Ñe ewal̦o̦k wãween rot in, eklejia eo enaaj watõk bwe ear jem̦l̦o̦k mourin m̦are eo m̦okta ke armej in ear m̦areiki bar juon, im bwe em̦õj kiiõ kapene mourin m̦are eo an ekããl. Ñan mel̦el̦e unin ad maroñ ba men in, jen etale ta eo Jesus ear ba ñe juon ej jepel im bar m̦areik juon.

Ãinwõt an Matu 19:9 kwal̦o̦k, Jesus ear kaalikkar bwe ewõr juon wõt un me ej pedped ioon Baibõl̦ im ej kamãlim an juon maroñ jepel jãn eo pãleen. Ear ba: “Ñe juon em̦m̦aan ej jepel jãn lio pãleen meñe lio ear jab l̦õñ im ej m̦areik bar juon, eokwe em̦m̦aan in ej lejãn.” Jãn naan kein an Jesus, jej katak bwe (1) l̦õñ ej un eo wõt ej pedped ioon Baibõl̦ me juon emaroñ jepel jãn eo pãleen im (2) bwe ñe juon em̦m̦aan ej jepel jãn eo pãleen bõtab ejjab ekkar ñan un eo jãn Baibõl̦ im ej bar m̦areik juon, innem em̦m̦aan in ej lejãn. *

Naan kein an Jesus rej ke mel̦el̦ein bwe ñe juon em̦m̦aan ej l̦õñ im jepel jãn lio pãleen, innem eanemkwõj ñan bar m̦are ekkar ñan naanin kakapilõklõk ko ilo Baibõl̦? Ejjab. El̦aññe em̦õj an juon rippãlele l̦õñ, innem rippãlele eo me ejjel̦o̦k ruõn enaaj pepe el̦aññe enãj jol̦o̦k an eo pãleen bõd ak jaab. El̦aññe ejjab kõn̦aan jol̦o̦k an bõd im rej kõm̦m̦an pepa in jepel im kadedeikl̦o̦k aolep peba kein, kiiõ erro jim̦or maroñ bar m̦are.

Ijoke, rippãlele eo me ejjel̦o̦k ruõn emaroñ lukkuun kõn̦aan kõjparok wõt mourin m̦are eo aerro im ej kwal̦o̦k an kõn̦aan jol̦o̦k an l̦eo pãleen bõd. Bõtab ta el̦aññe l̦ein me ear l̦õñ ej kõjekdo̦o̦n kõn̦aan in an kõrã eo pãleen im ej wõnm̦aanl̦o̦k wõt kõm̦m̦ane juon peba in jepel? Eokwe kõnke lio em̦õn̦õn̦õ in jol̦o̦k an l̦eo bõd im wõnm̦aanl̦o̦k kõn mourin m̦are eo aerro, innem l̦eo ejjab anemkwõj ñan an bar m̦are ekkar ñan naanin kakapilõk ko ilo Baibõl̦. El̦aññe l̦eo ej wõnm̦aanl̦o̦k wõt ilo an mour ettoon im m̦areik bar juon armej meñe ejjab anemkwõj ñan bar m̦are ekkar ñan Baibõl̦, innem ej bar l̦õñ, im em̦m̦aan ro rej lale eklejia renãj aikuj bar ejaake juon kumi in ekajet ñan etale bõd in an ekããl.​—1 Kor. 5:1, 2; 6:9, 10.

El̦aññe juon em̦m̦aan ej m̦areik bar juon meñe ejjab anemkwõj ñan bar m̦are ekkar ñan naanin kakapilõk ko ilo Baibõl̦, enaaj ewi wãween an eklejia eo watõk mourin m̦are eo an m̦okta im mourin m̦are eo an ekããl? Ekkar ñan Baibõl̦, mourin m̦are eo kar m̦okta ej ke wõnm̦aanl̦o̦k wõt? Rippãlele eo me ejjel̦o̦k ruõn ej wõr wõt ke an maroñ in pepe ñan jol̦o̦k an l̦eo kar pãleen bõd ak kõjekdo̦o̦n e? Naaj ke watõk bwe mourin m̦are in ekããl ej mourin lejãn?

Ilo kar m̦okta, eklejia eo ekõn watõk bwe mourin m̦are eo ekããl ej juon mourin lejãn toon wõt an eo ejjel̦o̦k ruõn jãn mourin m̦are eo m̦okta mour wõt, jab m̦are, im ejjel̦o̦k ruõn kõn l̦õñ. Ijoke, Jesus ear jab kõnono kõn eo ejjel̦o̦k ruõn ke ear kõnono kõn an juon jepel im bar m̦are. Ijello̦kun men in, ear kõmel̦el̦e bwe ñe juon em̦m̦aan em̦õj an jepel jãn eo pãleen meñe ejjel̦o̦k pedpedin ilo Baibõl im ej m̦areik bar juon, ej lejãn. Ilo wãween in, an l̦eo jepel im bar m̦are, me Jesus ear  ba bwe ejjel̦o̦k oktak jãn lejãn, men kein rej kõjem̦l̦o̦k mourin m̦are eo m̦okta.

Ñe ejem̦l̦o̦k juon mourin m̦are kõn wõt an kar juon rippãlele jepel jãn eo pãleen im bar m̦areiki bar juon, innem ejako an rippãlele eo me ejjel̦o̦k ruõn maroñ pepe el̦aññe enaaj jol̦o̦k an bõd ak jaab. Kõn men in, kõrã eo ejjab aikuj eddodo kõn an aikuj kõm̦m̦ane pepe eo ñan jol̦o̦k an l̦eo bõd ke ak jaab. Bareinwõt, wãween an eklejia eo watõk mourin m̦are eo ekããl ejjab pedped ioon an eo ejjel̦o̦k ruõn mej, bar m̦are, ak l̦õñ. *

Ilo kar waanjoñak eo itulõñ, l̦eo ear lejãn im men in ear tõll̦o̦k e ñan jepel. Ijoke, ta el̦aññe l̦eo ear jab lejãn ak ear kõm̦m̦an an peba in jepel innem bar m̦are? Ak ta el̦aññe l̦eo ear jab l̦õñ m̦okta jãn an jepel, bõtab tokãlik ear l̦õñ ãlikin an jepel innem ej bar m̦are meñe lio pãleen ear m̦õn̦õn̦õ in jeorl̦o̦k an bõd? Ilo aolep waanjoñak kein, kõn an kar l̦eo jepel im bar m̦are, wãween kein me rej ekkejell̦o̦k ñan lejãn, mel̦el̦ein bwe ejem̦l̦o̦k mourin m̦are eo m̦okta. Mourin m̦are eo ekããl an armej rein em̦õj kiiõ kapene ikijjeen kien. Ãinwõt an The Watchtower eo an November 15, 1979, peij 32 kwal̦o̦k, “kiiõ ke em̦õj an em̦m̦aan eo pãd ilo juon mourin m̦are ekããl, ejjab maroñ kõjem̦l̦o̦ke im bar jepl̦aak ñan eo pãleen kar m̦okta; ear jem̦l̦o̦k mourin m̦are eo an m̦okta ke ear jepel, lejãn, im bar m̦are.”

Mel̦el̦e in ad me em̦õj kajim̦weikl̦o̦k ejjab mel̦el̦ein bwe kõj Kũrjin ro jej l̦õmn̦ak bwe ejjab eokkwõjarjar mourin m̦are im bwe mourin lejãn ejjab juon jerawiwi el̦ap. Ñe juon em̦m̦aan me ej jepel jãn kõrã eo pãleen ak ejjel̦o̦k pedpedin ilo Baibõl̦ im ej m̦areik bar juon meñe ejjab anemkwõj ekkar ñan Baibõl̦, innem em̦m̦aan ro rej lale eklejia renaaj ejaake juon kumi in ekajet im etale wãween in kõnke armej in ear lejãn. (El̦aññe kõrã eo pãleen ekããl ej bar juon Kũrjin, innem enaaj bar pãd ium̦win kumi in ekajet eo kõnke ear lejãn.) Meñe reban watõk bwe mourin m̦are eo ekããl ej juon mourin lejãn, bõtab em̦m̦aan eo eban juon eo ekkar ñan an bõk eddo ko rejejuwaer ilo eklejia eo ium̦win elõñ iiõ im enaaj ãindein m̦ae iien ebõjrak an ro jet inepata kõn men eo enana ear kõm̦m̦ane ak bõk eñjake eo bwe ejjab tõllo̦kũn bwe ren kwal̦o̦k kautiej ñane. Men in enaaj bar kitibuj an em̦m̦aan ro rej lale eklejia etale wãween ko rej wal̦o̦k ippãn kõrã eo kar pãleen m̦okta me emaroñ kar jab em̦m̦an an em̦m̦aan eo kõm̦m̦an ñane, ekoba ajri ro nejierro reddik me emaroñ kar kõjoole er.​—Mal. 2:14-16.

Kõn wõt an l̦ap jorrããn ko rej wal̦o̦k itok wõt jãn jepel im m̦are rot kein me rejjab pedped ioon Baibõl̦, enaaj juon menin mãlõtlõt ñan an Kũrjin ro anõke wãween an Jeova l̦õmn̦ak im watõk bwe karõk eo kõn mourin m̦are ej juon men eokkwõjarjar.​—Ekl. 5:4, 5; Hib. 13:4.