Kwaar Jel̦ã Ke?
Etke ear wõr ruwamãejet ro ilo jarin tarin̦ae eo an Kiiñ Devid?
ILO kar jarin tarin̦ae eo an Devid, ear wõr rũttarin̦ae ro me rejjab ri-Israel, ãinwõt ri-Amon eo etan Zilek, ri-Het eo etan Uraia, im ri-Moab eo etan Itma. a (1 Kro. 11:39, 41, 46) Ear bareinwõt wõr ‘ri-Kiret ro, ri-Pilet ro, im ri-Gat ro’ ilo jarin tarin̦ae eo an. (2 Sa. 15:18) Ri-Kiret ro im ri-Pilet ro remaroñ kar uwaan ri-Pilistia ro. (Ezk. 25:16) Im ri-Gat ro rar itok jãn juon bukwõn ilo Pilistia etan Gat.—Jos. 13:2, 3; 1 Sa. 6:17, 18.
Etke Devid ear kõtl̦o̦k bwe ruwamãejet rein ren uwaan jarin tarin̦ae eo an? Kõnke ear lõke bwe em̦m̦aan renaaj kar tiljek ñan e, im el̦aptata, ñan Jeova. Ñan waanjoñak, ikijjeen ri-Kiret ro im ri-Pilet ro, juon bokin kõmel̦el̦e kõn Baibõl̦ (The New Interpreter’s Dictionary of the Bible) ej ba: “Ilo iien ko reppentata ke Devid ear juon kiiñ, em̦m̦aan rein rar jab jol̦o̦k aer tiljek ñan e.” Ewi wãween? Ke em̦m̦aan in “ri-Israel otemjej” rar ilo̦k jãn Kiiñ Devid bwe ren l̦oore “juon armej pata etan Shiba,” ri-Kiret ro im ri-Pilet ro rar tiljek wõt ñan Devid im jipañ kabõjrak an Shiba jum̦ae im kõm̦m̦an poktak. (2 Sa. 20:1, 2, 7) Ejjab men in wõt, ak juon iien, l̦eo nejin Kiiñ Devid etan Adonaija ear kajjioñ kõm̦m̦an bwe en kiiñ ijello̦kun Solomon. Ijoke, ri-Kiret ro im ri-Pilet ro rar tiljek wõt ñan Devid im jipañ kõm̦m̦an bwe Solomon en erom kiiñ kõnke e eo me Jeova ear kããlõte bwe en bõk jikin Devid.—1 Kñ. 1:24-27, 38, 39.
Bar juon ruwamãejet me ear lukkuun tiljek ñan Devid ej ri-Gat eo etan Ittai. Ittai im rũttarin̦ae ro an me 600 uwaaer rar rejetake Kiiñ Devid ke l̦eo nejin etan Absalom ear jum̦ae im kajjioñ kõm̦m̦an bwe em̦m̦aan ro ilo Israel ren jitõñe bwe en kiiñ ijello̦kun Devid. Ilo jinoin, Devid ear ba ñan Ittai bwe ejjab aikuj tarin̦ae kõnke ej juon ruwamãejet. Bõtab, Ittai ear ba: “Ãinwõt Jeova emour, im ãinwõt aõ irooj kiiñ kwõj mour, ilo jabdewõt jikin ijo aõ irooj kiiñ kwõnaaj pãd ie, kõn mej ak kõn mour, ijo ña karejeram̦ inaaj pãd ie.”—2 Sa. 15:6, 18-21.
Ittai ear tiljek ñan Devid, eo me Jeova ear kapiti bwe en kiiñ
Meñe ri-Kiret ro, ri-Pilet ro, im ri-Gat ro rar jãn aelõñ ko jet, ak rar kile bwe Jeova ej Anij eo em̦ool im bwe Devid ej eo Jeova ear kapiti. Ejjel̦o̦k pere bwe Devid ear lukkuun kam̦m̦oolol bwe em̦m̦aan rein retiljek rar pãd ippãn im rejetake!
a Ilo Duteronomi 23:3-6, kien eo an Anij ear kõmo̦ an ri-Amon ro im ri-Moab ro erom uwaan aelõñin Israel. Ijoke, kien in emaroñ kar kõnono kõn an ruwamãejet rein jab maroñ erom jitijen in Israel. Ear jab kõmo̦ aer kobal̦o̦k ak jokwe ibwiljin armej ro an Anij. Lale bok eo etan Insight on the Scriptures, Volume 1, p. 95.
