1. Ewi wãween an yokwe eo an Anij jelõt eñjake eo am̦?

RIJJILÕK Jon ear je im ba, “Anij yokwe.” (1 Jon 4:8) Meñe eiiet naan kein, ak rej kakeememej kõj kõn juon men em̦ool elukkuun aorõk: Anij, eo ej Wũnjãn mour, ej bareinwõt Wũnjãn yokwe. Jeova ej yokwe kõj! Yokwe eo an ej kõm̦m̦an bwe jen eñjake ad jokwane, m̦õn̦õn̦õ, im an jubũruod.

2. Ekkar ñan Matu 22:37-40, ta kien ko ruo raorõktata, im etke emaroñ jab pidodo ñan ad pokake kien eo kein karuo?

² Ñan Kũrjin ro, ad kwal̦o̦k yokwe ejjab juon men me jemaroñ kããlõt ñan kwal̦o̦ke ak jaab. Ej juon kien. (Riit Matu 22:37-40.) Ñe jej jino jel̦ãl̦o̦k kajjien Jeova, jemaroñ kile an pidodo ad pokake kien eo kein kajuon. Unin ej kõnke Jeova eweeppãn; ej juon eo ejel̦ã l̦õmn̦ak kõn kõj im ejouj ilo an kõm̦m̦an ñan kõj. Bõtab, emaroñ jab pidodo ñan ad pokake kien eo kein karuo. Etke? Kõnke ro jeid im jatid​—ro ri-turid me repaaktata ñan kõj—​rejjab weeppãn. Jet iien, remaroñ ba im kõm̦m̦ani men ko me jel̦ak lale ejjab kwal̦o̦k aer kea im ejjab jouj. Jeova ear jel̦ã bwe jenaaj iioone wãween in epen, kõn men in ear kõm̦akũt jet iaan ri-jeje ro ilo Baibõl̦ ñan bar kobaik naanin kaiñi ko kõn etke im ewi wãween ad aikuj kwal̦o̦k yokwe ñan doon. Juon iaan ri-jeje rein ej Jon.​—1 Jon 3:11, 12.

3. Ta eo el̦ap an kar Jon kaalikkar kake?

³ Ilo naan ko Jon ear je, el̦ap an kar kaalikkar bwe Kũrjin ro rej aikuj kwal̦o̦k yokwe. Ilo m̦ool, ilo naan ko Jon ear je kõn mour eo an Jesus, elõñl̦o̦k alen an kar kõnono kõn yokwe jãn kobain aolep naan ko an ri-jeje Gospel ro jet jilu. Jon ear enañin jibukwi an iiõ ke ear je bokin Jon im lõta ko jilu. Naan ko  me kar kõm̦akũt Jon ñan je, rej kaalikkar bwe aolep men ko juon Kũrjin ej kõm̦m̦ani rej aikuj itok jãn yokwe. (1 Jon 4:10, 11) Ijoke, ear bõk iien ñan an Jon katak kõn men in.

4. Jon ear ke kwal̦o̦k yokwe aolep iien ñan ro jet?

⁴ Ke Jon ear juon likao, ejjab aolep iien ear kwal̦o̦k yokwe. Ñan waanjoñak, ilo kar juon iien, Jesus im ri-kal̦oor ro an rar pãd ilo Sameria ke rej jibadekl̦o̦k Jerusalem. Ilo juon bukwõn ilo Sameria, armej ro ie rar m̦akoko in kwal̦o̦k karwainene ñan er. Ta eo Jon ear kõm̦m̦ane? E im Jemes, l̦eo jein, rar kajjitõk ippãn Jesus ñe remaroñ kõm̦m̦an bwe en wõtlo̦k kijeek jãn lañ im ko̦kkure aolep armej ro ilo bukwõn in! (Luk 9:52-56) Ilo bar juon iien, Jon ear likjab in kwal̦o̦k yokwe ñan rijjilõk ro m̦õttan. Jon im Jemes, l̦eo jein, rar kajjitõk ippãn jineer bwe en kajjitõk ippãn Jesus ñan lel̦o̦k jikin ko reutiej iturin Jesus ilo Aelõñ eo. Ke rijjilõk ro jet rar roñ kõn men eo Jemes im Jon rar kõm̦m̦ane, rar lukkuun illu! (Matu 20:20, 21, 24) Ijoke, jekdo̦o̦n ñe elõñ bõd ko Jon ear kõm̦m̦ani, ak Jesus ear yokwe wõt e.​—Jon 21:7.

5. Ta ko jenaaj etali ilo katak in?

⁵ Ilo katak in, jenaaj etale joñak ko an Jon im jet iaan men ko ear je ikijjeen yokwe. Ilo ad naaj etali, jenaaj katak kõn ewi wãween ad maroñ kwal̦o̦k yokwe ñan ro jeid im jatid. Jenaaj bareinwõt katak kõn juon wãween eaorõk me bõran baam̦le eo emaroñ kõm̦m̦ane ñan kaalikkar bwe ej yokwe baam̦le eo an.

6. Ewi wãween an kar Jeova kaalikkar tok yokwe eo an ñan kõj?

⁶ Ekkã ad bõk l̦õmn̦ak eo bwe yokwe ej juon eñjake me ej alikkar ikijjeen naan ko rejouj. Bõtab bwe en alikkar bwe em̦ool juon yokwe , ej aikuj bareinwõt alikkar ilo kõm̦m̦an. (Keidi Jemes 2:17, 26.) Ñan waanjoñak, Jeova ej yokwe kõj. (1 Jon 4:19) Im ej kaalikkar tok yokwe eo an ilo naan ko me kar je ilo Baibõl̦. (Sam 25:10; Rom 8:38, 39) Meñe ãindein, ak jejel̦ã bwe Anij ej yokwe kõj, ejjab kõn wõt men ko ej ba ak bareinwõt kõn men ko ej kõm̦m̦ani. Jon ear je: “Yokwe eo an Anij ñan kõj ear alikkar ilo men in, eñin bwe Anij ear jilkintok Nejin eo ej make wõt ñan lal̦ in bwe jen maroñ bõk mour kõn e.” (1 Jon 4:9) Jeova ear kõtl̦o̦k bwe eo Nejin me ejitõnbõro ippãn en eñtaan im mej kõn kõj. (Jon 3:16) Ewõr ke men en̦ emaroñ kõm̦m̦an ad pere bwe Jeova ej lukkuun yokwe kõj?

7. Ta eo Jesus ear kõm̦m̦ane ñan kam̦ool yokwe eo an ñan kõj?

⁷ Jesus ear kaalikkar ñan ri-kal̦oor ro an bwe ej yokwe er. (Jon 13:1; 15:15) Ear kam̦ool joñan m̦wilal̦in yokwe eo an ñan er im ñan kõj,  ejjab kõn wõt ko men eo ear ba, ak ear bar alikkar ikijjeen men ko ear kõm̦m̦ani. Jesus ear ba, “Ejjel̦o̦k yokwe en̦ el̦apl̦o̦k jãn yokwe eo an juon eo ej lel̦o̦k mour eo an kõn ro jeran.” (Jon 15:13) Ñe jej kõl̦mãnl̦o̦kjen̦ kõn men eo Jeova im Jesus rar kõm̦m̦ane ñan kõj, en kar ewi wãween an men in jelõt kõj?

8. Ta eo 1 Jon 3:18 ej jiroñ kõj bwe jen kõm̦m̦ane?

⁸ Jej kam̦ool bwe jej yokwe Jeova im Jesus ilo ad pokake er. (Jon 14:15; 1 Jon 5:3) Jesus ear kakien kõj ñan yokwe doon. (Jon 13:34, 35) Jejjab aikuj kwal̦o̦k wõt ad yokwe ro jeid im jatid ikijjeen naan ko ad, ak jen bareinwõt kwal̦o̦k bwe jej yokwe er ikijjeen men ko jej kõm̦m̦ani. (Riit 1 Jon 3:18.) Ta ko jemaroñ kõm̦m̦ani ñan kam̦ool bwe jej yokwe er?

9. Yokwe ear kõm̦m̦akũt Jon ñan ta?

⁹ Jon emaroñ kar pãd im jerbal ippãn jemãn im kõm̦m̦an jããn ilo peejnej in eo̦ñõd eo an baam̦le eo aer. Bõtab, ijello̦kun an kar ãindein, ear lukkuun kate joñan wõt an maroñ ñan jipañ ro jet ñan katak kõn m̦ool eo kõn Jeova im Jesus toon wõt an mour. Mour eo Jon ear kããlõte, ear jab pidodo. Kar kaeñtaane im jum̦aiki, im ilo jem̦l̦o̦kinl̦o̦k tõre ko an rijjilõk ro, ke ear juon l̦al̦l̦ap, kar jilkinl̦o̦ke jãn aelõñ eo ear pãd ie ñan bar juon jikin. (Jrb. 3:1; 4:1-3; 5:18; Rev. 1:9) Meñe ear kalbuuj itok jãn an kar kwal̦o̦k naan kõn Jesus, ak Jon ear kam̦ool bwe ear l̦õmn̦ak kõn ro jet. Ñan waanjoñak, ke ear pãd ilo ãne eo etan Patmõs, ear je bokin Revelesõn im ear jilkinl̦o̦k ñan eklejia ko bwe ren jel̦ã kõn ta ko “epaak aer naaj wal̦o̦k.” (Rev. 1:1) Innem, emaroñ ãlikin iien eo kar karõl̦o̦ke jãn ãneen Patmõs, Jon ear je bokin Jon me ej kwal̦o̦k kõn mour eo an Jesus im jerbalin kwal̦o̦k naan eo an. Ear bareinwõt je jilu lõta ko bwe en maroñ kõketak im kõkajoore ro jein im jatin. Ewi wãween am̦ maroñ l̦oore joñak eo an Jon ilo an kar m̦õn̦õn̦õ in kaarmejjeteik e make?

10. Ewi wãween am̦ maroñ kam̦ool bwe kwõj yokwe armej ro?

¹⁰ Kwõmaroñ kam̦ool bwe kwõj yokwe armej ro ikijjeen men ko kwõj kããlõt in kõm̦m̦ani ilo mour eo am̦. Jukjukun pãd in an Setan ekõn̦aan bwe kwõn kõmaat aolep iien im maroñ ko am̦ ñan kwe make, ilo am̦ kajjioñ koorl̦o̦k jããn ak kõm̦m̦an bwe en buñbuñ etam̦. Ijoke, ri-kwal̦o̦k naan ro ipel̦aakin lal̦ in kõn Aelõñin Anij me rem̦õn̦õn̦õ in kaarmejjeteik er make, rej kõmaat iien ko aer joñan wõt aer maroñ ñan kwal̦o̦k naan kõn ennaan eo em̦m̦an im jipañ armej ro ñan ruwaakl̦o̦k ñan Jeova. Joñan, ewõr ro im ewõr aer maroñ ñan kwal̦o̦k naan im katakin full-time.

11. Ewi wãween an elõñ ri-kwal̦o̦k naan ro retiljek kam̦ool bwe rej yokwe Jeova im ro jeier im jatier?

¹¹ Elõñ Kũrjin ro retiljek rej aikuj in jerbal full-time ñan kabwe aikuj ko aer make ekoba baam̦le ko aer. Meñe ãindein, ak ri-kwal̦o̦k naan rein retiljek rej rejetake doulul eo an Anij ilo jabdewõt wãween remaroñe. Ñan waanjoñak, ewõr ro rar maroñ jipañ ilo jikin ko rar jorrããn jãn l̦añ ko rel̦l̦ap, ro jet rar maroñ bõk kun̦aaer ilo jerbalin ekkal, im ñan aolep, epel̦l̦o̦k ñan aer bõk kun̦aaer im jabawõt ñan rejetake jerbal eo an doulul in ipel̦aakin lal̦ in. Rej kõm̦m̦ani men kein kõnke rej yokwe Anij im ro ri-turier. Kajjojo wiik, jej kam̦ool bwe jej yokwe ro jeid im jatid ilo ad kobal̦o̦k ilo iien kweilo̦k ko an eklejia im bõk kun̦aad ie. Meñe jemaroñ m̦õk, ak jej pãd ilo iien kweilo̦k kein. Meñe jemaroñ ikkũm̦kũm̦, ak jej bõk kun̦aad im uwaak. Im meñe kõj aolep ewõr apañ ko jej iiooni, ak jej kõkajoor im kõketak ro jet, m̦okta jãn im ãlikin iien kweilo̦k. (Hib. 10:24, 25) El̦ap ad kam̦m̦oolol kõn jerbal  ko an ro jeid im jatid me rejitõnbõro ippãd!

12. Kar ta wãween eo juon Jon ear kam̦ool an yokwe ro jein im jatin?

¹² Jon ear kam̦ool an yokwe ro jein im jatin ilo an kar jab baj lel̦o̦k wõt naanin nõbar ko ñan er, ak ilo an kar bar lel̦o̦k naanin kauwe ko ñan er. Ñan waanjoñak, ilo lõta ko an, Jon ear nõbar ro jein im jatin kõn tõmak eo aer im jerbal ko aer rem̦m̦an, ejjab men in wõt ak ear bareinwõt lel̦o̦k naanin kauwe ko rekajju im remenin aikuj kõn jerawiwi. (1 Jon 1:8–2:1, 13, 14) Ejja ãindeinl̦o̦k wõt, jej aikuj in bar nõbar ro jeid im jatid kõn men ko rem̦m̦an rej kõm̦m̦ani. Bõtab el̦aññe juon ej jino kwal̦o̦k l̦õmn̦ak ko ak kõm̦m̦ani m̦anit ko rejjab jim̦we, jemaroñ kwal̦o̦k ad yokwe ilo ad kõnnaan ippãn im ba ñane ilo juon wãween ejouj, men ko ej aikuj in roñ. Jej aikuj in peran ñan ad maroñ lel̦o̦k naanin kauwe ko ñan juon m̦õttad, bõtab Baibõl̦ ej ba bwe ro em̦ool aer m̦õttãik doon, rej jeme, ak kajim̦weik doon.​—JK. 27:17.

13. Ta eo jej aikuj in kõjparok bwe jen jab kõm̦m̦ane?

¹³ Jet iien, jej kam̦ool ad yokwe ro jeid im jatid ikijjeen men ko jejjab kõm̦m̦ani. Ñan waanjoñak, jejjab m̦õkaj im illu kõn men ko rej ba. L̦õmn̦ak kõn ta eo ear wal̦o̦k ilo jem̦l̦o̦kinl̦o̦k mour eo an Jesus ioon lal̦ in. Ear ba ñan ri-kal̦oor ro an bwe, ñan aer maroñ bõk mour, rej aikuj in m̦õñã kanniõkin im idaak bõtõktõkin. (Jon 6:53-57) Naan kein an rar lukkuun kailbõk elõñ iaan ri-kal̦oor ro an, joñan elõñ iaaer rar ilo̦k jãne​—bõtab ro m̦õttan rem̦ool rar jab, ekoba Jon. Rar tiljek wõt im pãdwõt ippãn. Rar jab mel̦el̦e kõn ta eo Jesus ear ba, im remaroñ kar lukkuun ilbõk kõn naan kein an. Meñe ãindein, ak rein m̦õttan Jesus me retiljek rar jab m̦õkaj im l̦õmn̦ak bwe ebõd men ko ear ba, ak l̦õkatip kõn naan ko an. Ijoke, rar lõke wõt e kõnke rar jel̦ã bwe ej kwal̦o̦k kõn m̦ool eo. (Jon 6:60, 66-69) Joñan an lukkuun aorõk bwe jen jab m̦õkaj im l̦õkatip kõn men ko ro m̦õttad rej ba! Ijello̦kun ad ãindein, jen kõtl̦o̦k bwe ren kõmel̦el̦eik ta eo rej kajjioñ ba.​—JK. 18:13; Ekl. 7:9.

14. Etke jejjab aikuj in dike ro jeid im jatid?

¹⁴ Jon ej bar rõjañ kõj ñan jab dike ro jeid im jatid. El̦aññe jejjab pokake naanin kauwe in, jej kõm̦m̦an bwe en pidodo an Setan kajjioñ kapo kõj. (1 Jon 2:11; 3:15) Eñin men eo ear wal̦o̦k ñan jet ilo jem̦l̦o̦kinl̦o̦k tõre ko an rijjilõk ro. Setan ear lukkuun kate joñan wõt an maroñ ñan kajjioñ kõm̦m̦an bwe en wõr dike  doon im jepel ikõtaan armej ro an Anij. Ilo iien eo Jon ear je lõta ko an, em̦m̦aan ro me rar anõke kadkadin Setan rar del̦o̦ñel̦o̦k eklejia eo. Ñan waanjoñak, Diotrepis ear kõm̦m̦an bwe en l̦ap jepel ilo juon iaan eklejia ko. (3 Jon 9, 10) Ear jab kwal̦o̦k kautiej ñan em̦m̦aan ro me kumi eo ear lale aolep eklejia ko, ear jilkinl̦o̦k er ñan lol̦o̦k eklejia ko. Joñan, ear kajjioñ in jol̦o̦k jãn eklejia eo ro rar karwaineneik armej ro me edike er. Joñan an kar baj lukkuun utiej bũruon! Tok ñan kiiõ, Setan ej kate joñan wõt an maroñ ñan kõjepel armej ro an Anij. Jen jab kõtl̦o̦k bwe dike doon en kõjepel kõj.

15. Ta eo me juon bõran baam̦le ej aikuj keememej?

¹⁵ Juon wãween eaorõk juon bõran baam̦le ej kam̦ool an yokwe baam̦le eo an, ej ilo an kabwe aikuj ko aer. (1 Tim. 5:8) Bõtab ej aikuj in keememej bwe el̦apl̦o̦k an aorõk ñan jipañ baam̦le eo an bwe en wõr juon aer kõtaan em̦m̦an ippãn Jeova. (Matu 5:3) L̦õmn̦ak kõn joñak eo Jesus ear likũti ñan ro rej bõran baam̦le. Ekkar ñan bokin Jon, meñe Jesus ear pojakin tõn mej ioon al̦al̦ in eñtaan eo, ak ear l̦õmn̦ak wõt kõn baam̦le eo an. Jon ear jutak iturin jinen Jesus, Meri, ilo jikin eo rej kaeñtaane im m̦ane Jesus ie. Meñe Jesus ear lukkuun eñtaan im metak, ak ear kajjitõk ippãn Jon bwe en kab lale Meri. (Jon 19:26, 27) Ear wõr ro jatin Jesus me ejjel̦o̦k pere remaroñ kar kabwe aikuj ko an Meri, bõtab ilo kar tõre in, remaroñ jañin kar erom ri-kal̦ooran. Innem, Jesus ear kõn̦aan bwe en wõr en̦ ej lale Meri im kõkajoore bwe en wõnm̦aanl̦o̦k wõt im karejar ñan Jeova.

16. Ta kar eddo ko an Jon?

¹⁶ Elukkuun kar l̦ap eddo ko an Jon. Kõnke ear juon iaan rijjilõk ro, ear tõl ilo jerbalin kwal̦o̦k naan. Emaroñ kar bar juon eo me em̦õj an m̦are, innem ekar aikuj in kabwe aikuj ko an baam̦le eo an im bareinwõt jipañ er bwe en em̦m̦an kõtaan eo aer ippãn Anij. (1 Kor. 9:5) Ta eo me ro rej bõran baam̦le ilo raan kein remaroñ katak jãn men in?

17. Etke eaorõk bwe juon bõran baam̦le en jipañ baam̦le eo an ñan wõnm̦aanl̦o̦k wõt im karejar ñan Jeova?

¹⁷ Juon jeid im jatid em̦m̦aan me ej bõran juon baam̦le, emaroñ lõñ eddo ko ippãn. Ñan waanjoñak, ej aikuj in tiljek ilo jikin jerbal eo an bwe kõm̦m̦an ko an ren maroñ bõktok nõbar ñan Jeova. (Eps. 6:5, 6; Tai. 2:9, 10) Im emaroñ wõr an eddo ilo eklejia eo, ãinwõt  juon eo me ej jabõt im tõl ilo jerbalin kwal̦o̦k naan. Ilo ejja iien eo wõt, eaorõk bwe en bar niknik ilo an katak Baibõl̦ ippãn kõrã eo ippãn im ajri ro nejin. Renaaj lukkuun kam̦m̦oolole kõn aolep men ko ej kõm̦m̦ani bwe en em̦m̦an ãjmour eo aer im bwe ren m̦õn̦õn̦õ, ekoba an jipañ er ñan wõnm̦aanl̦o̦k wõt im karejar ñan Jeova.​—Eps. 5:28, 29; 6:4.

18. Ta eo Jon ear lukkuun tõmake?

¹⁸ Jon ear mour ium̦win elõñ iiõ, im elõñ men ko rekãitoktoklimo me ear iiooni ilo mour eo an. Ear jelm̦aik elõñ kain wãween ko reppen me remaroñ kar kam̦õjn̦o̦ik tõmak eo an. Bõtab aolep iien ear kate joñan wõt an maroñ ñan l̦oore kien ko an Jesus, ekoba kien eo ñan yokwe ro jein im jatin. Jãn an kar ãindein, Jon ear lukkuun tõmak bwe Jeova im Jesus rar lukkuun yokwe e im bwe renaaj lel̦o̦k kajoor ñane bwe en maroñ anjo̦ ioon jabdewõt apañ. (Jon 14:15-17; 15:10; 1 Jon 4:16) Ejjel̦o̦k jabdewõt men en̦ Setan ak jukjukun pãd in an emaroñ kar kõm̦m̦ane ñan kabõjrake Jon jãn an yokwe, im an kwal̦o̦ke kadkad in ilo naan im kõm̦m̦an ko an.

19. Ta eo 1 Jon 4:7 ej rõjañ kõj ñan kõm̦m̦ane, im etke?

¹⁹ Ãinwõt kar Jon, jej mour ilo juon lal̦ me Setan, eo ej anij in jukjukun pãd in im ekanooj in nana, ej kõjbwebweiki. (1 Jon 3:1, 10) Meñe ekõn̦aan bwe en bõjrak ad yokwe ro jeid im jatid, ak eban lo tõprak m̦ae iien jenaaj kõtl̦o̦ke. Innem, jen jek ippãd make ñan yokwe ro jeid im jatid, kaalikkar yokwe in ilo naan ko ad, im kam̦oole yokwe in ikijjeen kõm̦m̦an ko ad. Ilo ad ãindein, jenaaj lañlõñ kõnke jej m̦õttan baam̦le eo an Jeova, im jenaaj m̦õn̦õn̦õ kõn mour ko ad.​—Riit 1 Jon 4:7.