1. Ta eo kwõj l̦õmn̦ak kake ñe kwõj l̦õmn̦ak kõn Jeova?

 EM̦ÕJ ke am̦ kajjioñ pijaikl̦o̦k ewi wãween paotokin Jeova? Ñe kwõj kõnono ñane ilo jar, ta eo kwõj l̦õmn̦ak kake? Meñe jejjab maroñ loe Jeova, ak elõñ wãween ko Baibõl̦ eo ej kwal̦o̦k kake E. Baibõl̦ ej n̦aetan Jeova “juon al̦ im likõpejñak” im “juon kijeek in ko̦kkure.” (Sam 84:11; Hib. 12:29) Ilo juon pijen, Ezekiel ear kõnono kõn Jeova ãinwõt juon dekã sapair, juon mããl emeram, im juon jemãluut ak iia. (Ezk. 1:​26-28) Jet iaan kõmel̦el̦e kein kõn Jeova remaroñ kabwilõñ kõj ak remaroñ kõm̦m̦an bwe jen l̦õmn̦ak bwe ejjab tõllo̦kid ñan karejar ñane.

2. Ta ko remaroñ bõbraik kõj jãn ad kepaake Jeova?

² Kõn ad jab maroñ loe Jeova, emaroñ pen ad tõmak bwe ej yokwe kõj. Ak jemaroñ l̦õmn̦ak bwe Jeova ejjab maroñ yokwe kõj ñan jidik kõn wõt wãween ko reppen jaar iiooni ilo mour ko ad. Bõlen eo jemãd ear jab yokwe kõj. Jeova emel̦el̦e kõn eñjake ko ad im wãween an eñjake kein jelõt kõj. Bwe en maroñ jipañ kõj, em̦õj an Jeova kwal̦o̦k ñan kõj kadkad ko an rekanooj em̦m̦an ilo Naan eo an.

3. Etke jej aikuj kal̦apl̦o̦k ad jel̦ã kõn yokwe eo an Jeova?

³ Naan eo el̦aptata an jejjet me ej kwal̦o̦k kõn Jeova ej yokwe. Baibõl̦ ej ba bwe “Anij yokwe.” (1 Jon 4:8) Aolep men ko ej kõm̦m̦ani ej kõm̦m̦ani kõn wõt yokwe. Joñan an l̦ap im kajoor yokwe eo an Anij, ej bar kwal̦o̦ke ñan ro rejjab yokwe E. (Matu  5:​44, 45) Ilo katak in, jenaaj kal̦apl̦o̦k ad jel̦ã kõn Jeova im yokwe eo an. El̦ak l̦apl̦o̦k ad jel̦ã kõn Anij eo ad, enaaj l̦apl̦o̦k ad yokwe E.

ELUKKUUN L̦AP AN JEOVA YOKWE KÕJ

4. Ewi wãween am̦ eñjake kõn an Jeova juon eo elukkuun l̦ap an yokwe? (Bar lale pija eo.)

⁴ “Jeova elukkuun l̦ap an yokwe.” (Jem. 5:11) Ilo Baibõl̦, ej keidi e make ñan juon jinen me el̦ap an yokwe. (Ais. 66:​12, 13, UBS) Baj pijaikl̦o̦k m̦õk an juon jinen lale niñniñ eo nejin. Ej likũt niñniñ eo ioon neen im kõnono ñane ilo juon ainikien emera. Ñe niñniñ eo nejin ej jañ ak emetak, eo jinen ej lale aikuj ko an. Ñe jej metak ak inepata, jemaroñ lõke bwe Jeova enaaj lale kõj kõnke ej yokwe kõj. Ri-jeje sam eo ear je im ba: “Ñe ij inepata im jorrããn kwõj kaenõm̦m̦an eõ im kalañlõñ eõ.”—Sam 94:​19, UBS.

5. Ta l̦õmn̦ak eo am̦ kõn an Jeova juon eo etiljek?

⁵ Jeova etiljek. (Sam 103:​8, NW) Eban bõjrak an yokwe kõj ñe jej kõm̦m̦ane juon men ebõd. Elukkuun lõñ alen an kar ri-Israel ro kabũrom̦õj Jeova; meñe ãindein, ak ke armej rein an rar ukel̦o̦k jãn bõd ko rar kõm̦m̦ani, ear kaalikkar ñan er bwe ejjañin jako an yokwe er. Ear ba, ‘Kom̦ aorõk im̦aan Meja im utiej, im Ij yokwe eok.’ (Ais. 43:​4, 5) Yokwe eo an Jeova ejjañin oktak. Aolep iien jemaroñ lõke bwe ej yokwe kõj. Jekdo̦o̦n ñe jaar kõm̦m̦ani bõd ko rel̦l̦ap, ak Jeova eban kõjoole kõj. Ñe jej ukel̦o̦k im bar jepl̦aak ñan Jeova, jenaaj lo bwe ej yokwe wõt kõj. Ej kallim̦ur bwe enaaj “kanooj wũjlep in jol̦o̦k bõd ko” ad. (Ais. 55:7) Baibõl̦ ej ba bwe ñe jenaaj ãindein, ‘Jeova enaaj kõkajoore kõj.’—Jrb. 3:19.

6. Ta eo Zekaraia 2:8 ej katakin kõj kõn Jeova?

⁶ Riit Zekaraia 2:8. Kõnke el̦ap an Jeova yokwe kõj, em̦õkaj an jel̦ã wãween ad eñjake im ekõn̦aan kõjparok kõj. Ñe jej bũrom̦õj, ej bar bũrom̦õj. Kõn men in, jemaroñ lõke bwe enaaj uwaake kõj ñe jej jar im kajjitõk ippãn: “Kõjparok eõ ãinwõt iju in mejam̦.” (Sam 17:8) Jejel̦ã bwe iju in mejãd ej m̦õttan eo ilo ãnbwinnid me elukkuun aorõk im epidodo an eñjake jabdewõt men. Innem ñe Jeova ej keidi kõj ñan iju in mejãn, ej ãinwõt ñe ej ba, ‘Jabdewõt eo ej kajjioñ in ko̦kkure kom̦, armej ro aõ, ej kajjioñ in ko̦kkure ro relukkuun aorõk ippa.’

7. Etke jej aikuj kal̦apl̦o̦k ad lõke bwe Jeova ej yokwe kõj kajjojo?

 ⁷ Jeova ekõn̦aan bwe jen lukkuun lõke bwe ej yokwe kõj kajjojo. Ijoke, ejel̦ã bwe kõn wõt wãween ko renana jaar iiooni ilo mour ko ad, jemaroñ pere men in. Ak bõlen jej iiooni wãween ko reppen kiiõ me rej kõm̦m̦an bwe en pen ad lõke bwe ej yokwe kõj. Ta eo emaroñ jipañ kõj ñan kal̦apl̦o̦k ad lõke bwe Jeova ej yokwe kõj? Jej aikuj katak kõn wãween an Jeova kwal̦o̦k an yokwe Jesus, rũkkapit ro, im kõj aolep.

WÃWEEN AN JEOVA KWAL̦O̦K YOKWE EO AN

8. Etke Jesus ear lukkuun lõke bwe Jemãn ej yokwe e?

⁸ Ium̦win elõñ pilien iiõ ko, Jeova im eo Nejin ejitõnbõro rar ejaake juon kõtaan me elukkuun epaak. Etotata aerro jel̦ã kajjien doon jãn jabdewõt armej im jabdewõt menin kõm̦anm̦an. Jeova ear lukkuun kaalikkar bwe ej yokwe Jesus, ãinwõt ad lo ilo Matu 17:5. Jeova emaroñ kar ba, ‘Eñin eo ebuñbũruõ kake.’ Ijoke, Jeova ear kõn̦aan bwe jen jel̦ã ewi joñan an yokwe Jesus, kõn men in ear kũri im ba, “Eñin Nejũ, eo ejitõnbõro ippa.” Jeova ear lukkuun buñbũruon kõn Jesus, el̦aptata kõnke Jesus ear m̦õn̦õn̦õ in katok kõn mour eo an. (Eps. 1:7) Im ear ejjel̦o̦k an Jesus pere ñan jidik kõn yokwe eo an Jemãn. Ear lukkuun jel̦ã bwe Jeova ej yokwe e. Im elõñ alen an kar ba bwe Jemãn ej yokwe e.—Jon 3:35; 10:17; 17:24.

9. Naan ta eo me ej kwal̦o̦k kõn an Jeova yokwe rũkkapit ro? Jouj im kõmel̦el̦e. (Rom 5:5)

⁹ Jeova ear bar kwal̦o̦k bwe ej yokwe rũkkapit ro. (Riit Rom 5:5.) L̦õmn̦ak kõn naan eo kar kõjerbale ñan kwal̦o̦k ewi joñan an Jeova yokwe er. Eoon in ej ba bwe Jeova ear “koobrak” bũrueer kõn yokwe eo an. Juon bokin kõmel̦el̦e kõn Baibõl̦ ej keidi yokwe eo an Anij ñan juon dãn me ej to̦o̦rtok jãn juon unin dãn. Waanjoñak in ej jipañ kõj ñan pijaikl̦o̦k ewi joñan an l̦ap yokwe eo an Jeova ñan rũkkapit ro! Rũkkapit ro rejel̦ã bwe “rejitõnbõro ippãn Anij.” (Jud 1) Rijjilõk Jon ear kwal̦o̦k wãween aer eñjake ke ear je: “Lale m̦õk joñan an Jemãdwõj ilañ yokwe kõj, ear kõtl̦o̦k ad bõk ãt in ajri ro nejin Anij!” (1 Jon 3:1) Jeova ej ke yokwe wõt rũkkapit ro? Jaab, em̦õj an Jeova kwal̦o̦k bwe ej yokwe kõj aolep.

10. Ta eo el̦aptata an kam̦ool bwe Jeova ej yokwe eok?

¹⁰ Ta menin kam̦ool eo el̦aptata me ej kwal̦o̦k bwe Jeova ej yokwe kõj? Katok in mour eo an Jesus. Ikijjeen men in, Jeova ear kwal̦o̦k yokwe eo an me ej make wõt l̦aptata! (Jon 3:16; Rom 5:8) Jeova ear kõtl̦o̦k bwe eo Nejin me ejitõnbõro ippãn en mej kõn aolep armej bwe en maroñ kõl̦l̦ãik on̦ããn jerawiwi ko ad im bwe jen maroñ erom ro Jeran. (1 Jon 4:10) El̦ak l̦apl̦o̦k ad kõl̦mãnl̦o̦kjen̦ kõn on̦ããn eo Jeova im Jesus rar kõl̦l̦ãiki kõn kõj, enaaj l̦apl̦o̦k ad mel̦el̦e kõn ewi joñan aerro yokwe kõj kajjojo. (Gal. 2:20) Jesus ear jab katok kõn mour eo an ñan baj kõl̦l̦ãik wõt on̦ããn men eo Adam ear luuji. Ijoke, ear kõm̦m̦ane men in ñan kwal̦o̦k yokwe eo an Jeova ñan kõj. Jeova ear kam̦ool ewi joñan an yokwe kõj ke ear letok eo me eaorõktata ippãn—Jesus. Jeova ear kõtl̦o̦k bwe eo Nejin en eñtaan im mej kõn kõj.

11. Ta eo jej katak jãn Jeremaia 31:3?

¹¹ Ãinwõt ad kar etale, Jeova ejjab dãpij eñjake ko an ñan e make, ak ej ba ñan kõj ewi joñan an yokwe kõj. (Riit Jeremaia 31:3.) Jeova ear karuwaaktok kõj ñane kõnke ej yokwe kõj. (Keidi Duteronomi 7:​7, 8.) Ejjel̦o̦k juon men ak jabdewõt armej emaroñ kõjepel kõj jãn yokwe in. (Rom 8:​38, 39) Ewi wãween am̦ eñjake kõn yokwe in an? Riit Sam 23, im lale wãween an yokwe eo an Jeova kar jelõt Devid im wãween an maroñ bar jelõt kõj aolep.

 EWI WÃWEEN AM̦ EÑJAKE KÕN YOKWE EO AN JEOVA?

12. En kar ewi wãween am̦ kõmel̦el̦e kõn Sam 23 ilo tukadu?

¹² Riit Sam 23:​1-6. Ilo Sam 23, Devid ear kõnono kõn an lõke bwe Jeova ej yokwe e im bwe Ej lale im kõjparok e. Devid ear kwal̦o̦k kõn kõtaan eo an epaak ippãn Jeova, eo me ear n̦aetan an Jabõt. Devid ear lõke an Jeova tõle, im ear lukkuun atartar ioon. Devid ear jel̦ã bwe Jeova enaaj kwal̦o̦k yokwe eo an ñane toon wõt an mour. Ta eo ear kõm̦m̦an an lukkuun lõke men kein?

13. Etke Devid ear lõke bwe Jeova ej yokwe im enaaj kabwe aikuj ko an?

¹³ “Ijãmin aikuj.” Devid ear jab pãd ilo aikuj kõnke aolep iien Jeova ear kabwe aikuj ko an. Im Devid ear m̦õn̦õn̦õ kõnke Jeova ear jem̦jerãiki im ear buñbũruon ippãn. Eñin unin ear jel̦ã bwe jekdo̦o̦n ta eo enaaj wal̦o̦k ilju im jekl̦aj, Jeova enaaj wõnm̦aanl̦o̦k wõt im kabwe aikuj ko an. Kõnke Devid ear lõke bwe Jeova ej yokwe e im enaaj kõjparoke, men in ear jipañe bwe en jab inepata im bwe en m̦õn̦õn̦õ im jokwane wõt kõn men ko ewõr ippãn.—Sam 16:11.

14. Ewi wãween an Jeova kwal̦o̦k an yokwe im lale kõj?

¹⁴ Jeova ej yokwe kõj im ej lale kõj, el̦aptata ñe ewõr men ko renana rej wal̦o̦k ilo mour ko ad. Claire, a eo me elõñl̦o̦k jãn 20 iiõ in an jerbal ilo Betel̦, ear jaje kilen jipañe baam̦le eo an ke rar iioon elõñ kain apañ ko ilo juon wõt iien. Jemãn ear stroke, lio jatin ear bukwel̦o̦k, im baam̦le eo an rar luuji peejnej eo aer im m̦weo im̦weer. Ewi wãween an kar Jeova kwal̦o̦k an yokwe er im lale er? Claire ej ba: “Jeova ear kabwe aikuj ko an baam̦le eo aõ kajjojo raan. Elõñ alen an kar l̦apl̦o̦k men ko Jeova  ear litok jãn joñan eo kõmar aikuji! Ekkã aõ emmel̦o̦ketok iien ko iar lo an Jeova lukkuun kwal̦o̦k yokwe eo an im el̦ap aõ kaõroki iien kein.”

15. Etke Devid ear bõk kõkajoor? (Bar lale pija eo.)

¹⁵ “Ej kõkajoor eõ.” Ewõr iien ko Devid ear lukkuun inepata kõn aolep apañ ko im wãween ko reppen ear iiooni. (Sam 18:​4-6) Meñe ãindein, ak yokwe eo an Jeova ear kõkajoore. Jeova ear tõll̦o̦k Devid, eo m̦õttan me el̦ap an kar m̦õk ñan “mel̦aaj in ujooj” im ñan “iturin dãn ko rel̦ae.” Kõn men in, Devid ear bar kajoor im ear maroñ wõnm̦aanl̦o̦k wõt ilo an karejar ñan Jeova ilo lañlõñ.—Sam 18:​28-32.

16. Ewi wãween an kar yokwe eo an Jeova kõkajoor eok?

¹⁶ Ejja ãindeinl̦o̦k wõt ilo rainin, “kõn jouj [eo] an Jeova jejjab jako” ak buñ ñe jej iioon apañ ko ilo mour ko ad. (Lia. 3:22; Kol. 1:11) L̦õmn̦ak kõn joñak eo an Rachel. Ear lukkuun bũrom̦õj ke l̦eo ippãn ear etal jãne im jãn Jeova ilo kar COVID-19 eo. Ta eo Jeova ear kõm̦m̦ane ñane? Ej ba: “Jeova ear jipañ eõ ñan lo bwe e im ro jet el̦ap aer yokwe eõ. Ear letok ñan eõ ro m̦õtta me rar jol̦o̦k iien ippa, rar bõktok kijõ m̦õñã, rar jejetok naanin kaenõm̦m̦an ko im eoon ko jãn Baibõl̦, rar ettõñdikdik tok, im rar kakeememej eõ bwe Jeova ej lale im kõjparok eõ. Eokkutkut aõ kam̦m̦oolole Jeova kõn an kar letok juon baam̦le me el̦ap yokwe ippãer.”

17. Etke Devid ear jab “mijak jabdewõt nana”?

¹⁷ “Ijãmin mijak jabdewõt nana, bwe Kwõj pãd ippa.” Ekkã an kar mour eo an Devid pãd ilo kauwõtata, im ear lukkuun lõñ an ri-kõjdat me rekajoor. Bõtab, yokwe eo an Jeova ear kõm̦m̦an an jokwane wõt im ear eñjake kõjparok eo an. Devid ear kile bwe Jeova ear pãd ippãn ilo aolep wãween ko ear iiooni, im men in ear kaenõm̦m̦ane. Eñin unin ear maroñ al: “[Jeova] ear lo̦mo̦o̦r eõ jãn aõ mijak otemjej.” (Sam 34:4) Meñe Devid ear lukkuun mijak, ak ear maroñ anjo̦ ioon an mijak kõnke ear jel̦ã bwe Jeova ej yokwe e.

18. Ilo am̦ jel̦ã bwe Jeova ej yokwe eok, ewi wãween an men in kõkajoore eok ñe kwõj mijak?

¹⁸ Kõnke jejel̦ã bwe Jeova ej yokwe kõj, ewi wãween an men in kõkajoore kõj ñe jej iioone wãween ko rekaamijak? Juon bainier etan Susi ej kõmel̦el̦eik eñjake ko aerro l̦eo pãleen ke l̦eo nejier ear bõk mour eo an make. Ej ba: “Ñe ej wal̦o̦k juon jerata ilo jidimkij, men in el̦ap an jelõt eok im emaroñ kõm̦m̦an am̦ m̦õjn̦o̦ im kwõj ekkõl el̦aññe enaaj bar wal̦o̦k juon men enana. Bõtab yokwe eo an Jeova ej kõm̦m̦an ad jokwane im eñjake kõjparok eo an.” Rachel eo me kar kõnono kake m̦oktal̦o̦k, ej ba: “Juon boñ ear lukkuun metak bũruõ kõn aõ bũrom̦õj im ear l̦ap aõ inepata im iar mijak, iar jañ im kwal̦o̦k ainikiõ ilo aõ jar ñan Jeova. Ilo iien eo wõt iar eñjake an kaenõm̦m̦an eõ ãinwõt an juon jinen kõm̦m̦an ñan niñniñ eo  nejin, innem iar kiki. Iban mel̦o̦kl̦o̦k iien in.” Juon em̦m̦aan me ej lale eklejia etan Tasos ear kalbuuj kõn an jab bõk kun̦aan ilo tarin̦ae. Ewi wãween an kar lo an Jeova kwal̦o̦k yokwe im lale? Ej ba: “Jeova ear kabwe aikuj ko aõ im elõñ men ko jet. Men in ear kal̦apl̦o̦k aõ tõmak bwe imaroñ lõke. Bareinwõt, ikijjeen jetõb kwõjarjar eo an, Jeova ear jipañ eõ bwe in lañlõñ meñe jikin kalbuuj ej juon jikin ekõm̦m̦an ad bũrom̦õj. Men in ear kaalikkar ñan ña bwe ñe el̦apl̦o̦k aõ lõke Jeova enaaj l̦apl̦o̦k aõ lo yokwe eo an ñan ña. Kõn men in iar bõk jerbalin rekũl̦ar bainier ke iar pãd ilo kalbuuj.”

RUWAAKL̦O̦K ÑAN ANIJ EO AM̦ ME EL̦AP YOKWE IPPÃN

19. (1) Ñe jejel̦ã bwe Anij ej yokwe kõj, ewi wãween an men in jelõte ta ko jej ba ilo jar ko ad? (2) Ta eo em̦m̦an ippam̦ kõn yokwe eo an Jeova? (Lale bo̦o̦k eo etan “ Eoon ko Rej Jipañ Kõj Eñjake Yokwe eo an Jeova.”)

¹⁹ Bwebwenato ko an ro jeid im jatid me jaar kõnono kaki rej kam̦ool bwe Jeova, “Anij in yokwe,” ej pãd ippãd! (2 Kor. 13:11) Ewõr an itoklimo kõn kõj. Jej lõke bwe “enaaj kõjparok [kõj] kõn jouj im yokwe eo an el̦ap.” (Sam 32:​10, UBS) Ñe jenaaj kal̦apl̦o̦k ad kõl̦mãnl̦o̦kjen̦ kõn wãween an kwal̦o̦k yokwe eo an ñan kõj, enaaj l̦apl̦o̦k ad lo bwe ej kea kõn kõj im jenaaj epaakel̦o̦k e. Jemaroñ kepaake ilo jar jabdewõt iien im kwal̦o̦k ñane joñan ad aikuji yokwe eo an. Jemaroñ kwal̦o̦k aolep inepata ko ad ñane, im lõke bwe emel̦el̦e im elukkuun kõn̦aan jipañ kõj.—Sam 145:​18, 19.

20. Ewi wãween an yokwe eo an Jeova kõm̦m̦an bwe jen epaakel̦o̦k e?

²⁰ Ãinwõt ad kõn̦aan pãd epaake juon kijeek ñe em̦õl̦o, jekõn̦aan epaake okmããn̦ãn̦in yokwe eo an Jeova. Meñe yokwe eo an Jeova ekajoor, ak ebar okmããn̦ãn̦. Kõn men in, kwõn m̦õn̦õn̦õ in bõk yokwe eo eokmããn̦ãn̦ an Jeova ilo mour eo am̦. Im jen karo̦o̦ll̦o̦k yokwe eo an im ba: “Ij yokwe Jeova”!—Sam 116:1.