1-2. (1) Ta eñjake ko jemaroñ bũki ñe jej kõl̦mãnl̦o̦kjen̦ kõn mour eo an Jesus im jerbal eo an? (2) Ta ko jenaaj kõnono kaki ilo katak in?

 ÑE EJ mej juon eo ejitõnbõro ippãd, jej lukkuun bũrom̦õje ak oñ kõn armej in! Ilo jinoin, jemaroñ eñjake wõt ad bũrom̦õj ak metak ñe jej l̦õmn̦aketok raan ko m̦oktal̦o̦k wõt jãn an kar mej, el̦aptata ñe armej in me ejitõnbõro ippãd ear eñtaan m̦okta jãn an mej. Ijoke, ãlikin an mootl̦o̦k jet iien, jej jino bar eñjake ad m̦õn̦õn̦õ ke jej l̦õmn̦aketok juon men me ear katakin kõj kake, ak juon men ear kõm̦m̦ane ak ba ñan kõketak kõj ak kõm̦m̦an ad ettõñdikdik.

² Ilo ejja wãween in l̦o̦k wõt, ñe jej riit kõn wãween an kar Jesus eñtaan im mej, men in ej kabũrom̦õj kõj. Im ilo allõñ ko me ejejjet iien Kwõjkwõj eo ie, iien ko kein el̦aptata ad lukkuun bõk iien im kõl̦mãnl̦o̦kjen̦ kõn aorõkin katok in mour eo an Jesus. (1 Kor. 11:24, 25) Ijoke, jej lo el̦ap lañlõñ ilo ad kõl̦mãnl̦o̦kjen̦ kõn aolep men ko Jesus ear ba im kõm̦m̦ani ke ear pãd ioon lal̦ in. Bareinwõt ej juon menin kõketak ñe jej l̦õmn̦ak kõn ta eo ej kõm̦m̦ane kiiõ im ta eo enaaj kõm̦m̦ane ñan kõj ilo raan ko rej pãd im̦aan. Ad kõl̦mãnl̦o̦kjen̦ kõn men kein im kõn yokwe eo an ñan kõj, emaroñ kõm̦akũt kõj ñan kwal̦o̦k ad kam̦m̦oolol ilo wãween ko raorõk ãinwõt ad nãj loe ilo katak in.

3. Ta un ko unin ad aikuj kwal̦o̦k ad lukkuun kam̦m̦oolol kõn katok in mour eo an Jesus?

³ El̦ap ad kam̦m̦oolol ñe jej kõl̦mãnl̦o̦kjen̦ kõn mour eo an Jesus im an kar mej. Ilo an kar Jesus kõm̦m̦ane jerbal eo an ijin ioon lal̦, ear katakin armej ro kõn jeraam̦m̦an ko me Aelõñ eo an Anij enaaj bũktok. El̦ap ad kam̦m̦oolol kõn mel̦el̦e kein me Baibõl̦ eo ej katakin kõj kaki kõn katok in mour eo im jeraam̦m̦an ko rej wal̦o̦k itok wõt jãne. El̦ap ad kam̦m̦oolol kõn katok in mour eo kõnke ej kõpel̦l̦o̦k ial̦an ad maroñ ejaak juon jem̦jerã epaak ippãn  Jeova im Jesus. Ro rej kwal̦o̦k aer tõmak ilo Jesus ebar wõr aer kõjatdikdik ñan mour indeeo im ñan bar lo ro rejitõnbõro ippãer me rar mej. (Jon 5:28, 29; Rom 6:23) Ejjel̦o̦k men en̦ jenañin kar kõm̦m̦ane bwe en tõllo̦kũn ad bõk jeraam̦m̦an kein; im jejjab maroñ ukotl̦o̦k joñan men in me Anij im Christ rar kõm̦m̦ane ñan kõj. (Rom 5:8, 20, 21) Bõtab jemaroñ kwal̦o̦k ad lukkuun kam̦m̦oolol er. Ewi wãween?

4. Ewi wãween an kar Meri Magdalini kwal̦o̦k an kam̦m̦oolol kõn men eo Jesus ear kõm̦m̦ane ñane? (Lale pija eo.)

⁴ L̦õmn̦ak kõn joñak eo an juon kõrã in ri-Ju etan Meri Magdalini. Ear lukkuun eñtaan kõnke jimjuon jetõb ettoon rar kaeñtaane. Emaroñ kar bõk eñjake eo bwe elukkuun ejjel̦o̦k wãween emaroñ bõk jipañ. Innem baj pijaikl̦o̦k m̦õk joñan an maroñ kar lukkuun kam̦m̦oolol ke Jesus ear kõm̦m̦an bwe en rõl̦o̦k jãn jetõb kein rettoon! Joñan, kam̦m̦oolol eo an ear kõm̦akũti ñan erom ri-kal̦ooran Jesus im kõjerbal iien ko an, maroñ ko an, im men ko m̦weien ñan rejetake Jesus im jerbalin kwal̦o̦k naan eo an. (Luk 8:1-3) Meñe Meri ear l̦ap an kam̦m̦oolol kõn men eo Jesus ear kõm̦m̦ane ñane, ak emaroñ kar jab jel̦ã bwe Jesus enaaj kar kõm̦m̦ani men ko rel̦l̦apl̦o̦k ñane ilo ilju im jekl̦aj. Jesus enaaj kar ajel̦o̦k mour eo an kõn aolep armej, “bwe jabdewõt eo ej kwal̦o̦k an tõmak ilo e” en maroñ m̦õn̦õn̦õ kõn mour eo ej ñan indeeo. (Jon 3:16) Meñe ãindein, ak Meri ear kwal̦o̦k an kam̦m̦oolol Jesus ikijjeen an kar tiljek wõt ñane. Ilo iien eo Jesus ear eñtaan ioon al̦al̦ in eñtaan eo, Meri ear jutak ilo juon jikin epaake, ñan kwal̦o̦k an kea kake im rejetake Jesus im ro jet. (Jon 19:25) Ãlikin an kar Jesus mej, Meri im bar ruo kõrã rekar bõktok kein tol̦aj ko ñan lõb eo libõn ñan iien aer kakon̦ ãnbwinnin. (Mark 16:1, 2) Kar kõjeraam̦m̦an Meri kõn an kar kwal̦o̦k an tiljek. Ear maroñ iioone Jesus ãlikin an kar jerkakpeje im ear kõnono ippãn—juon jeraam̦m̦an me ear wal̦o̦k ñan jejjo wõt iaan ri-kal̦oor ro an Jesus.​—Jon 20:11-18.

5. Ewi wãween jemaroñ kwal̦o̦k ad kam̦m̦oolol kõn aolep men ko me Jeova im Jesus rar kõm̦m̦ani ñan kõj?

⁵ Kõj bareinwõt jemaroñ kwal̦o̦k ad kam̦m̦oolol kõn aolep men ko Jeova im Jesus rar kõm̦m̦ani ñan kõj ikijjeen ad kõjerbal iien ko ad, maroñ  ko ad, im jããn ko ad ñan kowõnm̦aanl̦o̦k jerbal ko an Aelõñ eo. Ñan waanjoñak, jemaroñ jipañ ilo jerbalin ekkal kab jerbal ko jet ñan kõjparok im̦õn kabuñ ko ad ñan Jeova.

6. Etke jemaroñ ba bwe katok in mour eo ej juon menin letok ñan kajjojo iaad?

⁶ Ñe jej l̦õmn̦ak kõn joñan an Jeova im Jesus yokwe kõj, men in ej kõm̦akũt kõj ñan yokwe er. (1 Jon 4:10, 19) Im ej l̦apl̦o̦k wõt ad yokwe er ilo ad jel̦ã bwe Jesus ear mej kõn kajjojo iaad. Rijjilõk Paul ear kwal̦o̦k an kile men in im ear kwal̦o̦k an kam̦m̦oolol ke ear jeje ñan ro ilo Galetia im ba: “Nejin Anij . . . ear yokwe eõ im ajel̦o̦k mour eo an kõn ña.” (Gal. 2:20) Ikijjeen katok in mour eo, Jeova ear karuwaakl̦o̦k kwe ñan e bwe kwõn maroñ erom jeran. (Jon 6:44) Ejjab ke lujur bũruom̦ ilo am̦ jel̦ã bwe Jeova ear lo juon men em̦m̦an ippam̦ im bwe ear kõl̦l̦ãik juon joñan on̦ããn me ej make wõt l̦aptata bwe kwõn maroñ juon iaan ro jeran? Men in ejjab ke kõkajoorl̦o̦k yokwe eo am̦ ñan Jeova im Jesus? Elukkuun em̦m̦an ñe jenãj kajjitõk ippãd make kajjitõk in, ‘Ta eo yokwe in enaaj kõm̦akũt eõ ñan kõm̦m̦ane?’

7. Ãinwõt an wal̦o̦k ilo pija eo, ewi wãween kõj aolep jemaroñ kaalikkar yokwe eo ad ñan Jeova im Jesus? (2 Korint 5:14, 15; 6:1, 2)

⁷ Yokwe eo ad ñan Anij im Christ ej kõm̦akũt kõj ñan kwal̦o̦k yokwe ñan ro jet. (Riit 2 Korint 5:14, 15; 6:1, 2.) Juon wãween jej kwal̦o̦k ad yokwe ej ikijjeen ad kijejeto ilo ad kõm̦m̦ane jerbalin kwal̦o̦k naan eo. Jej kõnnaan ippãn aolep ro me jej iioone er. Jejjab kõjekdo̦o̦n ro jet im jab kõnono ñan er kõn wõt an oktak kil ko kilier ak ijoko rej itok jãni, bwij ko aer, meñe rem̦weiie ak jaab, im meñe rar bõk jel̦ãl̦o̦kjen̦ ko rel̦l̦ap ak jaab. Ilo ad kõnono ippãn aolep ro jej iioon er, jej kõm̦anm̦an ankilaan Jeova kõnke ej ankilaan bwe “jabdewõt armej en bõk lo̦mo̦o̦r im bwe ren bõk jel̦ãl̦o̦kjen̦ eo ejim̦we kõn m̦ool eo.”—1 Tim. 2:4.

8. Ewi wãween ad maroñ kaalikkar bwe jej yokwe rũttõmak ro jeid im jatid?

 ⁸ Jej bar kam̦ool yokwe eo ad ñan Anij im Christ ilo ad kwal̦o̦k ad yokwe rũttõmak ro jeid im jatid. (1 Jon 4:21) Jej kwal̦o̦k ad itoklimo kõn er im jej rejetak ak jipañ er ilo iien ko rej jelm̦ae mãlejjoñ ko. Jej kaenõm̦m̦an er ñe ej mej juon eo ejitõnbõro ippãer, lol̦o̦k er ñe rej nañinmej, im kate kõj joñan wõt ad maroñ ñan kõkajoor er ñe rej bũrom̦õj ak ebbweer. (2 Kor. 1:3-7; 1 Tes. 5:11, 14) Jej wõnm̦aanl̦o̦k im jar wõt kake er im keememej bwe “jar in akwel̦ap eo an juon eo ewãnõk ekanooj in kajoor im l̦ap tokjãn.”—Jem. 5:16.

9. Bar ta juon wãween me jemaroñ kõm̦m̦ane ñan kwal̦o̦k ad yokwe rũttõmak ro jeid im jatid?

⁹ Jej bareinwõt kwal̦o̦k ad yokwe rũttõmak ro jeid im jatid ilo ad kate kõj ñan pukot kilen bwe jen aenõm̦m̦an wõt ippãer. Jej kate kõj ñan anõke wãween an Jeova jeorl̦o̦k an ro jet bõd. El̦aññe Jeova ear m̦õn̦õn̦õ in kõtl̦o̦k bwe Nejin en mej kõn jerawiwi ko ad, ejjab ke l̦apl̦o̦k ad aikuj pojakin jeorl̦o̦k bõd ko an rũttõmak ro jeid im jatid ñe rej jerawiwi n̦ae kõj? Jeban kõn̦aan bwe jen ãinwõt ri-karejar eo enana me kar kwal̦o̦k kake ilo juon iaan waanjoñak ko an Jesus. Meñe ãlikin an kar irooj eo an jol̦o̦k aolepen m̦uri l̦apl̦ap eo an, ak ri-karejar in ear m̦akoko in jol̦o̦k an ri-karejar eo juon m̦õttan bõd kõn juon m̦uri me ejjab kanooj in l̦ap. (Matu 18:23-35) Ñe ewõr juon apañ ikõtaam̦ im bar juon ilo eklejia eo me elikjab amiro kar mel̦el̦e kake jãn doon, kwõmaroñ ke kõm̦m̦an bwe en kwe eo m̦oktata kwõj em̦m̦akũt ñan kõm̦m̦an aenõm̦m̦an m̦okta jãn am̦ naaj kobal̦o̦k ilo iien Kwõjkwõj eo? (Matu 5:23, 24) Ilo am̦ kõm̦m̦ane men in, enaaj kaalikkar joñan m̦wilal̦in yokwe eo am̦ ñan Jeova im Jesus.

10-11. Ewi wãween an em̦m̦aan ro rej lale eklejia maroñ kwal̦o̦k aer yokwe Jeova im Jesus? (1 Piter 5:1, 2)

¹⁰ Ewi wãween an em̦m̦aan ro rej lale eklejia maroñ kwal̦o̦k bwe rej yokwe Jeova im Jesus? Juon wãween me eaorõk ej ilo aer lale aikuj ko an jiip ko an Jesus. (Riit 1 Piter 5:1, 2.) Jesus ear lukkuun kaalikkare mel̦el̦e in ñan rijjilõk Piter. Ãlikin an kar Piter kaarmejjeteik Jesus jilu alen, Piter ear lukkuun kõn̦aan kaalikkar im kam̦ool bwe ej yokwe Jesus. Ãlikin an kar Jesus jerkakpeje, tokãlik ear kajjitõk ippãn Piter im ba: “Saimõn nejin Jon, kwõj ke yokwe eõ?” Jemaroñ tõmak bwe Piter enaaj kar pojakin kõm̦m̦ane jabdewõt men ñan kam̦ool yokwe eo an ñan Irooj eo an. Jesus ear ba ñan Piter: “Kwõn lale jiip ko nejũ reddik.” (Jon 21:15-17) Innem ilo aolepen mour eo an Piter jãn iien eo m̦aanl̦o̦k, Piter ear kwal̦o̦k an lukkuun yokwe im kõjparok jiip ko an Irooj eo an, im ilo an kar ãindein ear kam̦ool bwe ear yokwe Jesus.

¹¹ Kom̦ em̦m̦aan ro rej lale eklejia, ilo wiik ko m̦okta jãn ak ãlikin iien Kwõjkwõj eo, ewi wãween am̦ maroñ kam̦ool bwe naan ko an Jesus ñan Piter el̦ap aer aorõk ippam̦? Kwõmaroñ kaalikkar joñan am̦ yokwe Jeova im Jesus ikijjeen am̦ ekkeini am̦ bõk kun̦aam̦ ilo jerbal eo ñan lol̦o̦k im kõkajoor rũttõmak ro jeim̦ im jatũm̦, im ilo am̦ kal̦apl̦o̦k wõt am̦ jipañ ro eto aer jab kwal̦o̦k naan im pãd ilo kweilo̦k ko (ak ro rej inactive) ñan aer jepl̦aaktok ñan ippãn Jeova. (Ezk. 34:11, 12) Kwõmaroñ bar kwal̦o̦k am̦ itoklimo kõn rũkkatak ro im ro rekããltok ñan iien Kwõjkwõj eo, im kate eok joñan wõt am̦ maroñ ñan kõm̦m̦an bwe rein me remaroñ erom ri-kal̦ooran Jesus ren eñjake aer ruwainene.

12. Ilo ad kõl̦mãnl̦o̦kjen̦ kõn naan ko Jesus ear ba ilo boñõn eo m̦okta jãn an kar mej, etke men in ej kaperan kõj? (Jon 16:32, 33)

¹² Ilo boñõn eo m̦okta jãn an kar mej, Jesus ear jiroñl̦o̦k ri-kal̦oor ro an im ba: “Kom̦ naaj iioon eñtaan ilo lal̦ in, bõtab kom̦win peran! Em̦õj aõ anjo̦ ioon lal̦.” (Riit Jon 16:32, 33.)  Ta eo ear jipañ Jesus ñan jelm̦ae ri-kõjdat ro an kõn peran im dãpij wõt an tiljek ñan mej? Ear atartar ioon Jeova. Kõnke Jesus ear jel̦ã bwe ri-kal̦oor ro an renaaj kar jelm̦ae kain mãlejjoñ ko me reãinl̦o̦kwõt mãlejjoñ ko ear iiooni, ear kajjitõk bwe Jeova en lale er. (Jon 17:11) Etke men in ej kaperan kõj? Kõnke Jeova ekajoorl̦o̦k jãn jabdewõt iaan ri-kõjdat ro ad. (1 Jon 4:4) Ejjel̦o̦k men en̦ en̦ojak jãn an Jeova loe. Im jej lõke bwe el̦aññe jenaaj atartar wõt ioon Jeova, jemaroñ anjo̦ ioon jabdewõt men jej mijake im kwal̦o̦k ad peran.

13. Ewi wãween an kar em̦m̦aan in Arimatia eo etan Josep, kwal̦o̦k an peran?

¹³ L̦õmn̦ak kõn joñak eo an juon em̦m̦aan in Arimatia etan Josep. Ear l̦ap an ri-Ju ro kautiej em̦m̦aan in. Im ear juon iaan ro uwaan Im̦õn Ekajet eo El̦ap an ri-Ju ro. Ijoke, ilo kar tõre ko Jesus ear kõm̦m̦ane jerbal eo an ijin ioon lal̦, Josep ear juon eo ejjab peran. Jon ear ba bwe l̦ein “ear juon iaan ri-kal̦oor ro an Jesus, bõtab ilo ittino wõt, kõn an mijak ri-Ju ro.” (Jon 19:38) Meñe Josep ear itoklimo kõn ennaan eo kõn Aelõñ eo, ak ear n̦ooje jãn ro jet bwe ear wõr an tõmak ilo Jesus. Ejjel̦o̦k pere bwe emaroñ kar mijak ñe enaaj jako an armej ro kautieje ñe rejel̦ã bwe ej juon ri-kal̦ooran Jesus. Jekdo̦o̦n ta un eo unin an kar ãindein, ak Baibõl̦ eo ej kwal̦o̦k bwe ãlikin an kar Jesus mej, Josep ear kiiõ kwal̦o̦k an “peran im jãdel̦o̦k ñan ippãn Pail̦at im kajjitõk an bõk ãnbwinnin Jesus.” (Mark 15:42, 43) Ear kiiõ jako an Josep n̦ooje bwe ej rejetake Jesus.

14. Ta eo kwõj aikuj kõm̦m̦ane ñe epen am̦ jol̦o̦k am̦ mijak armej?

¹⁴ Kwõnañin ke kar bõk kain eñjake rot in an Josep im mijak armej? Ilo jikin jikuul̦ ak jikin jerbal, ewõr ke iien kwõj jook in kwal̦o̦k ke kwõj juon iaan Ri-Kõnnaan ro an Jeova? Kwõj ke jenliktak jãn am̦ erom juon ri-kwal̦o̦k naan ak peptaij kõn wõt am̦ inepata kõn wãween an ro jet maroñ l̦õmn̦ak kõn kwe? Kwõn jab kõtl̦o̦k bwe kain eñjake ak l̦õmn̦ak rot kein ren kabõjrak eok jãn am̦ kõm̦m̦ane ta eo me kwõjel̦ã ke ejim̦we. Kwõn lukkuun jar jãn bũruom̦ ñan Jeova. Kajjitõk ippãn bwe en kaperan eok ñan kõm̦anm̦an ankilaan. Ilo am̦ naaj lo wãween an Jeova uwaaki jar ko am̦, kwõnaaj kajoorl̦o̦k wõt im enaaj l̦apl̦o̦k am̦ peran.​—Ais. 41:10, 13.

15. Ãlikin an kar Jesus wal̦o̦kl̦o̦k ñan ri-kal̦oor ro an, ta eo me lañlõñ eo aer ear kõm̦akũt er ñan kõm̦m̦ane? (Luk 24:52, 53)

¹⁵ Ri-kal̦oor ro rar lukkuun bũrom̦õj ke Jesus ear mej. Baj pijaikl̦o̦k m̦õk ñe kwõn kar pãd ilo wãween in rar iioone. Ear jab baj jako wõt armej in jeraer me ejitõnbõro ippãer, ak rar bareinwõt bõk eñjake eo bwe ejako kõjatdikdik eo  aer. (Luk 24:17-21) Bõtab ke Jesus ear wal̦o̦kl̦o̦k ñan er, ear jol̦o̦k iien ñan jipañ er ñan mel̦el̦e kõn ijo kun̦aan ñan kajejjet kanaan ko ilo Baibõl̦. Im ear bareinwõt lel̦o̦k juon jerbal eaorõk ñan aer kõm̦m̦ane. (Luk 24:26, 27, 45-48) Im ilo tõre eo Jesus ear wanlõñl̦o̦k ñan lañ, 40 raan ko tokãlik, bũrom̦õj eo an ri-kal̦oor ro an ear oktak ñan lañlõñ el̦ap. Ilo aer kar jel̦ã bwe Irooj eo aer emour im bwe epojakin jipañ er ñan kadedeikl̦o̦k eddo eo ekããl me kar lel̦o̦k ñan er, men in ear kõm̦m̦an aer m̦õn̦õn̦õ. Lañlõñ eo aer ear kõm̦akũt er ñan kaiboojoj Jeova im jab bõjrak jãn aer kõm̦m̦ane men in.​—Riit Luk 24:52, 53; Jrb. 5:42.

16. Ewi wãween jemaroñ anõke joñak eo an ri-kal̦oor ro an Jesus?

¹⁶ Ewi wãween jemaroñ anõke joñak eo an ri-kal̦oor ro an Jesus? Jemaroñ lo lañlõñ ilo ad karejar ñan Jeova ejjab ilo allõñ ko wõt me ejejjet iien Kwõjkwõj eo, ak jemaroñ lo lañlõñ in ilowaan aolepen iiõ eo. Bwe en maroñ ãindein, jej aikuj likũt m̦oktata Aelõñ eo an Anij ilo mour ko ad. Ñan waanjoñak, elõñ rar kõm̦m̦an oktak ilo jikejuul̦in jerbal ko aer bwe ren maroñ bõk kun̦aaer ilo jerbalin kwal̦o̦k naan, pãd ilo kweilo̦k ko, im ekkeini aer pãd ak kõm̦m̦ane iien kabuñ an baam̦le ko aer. Jet rar pepe ñan jab bõk jet m̦weiuk ko me ro jet rej l̦õmn̦ak bwe ej menin aikuj, kõnke en maroñ l̦apl̦o̦k aer kõjerbal er ilo eklejia eo ak bwe ren maroñ jerbal ilo jikin ko el̦ap aer aikuj ri-kwal̦o̦k naan ro kõn Aelõñ eo ie. Meñe jej aikuj kijenmej bwe jen maroñ wõnm̦aanl̦o̦k wõt ilo ad karejar ñan Jeova, ak ej kallim̦ur bwe enaaj kanooj in kõjeraam̦m̦an kõj ñe jenaaj likũt m̦oktata kõn̦aan ko an Aelõñ eo ilo mour ko ad.​—JK. 10:22; Matu 6:32, 33.

17. Ta eo kwõj jek ilo bũruom̦ ñan kõm̦m̦ane ilo allõñ ko me enaaj jejjet iien Kwõjkwõj eo ie? (Lale pija eo.)

¹⁷ Jej reim̦aanl̦o̦k ñan ad naaj kõm̦m̦ane iien Kwõjkwõjin Keememej Eo ilo Juje, Eprõl̦ 4 raan. Ijoke, jab kõttar an jejjet iien in im kwõj kab kõl̦mãnl̦o̦kjen̦ kõn mour eo an Jesus im an kar mej, im kõn yokwe eo me e im Jeova rar kwal̦o̦k ñan kõj. Kwõn kortokjãn jabdewõt iien ko repel̦l̦o̦k ilo allõñ ko me enaaj jejjet iien Kwõjkwõj eo ie ñan am̦ kõm̦m̦ane men in. Ñan waanjoñak, kõjenolo̦k jet iien ko ñan am̦ naaj riiti im kõl̦mãnl̦o̦kjen̦ kõn iien ko me em̦õj kwal̦o̦k kaki ilo jaat eo etan “Wiik eo Ãliktata in an Kar Jijej Mour ilo Lal̦ In,” ilo bok jidikdik eo etan Kein Jipañ ñan Katak Naanin Anij ium̦win 16-A im 16-B. Ñe kwõnaaj kõm̦m̦ane men in, kwõn kappukot eoon ko jãn Baibõl̦ me renaaj kal̦apl̦o̦k am̦ kam̦m̦oolol, yokwe, peran, im lañlõñ. Innem kwõn kajjioñ l̦õmn̦ak kõn wãween ko me kwõmaroñ kwal̦o̦k am̦ lukkuun kam̦m̦oolol jãn bũruom̦. Kwõmaroñ lukkuun tõmak im lõke bwe el̦ap an Jesus kaorõk aolep men ko kwõj kõm̦m̦ani ñan am̦ keememej e ilo allõñ ko me enaaj jejjet iien Kwõjkwõj eo ie.​—Rev. 2:19.