Etke Jesus ear ãlijtok naan ko an Devid ilo Sam 22:1 m̦okta wõt jãn an kar mej?

Jet iaan naan ko an Jesus ãliktata m̦okta jãn an kar mej me rej pãd ilo Matu 27:46 ej: “Aõ Anij, aõ Anij, etke kwaar ilo̦k jãn eõ?” Ilo an kar Jesus ba naan kein, ear kajejjet kũtien naan ko an ri-jeje sam eo Devid ilo Sam 22:1. (Mark 15:34) Enaaj kar juon men ebõd ñan bõk l̦õmn̦ak eo bwe unin an kar Jesus ãlijtok naan kein ej kõnke ear jab m̦õn̦õn̦õ ak ear dik an tõmak ium̦win jidik iien. Jesus ear lukkuun mel̦el̦e etke ear aikuj in mej, im ear m̦õn̦õn̦õ in kõm̦m̦ane men in. (Matu 16:21; 20:28) Ear bareinwõt jel̦ã bwe ilo iien eo enaaj kar mej, Jeova enaaj aikuj in jol̦o̦k jabdewõt “wõrwõr in kõpool̦” jãne, ak jol̦o̦k An kõjparoke. (Job 1:10) Ilo an kar Jeova ãindein, ear kõtl̦o̦k an Jesus kam̦ool bwe enaaj tiljek wõt jekdo̦o̦n ewi wãween an naaj mej.​—Mark 14:35, 36.

Innem etke Jesus ear kwal̦o̦k naan kein jãn bokin Sam? Meñe jejjab lukkuun jel̦ã unin an kar ba naan kein, ak jen etale jet iaan un ko unin emaroñ kar ba naan kein. *

Ilo an kar Jesus kwal̦o̦k naan kein, ear ke kajjioñ kaalikkar bwe Jeova eban kõm̦m̦an jabdewõt ilo iien eo ej pojakin mej? Jesus ear aikuj in make kõl̦l̦ãik on̦ããn jerawiwi ko ad im jab kõn jipañ eo an Jeova. Ear erom juon armej im ear aikuj in mej bwe en maroñ “edjoñ mej kõn aolep armej.”—Hib. 2:9.

Ilo an kar Jesus ãlijtok jet wõt naan ko jãn sam ak al in, ear ke kõn̦aan bwe ro jet ren  l̦õmn̦ak kõn aolepen sam eo? Ilo raan ko an Jesus, ekkã an kar ri-Ju ro kili elõñ iaan sam ko. Ñe rej roñ juon eoon jãn juon iaan sam ko, renaaj kajju l̦õmn̦ake aolepen sam eo. El̦aññe eñin men eo Jesus ear kõn̦aan kõm̦m̦ane, innem enaaj kar jipañ ri-Ju ro ri-kal̦ooran ñan ememejtok kanaan ko rellõñ ilo sam in me rar kwal̦o̦k kõn men ko renaaj wal̦o̦k ilo iien an mej. (Sam 22:7, 8, 15, 16, 18, 24) Bareinwõt, eoon ko ãliktata ilo sam in rej nõbar Jeova im rej kwal̦o̦k bwe ej Kiiñ ioon aolepen lal̦ in.​—Sam 22:27-31.

Ilo an kar Jesus ãlijtok naan kein an Devid, ear ke ba naan kein ñan kaalikkar bwe ejjel̦o̦k ruõn? M̦okta jãn an kar Jesus mej, ear aikuj in kijenmej ke kar ekajete ilo juon wãween ejjab jim̦we ekkar ñan kien im bareinwõt ke kar n̦aruon im ba bwe ej kõnono n̦ae Anij. (Matu 26:65, 66) Kar m̦õkaj im ekajete ilo lukwõl̦pãn boñ im kar kõm̦m̦ane men in ilo juon wãween ear jab ekkar ñan karõk ko an kien. (Matu 26:59; Mark 14:56-59) Ke Jesus ear kajjitõk im ba: “Aõ Anij, aõ Anij, etke kwaar ilo̦k jãn eõ?” emaroñ kar ba naan kein ñan kwal̦o̦k bwe ejjel̦o̦k ruõn im bwe ear ejjel̦o̦k unin aer kar m̦ane.

Jesus ear ke kajjioñ bar kakeememej ro jet kõn ri-jeje eo an sam in, Devid, bwe meñe Jeova ear kõtl̦o̦k bwe en eñtaan ak ejjab mel̦el̦ein bwe ear jako an Jeova buñbũruon ippãn Devid? Kajjitõk eo an Devid ear jab mel̦el̦ein bwe edik tõmak eo an. Ãlikin an kar kwal̦o̦k kajjitõk in, ear wõnm̦aanl̦o̦k im kwal̦o̦k an lõke kajoor eo ippãn Jeova ñan lo̦mo̦o̦ren ro doon, innem Jeova ear wõnm̦aanl̦o̦k wõt im kõjeraam̦m̦ane. (Sam 22:23, 24, 27) Ãindeinl̦o̦k wõt, meñe Jesus, eo “Nejin Devid,” ear eñtaan ioon al̦al̦ in eñtaan eo, ak men in ear jab mel̦el̦ein bwe ejako an Jeova buñbũruon kake Jesus.​—Matu 21:9.

Jesus ear ke kwal̦o̦k an lukkuun bũrom̦õj kõn an Jeova aikuj in bõjrak jãn An kõjparok e bwe en maroñ lukkuun kam̦ool an tiljek ñan E? Kar jab karõk eo an Jeova in jãn jinoin bwe Nejin en eñtaan im mej. Bõtab ear juon men ear aikuj in wal̦o̦k ãlikin wõt an kar Adam im Iv jum̦aiki Jeova. Ejjel̦o̦k men en̦ ebõd Jesus ear kõm̦m̦ane, bõtab ear aikuj in eñtaan im mej bwe en maroñ uwaake aitwerõk ko me Setan ear bũkm̦aantak im bwe en ajel̦o̦k mour eo an ñan kõl̦l̦ãik on̦ããn men eo armej rar luuji. (Mark 8:31; 1 Pit. 2:21-24) Bwe en maroñ tõprak men in, Jeova enaaj aikuj bõjrak jãn an kõjparoke Jesus ium̦win jidik wõt iien; enaaj kar kein kajuon in an Jeova kõm̦m̦ane men in ilo mour eo an Jesus.

Jesus ear ke kajjioñ jipañ ri-kal̦oor ro an ñan l̦õmn̦ak wõt kõn un eo unin an Jeova kõtl̦o̦k bwe en mej ilo wãween in? * Jesus ear jel̦ã bwe an mej ilo wãween in ãinwõt juon ri-nana ioon juon al̦al̦ in eñtaan, enaaj kar kal̦õkatip elõñ armej. (1 Kor. 1:23) El̦aññe ri-kal̦oor ro an renaaj kar l̦õmn̦ak wõt kõn unleplepin an aikuj mej, men in enaaj kar kõm̦m̦an bwe ren mel̦el̦e aorõkin an mej. (Gal. 3:13, 14) Innem, renaaj kar watõk Jesus ãinwõt juon ri-Lo̦mo̦o̦r im jab juon ri-nana me ear rupe kien.

Jekdo̦o̦n ta un eo unin an kar Jesus ãlijtok naan kein, ak ear jel̦ã bwe men ko ear iiooni rar m̦õttan ankilaan Jeova ñan e. Ejjabto ãlikin an kar Jesus ãlijtok sam in, ear ba: “Ededel̦o̦k!” (Jon 19:30; Luk 22:37) Aet, an Jeova kar bõjrak jãn an kõjparoke Jesus ium̦win jidik wõt iien, ear kõmaroñe Jesus ñan kajejjet aolep men ko me kar jilkintok e bwe en kõm̦m̦ani. Ear bar kõmaroñe ñan kajejjete aolep men ko kar je kõn e “ilo Kien Moses, naan ko an ri-Kanaan ro, im Sam ko.”—Luk 24:44.