦k er ñan mour indeeo. (Rom 6:17-22, UBS) Wãween mour eo ad bareinwõt eokkwõjarjar ak erreo. Men in enaaj kõjparok kõj bwe jen jab iioon men ko rekabũrom̦õjm̦õj rej itok jãn mour ettoon im lãj. El̦ap ad m̦õn̦õn̦õ kõn men in!

L̦õmn̦ak m̦õk kõn juon em̦m̦aan etan Jaime, juon eo im ear jab tõmak bwe ewõr Anij. Ear bar tõmak ilo katak eo bwe aolep men rar jide im wal̦o̦k. L̦ein ear juon rũbait. Jaime ear jino kweilo̦k im ear lukkuun bwilõñ kõn an ro jeid im jatid kwal̦o̦k yokwe. Bwe en oktak jãn mour eo an m̦okta, ear aikuj kajjitõk ippãn Jeova ñan jipañe bwe en tõmak ilo E. Jaime ej ba: “Jidik kõn jidik, iar jino tõmak bwe ewõr juon Anij eo el̦ap an tũriam̦o im ej Jemãd eo el̦ap an yokwe. Il̦ak l̦oore kien ko an Jeova, men in el̦ap an kõjparok ña. Ñe in kar jab oktak, in kar mej, ãinwõt jet iaan rũbait ro m̦õtta kar m̦okta. El̦ap aõ m̦õn̦õn̦õ jãn iien eo iar jino karejar ñan Jeova. Iiõ kein rej iiõ ko el̦aptata aõ m̦õn̦õn̦õ ilo mour e aõ.”

Ej aikuj ewi wãween ad eñjake ke jej kõttar an jem̦l̦o̦k jukjukun pãd in enana? Keememej bwe el̦aññe jej kõm̦m̦ani men ko rem̦m̦an, jenaaj “mour indeeo.” Kõn men in, “jen jab m̦õk in kõm̦m̦an em̦m̦an, bwe el̦aññe jejjab ebbeer, jenaaj m̦adm̦õd ilo iien jonikkan.” (Galetia 6:8, 9, UBS) Ikijjeen jipañ jãn Jeova, jen kijenmej, kate kõj bwe en wõr ippãd men ko jenaaj aikuji ñan el̦l̦ã im mour jãn “eñtaan eo el̦ap,” im wõnm̦aanl̦o̦k im karejar ñan Jeova ilo m̦õn̦õn̦õ, meñe ilo iien ko jej iioon mãlejjoñ ko.​—Revelesõn 7:9, 13, 14; Jemes 1:2-4.

Jemaroñ lõke bwe ilo ad kijenmej, Jeova enaaj kajeraam̦m̦an kõj kõnke ej loi jerbal ko ad im ad yokwe e im kautiej etan. El̦aññe jej wõnm̦aanl̦o̦k im karejar ñan Jeova ilo m̦õn̦õn̦õ, jenaaj ãinwõt Devid, eo ear ba: “Iien otemjej ij kile an Irooj pãd ippa; Ej epaake eõ, innem ejjel̦o̦k men emaroñ kabbeer eõ. Kõn men in iobrak kõn m̦õn̦õn̦õ im lañlõñ, im ij jokwane iien otemjej.”​—Sam 16:8, 9, UBS.