1. Ewi wãween kar karõke armej ro an Jeova ilo tõre ko an rijjilõk ro?

 JABDEWÕT iien Jeova ej lel̦o̦k juon jerbal ñan armej ro an, ej kõtmãne bwe ren kõm̦m̦ane jerbal in ilo juon wãween elaajrak im kon̦. (1 Kor. 14:33) Ñan waanjoñak, ej ankilaan Anij bwe ennaan eo em̦m̦an en ajeeded ipel̦aakin lal̦ in. (Matu 24:14) Jeova ear jitõñ Jesus bwe en loloodjake jerbal in. Jesus ej kõm̦m̦an bwe jerbal in en wõnm̦aanl̦o̦k ilo juon wãween elaajrak im kon̦. Ilo tõre ko an rijjilõk ro ilo Jerusalem, ear wõr juon kumi in em̦m̦aan ro rej lale eklejia im kumi in ear ejaakin rijjilõk ro im em̦m̦aan ro rerũtto. Kumi in ear kõm̦m̦ani pepe ko me aolep eklejia ko rar aikuj l̦oori. Ke ear jutak eklejia ko ilo elõñ jikin ko, em̦m̦aan ro rar lale eklejia kein rar kõnnaanek aolep ro jeier im jatier kõn pepe kein. (Jrb. 14:23; 15:2; 16:4) Tokjãn aer pokake naanin tõl kein, “ear penl̦o̦k wõt tõmak ko an ro ilo eklejia ko, im . . . ear lõñl̦o̦k wõt uwaaer.”—Jrb. 16:5.

2. Jãn iiõ eo 1919 tok ñan raan kein, ewi wãween an Jeova tõl armej ro an im letok m̦õñã ko ilo kõkkar?

² Jeova ej wõnm̦aanl̦o̦k wõt im kõm̦m̦an bwe en laajrak wãween an armej ro an jerbal rainin. Jãn iiõ eo 1919 tok ñan raan kein, Jesus ej kõjerbale juon kumi edik in em̦m̦aan ro em̦õj kapiti er ñan kõm̦m̦an bwe en laajrak im kon̦ jerbalin kwal̦o̦k naan eo im an itok m̦õñã ko ilo kõkkar ñan ri-kal̦oor ro an. a (Luk 12:42) Alikkar bwe Jeova ej kõjeraam̦m̦ane jerbal ko an kumi in.—Ais. 60:22; 65:​13, 14.

3-4. (1) Kwal̦o̦k juon waanjoñak kõn wãween ad bõk tokjãn jãn ad laajrak im kon̦. (2) Ta ko jenaaj etali ilo katak in?

 ³ El̦aññe ear jab laajrak im kon̦ wãween ad jerbal, jeban kar maroñ kajejjete jerbal eo Jesus ear letok ñan kõj. (Matu 28:​19, 20) Ñan waanjoñak, jen ba bwe kar jab letok teretore ko me eklejia ko ren jerbali, im aolep remaroñ kwal̦o̦k naan ilo jabdewõt jikin rekõn̦aan. Ñe en kar ãindein, jen kar oktak im jerbali jet teretore ko elõñ alen ak jejjab jerbali teretore ko jet. Kwõmaroñ ke l̦õmn̦ak kõn wãween ko jet jej bõk tokjãn jãn ad jerbal ilo juon wãween elaajrak im kon̦?

⁴ Men ko Jesus ear kõm̦m̦ani ke ear pãd ijin ioon lal̦ ej juon joñak kõn wãween an kõm̦m̦an bwe en laajrak wõt armej ro an Anij rainin. Ilo katak in, jenaaj etale joñak eo Jesus ear likũti im wãween an doulul in l̦oore joñak eo an. Jenaaj bareinwõt etale wãween ad maroñ kwal̦o̦k ad lõke im kam̦m̦oolol doulul in an Jeova.

DOULUL EO AD EJ ANÕKE JOÑAK EO AN JESUS

5. Ta juon iaan wãween ko jej l̦oore joñak eo an Jesus? (Jon 8:28)

⁵ Jesus ear katak jãn Jemãn ilañ kõn ta eo en kõm̦m̦ane im ta eo en ba. Doulul eo an Jeova ej anõke joñak eo an Jesus ikijjeen an kõm̦m̦an bwe naanin tõl ko im katak ko kõn ta eo em̦m̦an im ta eo ebõd ren pedped ioon Naanin Anij. (Riit Jon 8:28; 2 Tim. 3:​16, 17) Eokkutkut ad bõk naanin kakeememej ko ñan riit im jerbale Naanin Anij. Ewi wãween ad bõk tokjãn jãn ad l̦oore naanin tõl in?

6. Ta juon iaan wãween ko raorõk jej bõk tokjãn jãn ad katak Baibõl̦?

⁶ El̦ap ad bõk tokjãn ñe jej katak Baibõl̦ im bõk jipañ jãn bok ko an doulul in ad. Ñan waanjoñak, jemaroñ keidi katak ko ilo Baibõl̦ ippãn naanin tõl ko jej bũki jãn doulul in ad. Ñe jej loe bwe naanin tõl ko jej bũki rej pedped ioon Baibõl̦, el̦apl̦o̦k ad lõke doulul eo an Jeova.—Rom 12:2.

7. Ta ennaan eo Jesus ear kwal̦o̦k kake, im ewi wãween an doulul eo an Jeova l̦oore joñak eo an?

⁷ Jesus ear kwal̦o̦k naan kõn “ennaan eo em̦m̦an kõn Aelõñ eo an Anij.” (Luk 4:​43, 44) Jesus ear bareinwõt kakien ri-kal̦oor ro an bwe ren kwal̦o̦k naan kõn Aelõñ eo. (Luk 9:​1, 2; 10:​8, 9) Rainin aolep ro me rej pãd ilo doulul eo an Jeova rej kwal̦o̦k kõn ennaan eo kõn Aelõñ eo jekdo̦o̦n ia eo rej jokwe ie ak ewi joñan eddo ko ewõr ippãer.

8. Ta jeraam̦m̦an eo ewõr ippãd?

⁸ Jej watõk bwe ej juon jeraam̦m̦an ñan kwal̦o̦k ñan ro jet m̦ool eo kõn Aelõñ eo an Anij! Ejjab aolep remaroñ bõk jeraam̦m̦an in. Ñan waanjoñak, ke Jesus ear pãd ijin ioon lal̦, ear jab kõtl̦o̦k bwe jetõb ko rettoon ren kwal̦o̦k naan kõn e. (Luk 4:41) Ilo raan kein, m̦okta jãn an juon armej maroñ bõk kun̦aan ilo jerbalin kwal̦o̦k naan ippãn armej ro an Jeova, ej aikuj m̦okta mour ilo juon wãween ej kabuñbũruon Jeova. Jej kwal̦o̦k joñan ad kaorõk jeraam̦m̦an eo ñan kwal̦o̦k naan ikijjeen ad kõm̦m̦ane jerbal in ilo jabdewõt jikin im jabdewõt iien. Ãinwõt Jesus, mejãnkajjik eo ad ej ñan ekkat im utdikdik ineen m̦ool eo kõn Aelõñ eo ilo bũruon armej.—Matu 13:​3, 23; 1 Kor. 3:6.

9. Ewi wãween an doulul in kwal̦o̦k kõn etan Anij ñan ro jet?

⁹ Jesus ear kwal̦o̦k kõn etan Anij ñan ro jet. Ke Jesus ear jar ñan Jemãn ilañ, ear ba: “Iar kwal̦o̦k etam̦ ñan er.” (Jon 17:26) Doulul eo an Jeova ej l̦oore joñak eo an Jesus ikijjeen aer kate er joñan wõt aer maroñ ñan jipañ ro jet jel̦ã kõn etan Anij. El̦ap an ukokin Baibõl̦ eo etan New World Translation of the Holy Scriptures jipañ katõprake men in ikijjeen an kõjepl̦aaktok etan Anij ilo jikin ko ren kar pãd ie. M̦õttan ak likiio in ukokin Baibõl̦ in ej wal̦o̦k ilo elõñl̦o̦k jãn 270 kajin ko. Ilo bok eo etan  Kein Jipañ ñan Katak Naanin Anij ilo M̦õttan 1 im 2, kwõnaaj lo kõmel̦el̦e ko kõn unin kar kõjepl̦aaktok etan Anij ilo ukokin Baibõl̦ in. Ilo Appendix C me ej pãd ilo Study Bible eo, ej kwal̦o̦k elõñ kein kam̦ool ko bwe etan Anij ej aikuj wal̦o̦k 237 alen ilo Jeje ko jãn Kajin Grik.

10. Ta eo kwõj katak jãn naan ko an juon kõrã ilo Myanmar?

¹⁰ Ãinwõt Jesus, jekõn̦aan jipañ elõñ armej joñan wõt ad maroñ ñan jel̦ã etan Anij. Juon lel̦l̦ap me 67 an iiõ jãn Myanmar, ear katak kõn etan Anij im ear to̦o̦r dãnnin kõmjaal̦al̦ jãn mejãn. Ear ba: “Ej kab kein kajuon in aõ roñ bwe etan Anij ej Jeova. . . . Kwaar katakin eõ juon men elukkuun aorõk.” Ãinwõt an bwebwenato in kwal̦o̦k, ñe ro em̦ool bũrueer rej katak kõn etan Anij, men in emaroñ lukkuun ukot mour ko aer.

WÕNM̦AANL̦O̦K IM KWAL̦O̦K AM̦ LÕKE IM KAM̦M̦OOLOL KÕN DOULUL IN AD

11. Ewi wãween an em̦m̦aan ro rej lale eklejia maroñ kwal̦o̦k aer lõke im kam̦m̦oolol kõn doulul eo an Jeova? (Bar lale pija eo.)

¹¹ Ta juon wãween em̦m̦aan ro rej lale eklejia eo remaroñ kwal̦o̦k aer lõke im kam̦m̦oolol doulul eo an Anij? Ñe doulul eo ej lel̦o̦k naanin tõl ko ñan er, rej aikuj in lukkuun riiti innem jerbali joñan wõt aer maroñ. Ñan waanjoñak, rejjab baj bõk wõt naanin tõl ko kõn wãween aer kõm̦m̦ani katak ko aer, im wãween aer jar ilo eklejia eo, ak rej bareinwõt bõk naanin tõl ko kõn wãween aer maroñ lale im kea kõn jiip ro an Christ. Ñe em̦m̦aan ro rej lale eklejia rej l̦oore naanin tõl ko jãn doulul in, rej jipañ ro jeier im jatier ñan kile bwe Jeova ej yokwe im kea kake er.

12. (1) Etke jej aikuj m̦õn̦õn̦õ in rejetake im jerbal ippãn em̦m̦aan ro rej lale kõj? (Hibru 13:​7, 17) (2) Etke jej aikuj kalimjek im l̦õmn̦ak wõt kõn kadkad ko rem̦m̦an ippãn ro rej lale kõj?

¹² Ñe jej bõk naanin tõl ko jãn em̦m̦aan ro rej lale eklejia eo, jej aikuj m̦õn̦õn̦õ in l̦oori. Ilo ad kõm̦m̦ane men in, jenaaj kõm̦m̦an bwe en pidodol̦o̦k aer kõm̦m̦ane jerbal eo aer. Baibõl̦ eo ej rõjañ kõj ñan pokake im kõttãik kõj ñan ro rej lale kõj. (Riit Hibru 13:​7, 17.) Ak men in emaroñ pen jet iien. Etke? Eokwe, kõnke em̦m̦aan rein rejjab weeppãn. Ijoke, el̦aññe jej kalimjek wõt wãween ko rejjab em̦m̦an ippãer ijello̦kun ad kalimjek kadkad ko aer rem̦m̦an, eokwe enaaj ãinwõt ñe jej jipañ ri-kõjdat ro ad. Ilo wãween et? Ri-kõjdat ro ad rekõn̦aan kõm̦m̦an bwe jen pere bwe Anij ej kõjerbal doulul in ñan tõl kõj. Innem el̦aññe jej kalimjek im l̦õmn̦ak wõt kõn wãween ko rejjab em̦m̦an ippãn em̦m̦aan ro rej lale eklejia, jemaroñ bar jino bõk l̦õmn̦ak ko rejjab jim̦we im emaroñ dikl̦o̦k ad lõke doulul in. Ta ko jemaroñ kõm̦m̦ani ñan ad maroñ kile im jum̦ae riab ko an ri-kõjdat ro ad?

JAB KÕTL̦O̦K AN RO JET KÕM̦M̦AN BWE EN DIKL̦O̦K AM̦ LÕKE DOULUL IN

13. Ewi wãween an ri-kõjdat ro an Anij kajjioñ kõnanaik doulul eo an?

¹³ Ri-jum̦ae ro an Anij rej kajjioñ kõm̦m̦an bwe men ko rem̦m̦an kõn doulul eo an Jeova ren ãinwõt ñe renana. Ñan waanjoñak, jaar katak jãn Baibõl̦ eo bwe Jeova ej kõtmãne bwe ri-karejar ro an ren erreo ilo ãnbwin, ilo kõm̦m̦an ko aer, im ilo aer kabuñ ñan E. Jeova ej ba bwe jabdewõt eo ej wõnm̦aanl̦o̦k wõt im mour ilo juon wãween ettoon ak enana im ejjab kõn̦aan bõjrak, ejjab maroñ pãdwõt ilo eklejia eo. (1 Kor. 5:​11-13; 6:​9, 10) Jej pokake kien in jãn Baibõl̦. Bõtab kõnke jej pokake kien in, ri-jum̦ae ro rej ba bwe jejjab yokwe armej, jej ekajete er, im jej dike ro reoktak jãn kõj.

14. Wõn eo ej wũnjãn mel̦el̦e ko reriab kõn doulul eo ad?

¹⁴ Kile wũnjãn eo ej kõnanaik doulul eo ad. Setan Tepil̦ eo ej pãd ilikin mel̦el̦e ko reriab  kõn doulul eo ad. E eo ej “jemãn aolep ri-riab.” (Jon 8:44; Jen. 3:​1-5) Kõn men in, jemaroñ kõtmãne bwe Setan enaaj kõjerbal ri-kõjdat ro ad ñan kowõnm̦aanl̦o̦k mel̦el̦e ko reriab kõn doulul eo an Jeova. Eñin men eo ear wal̦o̦k ñan Jesus im Kũrjin ro jinoin.

15. Ta ko ri-tõlin kabuñ ko rar kõm̦m̦ani ñan Jesus im ri-kal̦oor ro an?

¹⁵ Ilo tõre ko an rijjilõk ro, Setan ear kõjerbal jet armej ñan kajeeded elõñ riab ko kõn Jesus, eo ej Nejin Anij, meñe ear weeppãn im ear kõm̦m̦ani elõñ menin kabwilõñlõñ ko rem̦m̦an. Ñan waanjoñak, ri-tõlin kabuñ ko rar ba ñan armej ro bwe kajoor eo Jesus ear kõjerbale ñan kadiwõjl̦o̦k jetõb ko rettoon ej itok jãn “ri-tõl eo an jetõb ko rettoon.” (Mark 3:22) Ke kar ekajete Jesus, ri-tõlin kabuñ ko rar n̦aruon im ba bwe ear kõnono n̦ae Anij im rar kareel armej ro ñan kajjitõk bwe ren m̦ane Jesus. (Matu 27:20) Tokãlik, ke ri-kal̦oor ro an Christ rar kwal̦o̦k naan kõn ennaan eo em̦m̦an, ro rar jum̦aik er rar “kareel armej ro” ñan kaeñtaan Kũrjin rein. (Jrb. 14:​2, 19) Ilo Brochure Eo Kin Katak Ko 1 ilo 1998 eo ear kõmel̦el̦e kõn Jerbal 14:2 im ba bwe ro me rar rejetake Setan rar kõjekdo̦o̦n ennaan eo Kũrjin ro rar kwal̦o̦k naan kake. Ejjab men in wõt, ak rar bar ba men ko relukkuun nana kõn Kũrjin ro bwe armej ro jet ren jab roñjake er im ren dike er.

16. Ta eo jej aikuj keememeje el̦aññe jej roñ mel̦el̦e ko reriab?

¹⁶ Ejjab bõjrak an Setan kwal̦o̦k riab ko ilo raan kein. Rainin ej wõnm̦aanl̦o̦k wõt im “m̦on̦e aolepen lal̦ in.” (Rev. 12:9) Kõn men in, el̦aññe kwõj roñ bwebwenato ko rejjab em̦m̦an kõn doulul in ad ak kõn em̦m̦aan ro rej lale kõj, keememej wãween an kar ri-kõjdat ro an Anij kõm̦m̦an ñan Jesus im ri-kal̦oor ro an ilo tõre ko an rijjilõk ro. Ilo raan kein, lal̦ in ej  jum̦ae im kaeñtaan armej ro an Jeova im kwal̦o̦k riab ko kõn er ãinwõt an kar Baibõl̦ eo kanaan kake. (Matu 5:​11, 12) El̦aññe jej kile wõn eo ej wũnjãn mel̦el̦e ko reriab im em̦m̦akũt ilo m̦õkaj ñan kõjparok kõj jãni, mel̦el̦e kein reban m̦on̦e im ko̦kkure kõj. Innem ta eo jej aikuj kõm̦m̦ane ñan kõjparok kõj make?

17. Ewi wãween jemaroñ kõjparok kõj make jãn mel̦el̦e ko reriab? (2 Timote 1:13) (Bar lale bo̦o̦k eo etan “ Wãween ñan Em̦m̦akũt Ñe Jej Roñ Mel̦el̦e ko Reriab.”)

¹⁷ Kõjekdo̦o̦n mel̦el̦e ko reriab. Rijjilõk Paul ear kaalikkar ta ko jej aikuj kõm̦m̦ani el̦aññe jej roñ mel̦el̦e ko reriab. Ear ba ñan Timote bwe en “jiroñ ro jet bwe ren . . . kõjparok er jãn bwebwenato ko reriab” im ñan “jab roñjake” bwebwenato kein. (1 Tim. 1:​3, 4; 4:7) L̦õmn̦ak kõn men in: juon niñniñ emaroñ likũt juon men ettoon jãn lal̦ ilo lo̦ñiin, bõtab juon eo rũtto eban kõm̦m̦ane men in kõnke emel̦el̦e bwe men in emaroñ ko̦kkure e. Ejja ãindeinl̦o̦k wõt, jej kõjekdo̦o̦n mel̦el̦e ko reriab kõnke jejel̦ã wõn eo ej wũnjãn mel̦el̦e kein. Ijoke, jej roñjake wõt “katak ko rejim̦we” kõn m̦ool eo.—Riit 2 Timote 1:13.

18. Ewi wãween jemaroñ kwal̦o̦k ad lõke im kam̦m̦oolol doulul eo an Jeova?

¹⁸ Em̦õj ad etale jilu wõt iaan wãween ko me doulul eo an Anij ej anõke joñak eo an Jesus. Ilo am̦ katak Baibõl̦, kajjioñ pukot wãween ko jet doulul in ej l̦oore joñak eo an Jesus. Jipañ ro jet ilo eklejia eo am̦ ñan kal̦apl̦o̦k aer lõke im kam̦m̦oolol doulul in ad. Im wõnm̦aanl̦o̦k wõt im kwal̦o̦k am̦ lõke im kam̦m̦oolol Jeova ikijjeen am̦ karejar ñan e ilo tiljek im pãd epaake wõt doulul eo an me Ej kõjerbale ñan kajejjet ankilaan. (Sam 37:28) Jen wõnm̦aanl̦o̦k wõt im kaorõk jeraam̦m̦an eo ewõr ippãd ñan ad uwaan armej ro an Jeova me retiljek im el̦ap yokwe ippãer.