1-2. Ta eo ej jipañ kõj bwe jen maroñ anõke jenkwan neen Jesus? Kwal̦o̦k juon waanjoñak.

PIJAIKL̦O̦K am̦ m̦õttan juon kumi in armej me rej etetal ilo juon ãne jem̦aden ekauwõtata. Ewõr juon armej el̦ap imminene ko ippãn ej tõl kom̦. Ke ej etetal, ewõr annañin jenkwan neen ioon bok. Ak ãlikin jet iien, kwõjjab maroñ loe armej eo ej tõl kom̦! Bõtab kwõjjab wiwijet. Ijoke, kwe im armej ro jet kom̦ij kanooj l̦oore jenkwan neen armej eo ear tõl kom̦!

² Ãinwõt Kũrjin ro rem̦ool, jej etetal ilo kõkkar ilujen juon ãne jem̦aden me ekauwõtata​—lal̦ in enana. Ijoke, jejeraam̦m̦an bwe em̦õj an Jeova letok juon eo ej tõl kõj me eweeppãn—​eo Nejin, Jesus Christ, me jemaroñ kanooj anõke jenkwan neen. (1 Pit. 2:21) Ekkar ñan juon bokin kõmel̦el̦e kõn Baibõl̦, ilo eoon in, Piter ej keidi Jesus ñan juon ri-tõl. Ãinwõt an juon eo me ej tõl likũt annañin jenkwan neen, em̦õj an Jesus likũt jenkwan ne ko neen ñan ad maroñ anõki. Jen kiiõ etale jilu kajjitõk ko ikijjeen ad anõke jenkwan neen Jesus​—ta mel̦el̦ein? etke? im ewi wãween?

3. Ta mel̦el̦ein ñan anõke jenkwan neen juon armej?

³ Ta mel̦el̦ein ñan anõke jenkwan neen juon armej? Ilo Baibõl̦, ewõr iien naan kein “etetal” im ‘ne’ rej jitõñl̦o̦k ñan wãween an juon armej mour. (Jen. 6:9; JK. 4:26) Jemaroñ keidi joñak ko juon armej ej likũti, ñan jenkwan ne ko neen me ej likũti  ilo an etetal. Kõn men in, ñan anõke jenkwan neen juon armej ej mel̦el̦ein ñan l̦oore ak anõke joñak ko an.

4. Ta mel̦el̦ein ñan anõke jenkwan neen Jesus?

⁴ Ta mel̦el̦ein ñan anõke jenkwan neen Jesus? Eokwe, ilo tukadu, ej mel̦el̦ein ñan anõke joñak ko an. Ilo eoon eo me katak in ej pedped ioon, rijjilõk Piter ej kõnono kõn joñak eo em̦m̦an Jesus ear likũti ikijjeen an kar kijenmej wõt ke ear eñtaan; bõtab ebar lõñ wãween ko jet jemaroñ anõke Jesus ie. (1 Pit. 2:18-25) Ilo m̦ool, aolep men ko ilo mour eo an Jesus​—aolep men ko ear ba im kõm̦m̦ani—​rej juon joñak jemaroñ anõki.

5. Armej ro rejjab weeppãn remaroñ ke lukkuun anõke joñak eo eweeppãn an Jesus? Jouj im kõmel̦el̦e.

⁵ Ãinwõt armej ro rejjab weeppãn, em̦ool ke bwe jemaroñ anõke joñak eo an Jesus? Aet, jemaroñ. Keememej bwe Piter ear rõjañ kõj ñan “kanooj anõke jenkwan neen [Jesus],” ak ear jab ba bwe en jejjet im weeppãn ad kõm̦m̦ane men in. Ijoke, el̦aññe jenaaj kate kõj ñan anõke jenkwan neen Jesus, ilo ad kate kõj joñan wõt ad maroñ ãinwõt armej ro rejjab weeppãn, innem jenaaj pokake naan ko an rijjilõk Jon me ej ba: “Wõnm̦aanl̦o̦k wõt im etetal ilo ejja wãween eo wõt Jesus ear etetal.”​—1 Jon 2:6.

6-7. Etke jemaroñ ba bwe ad anõke jenkwan neen Jesus enaaj kõm̦m̦an bwe jen epaakel̦o̦k Jeova?

⁶ Ad anõke jenkwan neen Jesus, enaaj kõm̦m̦an bwe jen epaakel̦o̦k Jeova. Etke jemaroñ ba men in? M̦oktata, Jesus ear likũt juon joñak elukkuun em̦m̦an kõn wãween ad maroñ mour ilo wãween eo ej kabuñbũruon Anij. (Jon 8:29) Kõn men in, ñe jenaaj anõke jenkwan neen Jesus, jenaaj kabuñbũruon Jeova. Im jemaroñ lõke bwe Jemãdwõj ilañ enaaj epaakel̦o̦k ro rej lukkuun kate er bwe ren m̦õttan.​—Jem. 4:8.

 ⁷ Kein karuo, ear lukkuun weeppãn wãween an Jesus anõke Jemãn. Eñin unin Jesus ear maroñ ba: “Jabdewõt eo em̦õj an lo ña, em̦õj an bar lo Jema.” (Jon 14:9) Ñe jej anõke kadkad ko kadkadin Jesus im wãween an kar kõm̦m̦an ñan armej ro​—ñan waanjoñak, an kar kwal̦o̦k tũriam̦o ñan juon ri-lõba, an mel̦el̦e kõn eñjake ko an kõrã eo enañinmej, im an tũriam̦okake ro emej ro rejitõnbõro ippãer—​jej anõke bar Jeova. (Mark 1:40, 41; 5:25-34; Jon 11:33-35) El̦ak l̦apl̦o̦k ad ãinwõt Jeova, el̦apl̦o̦k ad epaakel̦o̦k E.

8. Kõmel̦el̦e etke ad anõke jenkwan neen Jesus enaaj jipañ kõj ñan “anjo̦” ioon lal̦ in.

⁸ Ad anõke jenkwan neen Jesus ej jipañ kõj ñan jab m̦ad ilo lal̦ in enana. Ilo boñõn eo ãliktata in an kar Jesus mour ioon lal̦ in, ear maroñ ba: “Em̦õj aõ anjo̦ ioon lal̦.” (Jon 16:33) Ilo an ba naan kein ear kwal̦o̦k bwe ear jab kõtl̦o̦k bwe l̦õmn̦ak, mejãnkajjik, im kõm̦m̦an ko an lal̦ in ren jelõt e. Jesus ear jab kõtl̦o̦k bwe en m̦ad jãn unin an kar itok ñan lal̦ in​—bwe en jojomare Jeova. Ak ta kõn kõj? Ilo lal̦ in, elõñ men ko remaroñ kõm̦ad kõj. Bõtab el̦aññe jenaaj ãinwõt Jesus im kate wõt kõj ñan jab m̦ad jãn ad kõm̦anm̦an ankilaan Jeova, kõj bareinwõt jenaaj “anjo̦” ioon lal̦ in.​—1 Jon 5:5.

9. Ta eo jej aikuj in kõm̦m̦ane bwe jen pãdwõt ilo ial̦ eo ej tõll̦o̦k ñan mour indeeo?

⁹ Ad anõke jenkwan neen Jesus ej tõll̦o̦k ñan mour indeeo. Ke juon likao em̦weiie ear kajjitõk ta eo ej aikuj in kõm̦m̦ane ñan bõk mour indeeo, Jesus ear uwaake im ba: “Kwõn itok im l̦oor eõ.” (Matu 19:16-21) Ñan jet ri-Ju ro me rar jab tõmak bwe e eo ej Christ, Jesus ear ba: “Jiip ko aõ . . . rej l̦oor eõ. Inaaj lel̦o̦k ñan er mour indeeo.” (Jon 10:24-29) Ñan Nikodimõs, juon iaan ri-ekajet ro ilo Im̦õn Ekajet eo El̦ap an ri-Ju ro, eo me ear jino itoklimo kõn katak ko, Jesus ear ba ñane bwe ro rej “kwal̦o̦k [aer] tõmak ilo e” renaaj “bõk mour indeeo.” (Jon 3:16) Jej kwal̦o̦k ad tõmak ilo Jesus ikijjeen ad jerbali katak ko an, ilo naan im ilo kõm̦m̦an ko ad. El̦aññe jenaaj kõm̦m̦ani men kein, jenaaj pãd ilo ial̦ eo ej tõll̦o̦k ñan mour indeeo.​—Matu 7:14.

10. Ta ko jej aikuj in kõm̦m̦ani bwe en em̦m̦anl̦o̦k ad “jel̦ã kõn” Jesus? (Jon 17:3)

¹⁰ M̦okta jãn ad maroñ kanooj anõke jenkwan neen Jesus, jej aikuj jel̦ã kõn e. (Riit Jon 17:3.) Ad “jel̦ã kõn” Jesus ej juon men jejjab aikuj bõjrak jãn ad kõm̦m̦ane. Jej aikuj wõnm̦aanl̦o̦k wõt im kal̦apl̦o̦k ad jel̦ã kõn e, ikijjeen ad katak kõn kadkad ko kadkadin, wãween an l̦õmn̦ak, im naanin jiroñ ko an. Jekdo̦o̦n ewi toon ad pãd ilo m̦ool eo, ak jej aikuj wõnm̦aanl̦o̦k wõt im kate kõj ilo ad kal̦apl̦o̦k ad jel̦ã kõn Jeova im eo Nejin.

11. Ta ko repãd ilo Gospel ko emãn?

¹¹ Ñan jipañ kõj bwe jen jel̦ã kõn eo Nejin, ilo yokwe Jeova ear kitibuj Gospel ko emãn  ilo Naan eo an. Gospel ko rej kwal̦o̦k kõn bwebwenatoun mour eo an Jesus im jerbalin kwal̦o̦k naan eo an. Bwebwenato kein rej kwal̦o̦k ñan kõj kõn ta ko Jesus ear ba, kõm̦m̦ani, im wãween an kar eñjake. Bok kein emãn rej jipañ kõj ñan “kanooj kal̦apl̦o̦k wõt [ad] kõl̦mãnl̦o̦kjen̦” kõn joñak eo an Jesus. (Hib. 12:3) Ilo juon wãween, jemaroñ ba bwe ilo bok kein, epãd jenkwan ne ko neen Jesus me ear likũti bwe jen anõki. Kõn men in, ñe jej katak im etali Gospel ko, enaaj l̦apl̦o̦k ad jel̦ã kõn Jesus. Tokjãn ad ãindein, jemaroñ kanooj anõke jenkwan neen.

12. Ewi wãween ad maroñ lukkuun bõk tokjãn jãn bokin Gospel ko?

¹² Ñan lukkuun bõk tokjãn jãn Gospel ko, ej aikuj l̦apl̦o̦k men ko jej kõm̦m̦ani jãn ad baj riit wõt. Jej aikuj bõk iien im lukkuun katak im kõl̦mãnl̦o̦kjen̦ kaki. (Keidi Joshua 1:8.) Jen etale ruo wãween ko remaroñ jipañ kõj ñan kõl̦mãnl̦o̦kjen̦ kõn Gospel ko im jerbali men ko jej riiti.

13. Ewi wãween am̦ maroñ kõm̦m̦an bwe bwebwenato ko ilo Gospel ko ren m̦ool ñan eok?

¹³ Kein kajuon, kõm̦m̦an bwe bwebwenato ko ilo Gospel ko ren m̦ool ñan eok. Pijaikl̦o̦k am̦ lo, roñ, im eñjake men ko rej wal̦o̦k ilo bwebwenato eo. Ñan jipañ eok kõm̦m̦ane men in, kõm̦m̦an etale ko ilo bokin katak ko jãn doulul eo an Jeova. Etale eoon ko jet​—men ko rar wal̦o̦k m̦oktal̦o̦k ak ãlikin bwebwenato eo kwõj katak kake. Kappok kõmel̦el̦e ko me rej kwal̦o̦k kõn ta ko rar wal̦o̦k ilo iien eo im kõn wãween ko rar iiooni. Keidi bwebwenato eo kwõj katak kake ñan bar juon Gospel me ej bar kwal̦o̦k kõn ejja bwebwenato eo wõt. Jet iien juon ri-jeje Gospel ej kobaik juon kõmel̦el̦e el̦ap tokjãn me eo juon ear jab likũti ilo Gospel eo ear je.

14-15. Ewi wãween ad maroñ jerbali men ko jaar katak jãn bokin Gospel ko?

¹⁴ Kein karuo, jerbale bwebwenato ko jãn Gospel ko ilo mour n̦e am̦. (Jon 13:17) Ãlikin am̦ lukkuun katak im etale juon bwebwenato jãn Gospel ko, kajjitõk ippam̦ make: ‘Ewõr  ke juon men ilo bwebwenato in me imaroñ jerbale ilo mour e aõ? Ewi wãween aõ maroñ kõjerbale bwebwenato in ñan jipañe bar juon armej?’ Kajjioñ l̦õmn̦ak kõn juon armej, innem ilo yokwe im ilo jouj kwal̦o̦k ñane men ko kwaar katak kaki ilo juon iien ekkar.

¹⁵ Jen etale juon waanjoñak kõn ewi wãween ad maroñ jerbale wãween kein ruo. Jenaaj etale bwebwenato eo kõn kõrã eo ejeram̦õl me emej l̦eo pãleen me Jesus ear loe ilo tampel̦ eo.

16. Kõmel̦el̦eik ta eo ej wal̦o̦k ilo Mark 12:41.

¹⁶ Kõm̦m̦an bwe bwebwenato eo en m̦ool ñan eok. (Riit Mark 12:41.) Pijaikl̦o̦k ta ko rej wal̦o̦k. Iien in ej Nisan 11, 33 C.E.​—jejjo raan m̦okta jãn an Jesus mej. Jesus ear kõjerbal enañin aolepen raan eo ñan katakin ilo tampel̦ eo. Ri-tõlin kabuñ ro me rar jum̦aiki rar kõm̦m̦an bwe en lukkuun pen ñane. M̦oktal̦o̦k, jet iaaer rar ekajete maroñ eo an. Ro jet rar kajjioñ mãlejjoñe e ilo aer kwal̦o̦k kajjitõk ko reppen. (Mark 11:27-33; 12:13-34) Kiiõ, em̦õj an Jesus em̦m̦akũt ñan bar juon jikin ilo tampel̦ eo. Ilo ijin​—emaroñ jikin eo n̦aetan Mel̦an eo an Kõrã—​Jesus ej loe jikin jaba ko rej kõkar iturin kiin m̦weo. Ej jijet im jino lale an armej ro illik jããn ilo jikin jaba ko. Ej lo an elõñ ri-m̦weiie ro illik elõñ jããn. Bõlen emaroñ kar epaake jikin jaba ko ñan joñan eo me emaroñ roñ ainikien an jããn ko tõtõñtõñ ke rej wõtlo̦k ñan ilowaaer.

17. Ilo Mark 12:42, ta eo kõrã eo ejeram̦õl me emej l̦eo pãleen ear kõm̦m̦ane?

¹⁷ Riit Mark 12:42. Ãlikin jet iien, Jesus ej loe ta eo juon kõrã ej kõm̦m̦ane. Kõrã in ej juon eo “ejeram̦õl im emej l̦eo pãleen.” (Luk 21:2) Ebwe an lukkuun pen an kõrã in mour; ejjel̦o̦k pere bwe emaroñ pen ñan an kabwe aikuj ko an. Meñe ãindein, ak ej etal ñan juon iaan jikin jaba ko im likũt ruo jããn jiddik ie, me emaroñ kar jidik wõt ainikieer aer wõtlo̦k ñan ilowaan jikin jaba eo. Jesus ejel̦ã joñan eo ear likũti​—ruo lepta, jããn ko reddiktata ilo iien eo. Joñan an dik jããn in, ekar jabwe ñan wia juon bao sparrow, bao ko ediktata on̦ãer me kar wiakaki ñan m̦õñã.

18. Ekkar ñan Mark 12:43, 44, ta eo Jesus ear ba kõn jaba eo an kõrã eo emej l̦eo pãleen?

¹⁸ Riit Mark 12:43, 44. Jesus ej bwilõñ kõn kõrã in emej l̦eo pãleen. Kõn men in, ej kũrtok ri-kal̦oor ro an im jitõñe kõrã eo, im ba: “El̦apl̦o̦k joñan eo kõrã in ejeram̦õl im emej l̦eo pãleen ear likũti ilo jikin jaba jãn armej ro jet.” Jesus ej kõmel̦el̦e im ba: “Armej rein [el̦aptata ri-m̦weiie ro] rar jaba kõn bween jããn ko aer. Bõtab kõrã in, meñe ejeram̦õl ak ear jaba kõn aolepen jããn ko an, men ko en kar mour kaki.” Ke kõrã in etiljek me emej l̦eo pãleen ear lel̦o̦k jããn ko an ãliktata ilo raan eo, ear kwal̦o̦k an likũt mour eo an ium̦win kõjparok eo an Jeova.​—Sam 26:3.

19. Ta men eo eaorõk jemaroñ katak jãn naan ko an Jesus kõn kõrã eo ejeram̦õl me emej l̦eo pãleen?

¹⁹ Jerbale bwebwenato eo ilo mour eo am̦. Kajjitõk ippam̦ make, ‘Ta eo imaroñ katak jãn naan ko an Jesus kõn kõrã eo ejeram̦õl me emej l̦eo pãleen?’ L̦õmn̦ak kõn kõrã in me emej l̦eo pãleen. Ejjel̦o̦k pere bwe emaroñ kar kõn̦aan bwe en l̦apl̦o̦k joñan eo ej lel̦o̦k ñan Jeova. Ijoke, ear kõm̦m̦ane joñan eo emaroñe; ear lel̦o̦k ñan Jeova men eo em̦m̦antata ewõr ippãn. Im Jesus ear jel̦ã bwe jaba eo an ear lukkuun aorõk im̦aan mejãn Jemãn. Eñin ej juon men eaorõk jej katak: Jeova ej buñbũruon ñe jej lel̦o̦k ñane men eo em̦m̦antata ewõr ippãd​—ad karejar ñane kõn aolepen bũruod im kõn aolepen ad. (Matu 22:37; Kol. 3:23) Jeova ej m̦õn̦õn̦õ ñe ej loe ad kate kõj joñan wõt ad maroñ! Men in ej jerbal ñan joñan  iien im maroñ ko ad me jej kõjerbali ilo ad kabuñ, ekoba ilo jerbalin kwal̦o̦k naan im ilo iien kweilo̦k ko.

20. Ewi wãween am̦ maroñ jerbale men eo jaar katak jãn bwebwenato eo kõn kõrã eo emej l̦eo pãleen? Kwal̦o̦k juon waanjoñak.

²⁰ Ewi wãween am̦ maroñ jerbale men eo jaar katak jãn bwebwenato eo kõn kõrã eo emej l̦eo pãleen? Kajjioñ l̦õmn̦ak kõn ro me remaroñ aikuji an juon kaenõm̦m̦an im kakeememej er bwe jerbal ko aer rej kabuñbũruon Jeova. Ñan waanjoñak, ewõr ke juon jeid im jatid lel̦l̦ap kwõjel̦ã kake me emaroñ nana an mour ak l̦õmn̦ak bwe ejejtokjãn kõnke kiiõ enana ãjmour eo an ak edik maroñ eo ippãn ñan kõm̦m̦ane joñan eo ekõn kõm̦m̦ane ilo jerbalin kwal̦o̦k naan? Ak ewõr ke juon jeid im jatid em̦m̦aan kwõmaroñ l̦õmn̦ak kake me ewõr juon an nañinmej el̦ap an jelõte im ekõn ebbweer kõnke ejjab maroñ pãd ilo Im̦õn Kweilo̦k eo ñan aolep kweilo̦k ko? Jipañ kain armej rot in ilo am̦ kwal̦o̦k naan ko “rem̦m̦an im rej kõketak.” (Eps. 4:29) Kwal̦o̦k ñan er kõn men eo ekaenõm̦m̦an jaar katak jãn bwebwenato eo kõn kõrã eo ejeram̦õl me emej l̦eo pãleen. Naan ko am̦ rekaenõm̦m̦an remaroñ kakeememej er bwe Jeova ej buñbũruon ñe jej kate kõj im lel̦o̦k aolepen ad ñane. (JK. 15:23; 1 Tes. 5:11) Ñe kwõj nõbar ro jet kõn aer kate er im lel̦o̦k aolepen aer ñan Jeova​—jekdo̦o̦n ñe ãinwõt ñe elukkuun dik—​kwõj kanooj in anõke jenkwan neen Jesus.

21. Ta eo kwõj jek ippam̦ make ñan kõm̦m̦ane?

²¹ El̦ap ad kam̦m̦oolol bwe bokin Gospel ko rej kwal̦o̦k elõñ mel̦el̦e ko kõn mour eo an Jesus, im men in ej kõmaroñ kõj ñan kanooj in anõke jenkwan neen! Kwõmaroñ ke kõm̦m̦ane juon am̦ project ilo iien am̦ katak ippam̦ make ak ilo Iien Kabuñ an Baam̦le me ej ikijjeen Gospel kein? Jen keememej bwe ñan ad lukkuun bõk tokjãn jãn kain katak rot in, jej aikuj kõm̦m̦an bwe bwebwenato ko ren m̦ool ñan kõj im jen jerbali ilo mour eo ad. Kobal̦o̦k ippãn ad anõki men ko Jesus ear kõm̦m̦ani, jej aikuj in bar eo̦roñ men ko ear ba. Ilo katak eo tok juon, jenaaj etale ta ko jemaroñ katak jãn naan ko ãliktata an Jesus ke ear juon armej.