1-2. (1) Ñããt eo me el̦aptata an ekkã ad keememejtok juon eo ejitõnbõro ippãd me ear mej? (2) Ta eo Jesus ear kõm̦m̦ane ilo boñõn eo m̦okta jãn an kar mej?

JEKDO̦O̦N ewi toon kiiõ jãn ke juon eo ejitõnbõro ippãd ear jako ak mej, ak jej keememej wõt er. Ñe ej jejjet raan eo me rar mej ie, eitok wõt bwe jen keememejtok er im elõñ men ko kõn er.

² Kajjojo iiõ, jej uwaan elõñ milien ro jãn ipel̦aakin lal̦ in me rej koba ippãn doon ñe ej jejjet raanin mej eo an juon eo me el̦ap ad yokwe​—Jesus Christ. (1 Pit. 1:8) Jej koba ippãn doon ñan keememej eo me ear aje mour eo an ãinwõt juon menin katok ñan lo̦mo̦o̦ren kõj jãn jerawiwi im mej. (Matu 20:28) Ilo m̦ool, Jesus ear kõn̦aan bwe ri-kal̦oor ro an ren keememej mej eo an. Boñõn eo m̦okta jãn an kar mej, ear kõm̦m̦ane juon iien kõjota ejejuwaan im ear kakien im ba: “Kom̦win wõnm̦aanl̦o̦k wõt im kõm̦m̦ane men in ilo ememej eõ.” *​—Luk 22:19.

3. Ta ko jenaaj kõnono kaki ilo katak in?

³ Juon kumi edik jãn ibwiljin aolep ro rej kobal̦o̦k ilo iien Kwõjkwõjin mej eo an Christ, ewõr ippãer kõjatdikdik eo ñan mour ilañ. Bõtab elõñ milien ro jet me kõjatdikdik eo aer ej ñan mour ijin ioon lal̦ rej bar kobal̦o̦k ilo iien in. Ilo katak in, jenaaj lale un ko unin an kumi kein jim̦or kijooror ak kõn̦aan kobal̦o̦k ilo iien Kwõjkwõjin Keememej Eo kajjojo iiõ. Jenaaj bareinwõt lale wãween ad bõk tokjãn ilo ad kobal̦o̦k ilo iien in. Jen jinoe ilo ad lale jet iaan un ko unin an rũkkapit ro kobal̦o̦k ilo iien in.

4. Etke rũkkapit ro rej m̦õñã bũreet eo kab idaak wain eo ilo iien Kwõjkwõj eo?

⁴ Kajjojo iiõ, rũkkapit ro rej reim̦aanl̦o̦k ñan aer kobal̦o̦k ilo iien Kwõjkwõj eo ãinwõt ke rej m̦õttan ro im renaaj m̦õñã bũreet kab idaak wain. Etke ekkar bwe rein ren m̦õñã bũreet kab idaak wain eo? Ñan uwaake kajjitõk in, l̦õmn̦ak kõn ta eo ear wal̦o̦k ilo boñõn eo ãliktata in an kar Jesus mour ilo lal̦ in. Ãlikin kõjota in Kwõjkwõjin Kijoone Eo, Jesus ear kõm̦m̦ane ak ejaake juon iien me kar tokãlik n̦aetan Kõjota eo an Irooj. Ear lel̦o̦k bũreet im wain eo ñan rijjilõk ro an 11 me retiljek im ear jiroñ er ñan m̦õñã im idaak. Jesus ear kõnono ñan er kõn ruo bujen ko, ak kon̦ ko​—bujen eo ekããl kab bujen eo kõn Aelõñ eo. * (Luk 22:19, 20, 28-30) Bujen kein rar kõpel̦l̦o̦k ial̦an an rijjilõk ro kab ro jet me ewõr joñan oraer, maroñ erom kiiñ im bũrij ilo lañ. (Rev. 5:10; 14:1) Bween rũkkapit ro * me rej del̦o̦ñ ilo bujen kein ruo, rein wõt remaroñ m̦õñã bũreet eo kab idaak wain eo ilo iien Kwõjkwõj eo.

5. Ta eo rũkkapit ro rej kile kõn kõjatdikdik eo me em̦õj lel̦o̦k ñan er?

⁵ Eñin bar juon iaan un ko unin an rũkkapit ro kijooror ak kõn̦aan pãd ilo iien Kwõjkwõj eo: Iien in ej lel̦o̦k juon iien em̦m̦an ñan aer kõl̦mãnl̦o̦kjen̦ kõn kõjatdikdik eo aer. Em̦õj an Jeova lel̦o̦k juon aer kõjatdikdik ekanooj em̦m̦an—aer naaj m̦õn̦õn̦õ ilo aer bõk juon mour ilo lañ me ejjãmin wabanban im rejjãmin mej im aer naaj jerbal iturin eo em̦õj kaiboojoje, Jesus Christ, im ro jet uwaan 144,000. Im ilõñin men otemjej, aer naaj maroñ make loe Jeova! (1 Kor. 15:51-53; 1 Jon 3:2) Rũkkapit rein rej kile bwe em̦õj kũr er ñan aer m̦õn̦õn̦õ kõn jeraam̦m̦an kein ilo lañ. Bõtab, bwe ren maroñ del̦o̦ñel̦o̦k lañ, rej aikuj in dãpij wõt aer tiljek m̦ae iien eo rej mej. (2 Tim. 4:7, 8) Ej juon men el̦ap an kalañlõñ rũkkapit ro ñe rej kõl̦mãnl̦o̦kjen̦ kõn kõjatdikdik eo aer ñan mour ilañ. (Tai. 2:13) Ak ta kõn ‘jiip ro jet’? (Jon 10:16) Ta jet iaan un ko unin aer kobal̦o̦k ilo iien Kwõjkwõjin Keememej Eo?

6. Etke jiip ro jet rej kobal̦o̦k ilo iien Kwõjkwõj eo kajjojo iiõ?

⁶ Jiip ro jet rej kobal̦o̦k ilo iien Kwõjkwõj eo, bõtab rejjab m̦õñã bũreet im idaak wain, rej kobal̦o̦k ãinwõt ro im rej baj pãd im lale. Ilo 1938 eo, ej kab kein kajuon in aer kar kũr ro me kõjatdikdik eo aer ej ñan mour ilo lal̦ in bwe ren kobal̦o̦k ilo iien Kwõjkwõj eo. The Watchtower eo an March 1, 1938 ear kwal̦o̦k mel̦el̦e in: “Ej juon men enaaj lukkuun jim̦we im ekkar bwe [jiip ro jet] ren pãd ilo iien kweilo̦k rot in im lale ta ko rej wal̦o̦k. . . . Ej aikuj in im ej juon iien ñan aer aikuj bar lañlõñ.” Ãinwõt ro me rej kũrl̦o̦k er ñan lale juon iien kõm̦are, jiip ro jet rej bareinwõt m̦õn̦õn̦õ ilo aer kobal̦o̦k ãinwõt ro im rej pãd im lale ta ko rej wal̦o̦k ilo iien Kwõjkwõj eo.

7. Etke jiip ro jet rej reim̦aanl̦o̦k ñan katak eo ilo iien Kwõjkwõj eo?

⁷ Jiip ro jet rej bareinwõt kõl̦mãnl̦o̦kjen̦ kõn kõjatdikdik eo aer. Rej reim̦aanl̦o̦k ñan katak eo ilo iien Kwõjkwõj eo kõnke enañin aolepen katak eo, el̦ap an kwal̦o̦k kõn ta eo Christ kab ro uwaan 144,000 me renaaj irooj ippãn renaaj kõm̦m̦ane ñan armej ro retiljek ium̦win Juon To̦ujin Iiõ ko in aer Irooj. Ium̦win tõl eo an Kiiñ eo aer, Jesus Christ, ri-tõl rein ilo lañ renaaj jipañ kõm̦m̦an bwe lal̦ in en erom juon pedetaij im kõm̦m̦an bwe armej ro ren weeppãn. Ej juon men ekalañlõñ ilo an elõñ milien  ro im rej pãd im lale iien Kwõjkwõj eo maroñ pijaikl̦o̦k an jejjet kũtien kanaan ko ilo Baibõl̦, ãinwõt kanaan ko ilo Aiseia 35:5, 6; 65:21-23; im Revelesõn 21:3, 4. Ilo aer pijaikl̦o̦k er make kab ro rejitõnbõro ippãer ilo lal̦ eo ekããl, ej kõkajoorl̦o̦k kõjatdikdik eo aer kõn ilju im jekl̦aj im kõn̦aan eo aer ñan jab bõjrak jãn aer karejar ñan Jeova.​—Matu 24:13; Gal. 6:9.

8. Ta un eo juon unin an jiip ro jet kobal̦o̦k ilo iien Kwõjkwõj eo?

⁸ Bar l̦õmn̦ak kõn juon un unin an jiip ro jet kobal̦o̦k ilo iien Kwõjkwõj eo. Rekõn̦aan kwal̦o̦k aer yokwe im rejetake rũkkapit ro. Naanin Anij ear kanaan bwe enaaj wõr juon kõtaan epaak ikõtaan rũkkapit ro im ro me kõjatdikdik eo aer ej ñan mour ijin ioon lal̦. Ewi wãween? Jen kõnono kõn jet waanjoñak ko.

9. Ta eo kanaan eo ilo Zekaraia 8:23 ej kaalikkare kõn wãween an jiip ro jet eñjake kõn rũkkapit ro?

⁹ Riit Zekaraia 8:23. Kanaan in ej kwal̦o̦k kõn juon men ekõketak me jemaroñ pijaikl̦o̦k, kõn wãween an jiip ro jet eñjake kõn rũkkapit ro jeier im jatier. Naan kein “juon ri-Ju” im “ippam̦ [ak, “ippemi,” NW]” rej jitõñl̦o̦k ñan juon wõt kumi in armej​—bween rũkkapit ro. (Rom 2:28, 29) “Joñoul armej jãn aelõñ ko in kajin otemjej” ej jitõñl̦o̦k ñan jiip ro jet. Rein rej “jibwe” ak lukkuun dãpiji—​tiljek ilo aer eddãp ñan​—rũkkapit ro, ilo aer kobal̦o̦k ippãer ilo wãween kabuñ eo erreo. Innem ilo boñõn Kwõjkwõjin Keememej Eo, jiip ro jet rej kwal̦o̦k aer epaake rũkkapit ro ilo aer kobal̦o̦k ippãer.

10. Ta eo Jeova ear kõm̦m̦ane ñan kajejjet kũtien kanaan eo ilo Ezekiel 37:15-19, 24, 25?

¹⁰ Riit Ezekiel 37:15-19, 24, 25. Ñan kajejjet kũtien kanaan in, em̦õj an Jeova kakobaiktok rũkkapit ro im jiip ro jet bwe ren bõrokuk ippãn doon kõn juon kõtaan epen im ejjãmin rup. Kanaan in ej kõnono kõn ruo al̦al̦. Ro me kõjatdikdik eo aer ej ñan mour ilañ rej ãinwõt al̦al̦ eo “an Juda” (bwij eo me naaj kar kããlõt kiiñ ro an Israel jãne), im ro me kõjatdikdik eo aer ej ñan mour ilo lal̦ in, rej ãinwõt al̦al̦ eo “an Ipreim.” * Jeova enaaj kõm̦m̦an bwe kumi kein ruo ren bõrokuk ak juon wõt bwe ren oktak im “juon al̦al̦.” Mel̦el̦ein bwe rej jim̦or karejar ippãn doon ilo bõrokuk ium̦win tõl eo an Kiiñ eo aer, Christ Jesus. Kajjojo iiõ, rũkkapit ro im jiip ro jet rej kobal̦o̦k ilo Kwõjkwõjin Keememej Eo, rejjab kobal̦o̦k ãinwõt ruo kumi me rejenolo̦k jãn doon, ak rej kobal̦o̦k ãinwõt “juon wõt bwij” im “juon wõt aer jabõt.”​—Jon 10:16.

11. Ewi wãween an “jiip ko” me Matu 25:31-36, 40 ej kwal̦o̦k kake er, lukkuun kwal̦o̦k aer rejetake ro jatin Christ?

¹¹ Riit Matu 25:31-36, 40. “Jiip ko” ilo waanjoñak eo an Jesus rej jitõñl̦o̦k ñan ro rewãnõk ilo tõre ko ãliktata me kõjatdikdik eo aer ej ñan mour ilo lal̦ in​—mel̦el̦ein, jiip ro jet. Rein rej tiljek ilo aer rejetake bween rũkkapit ro jatin Jesus ilo aer jipañ er ñan kajejjet eddo eo aer ekanooj in l̦ap​—jerbalin kwal̦o̦k naan im kõm̦m̦an ri-kal̦oor.​—Matu 24:14; 28:19, 20.

12-13. Ta wãween ko jet me jiip ro jet rej kwal̦o̦k aer rejetake ro jatin Christ?

¹² Aolep iiõ ilo wiik ko m̦oktal̦o̦k jãn iien Kwõjkwõj eo, jiip ro jet rej kwal̦o̦k aer rejetake ro jatin Christ ilo aer lukkuun kate er ñan bõk kun̦aaer ilo campaign eo me ej wal̦o̦k ipel̦aakin lal̦ in ñan kũrtok ro rej itoklimo ñan iien Kwõjkwõj eo. (Lale bo̦o̦k eo etan “ Kwõj Ke Bũl̦ããnl̦o̦k Im̦aan ñan Allõñ ko an Iien Kwõjkwõj Eo?”) Rein rej bareinwõt kõm̦m̦an jabdewõt karõk ko remenin aikuj bwe iien Kwõjkwõj eo en wal̦o̦k ipel̦aakin lal̦ in, meñe enañin aolep eklejia ko ejjel̦o̦k ro me renaaj m̦õñã bũreet im idaak wain ie. Elukkuun l̦ap  an jiip ro jet m̦õn̦õn̦õ in rejetak ro jatin Christ ilo wãween kein. Jiip rein rejel̦ã bwe Jesus ej watõk men ko rej kõm̦m̦ani ñan rũkkapit rein jatin bwe ej ãinwõt ñe rej kõm̦m̦ani ñan e.​—Matu 25:37-40.

¹³ Jekdo̦o̦n ta kõjatdikdik eo ad, ak ta un ko jet me kõj aolep jej kobal̦o̦k ilo iien Kwõjkwõj eo?

14. Ewi wãween an kar Jeova im Jesus kwal̦o̦k yokwe eo el̦ap ñan kõj?

¹⁴El̦ap ad kam̦m̦oolol kõn yokwe eo Jeova im Jesus rar kwal̦o̦k ñan kõj. Elukkuun lõñ wãween ko Jeova ear kwal̦o̦k an yokwe kõj ie, bõtab ewõr juon wãween me ej make wõt l̦aptata jãn aolep wãween ko jet. Anij eo ad ear kwal̦o̦k wãween eo el̦aptata an kwal̦o̦k yokwe eo an me ejjel̦o̦k kũbbon̦ ie ilo an kar jilkintok eo Nejin me el̦ap an aorõk bwe en eñtaan im mej kõn kõj. (Jon 3:16) Jej bar kile bwe Jesus bareinwõt ear kwal̦o̦k el̦ap yokwe ilo an kar m̦õn̦õn̦õ in aje mour eo an kõn kõj. (Jon 15:13) Jejjab maroñ ukotl̦o̦k ak kõl̦l̦ãik Jeova im Jesus kõn yokwe eo erro kar kwal̦o̦ke ñan kõj. Bõtab jemaroñ kwal̦o̦k ad kam̦m̦oolol ikijjeen wãween ad mour kajjojo raan. (Kol. 3:15) Im jej kobal̦o̦k ilo iien Kwõjkwõjin Keememej Eo bwe jen maroñ keememej yokwe eo aerro ñan kõj, im bareinwõt bwe jen kwal̦o̦k ad yokwe er.

15. Etke rũkkapit ro im jiip ro jet jim̦or el̦ap aer kaorõk menin letok eo kõn katok in mour eo?

¹⁵Elukkuun l̦ap ad kaorõk menin letok eo kõn katok in mour eo. (Matu 20:28) Rũkkapit ro rej lukkuun kaorõk katok in mour eo, men eo im ej kõm̦m̦an bwe en wõr ippãer kõjatdikdik eo elukkuun em̦m̦an. Kõn aer likũt aer tõmak ilo katok in mour eo an Christ, Jeova em̦õj an kõwãnõk er im bõk er bwe ren ro nejin. (Rom 5:1; 8:15-17, 23) Jiip ro jet el̦ap aer bar kam̦m̦oolol kõn katok in mour eo. Ilo aer likũt aer tõmak ilo bõtõktõkin Christ me ear to̦o̦rl̦o̦k, rej erreo im̦aan mejãn Anij, im remaroñ kõm̦m̦ani jerbal ko rekkwõjarjar ñane im bõk kõjatdikdik eo ñan “el̦l̦ã jãn eñtaan eo el̦ap.” (Rev. 7:13-15) Juon wãween me rũkkapit ro im jiip ro jet jim̦or rej kwal̦o̦k aer kam̦m̦oolol kõn katok in mour eo ej ilo aer pãd ilo Kwõjkwõjin Keememej Eo kajjojo iiõ.

16. Bar ta un eo juon unin ad kobal̦o̦k ilo iien Kwõjkwõj eo?

¹⁶ Bar juon un unin ad kobal̦o̦k ilo iien Kwõjkwõj eo ej bwe jekõn̦aan pokake Jesus. Jekdo̦o̦n kõjatdikdik ta eo jej reim̦aanl̦o̦k ñane, ak kajjojo iaad jekõn̦aan pokake naanin jiroñ eo Jesus ear kwal̦o̦ke ilo boñõn eo ear kõm̦m̦ane ak ejaake iien Kwõjkwõjin Keememej Eo, ear ba: “Kom̦win wõnm̦aanl̦o̦k wõt im kõm̦m̦ane men in ilo ememej eõ.”​—1 Kor. 11:23, 24.

17. Ewi wãween an iien Kwõjkwõj eo jipañ kõj ñan epaakel̦o̦k Jeova?

¹⁷Jej epaakel̦o̦k Jeova. (Jem. 4:8) Ãinwõt ad kar katak, iien Kwõjkwõj eo ej kõpel̦l̦o̦k juon iien em̦m̦an ñan ad kõl̦mãnl̦o̦kjen̦ kõn kõjatdikdik eo Jeova ear letok ñan kõj im kõl̦mãnl̦o̦kjen̦ kõn yokwe eo el̦ap me ear kwal̦o̦ke ñan kõj. (Jrm. 29:11; 1 Jon 4:8-10) Ñe jej kõl̦mãnl̦o̦kjen̦ kõn kõjatdikdik eo ad em̦ool me enaaj wal̦o̦k ilo raan ko repãd im̦aan im yokwe eo em̦ool an Anij ñan kõj me ejjel̦o̦k kũbbon̦ ie, ej kam̦wilal̦l̦o̦k yokwe eo ad ñan Jeova im kõkajoorl̦o̦k kõtaan eo ad ippãn.​—Rom 8:38, 39.

18. Ad kõl̦mãnl̦o̦kjen̦ kõn joñak eo an Jesus ej kõm̦akũt kõj ñan ta?

¹⁸Ej kõm̦akũt kõj ñan anõke joñak eo an Jesus. (1 Pit. 2:21) Ilo raan ko me ej epaakl̦o̦k  iien Kwõjkwõj eo, jej lukkuun l̦õmn̦ak kõn eoon ko jãn Baibõl̦ kõn wiik eo ãliktata in an kar Jesus mour ilo lal̦ in, mej eo an, im an kar jerkakpeje. Im ilo joteenin iien Kwõjkwõj eo, katak eo ej kakeememej kõj kõn yokwe eo an Jesus ñan kõj. (Eps. 5:2; 1 Jon 3:16) Ilo ad riit kõn joñak eo an Jesus ilo an kar kaarmejjeteik e make im kõl̦mãnl̦o̦kjen̦ kake, jej bõk eñjake eo bwe jej aikuj “wõnm̦aanl̦o̦k wõt im etetal ilo ejja wãween eo wõt Jesus ear etetal.”​—1 Jon 2:6.

19. Ewi wãween bwe jen maroñ pãdwõt ilo yokwe eo an Anij?

¹⁹El̦apl̦o̦k wõt ad kõn̦aan jek ilo bũruod ñan pãdwõt ilo yokwe eo an Anij. (Jud 20, 21) Jej pãdwõt ilo yokwe eo an Anij ñe jej kate kõj kõn aolepen ad maroñ ñan pokake e, kaiboojoje ak kokkwõjarjar ãt eo etan, im kam̦õn̦õn̦õik bũruon. (JK. 27:11; Matu 6:9; 1 Jon 5:3) Ad pãd im lale iien Kwõjkwõj eo ej kõm̦akũt kõj bwe en l̦apl̦o̦k wõt ad kõn̦aan mour kajjojo raan ilo wãween eo me ãinwõt ñe jej bal̦o̦k ñan Jeova men in, ‘Ikõn̦aan pãdwõt ilo yokwe eo am̦ ñan indeeo!’

20. Ta un ko rem̦m̦an unin ad kobal̦o̦k ilo iien Kwõjkwõjin Keememej Eo?

²⁰ Meñe kõjatdikdik eo ad ej ñan mour indeeo ilañ ak ioon lal̦, ak ewõr un ko rem̦m̦an unin ad kobal̦o̦k ilo iien Kwõjkwõjin Keememej Eo. Kajjojo iiõ, ñe jej koba ippãn doon ilo raanin Kwõjkwõj eo, jej keememej mej eo an juon eo me jej yokwe, Jesus Christ. Ilõñin men otemjej, jej keememej wãween yokwe eo ej make wõt l̦aptata​—yokwe eo Jeova ear kwal̦o̦k ñan kõj ikijjeen an kar letok eo Nejin ãinwõt juon menin katok. Ilo iiõ in, naaj kõm̦m̦ane iien Kwõjkwõj eo ilo joteenin Bõl̦aide, Eprõl̦ 15, 2022. Jej yokwe Jeova im eo Nejin, innem ilo naaj jejjetin raanin mej eo an Jesus, ejjel̦o̦k bar juon men enaaj aorõkl̦o̦k ippãd jãn ad kobal̦o̦k im pãd ilo iien Kwõjkwõjin Keememej Eo.