Ewõr kein kam̦ool ñan kwal̦o̦k bwe Jesus ear erom Bũrij L̦apl̦ap ke ear peptaij ilo 29 C.E. eo. Ta kein kam̦ool eo? Ilo iien eo ear peptaij, Jesus ear ajel̦o̦k e make ñan katok ioon kein lokatok eo me ej jitõñl̦o̦k ñan “ankilaan” Anij. (Gal. 1:4; Hib. 10:5-10) Kõnke kein lokatok in ilo kõkkar ear pãd jãn iien eo Jesus ear peptaij m̦aanl̦o̦k, tampel̦ eo el̦ap ilo kõkkar​—me ej jutak kõn karõk eo ñan kabuñ eo em̦ool an Jeova me ej pedped ioon katok in mour eo an Jesus​—emaroñ kar bareinwõt wal̦o̦k ilo tõre in. Kein lokatok in ej m̦õttan men ko raorõk ilo tampel̦ eo ilo kõkkar.​—Matu 3:16, 17; Hib. 5:4-6.

Ilo tampel̦ eo el̦ap ilo kõkkar, kar aikuj juon bũrij l̦apl̦ap bwe en jerbal ijo. Kõn men in, kar kapit Jesus “kõn jetõb kwõjarjar im kajoor.” (Jrb. 10:37, 38; Mark 1:9-11) Bõtab, ewi wãween ad maroñ jel̦ã bwe kar kapiti Jesus bwe en Bũrij L̦apl̦ap m̦okta jãn an kar mej im jerkakpeje? Waanjoñak eo an Aron im ro rar jerbalin bũrij l̦apl̦ap ãlikin e, naaj jipañ kõj lo uwaakin kajjitõk in.

Ekkar ñan Kien eo, bũrij l̦apl̦ap eo wõt emaroñ del̦o̦ñl̦o̦k ilo Jikin Kwõjarjar Otem Kwõjarjar eo ilo im̦õn kõppãd eo innem, tokãlik, Jikin Kwõjarjar Otem Kwõjarjar eo ilo tampel̦ eo. Ewõr juon katiiñ me ear kõjenolo̦ke Jikin Kwõjarjar Otem Kwõjarjar eo jãn Jikin Kwõjarjar eo. Bũrij l̦apl̦ap eo ear deblo̦ke katiiñ in ilo Raanin Kõllaajrak eo wõt. (Hib. 9:1-3, 6, 7) Kar kapit Aron im ro rar jerbalin bũrij l̦apl̦ap ãlikin e, m̦okta jãn aer kar deblo̦ke “katiiñ eo” ñan ilowaan Jikin Kwõjarjar Otem Kwõjarjar eo. Innem, bõlen kar bareinwõt kapit Jesus ãinwõt Bũrij L̦apl̦ap an Jeova m̦okta jãn an kar mej im deblo̦ke “katiiñ eo, mel̦el̦ein, ãnbwinnin” ñan mour ilañ. (Hib. 10:20) Kõn men in, rijjilõk Paul ear ba bwe Jesus ear itok “ãinwõt juon bũrij l̦apl̦ap” innem “deblo̦ke im̦õn kõppãd eo el̦apl̦o̦k im weeppãnl̦o̦k im ejjab kõm̦m̦anin pein armej”, innem ñan, “ilañ.”​—Hib. 9:11, 24.

Ejjel̦o̦k oktak ikõtaan ñããt eo kar kapene bujen eo ekããl im ñããt eo ear jino jerbal. Etke? Ke Jesus ear wanlõñl̦o̦k ñan lañ im ajel̦o̦k mour eo an eweeppãn kõn kõj, ear bõk buñtõn ne eo m̦oktata iaan buñtõn ne ko jilu me renaaj kapene, ak kamãlim, bujen eo ekããl. Im ejja buñtõn ne kein wõt rar bareinwõt kõm̦m̦an bwe en jino jerbal bujen eo, ak bwe en jino ejaak. Ta kar buñtõn ne kein jilu?

Kein kajuon, Jesus ear jãde im̦aan Jeova. Kein karuo, Jesus ear ajel̦o̦k mour eo an eweeppãn ñan Jeova. Im kein kajilu, Jeova ear m̦õn̦õn̦õ in bõk aorõkin an kar Jesus mej im kato̦o̦rl̦o̦k bõtõktõkin. M̦ae iien eo kar kõm̦m̦ani buñtõn ne kein, bujen eo ekããl eban kar jino jerbal.

Baibõl̦ eo ejjab kwal̦o̦k ñan kõj lukkuun ñããt eo Jeova ear m̦õn̦õn̦õ in bõk katok in mour eo eweeppãn an Jesus. Kõn men in, jejjab maroñ lukkuun kaalikkar ñããt eo kar kapene bujen eo ekããl im bareinwõt ñããt eo ear jino jerbal. Bõtab, jejel̦ã bwe Jesus ear wanlõñl̦o̦k ñan lañ joñoul raan m̦okta jãn raanin Pentekost eo. (Jrb. 1:3) Ilowaan wõt tõre in ekadu, ear ajel̦o̦k mour eo an eweeppãn ñan Jeova, eo me ear m̦õn̦õn̦õ in bõke. (Hib. 9:12) Menin kam̦ool eo bwe ear kiiõ jino jerbal bujen eo ekããl, ear lukkuun alikkar ilo raanin Pentekost eo. (Jrb. 2:1-4, 32, 33) Kõn men in, bujen eo ekããl em̦õj an kar jino jerbal.

Ñan kõmel̦el̦eik katak in ilo tukadu, jaar katak bwe kar kapene bujen eo ekããl im ear jino jerbal ãlikin an kar Jeova m̦õn̦õn̦õ in bõk aorõkin an kar Jesus mej im kato̦o̦rl̦o̦k bõtõktõkin im kõm̦m̦an bwe rũkkapit ro ren del̦o̦ñ ilo bujen in. Kõn men in, bujen eo ear jino jerbal ippãn Bũrij L̦apl̦ap eo, Jesus, eo ej jerbal ãinwõt ri-Kõllaajrak eo.​—Hib. 7:25; 8:1-3, 6; 9:13-15.