1. Ãinwõt an 3 Jon 3, 4 kwal̦o̦k, ta eo ej kam̦õn̦õn̦õik kõj?

KWÕMAROÑ ke pijaikl̦o̦k joñan an kar rijjilõk Jon m̦õn̦õn̦õ ke ear roñ bwe ro ear jipañ er jel̦ã kõn m̦ool eo, rar wõnm̦aanl̦o̦k wõt im tiljek ilo aer karejar ñan Jeova? Rar jelm̦aik elõñ apañ ko, im Jon ear lukkuun kate ñan kõkajoore tõmak eo an Kũrjin rein retiljek me ear watõk er ro nejin ilo tõmak. Ejja ãindeinl̦o̦k wõt, jej m̦õn̦õn̦õ ñe ro nejid, meñe lukkuun nejid ak nejid ilo tõmak, rej ajel̦o̦k er make ñan Jeova im kate wõt er ilo aer karejar ñane.​—Riit 3 Jon 3, 4.

2. Ta unin an kar Jon je lõta ko?

² Ilo kar 98 C.E. eo, Jon emaroñ kar jokwe ilo Epesõs ak turin jikin in. Emaroñ kar em̦m̦akũt ñan jikin in ãlikin an kar rõl̦o̦k jãn an jipo̦kwe ilo kar ãneen Patmõs. Im emaroñ ilo kar tõre in, jetõb kwõjarjar eo an Jeova ear kõm̦akũt e ñan je lõta kein jilu. Kar je lõta kein ñan kõm̦akũt Kũrjin ro retiljek bwe ren kõkajoore wõt tõmak eo aer ilo Jesus im wõnm̦aanl̦o̦k wõt im etetal ilo m̦ool eo.

3. Ta kajjitõk ko jenaaj uwaaki?

³ Jon ear rijjilõk eo ãliktata me ear mour wõt, im ear inepata kõn an ri-kaki ro reriab kajjioñ kapo ro ilo eklejia eo. * (1 Jon 2:18, 19, 26) Ri-jum̦ae rein me rar ilo̦k jãn m̦ool eo rar ba bwe rejel̦ã kajjien Anij, bõtab rar jab pokake naanin tõl ko an Jeova. Jen etale naanin rõjañ ko jãn Jon. Ilo ad etali, jenaaj uwaaki kajjitõk kein jilu: Ta mel̦el̦ein ñan etetal ilo m̦ool  eo? Ta wãween ko reppen jej jelm̦aiki? Im ewi wãween ad maroñ jipañ doon bwe jen pãdwõt ilo m̦ool eo?

4. Ekkar ñan 1 Jon 2:3-6 im 2 Jon 4, 6, ta ko jej aikuj in kõm̦m̦ani bwe jen etetal ilo m̦ool eo?

⁴ Bwe jen maroñ etetal ilo m̦ool eo, jej aikuj in jel̦ã m̦ool eo jãn Naanin Anij, Baibõl̦ eo. Ejjab men in wõt, ak jej aikuj bar “pokake kien ko an [Jeova].” (Riit 1 Jon 2:3-6; 2 Jon 4, 6.) Jesus ear likũt joñak eo em̦m̦antata ilo an kar pokake Jeova. Innem juon wãween eaorõk jemaroñ pokake Jeova ej ilo ad kate kõj joñan wõt ad maroñ ñan l̦oore jenkwan neen Jesus.​—Jon 8:29; 1 Pit. 2:21.

5. Ta ko jej aikuj in lukkuun tõmake?

⁵ Bwe jen maroñ etetal wõt ilo m̦ool eo, jej aikuj in lukkuun tõmak bwe Jeova ej Anij in m̦ool, im bwe aolep men ko ej ba ñan kõj ilo Naan eo an, Baibõl̦ eo, rej m̦ool. Im jej aikuj bareinwõt lukkuun tõmak bwe Jesus ej Messaia eo kar kallim̦ur kake. Elõñ armej ro rainin rej pere bwe em̦õj kapit Jesus bwe en Kiiñ in Aelõñ eo an Anij. Jon ear kakkõl bwe “elõñ ri-etao” ro remaroñ m̦on̦e ro me rar jab pojakin jojomare m̦ool eo kõn Jeova im Jesus. (2 Jon 7-11) Jon ear je: “Wõn eo ej ri-riab, ejjab ke eo ej riab im ba bwe Jesus ejjab Christ?” (1 Jon 2:22) Wãween eo wõt jemaroñ kõjparok bwe ro jet ren jab m̦on̦e kõj ej ilo ad katak kõn Naanin Anij. Eñin wãween eo wõt me enaaj jipañ kõj bwe jen jel̦ã kõn Jeova im Jesus. (Jon 17:3) Innem, ilo wõt ad kõm̦m̦ane men in, jenaaj lukkuun tõmak bwe m̦ool eo ej pãd ippãd.

6. Ta wãween eo epen me Kũrjin ro rej jo̦dikdik rej jelm̦aiki?

⁶ Aolep Kũrjin ro rej aikuj kõjparok bwe ren jab po ilo katak ak mãlõtlõt ko an armej. (1 Jon 2:26) El̦ap an jo̦dikdik ro aikuj in kõjparok er jãn aujiid in. Alexia, * juon jeid im jatid jiroñ jãn France me 25 an iiõ, ej ba: “Ke iar dik, iar inepata kõn mel̦el̦e ko an lal̦ in, ãinwõt kõn katak eo bwe aolep men rar jide im wal̦o̦k im kõn katak ak mãlõtlõt ko an armej. Ewõr iien, katak kein rar kãitoklimoik eõ. Bõtab iar l̦õmn̦ak bwe ebõd ñan kõjekdo̦o̦n ta ko Baibõl̦ ej katakin im tõmaki aolep men ko ri-kaki ro aõ rar ba.” Alexia ear katak ippãn make (bok eo etan Life​—How Did It Get Here? By Evolution or by Creation?, ilo kajin Pãlle). Im ãlikin  jet wiik, ear jako an pere. Alexia ej ba: “Iar kam̦ool ñan ña make bwe men ko Baibõl̦ ej katakin, rem̦ool. Im iar kile bwe ilo aõ l̦oori kien ko an Baibõl̦, enaaj kõm̦m̦an bwe in lañlõñ im aenõm̦m̦an.”

7. Ta eo jej aikuj kõjparok kõj jãne, im etke?

⁷ Aolep Kũrjin ro, ro reddik im rerũtto, rej aikuj kõjparok bwe ren jab ba bwe rej karejar ñan Jeova ak ilo ejja iien eo wõt rej kõm̦m̦ani m̦anit ko renana. Jon ear kwal̦o̦k bwe jejjab maroñ etetal ilo m̦ool eo im ilo ejja iien eo wõt, jej kõm̦m̦ani m̦anit ko rettoon. (1 Jon 1:6) El̦aññe jekõn̦aan bwe Anij en buñbũruon ippãd kiiõ im ilju im jekl̦aj, jej aikuj mour ilo juon wãween me ej ãinwõt ñe aolep men ko jej kõm̦m̦ani, rejjab n̦ojak. Ilo m̦ool, ejjel̦o̦k juon jerawiwi ettino kõnke Jeova ej loi aolep men ko jej kõm̦m̦ani.​—Hib. 4:13.

8. L̦õmn̦ak rot eo jejjab aikuj bõke?

⁸ Jej aikuj in jum̦aik l̦õmn̦ak ko an lal̦ in kõn jerawiwi. Rijjilõk Jon ear je: “El̦aññe jej ba, ‘Ejjel̦o̦k ad jerawiwi,’ eokwe jej m̦on̦e kõj make.” (1 Jon 1:8) Ilo tõre ko an Jon, ri-jum̦ae ro me rar ilo̦k jãn m̦ool eo rar ba bwe juon armej emaroñ kããlõt in kõm̦m̦ani men ko renana im dãpij wõt jem̦jerã eo an ippãn Anij. Rainin, jej mour ibwiljin armej ro rej bõk ejja l̦õmn̦ak in wõt. Elõñ rej ba bwe rej tõmak ilo Anij, ak rejjab errã ilo l̦õmn̦ak eo an Jeova kõn jerawiwi, el̦aptata ñe ej itok ñan an ruo armej babu ippãn doon. M̦anit ko me Jeova ej ba bwe rettoon, rein rej ba bwe men kein rej ekkar ñan kõn̦aan eo an juon armej, ak ej bar juon wãween mour me armej remaroñ kããlõte.

9. Ewi wãween an jo̦dikdik ro bõk tokjãn ñe rej eddãp wõt ñan katak ko rej tõmaki ilo Baibõl̦?

⁹ El̦aptata ñan jo̦dikdik ro, remaroñ l̦õmn̦ak bwe rej aikuj errã im bõk l̦õmn̦ak ko an ri-jikuul̦ ro ak ri-jerbal ro m̦õttaer ikijjeen m̦anit ko rettoon. Eñin men eo ear wal̦o̦k ñan Aleksandar. Ilo an ememejtok tõre ko ej jikuul̦, ej  ba: “Jet leddik ilo jikuul̦ rar kajjioñ iuuni eõ bwe in babu ippãer. Rar ba bwe kõnke ejjel̦o̦k jera leddik, bõlen em̦m̦an ippa l̦addik.” Ñe kwõj jelm̦ae mãlejjoñ ko ãinwõt in, keememej bwe ñe kwõnaaj eddãp wõt ñan katak ko kwõj lukkuun tõmaki ilo Baibõl̦, kwõnaaj m̦õn̦õn̦õ ippam̦ make, im kwõnaaj kõjparok ãjmour eo am̦, bũruom̦, im jem̦jerã eo am̦ ippãn Jeova. Im kajjojo iien kwõj jum̦ae menin kapo ko, enaaj pidodol̦o̦k ñan am̦ kõm̦m̦ani men ko rejim̦we. Im bareinwõt keememej bwe l̦õmn̦ak eo ebõd an lal̦ in kõn an ruo armej babu ippãn doon, ej itok jãn Setan. Innem ñe kwõj jutak pen im m̦akoko in bõk l̦õmn̦ak eo an lal̦ in, kwõj “anjo̦ ioon ri-nana eo.”​—1 Jon 2:14.

10. Ewi wãween an 1 Jon 1:9 jipañ kõj karejar ñan Jeova kõn juon bõklõkõt erreo?

¹⁰ Jej kile bwe ewõr an Jeova jim̦we im maroñ ñan kaalikkar m̦anit ta ko me rebõd. Im jej kate kõj joñan wõt ad maroñ ñan jab kõm̦m̦an jerawiwi. Innem ñe jej kõm̦m̦an bõd, jej kwal̦o̦k bõd eo ad ñan Jeova ilo ad jar ñane. (Riit 1 Jon 1:9.) Im ñe jej kõm̦m̦an juon jerawiwi el̦ap, jej kappok jipañ jãn em̦m̦aan ro rej lale eklejia, ro me Jeova ear jitõñ er bwe ren lale kõj. (Jem. 5:14-16) Ijoke, ejjab aikuj l̦e jãn joñan an nana ad mour kõn bõd ko jaar kõm̦m̦ani m̦oktal̦o̦k. Etke? Kõnke Jemãdwõj ilañ me el̦ap yokwe ippãn, em̦õj an letok katok in mour eo an Nejin bwe en maroñ jeorl̦o̦k jerawiwi ko ad. Ñe Jeova ej ba bwe enaaj jeorl̦o̦k bõd ko an ri-jerawiwi ro rej ukel̦o̦k, ej m̦ool ilo an ba men in. Kõn men in, ejjel̦o̦k men en̦ emaroñ kabõjrak kõj jãn ad karejar ñan Jeova kõn juon bõklõkõt erreo.​—1 Jon 2:1, 2, 12; 3:19, 20.

11. Ewi wãween ad maroñ kõjparoke l̦õmn̦ak ko ad jãn katak ko me remaroñ ko̦kkure tõmak eo ad?

¹¹ Jej aikuj jum̦ae katak ko an ri-jum̦ae ro rar ilo̦k jãn m̦ool eo. Jãn iien eo ear jinoe eklejia eo an Kũrjin ro jinoin tok ñan kiiõ, Tepil̦ eo ej kõjerbal elõñ ri-etao ro ñan kõm̦m̦an  bwe en jino wõr pere ilo l̦õmn̦ak ko an ri-karejar ro retiljek an Anij. Kõn men in, jej aikuj jel̦ã kilen kile oktan mel̦el̦e ko rem̦ool im riab ko. * Ri-kõjdat ro remaroñ kõjerbale men ko ilo online ak weepjait ko rej illik pija im naan ko aer ie ñan kõm̦m̦an bwe en dikl̦o̦k ad lõke Jeova im yokwe ro jeid im jatid. Jen jum̦aik riab kein, rej itok jãn Setan!​—1 Jon 4:1, 6; Rev. 12:9.

12. Etke jej aikuj kõkajoor tõmak eo ad ilo katak ko rem̦ool em̦õj ad katak kaki?

¹² Bwe jen maroñ jum̦ae men ko Setan ej kõjerbali ñan kajjioñ ko̦kkure tõmak eo ad, jej aikuj kal̦apl̦o̦k ad lõke Jesus im jerbal eo an ñan kajejjet ankilaan Anij. Jej aikuj bar lõke ro wõt me Jeova ej kõjerbale ñan tõl doulul eo an rainin. (Matu 24:45-47) Jej kal̦apl̦o̦k ad lõke ilo ad keini ad katak Naanin Anij. Innem tõmak eo ad enaaj ãinwõt juon wõjke elukkuun m̦wilal̦ okran im epen. Paul ear kwal̦o̦k ejja l̦õmn̦ak in ke ear jeje ñan eklejia eo ilo Kolosse. Ear ba: “Ãinwõt ami kar likũt ami tõmak ilo Christ Jesus ad Irooj, ãindein kom̦win wõnm̦aanl̦o̦k wõt im etetal ilo ami juon wõt ippãn. Kom̦win kapen okrami im kalõk kom̦ ilo e im pen wõt ilo tõmak.” (Kol. 2:6, 7) Ejjel̦o̦k men en̦ Setan ak ro ej kõjerbal er, remaroñ kõm̦m̦ane ñan kam̦õjn̦o̦ik juon Kũrjin me em̦õj an kõkajoore tõmak eo an make.​—2 Jon 8, 9.

13. Ta eo jej aikuj in kõtmãne kake, im etke?

¹³ Jej aikuj kõtmãne bwe lal̦ in enaaj dike kõj. (1 Jon 3:13) Jon ej kakeememeje kõj bwe “aolepen lal̦ in ej pãd ium̦win pein ri-nana eo.” (1 Jon 5:19) Ilo an epaaktok jem̦l̦o̦kin jukjukun pãd in, ej l̦apl̦o̦k wõt an Setan illu. (Rev. 12:12) Setan ej kajjioñ ko̦kkure kõj, ejjab ilo wãween ko wõt me jejjab maroñ kile, ãinwõt m̦anit ko rettoon im riab ko an ri-jum̦ae ro me rar ilo̦k jãn m̦ool eo, ak ej bareinwõt kajjioñ ko̦kkure kõj ilo an kõjerbali wãween ko em̦õkaj ad kile ãinwõt an ri-jum̦ae ro lukkuun matõrtõr im kaeñtaan armej ro an Jeova. Setan ejel̦ã bwe edik an iien ñan kajjioñ kabõjrak jerbalin kwal̦o̦k naan eo ad ak ñan kajjioñ ko̦kkure tõmak eo ad. Kõn men in, jejjab bwilõñ bwe em̦õj kam̦o jerbal eo ad ak jet iaan m̦akũtkũt ko an doulul in ilo elõñ aelõñ ko. Meñe ãindein ak ro jeid im jatid ilo aelõñ kein rej kijenmej wõt. Rej kam̦ool bwe jekdo̦o̦n ta ko ri-nana eo ej kajjioñ ko̦kkure kõj kaki, ak jemaroñ anjo̦!

14. Ta juon wãween jemaroñ jipañ ro jeid im jatid ñan pãdwõt ilo m̦ool eo?

¹⁴ Bwe jen maroñ jipañ ro jeid im jatid ñan pãdwõt ilo m̦ool eo, jej aikuj kwal̦o̦k tũriam̦o. (1 Jon 3:10, 11, 16-18) Jej aikuj yokwe doon, ejjab ilo iien ko rem̦m̦an wõt ak ilo bar iien ko apañ ko rej wal̦o̦k. Ñan waanjoñak, kwõjel̦ã ke kajjien juon eo me ear mej eo ejitõnbõro ippãn im ej aikuj bõk kaenõm̦m̦an ak jipañ kõn jet men? Ak kwaar ke roñ kõn rũttõmak ro m̦õttad me ear jako men ko m̦weieer jãn l̦añ ko rel̦l̦ap im men ko ãierl̦o̦kwõt im rej aikuj jipañ ñan bar kalõke Im̦õn Kweilo̦k ko aer ak m̦õko im̦weer? Jej kwal̦o̦k joñan yokwe eo ad ñan ro jeid im jatid im ad tũriam̦okake er, ejjab wõt ilo men ko jej ba, ak wãween eo el̦apl̦o̦k an aorõk, ej ilo kõm̦m̦an ko ad.

15. Ãinwõt an wal̦o̦k ilo 1 Jon 4:7, 8, ta eo jej aikuj in kõm̦m̦ane?

¹⁵ Jej anõke Jemãdwõj ilañ eo el̦ap yokwe ippãn ñe jej kwal̦o̦k yokwe ñan doon. (Riit 1 Jon 4:7, 8.) Juon wãween eaorõk jej kwal̦o̦k yokwe ej ilo ad jol̦o̦k an doon bõd. Ñan waanjoñak, juon emaroñ kõmetak kõj, innem tokãlik jol̦o̦k an bõd ippãd. Jej kwal̦o̦k yokwe ilo  ad jol̦o̦k an bõd im mel̦o̦kl̦o̦ke bõd eo. (Kol. 3:13) Juon jeid im jatid em̦m̦aan etan Aldo ear jelm̦aik mãlejjoñ in ke ear roñ an juon jeid im jatid me ej kautieje ba juon men ekõmmetak kõn armej ro jãn aelõñ eo an. Aldo ej ba, “Iar jar wõt ñan Jeova bwe en jipañ eõ ñan jab bõk eñjake ko renana kõn em̦m̦aan in jeid im jatid.” Bõtab ewõr bar men en̦ Aldo ear kõm̦m̦ane. Ear pepe in kajjitõk bwe erro em̦m̦aan eo jeid im jatid ren jerbal ippãn doon ilo kwal̦o̦k naan. Ke erro ar jerbal ippãn doon, Aldo ear kõmel̦el̦e ñan eo jeid im jatid kõn wãween an kar naan ko an jelõte. Aldo ej bar ba: “Ke em̦m̦aan in jeid im jatid ear roñ kõn wãween an kar naan ko an rekõmmetak jelõt eõ, ear jol̦o̦k an bõd. Im iar kile ilo ainikien bwe elukkuun kar ajl̦o̦k kõn men ko ear ba. Ãlikin iien in, ekar em̦m̦an kõtaamro im jaar mel̦o̦kl̦o̦ke apañ eo.”

16-17. Ta eo jej aikuj in jek ippãd make?

¹⁶ Rijjilõk Jon ear lukkuun kea kõn kõtaan eo an ro jein im jatin ippãn Jeova, im ear lukkuun alikkar an kar bõk eñjake in ilo naanin jiroñ ko an ilo lõta ko jilu me kar kõm̦akũt e ñan je. Ej juon menin kõketak ñan jel̦ã bwe em̦õj jitõñ em̦m̦aan im kõrã ro me rej ãinwõt e, ñan irooj ippãn Christ!​—1 Jon 2:27.

¹⁷ Jen lukkuun l̦õmn̦ak kõn naanin jiroñ eo ej kab m̦õj ad etale. Jen jek ippãd make bwe jen etetal wõt ilo m̦ool eo, im pokake Jeova ilo men otemjej jej kõm̦m̦ani ilo mour ko ad. Katak kõn Naan eo an, im lõke. Kõm̦m̦an bwe en pen tõmak eo am̦ ilo Jesus. Jum̦ae mãlõtlõt ko an armej im katak ko an ri-jum̦ae ro me rar ilo̦k jãn m̦ool eo. Kõjparok bwe kwõn jab juon eo me ej ba bwe ej karejar ñan Jeova ak ilo ejja iien eo wõt ej kõm̦m̦ani m̦anit ko renana, im jab roñjake ro rej kajjioñ in kareel eok ñan kõm̦m̦ani men ko renana. Mour ekkar ñan kien ko an Jeova ikijjeen mour erreo. Im jen jipañ ro jeid im jatid kajoor wõt ilo ad jol̦o̦k bõd ko an ro rej kõmetak kõj im jipañ ro rej pãd ilo aikuj. Innem jekdo̦o̦n ta wãween ko reppen jej iiooni, jenaaj wõnm̦aanl̦o̦k wõt im etetal ilo m̦ool eo.