1-2. Ta apañ ko ri-karejar ro an Jeova remaroñ jelm̦aiki?

 JERATA emaroñ wal̦o̦k ñan kõj ilo jidimkij. Ñan waanjoñak, juon jeid im jatid em̦m̦aan etiljek etan Luis a ear bõk juon kain kããnjer me ejeja. Taktõ eo ear ba ñane bwe m̦õttan jejjo allõñ in an mour. Monika im l̦eo pãleen rar poub ilo aer kõm̦m̦ani jerbal ko an Jeova. Bõtab juon iien, Monika ear lo bwe l̦eo pãleen, eo ej juon iaan ro ej lale eklejia, ear kõm̦m̦an jerawiwi ium̦win elõñ iiõ ko. Olivia, juon jeid im jatid kõrã me ejjel̦o̦k pãleen ear aikuj etal jãn m̦weo im̦õn kõnke ear wõr juon l̦añ me ear pojak in tõpar ijo ej jokwe ie. El̦ak jepl̦aak ñan jikin eo ear jokwe ie, l̦añ eo ear ko̦kkure m̦weo im̦õn. Ilo idiñ, mour eo an kajjojo iaan rein ear oktak. Kwõmaroñ ke mel̦el̦e kõn wãween kein rar iiooni? Kwõnañin ke iioon juon apañ me ear kajju ukote mour eo am̦?

² Ãinwõt ri-karejar ro an Jeova, jej iioon apañ im nañinmej ko me aolep armej rej bar iiooni. Jemaroñ bar aikuj kijenmej kõnke ro me rej dike armej ro an Anij rej kaeñtaan im jum̦ae kõj. Meñe Jeova ejjab bõbrae an apañ ko wal̦o̦k ñan kõj, ak ej kallim̦ur bwe enaaj jipañ kõj. (Ais. 41:10) Ikijjeen jipañ eo An, jemaroñ dãpij wõt ad lañlõñ, kõm̦m̦ani jokãlõt ko rem̦m̦an, im tiljek wõt ñan Jeova meñe jej iioon wãween ko rekanooj in pen. Ilo katak in, jenaaj etale emãn wãween ko me Jeova ej jipañ kõj ilo iien ko reppentata ilo mour ko ad. Jenaaj etale ta ko jej aikuj in kõm̦m̦ani bwe jen bõk tokjãn jãn jipañ ko ej litoki.

 JEOVA ENAAJ KÕJPAROK EOK

3. Ñe jej iioon juon jerata, ta eo emaroñ pen ñan kõj?

³ Apañ eo. Ñe ej wal̦o̦k juon jerata ilo mour eo ad, emaroñ pen ad kõl̦mãnl̦o̦kjen̦ im kõm̦m̦an jokãlõt. Etke? Kõnke el̦ap an rup bũruod. Emaroñ obrak l̦õmn̦ak ko ad kõn elõñ men ko me el̦ap aer kainepataik kõj. Emaroñ ãinwõt ñe jej etetal ibũl̦õn̦ juon jikin me etab ad lo m̦aan im jejaje ia eo jen etal iel̦o̦k. Lale ewi wãween an kar ruo iaan kõrã ro jeid im jatid me jaar kõnono kake m̦oktal̦o̦k, kar eñjake ke rar iioon wãween ko reppen. Olivia ej ba: “Ãlikin an kar l̦añ eo ko̦kkure m̦weo im̦õ, iar jaje ta eo in kõm̦m̦ane im el̦ap an kar pen ñan ña.” Monika ej ba ikijjeen an kar l̦eo pãleen ketake: “Iar jab bũrom̦õj wõt, ak ear lukkuun rup bũruõ im elukkuun kar metak itulowa. Joñan, iar jaje kilen kõm̦m̦ani men dikdik ko ikõn kõm̦m̦ani kajjojo raan. Iar jab tõmak bwe men in en kar wal̦o̦k ñan ña.” Ta eo Jeova ej kallim̦ur bwe enaaj kõm̦m̦ane ñe el̦ap ad eddodo im inepata?

4. Ekkar ñan Pilippai 4:​6, 7, ta eo Jeova ej kallim̦ur ñan kõj?

⁴ Men eo Jeova ej kõm̦m̦ane. Ej kallim̦ur ñan letok ñan kõj men eo Baibõl̦ ej n̦aetan “aenõm̦m̦an eo jãn Anij.” (Riit Pilippai 4:​6, 7.) Aenõm̦m̦an in ej jitõñl̦o̦k ñan ad lo aenõm̦m̦an im ineem̦m̦an ilo l̦õmn̦ak ko ad im bũruod itok jãn ad jem̦jerãiki Jeova. Aenõm̦m̦an in “el̦ap jãn jel̦ã otemjej,” im em̦m̦an jãn jabdewõt men jej iioone. Kwõnañin ke kar eñjake am̦ aenõm̦m̦an ãlikin wõt am̦ lukkuun lutõkl̦o̦k bũruom̦ ñan Jeova ilo jar? Eñjake in ej “aenõm̦m̦an eo jãn Anij.”

5. Ewi wãween an aenõm̦m̦an eo jãn Anij kõjparok l̦õmn̦ak ko ad im bũruod?

⁵ Pilippai 4:7 ej bareinwõt ba bwe aenõm̦m̦an eo jãn Anij enaaj ‘kõjparok bũruod im l̦õmn̦ak ko ad.’ Lukkuun naan eo kar kõjerbale ilo jeje ko jinoin ñan naan eo “kõjparok,” kar kõjerbale ñan tarin̦ae. Ej jitõñl̦o̦k ñan rũttarin̦ae ak ri-waj ro me rar kõjparoke juon jikin kweilo̦k im lale bwe ri-kõjdat ro ren jab kajjioñ nitbwili ak tarin̦aeiki. Armej ro ilo jikin kweilo̦k rot in rar maroñ kiki ilo aenõm̦m̦an kõnke rar jel̦ã bwe rũttarin̦ae rein rar waje wõrwõr ko. Ejja ãindeinl̦o̦k wõt, ñe aenõm̦m̦an eo jãn Anij ej kõjparoke bũruod im l̦õmn̦ak ko ad, jej aenõm̦m̦an kõnke jejel̦ã bwe jej bõk kõjparok. (Sam 4:​8, UBS) Ãinwõt Hanna, meñe wãween eo jej iioone ejjab m̦õkaj im oktak, ak jemaroñ aenõm̦m̦an wõt. (1 Sa. 1:​16-18) Im ñe jej aenõm̦m̦an, ekkã an jipañ bwe en em̦m̦an ad kõl̦mãnl̦o̦kjen̦ im kõm̦m̦an jokãlõt ko remãlõtlõt.

6. Ta ko kwõmaroñ kõm̦m̦ani bwe kwõn bõk tokjãn jãn aenõm̦m̦an eo jãn Anij? (Bar lale pija eo.)

⁶ Men eo jej aikuj kõm̦m̦ane. Ñe kwõj inepata, kwõn kũri ri-waj eo ilo kõkkar. Ewi  wãween? Jar m̦ae iien kwõj eñjake aenõm̦m̦an eo jãn Anij. (Luk 11:9; 1 Tes. 5:17) Luis, eo me kar kõnono kake m̦oktal̦o̦k ej kõmel̦el̦e kõn men ko e im kõrã eo pãleen etan Ana rar kõm̦m̦ani ke rar jel̦ã bwe m̦õttan wõt jejjo allõñ in an mour. Ej ba: “Ilo iien rot kein, elukkuun pen ñan kõm̦m̦ani jokãlõt ko ikijjeen taktõ im men ko jet. Bõtab kõnke ekar lukkuun l̦ap am̦ro jar, kõm̦ro ear maroñ aenõm̦m̦an wõt ilo kar iien in elukkuun pen.” Luis im kõrã eo ippãn rej ba bwe rar buul̦ jar im ear ikkutkut aer jar. Rar kajjitõk bwe Jeova en kaenõm̦m̦an l̦õmn̦ak ko aer im bũrueer, im bwe en lel̦o̦k ñan er mãlõtlõt bwe ren kõm̦m̦ani jokãlõt ko rem̦m̦an. Im rar lo an jipañ er. Ñe kwõj iioon juon wãween epen, buul̦ jar kake, im kwõnaaj lo an aenõm̦m̦an eo jãn Jeova kõjparok bũruom̦ im l̦õmn̦ak ko am̦.—Rom 12:12.

JEOVA ENAAJ KÕM̦M̦AN BWE KWÕN JUTAK PEN

7. Ta ko jemaroñ eñjake ñe jej iioon juon wãween elukkuun pen?

⁷ Apañ eo. Ñe jej iioon juon wãween elukkuun pen, jemaroñ bõk eñjake ko, l̦õmn̦ak ko, im em̦m̦akũt ilo wãween ko rejjab lukkuun pel̦an ãinwõt ad kõn kõm̦m̦ani. Eñjake ko ad remaroñ ãinwõt juon tim̦a ilo kõkkar me n̦o ko rej iuunto-iuuntak. Ana, eo me jaar kõnono kake m̦oktal̦o̦k, ej ba bwe ãlikin an kar Luis mej, elõñ kain eñjake ko ear bũki. Ej ba: “Ñe elukkuun l̦ap aõ bũrom̦õj, ij jino bũrom̦õj kõn ña make. Im ikõn bar lukkuun illu kõn an jako l̦eo ippa.” Ewõr iien ko Ana ear eñjake an make iaan im ear inepata kõnke ear aikuj kõm̦m̦ani pepe ko me em̦m̦an an Luis kõn kar kõm̦m̦ani. Ewõr iien ear eñjake bwe ej ãinwõt ñe ej pãd ilo juon l̦añ ilo̦meto. Ewi wãween an Jeova jipañ kõj ñe jej jino bũki eñjake kein?

8. Ãinwõt an wal̦o̦k ilo Aiseia 33:​6, ta eo Jeova ej kallim̦ur ñan kõj?

⁸ Men eo Jeova ej kõm̦m̦ane. Ej kallim̦ur ñan kõj bwe enaaj kõm̦m̦an bwe jen jutak pen. (Riit Aiseia 33:6.) Ñe juon tima ej iioon juon l̦añ ilo̦meto, emaroñ jino lukkuun ellãle. Ñan jipañ tim̦a eo bwe en jab l̦ap an ellãle, ekkã an wõr pã ko me rej diwõjtok jãn ium̦win tim̦a eo ium̦win dãn eo. Pã kein rej jipañ bwe en dikl̦o̦k an tim̦a eo ellãle, im ej kõm̦m̦an bwe en jab kauwõtata ñan bajinjea ro im en em̦m̦an aer uwe ilo tim̦a eo. Bõtab bwe en em̦m̦an an pã kein jerbal, tim̦a eo ej aikuj ettõr m̦aanl̦o̦k. Ejja ãindeinl̦o̦k wõt, Jeova enaaj kõm̦m̦an bwe jen jutak wõt pen ñe jej wõnm̦aanl̦o̦k wõt im dãpij wõt ad tiljek meñe jej iioon wãween ko reppen.

9. Ewi wãween an kein jerbal ko ad jipañ kõj ñan pel̦an wõt? (Bar lale pija eo.)

⁹ Men eo jej aikuj kõm̦m̦ane. Ñe kwõj jino eddodo kõn inepata im bũrom̦õj, kate eok joñan wõt am̦ maroñ ñan wõnm̦aanl̦o̦k wõt  im jar, etal ñan iien kweilo̦k ko, im kwal̦o̦k naan. Em̦ool bwe kwõmaroñ jab kõm̦m̦ani joñan eo me ekkã am̦ kar kõm̦m̦ani ilo m̦okta, bõtab keememej bwe Jeova ejjab kõtmãne bwe kwõn lel̦o̦k el̦ap jãn joñan eo kwõmaroñe. (Keidi Luk 21:​1-4.) Kwõn niknik ilo am̦ kõm̦m̦an iien ñan katak ippam̦ make im kõl̦mãnl̦o̦kjen̦ kõn men ko kwõj riiti. Etke? Kõnke ikijjeen doulul eo an Jeova, ej letok mel̦el̦e ko rej pedped ioon Baibõl̦ me remaroñ jipañ kõj bwe en pel̦an wõt wãween ad l̦õmn̦ak im eñjake. Ñan lo men ko kwõj aikuji, kwõmaroñ kõjerbali kein jerbal ko an doulul in ilo kajin eo am̦ make, ãinwõt JW Library^® app eo im Bok in Jipañ Ri Kõnnaan ro an Jeova ñan Kappok Mel̦el̦e. Monika, eo jaar kõnono kake m̦oktal̦o̦k ej ba bwe ear bõk naanin jipañ jãn kein jerbal kein ilo iien ko ej jino eddodo kõn inepata im bũrom̦õj. Ñan waanjoñak, ear search e naan eo “illu.” Im ewõr iien ko jet ear search e “ketak” ak “tiljek.” Innem ekõn riit m̦ae iien em̦m̦anl̦o̦k an mour. Ej ba: “Ñe ij jino kõm̦m̦an research, ekkã aõ illu ilo aõ taipi naan kein, ak ãlikin aõ riit ej ãinwõt ñe Jeova ej atbo̦kwõji eõ. Il̦ak riit, iar kile bwe Jeova emel̦el̦e kõn aolep eñjake ko aõ, im ej jipañ eõ.” Jipañ rot in jãn Jeova emaroñ bareinwõt jipañ eok bwe en pel̦an wõt wãween am̦ l̦õmn̦ak im eñjake m̦ae iien kwõj eñjake am̦ aenõm̦m̦an.—Sam 119:​143, 144.

JEOVA ENAAJ JIPAÑ EOK

10. Ta eñjake ko jemaroñ bũki ãlikin an wal̦o̦k juon jerata ñan kõj?

¹⁰ Apañ eo. Ãlikin an wal̦o̦k juon jerata ñan kõj, emaroñ wõr iien ko jej eñjake ad m̦õjn̦o̦. Jemaroñ ãinwõt juon rũttõr me ear lukkuun m̦õkaj an ettõr ak kiiõ ej ajukub an etetal kõn an jorrããn neen. Emaroñ pen ad kõm̦m̦ani men ko me ekõn pidodo ad kõm̦m̦ani, ak jemaroñ m̦akoko in kõm̦m̦ani men ko me rekõn em̦m̦an ippãd. Ãinwõt Ilaija, jemaroñ eñjake bwe elukkuun pen ad jerkak im jekõn̦aan wõt kiki. (1 Kñ. 19:​5-7) Ta eo Jeova ej kallim̦ur bwe enaaj kõm̦m̦ane ñe jej m̦õjn̦o̦?

11. Ta wãween eo juon Jeova ej jipañ kõj? (Sam 94:18)

¹¹ Men eo Jeova ej kõm̦m̦ane. Ej kallim̦ur bwe enaaj rejetake kõj. (Riit Sam 94:18.) Ãinwõt an juon rũttõr me ejorrããn neen aikuj jipañ ñan etetal im m̦akũtkũt, jemaroñ aikuj jipañ bwe jen maroñ wõnm̦aanl̦o̦k wõt ilo ad kabuñ ñan Jeova. Ilo iien rot kein, Jeova ej kaenõm̦m̦an kõj im ba: “Ña Jeova, am̦ Anij, Inaaj jibwe peim̦ anmoon̦ im ba ñan eok, ‘Kwõn jab mijak; Inaaj jipañ eok.’” (Ais. 41:13) Kiiñ Devid ear lo an Jeova jipañe ilo  wãween in. Ke ear iioon wãween ko reppen im ewõr ro rar kõjdate, ear ba ñan Jeova: “Pein anmoon̦ũm̦ ear dãpij eõ.” (Sam 18:35) Bõtab, ewi wãween an Jeova rejetake kõj?

12. Wõn ro Jeova emaroñ kõjerbali ñan jipañ kõj ñe jej m̦õjn̦o̦?

¹² Ekkã an Jeova rejetake kõj ikijjeen an kõm̦akũt ro jet ñan jipañ kõj. Ñan waanjoñak, ke Devid ear m̦õjn̦o̦, l̦eo m̦õttan etan Jonetan ear lol̦o̦ke bwe en kõkajoore im kõketake. (1 Sa. 23:​16, 17) Ejja ãindeinl̦o̦k wõt, Jeova ear kããlõt Ilaisha ñan lel̦o̦k jipañ ñan Ilaija. (1 Kñ. 19:​16, 21; 2 Kñ. 2:2) Ilo raan kein, Jeova emaroñ kõjerbal baam̦le ko ad, ro m̦õttad, im em̦m̦aan ro rej lale eklejia ñan jipañ kõj. Bõtab, ñe jej bũrom̦õj im metak, jemaroñ m̦akoko in pãd ippãn armej. Jekõn̦aan make iaad. Ãindein ñe jej iioon wãween rot kein. Bõtab, ta eo jemaroñ kõm̦m̦ane bwe jen maroñ bõk jipañ jãn Jeova?

13. Ta eo jej aikuj kõm̦m̦ane bwe jen maroñ bõk tokjãn jãn jipañ eo jãn Jeova? (Bar lale pija eo.)

¹³ Men eo jej aikuj kõm̦m̦ane. Kate eok ñan jab kamakel̦o̦k iaam̦. Ñe jej kamakel̦o̦k iaad, emaroñ kõm̦m̦an bwe jen jino l̦õmn̦ak wõt kõn kõj make im apañ ko jej iiooni. L̦õmn̦ak rot kein remaroñ jelõte pepe ko jej kããlõti. (JK. 18:1) Em̦ool bwe ewõr iien ko jej aikuj make iaad, el̦aptata ñe ej wal̦o̦k juon jerata el̦ap ilo mour ko ad. Bõtab, ñe eto ad kamakel̦o̦k iaad, jemaroñ kõjekdo̦o̦ni armej ro Jeova ej kõjerbali ñan an kajjioñ jipañ kõj. Kõn men in, meñe emaroñ lukkuun pen wãween eo jej iioone ak em̦m̦an ñe jej m̦õn̦õn̦õ in bõk jipañ jãn baam̦le ko ad, ro m̦õttad, im em̦m̦aan ro rej lale eklejia. Jekõn̦aan watõk rein ãinwõt ro me Jeova ej jilkintok bwe ren jipañ kõj.—JK. 17:17; Ais. 32:​1, 2.

JEOVA ENAAJ KAENÕM̦M̦AN EOK

14. Ta wãween ko jemaroñ iiooni me remaroñ kõm̦m̦an ad mijak?

¹⁴ Apañ eo. Ewõr iien ko jemaroñ mijak. Ilo Baibõl̦, ri-karejar ro an Anij retiljek rej kwal̦o̦k kõn iien ko rar lukkuun inepata im wũdiddid kõn aer mijak kõn ri-kõjdat ro aer ak kõn apañ ko jet. (Sam 18:4; 55:​1, 5) Ejja ãindeinl̦o̦k wõt, jemaroñ iioon jum̦ae ilo jikuul̦, ilo jikin jerbal, jãn baam̦le eo ad, ak jãn kien. Jemaroñ mijak ñe jenaaj mej kõnke ewõr ad nañinmej el̦ap. Ilo iien rot kein, jemaroñ ãinwõt juon ajri me ejaje en ta. Ewi wãween an Jeova jipañ kõj ilo iien rot kein?

15. Ta naanin kaenõm̦m̦an eo Sam 94:19 ej letok ñan kõj?

¹⁵ Men eo Jeova ej kõm̦m̦ane. Ej kaenõm̦m̦an  kõj. (Riit Sam 94:19.) Naan kein ilo bokin Sam remaroñ kõm̦m̦an ad l̦õmn̦ak kõn juon leddik jiddik me emijak im ejaje kiki kõnke ewõr jourur. Jemaroñ pijaiki an jemãn etal ippãn im kotake im kajajaiki ñan ñe ekiki. Meñe ej wõr wõt ainikien jourur, ak an jemãn atbo̦kwõji ledik in im kajajaiki ej kõm̦m̦an bwe en jako an mijak. Ñe jej iioon wãween ko rekõm̦m̦an ad mijak, jemaroñ aikuji an Jemãdwõj ilañ atbo̦kwõji kõj ilo kõkkar m̦ae iien jej eñjake ad aenõm̦m̦an. Ewi wãween ad maroñ bõk kaenõm̦m̦an rot in jãn Jeova?

16. Ta ko jemaroñ kõm̦m̦ani bwe jen bõk tokjãn jãn aenõm̦m̦an eo jãn Jeova? (Bar lale pija eo.)

¹⁶ Men eo jej aikuj kõm̦m̦ane. Ekkeini ad jol̦o̦k iien ippãn Jeova—jar ñane im riiti Naan ko an. (Sam 77:​1, 12-14) Innem ñe kwõj inepata, men eo m̦oktata kwõmaroñ kõm̦m̦ane ej reilo̦k ñan Jeova bwe en jipañ eok. Kwal̦o̦k ñane ta ko kwõj mijaki im inepata kaki. Kõtl̦o̦k bwe en kõnono ñan kwe im kaenõm̦m̦ane eok ikijjeen Naan ko an. (Sam 119:28) Kwõnaaj lo bwe jet iaan naan ko ilo Baibõl̦ el̦ap aer kaenõm̦m̦an eok ñe kwõj mijak. Ñan waanjoñak, kwõmaroñ bõk kaenõm̦m̦an jãn bokin Job, Sam, im Jabõn Kõnnaan im bareinwõt jãn naan ko an Jesus ilo Matu jebta 6. Ilo am̦ jar ñan Jeova im riiti Naan ko an, kwõnaaj eñjake an kaenõm̦m̦an eok.

17. Ta eo jemaroñ lõke?

¹⁷ Jemaroñ lõke bwe Jeova enaaj jipañ kõj ilo iien ko reppentata ilo mour ko ad. Jeban make iaad. (Sam 23:4; 94:14) Jeova ej kallim̦ur bwe enaaj kõjparok, kõm̦m̦an bwe jen jutak pen, jipañ, im kaenõm̦m̦an kõj. Aiseia 26:3 (UBS) ej kõnono kõn Jeova im ba: ‘Kwõj lel̦o̦k aenõm̦m̦an eo el̦ap ñan ro edim bũrueer, im rej kõjatdikdik kõn kwe.’ Kõn men in, kwõn lõke Jeova im kortokjãn jipañ ko ej liwaj ñan kwe. El̦aññe kwõnaaj kõm̦m̦ane men in, kwõnaaj bõk kajoor jãne ilo iien ko reppen.