1-2. Ta eo jej aikuj kõm̦m̦ane ilo ad kõttare an lal̦ eo ekããl itok?

 JEJ lukkuun kaorõk kallim̦ur eo an Jeova kõn an naaj jol̦o̦k jukjukun pãd in enana im kõm̦m̦an bwe juon lal̦ ekããl me eobrak kõn wãnõk en bõk jikin. (2 Pit. 3:13) Meñe jejjab jel̦ã ñããt eo lal̦ in ekããl enaaj itok, ak wãween ko jej loi ilo lal̦ in kiiõ rej kwal̦o̦k bwe eban to ad aikuj kõttar an itok.​—Matu 24:32-34, 36; Jrb. 1:7.

² Innem jekdo̦o̦n ewi toon ad pãd ilo m̦ool eo, kõj aolep jej aikuj kõkajoore tõmak eo ad ilo kallim̦ur in. Etke? Kõnke juon eo me ekajoor tõmak eo an emaroñ oktak im m̦õjn̦o̦l̦o̦k tõmak eo an. Ilo m̦ool, rijjilõk Paul ear ba bwe juon tõmak me edik ej “jerawiwi eo [epidodo an, NW] kapañ kõj.” (Hib. 12:1) Innem ñan kõjparok bwe tõmak eo ad en jab m̦õjn̦o̦l̦o̦k, jej aikuj keini ad etali kein kam̦ool ko me rej kaalikkar bwe m̦õttan jidik lal̦ eo ekããl enaaj pãd im wal̦o̦k.​—Hib. 11:1.

3. Ta ko jenaaj etali ilo katak in?

³ Ilo katak in, jenaaj kõnono kõn jilu wãween ko jemaroñ kõkajoore tõmak eo ad ilo kallim̦ur eo an Jeova kõn juon lal̦ ekããl, ikijjeen ad: (1) kõl̦mãnl̦o̦kjen̦ kõn katok in mour eo an Jesus, (2) l̦õmn̦ak kõn kajoor eo an Jeova, im (3) jol̦o̦k iien ñan kõm̦m̦ani men ko rej kõkajoore jem̦jerã eo ad ippãn Jeova. Innem jenaaj kõnono kõn wãween an naan ko an Jeova ñan Habakkuk kõkajoore tõmak eo ad ilo raan kein. Bõtab jen m̦okta etale jet iaan wãween ko jemaroñ iiooni kiiõ me ej menin aikuj ñan kwal̦o̦k bwe ekajoor tõmak eo ad ilo kallim̦ur eo kõn juon lal̦ ekããl.

 WÃWEEN KO JEJ IIOONI ME EJ MENIN AIKUJ ÑAN KWAL̦O̦K BWE EKAJOOR TÕMAK EO AD

4. Ta pepe ko jej kõm̦m̦ani me ej menin aikuj ñan kwal̦o̦k bwe ekajoor tõmak eo ad?

⁴ Kajjojo raan, jej kõm̦m̦ani pepe ko me ej menin aikuj ñan kwal̦o̦k bwe ekajoor tõmak eo ad. Ñan waanjoñak, jej kõm̦m̦ani pepe ko kõn ro jej kõm̦m̦ao ippãer, menin kam̦õn̦õn̦õ ko, jikuul̦, mourin m̦are, ajri ro, im ikijjeen jikin jerbal. Em̦m̦an ñe jej kajjitõk ippãd make: ‘Jokãlõt ko aõ rej ke kwal̦o̦k bwe ij lukkuun tõmak bwe eban to an pãd jukjukun pãd in im m̦õttan jidik lal̦ eo ekããl an Anij enaaj bõk jikin? Ak ij ke l̦oori jokãlõt ko an ro me rej tõmak bwe mej ej jem̦l̦o̦kin men otemjej?’ (Matu 6:19, 20; Luk 12:16-21) Jenaaj kõm̦m̦ani jokãlõt ko rem̦m̦antata ñe jej kõkajoore tõmak eo ad bwe m̦õttan jidik enaaj itok lal̦ eo ekããl.

5-6. Etke ej aikuj kajoor tõmak eo ad ñe jej iioon wãween ko reppen? Kwal̦o̦k juon waanjoñak.

⁵ Jej bareinwõt iioon apañ ko me ej menin aikuj ñan kwal̦o̦k bwe ekajoor tõmak eo ad. Jemaroñ jelm̦ae an ro jet jum̦ae im kaeñtaan kõj, nañinmej ko rel̦l̦ap, ak men ko jet me remaroñ kõm̦m̦an bwe jen ebbweer. Ilo jinoin, bõlen jaar l̦õmn̦ak bwe jemaroñ kijenmej ium̦win apañ eo jej jelm̦aiki. Bõtab ekkã an apañ rot kein aetok kũtieer, kõn men in ej aikuj kajoor tõmak eo ad bwe jen maroñ kijenmej wõt im wõnm̦aanl̦o̦k ilo ad karejar ñan Jeova ilo lañlõñ.​—Rom 12:12; 1 Pit. 1:6, 7.

⁶ Ñe jej iioon juon wãween epen, jemaroñ l̦õmn̦ak bwe lal̦ eo ekããl an Jeova eban itok. Men in ej ke mel̦el̦ein bwe em̦õjn̦o̦ tõmak eo ad? Jet iien, ejjab. L̦õmn̦ak kõn juon waanjoñak. Ñe eto an wõt ium̦win jejjo wiik, jemaroñ l̦õmn̦ak bwe eban bar det. Bõtab ãlikin jet iien, ewal̦o̦k al̦ im ebar jino det. Ejja ãindeinl̦o̦k wõt, ñe jelukkuun ebbweer, jemaroñ l̦õmn̦ak bwe lal̦ eo ekããl eban itok. Bõtab ñe ekajoor tõmak eo ad, jejel̦ã bwe enaaj jejjet kũtien kallim̦ur ko an Anij. (Sam 94:3, 14, 15, UBS; Hib. 6:17-19) Kõnke jej lukkuun tõmak men in, jemaroñ wõnm̦aanl̦o̦k wõt im likũt bwe ad kabuñ ñan Jeova en m̦oktata ilo mour ko ad.

7. Kain l̦õmn̦ak rot eo jej aikuj kõjparok kõj jãne?

⁷ Ej aikuj bar kajoor tõmak eo ad bwe jen maroñ kõm̦m̦ane jerbalin kwal̦o̦k naan eo ad. Elõñ iaan armej ro jej kwal̦o̦k naan ñan er rej l̦õmn̦ak bwe “ennaan eo em̦m̦an” kõn lal̦ eo ekããl an Anij me ej itok wõt, ej juon men me eban wal̦o̦k ñan jidik. (Matu 24:14; Ezk. 33:32) Jejjab kõn̦aan bwe jen pere men ko Jeova ej katakin ãinwõt armej rein. Ñan kõjparok jãn an men in wal̦o̦k, jej aikuj wõnm̦aanl̦o̦k wõt im kõkajoore tõmak eo ad. Jen etale jilu wãween ko jemaroñ kõm̦m̦ane men in.

KÕL̦MÃNL̦O̦KJEN̦ KÕN KATOK IN MOUR EO AN JESUS

8-9. Ñe jenaaj kõl̦mãnl̦o̦kjen̦ kõn katok in mour eo an Jesus, ewi wãween an men in kõkajoore tõmak eo ad?

⁸ Juon wãween jemaroñ kõkajoore tõmak eo ad ej ikijjeen ad kõl̦mãnl̦o̦kjen̦ kõn katok in mour eo an Jesus. Katok in mour eo an ej kam̦ool bwe kallim̦ur ko an Anij renaaj jejjet im m̦ool. Ñe jej lukkuun kõl̦mãnl̦o̦kjen̦ kõn etke kar letok katok in mour eo im men ko Jeova ear aikuj kõm̦m̦ani ñan katõprak men in, jej kõkajoore tõmak eo ad bwe enaaj jejjet kũtien kallim̦ur eo an Anij kõn mour indeeo ilo juon lal̦ em̦m̦anl̦o̦k. Etke jemaroñ ba men in?

⁹ Eokwe, ta ko Jeova ear aikuj kõm̦m̦ani? Jeova ear jilkintok m̦aanje eo Nejin ejitõnbõro ippãn me elukkuun epaake, jãn lañ bwe en maroñ l̦otak ijin ioon lal̦ ãinwõt juon armej eo eweeppãn. Ke Jesus ear pãd ijin ioon lal̦, ear  aikuj kijenmej ium̦win elõñ kain apañ ko. Innem, kar kaeñtaane im m̦ane ñan mej. Alikkar bwe Jeova ear kõl̦l̦ãiki juon on̦ããn el̦ap! Anij eo ad me el̦ap yokwe ippãn eban kar kõtl̦o̦k bwe eo Nejin en eñtaan im mej bwe jen bõk juon mour em̦m̦anl̦o̦k bõtab elukkuun kadu. (Jon 3:16; 1 Pit. 1:18, 19) Kõnke ear kõl̦l̦ãiki juon on̦ããn el̦ap, Jeova enaaj lale bwe ad mour indeeo ilo lal̦ eo ekããl en jejjet im wal̦o̦k.

L̦ÕMN̦AK KÕN KAJOOR EO AN JEOVA

10. Ekkar ñan Epesõs 3:20, ta eo ewõr an Jeova maroñ ñan kõm̦m̦ane?

¹⁰ Wãween eo kein karuo jemaroñ kõkajoore tõmak eo ad ej ikijjeen ad l̦õmn̦ak kõn kajoor eo an Jeova. Ewõr an Jeova maroñ ñan kajejjete aolep men ko ej kallim̦ur bwe enaaj kõm̦m̦ani. Em̦ool bwe ñan kõj armej, kallim̦ur eo kõn ad bõk mour indeeo ilo juon lal̦ ekããl emaroñ ãinwõt ñe epen an naaj tõprak. Ijoke, ekkã an Jeova kallim̦uri men ko me armej reban maroñ katõpraki. Im emaroñ kõm̦m̦ane men in kõnke ej Anij Ekajoor Bõtata. (Job 42:2, UBS; Mark 10:27) Kõn men in, jejjab bwilõñ ñe ej kallim̦ur ñan kõj bwe enaaj kõm̦m̦ani men ko rekabwilõñlõñ!—Riit Epesõs 3:20.

11. Kwal̦o̦k juon waanjoñak kõn juon iaan kallim̦ur ko an Anij me rekabwilõñlõñ. (Lale bo̦o̦k eo etan “ Jet Iaan Kallim̦ur ko Rekabwilõñlõñ me Em̦õj an Jejjet Kũtieer.”)

¹¹ L̦õmn̦ak kõn jet iaan kallim̦ur ko an Jeova ñan armej ro an ilo iien ko etto me remaroñ kar ãinwõt ñe reban tõprak ñan jidik. Ear kaalikkar ñan Ebream im Sera bwe enaaj wõr juon nejierro l̦addik meñe rar rũtto. (Jen. 17:15-17) Ear bareinwõt ba ñan Ebream bwe naaj lel̦o̦k ãneen Kenan ñan ro ineen. Ke ro ineen Ebream, ri-Israel ro, rar kõm̦akoko ilo Ijipt ium̦win elõñ iiõ ko, emaroñ kar ãinwõt ñe kallim̦ur in an Anij eban wal̦o̦k ñan jidik. Bõtab eñin men eo ear wal̦o̦k. Tokãlik, Jeova ear ba bwe lel̦l̦ap eo etan Elisabet enaaj keotak juon ajri. Ear bareinwõt ba ñan Meri, eo me ear juon bõjin, bwe enaaj keotak eo Nejin Anij. Men in enaaj kar kajejjete kallim̦ur eo Anij ear kõm̦m̦ane elõñ to̦ujin iiõ ko m̦oktal̦o̦k ilo kallibin Iden!—Jen. 3:15.

12. Ta ko Joshua 23:14 im Aiseia 55:10, 11 rej kaalikkar ñan kõj kõn kajoor eo an Jeova?

¹² Jej kõkajoore tõmak eo ad ilo kajoor eo an Jeova ñan bõktok lal̦ eo ekããl ikijjeen ad kõl̦mãnl̦o̦kjen̦ kõn iien ko ear kõm̦m̦ani kallim̦ur ko im an kar kajejjeti kallim̦ur kein. (Riit Joshua 23:14; Aiseia 55:10, 11.) Men in enaaj jipañ kõj bwe jen pojakin jipañ ro jet ñan kile bwe kallim̦ur eo an Anij kõn juon lal̦ ekããl ejjab juon ino̦ñ ak ettõn̦ak bajjek. Ikijjeen an naaj wõr juon lañ ekããl im juon lal̦ ekããl, Jeova make ear ba: “Naan kein rem̦ool im armej remaroñ lõki.”—Rev. 21:1, 5.

KÕM̦M̦ANI MEN KO REJ KÕKAJOORE JEM̦JERÃ EO AM̦ IPPÃN JEOVA

13. Ewi wãween an kweilo̦k ko an eklejia kõkajoore tõmak eo ad? Jouj im kõmel̦el̦e.

¹³ Wãween eo kein kajilu jemaroñ kõkajoore tõmak eo ad ej ikijjeen ad jol̦o̦k iien ñan kõm̦m̦ani men ko rej kõkajoore jem̦jerã eo ad ippãn Jeova. Ñan waanjoñak, l̦õmn̦ak kõn wãween ad bõk tokjãn jãn kweilo̦k ko an eklejia. Anna, eo me ear jol̦o̦k elõñ iiõ ilo elõñ kain jerbalin full-time, ej ba: “Kweilo̦k ko rej jipañ bwe en kõkajoor wõt tõmak e aõ. Meñe ri-kõnono eo ejjab l̦ap imminene ippãn ãinwõt juon ri-katakin ak ejjab katakin juon men ekããl, ak ekkã aõ roñ juon men me ej jipañ kal̦apl̦o̦k aõ jel̦ã kõn Baibõl̦ eo, im men in ej kõkajoore tõmak e aõ.” b Ejjel̦o̦k pere bwe ej bar kajoorl̦o̦k tõmak eo ad ñe jej roñjake uwaak  ko an ro jeid im jatid ilo iien kweilo̦k ko.​—Rom 1:11, 12; 10:17.

14. Ewi wãween an jerbalin kwal̦o̦k naan kõkajoore tõmak eo ad?

¹⁴ Jej bareinwõt kõkajoore tõmak eo ad ñe jej bõk kun̦aad ilo jerbalin kwal̦o̦k naan. (Hib. 10:23) Barbara, eo me elõñl̦o̦k jãn 70 iiõ ko in an karejar ñan Jeova, ej ba: “Jãn jinoin in aõ l̦õmn̦ak bwe jerbalin kwal̦o̦k naan el̦ap an kõkajoore tõmak e aõ. El̦ak l̦apl̦o̦k aõ kõnono kõn kallim̦ur ko an Jeova ñan ro jet, el̦apl̦o̦k an kajoor tõmak e aõ.”

15. Ñe jej katak ippãd make, ewi wãween an men in kõkajoore tõmak eo ad? (Bar lale pija ko.)

¹⁵ Ewõr bar juon men ej kõkajoore tõmak eo ad: ad katak ippãd make. Susan ej kile bwe el̦ap an jipañ ñe ej kõm̦m̦an an laajrak ak jikejuul̦ ñan katak. Ej ba: “Ilo raanin Jabõt, ij kõpooje Naan in Keeañ eo aõ ñan wiik eo tok juon. Ilo raanin M̦ande im Juje, ij kõppojakl̦o̦k im̦aan ñan kweilo̦k eo lukwõl̦pãn wiik. Im ilo raan ko jet, ij katak kõn jabdewõt men ij make kããlõt ñan katak kake.” Kõnke Susan ej aolep iien l̦oore jikejuul̦ in an ñan katak, ej wõnm̦aanl̦o̦k wõt im kõkajoore tõmak eo an. Irene, eo me elõñ iiõ in an jerbal ilo ra eo el̦ap, ear lo bwe el̦ap an kõkajoore tõmak eo an ñe ej katak kõn kanaan ko ilo Baibõl̦. Ej ba: “El̦ap an kabwilõñlõñ ñe ij lo bwe aolep kallim̦ur ko an Jeova, ekoba mel̦el̦e ko reddik ie, rar m̦ool im jejjet kũtieer.” c

“ILO M̦OOL ENAAJ ITOK”

16. Etke jemaroñ bõk tokjãn jãn naanin kaenõm̦m̦an ko an Jeova ñan Habakkuk? (Hibru 10:36, 37)

¹⁶ Jet iaan ri-karejar ro an Jeova elukkuun to aer kõttare an itok jem̦l̦o̦kin jukjukun pãd in. Ñan jet armej, remaroñ l̦õmn̦ak bwe elukkuun to an itok jem̦l̦o̦kin. Bõtab Jeova ejel̦ã wãween an ri-karejar ro an eñjake. Ilo m̦ool, ear kaenõm̦m̦an im kaalikkar ñan ri-kanaan Habakkuk im ba: “Pijen eo ej ñan juon iien  em̦õj kããlõte. Ej m̦õkajl̦o̦k ñan kõttõpar eo an, im eban buñ. Meñe emaroñ rum̦wij, kwõn kõttare; bwe ilo m̦ool enaaj itok im ban aepedped.” (Hab. 2:3) Anij ear ke ba naanin kaenõm̦m̦an kein ñan Habakkuk wõt? Ak jemaroñ ke bar bõk tokjãn jãn naan kein An ilo raan kein? Jeova ear kõm̦akũt rijjilõk Paul ñan kõnono kõn ejja naan kein wõt ñan Kũrjin ro, ro rej kõttare lal̦ eo ekããl. (Riit Hibru 10:36, 37.) Aet, jemaroñ lõke bwe meñe jemaroñ l̦õmn̦ak bwe eto an jejjet kũtien kallim̦ur eo an Jeova ñan lo̦mo̦o̦r kõj, ak “enaaj itok im ban aepedped”!

17. Ewi wãween an juon jeid im jatid lel̦l̦ap jerbale naanin kakapilõk eo Jeova ear lel̦o̦k ñan Habakkuk?

¹⁷ Elõñ iaan ri-karejar ro an Jeova rej jerbale naanin kakapilõk eo an Jeova ñan wõnm̦aanl̦o̦k wõt im “kõttar,” meñe rej aikuj kõttar ium̦win elõñ iiõ. Ñan waanjoñak, Louise ear jino karejar ñan Jeova ilo 1939 eo. Ej ba: “Ilo kar tõre in, iar l̦õmn̦ak bwe Armagedon enaaj itok m̦okta jãn aõ kadiwõjl̦o̦k jãn high school. Bõtab men in ekar jab wal̦o̦k. Ilo iiõ ko m̦aantak, iar kile bwe ej juon menin jipañ ñan riiti bwebwenato ko ilo Baibõl̦ kõn ro me rar kõttar an Jeova kajejjet kallim̦ur ko an ãinwõt Noa, Ebream, Josep, im ro jet. Rein rar aikuj kõttar ium̦win juon iien aetok m̦okta jãn aer bõk jeraam̦m̦an eo Jeova ear kallim̦ur er kake. Ej juon menin jipañ ñan ña im ro jet ñan wõnm̦aanl̦o̦k wõt im kõttar an jejjet kallim̦ur ko an Jeova. Men in ej jipañ kõm ñan lukkuun tõmak bwe elukkuun epaaktok lal̦ eo ekããl.” Elõñ iaan ro jet me eto aer karejar ñan Jeova rej bar errã!

18. Ñe jej etali menin kõm̦anm̦an ko, ewi wãween an men in kõkajoore tõmak eo ad kõn lal̦ eo ekããl me ej itok wõt?

¹⁸ Em̦ool bwe lal̦ eo ekããl ejjañin itok. Meñe ãindein, ak l̦õmn̦ak kõn jet iaan men ko jej loi kiiõ—iju ko, wõjke ko, menninmour ko, im armej ro. Ejjel̦o̦k en̦ emaroñ ba bwe men kein rejjab pãd, meñe ekar wõr juon tõre me rar jab pãd. Unin aer pãd kiiõ ej kõnke Jeova ear kõm̦anm̦ani men kein. (Jen. 1:1, 26, 27) Anij eo ad ear bar kallim̦ur bwe enaaj kõm̦m̦ane juon lal̦ ekããl. Im enaaj kajejjete kallim̦ur in. Ilo lal̦ eo ekããl, armej renaaj lukkuun ãjmour im m̦õn̦õn̦õ kõn mour ñan indeeo. Jemaroñ lõke bwe lal̦ eo ekããl enaaj itok ilo iien eo Anij ear kããlõte.​—Ais. 65:17; Rev. 21:3, 4.

19. Ewi wãween kwõmaroñ kõkajoore tõmak eo am̦?

¹⁹ Ilo tõre in, kortokjãn jabdewõt iien ko repel̦l̦o̦k ñan kõkajoore tõmak eo am̦. Kal̦apl̦o̦k am̦ kam̦m̦oolol kõn katok in mour eo an Jesus. L̦õmn̦ak kõn kajoor eo an Jeova. Im kõm̦m̦ani men ko rej kõkajoore jem̦jerã eo am̦ ippãn Jeova. Ilo am̦ kõm̦m̦ani men kein, kwõmaroñ uwaan ‘ro rej jolõte kallim̦ur ko itok wõt jãn aer tõmak im kijenmej.’—Hib. 6:11, 12; Rom 5:5.