ILO ukokin Baibõl̦ eo etan Ukokin Lal̦ eo Ekããl (Matu–Revelesõn), naanin Grik eo me kar kõjerbale ñan “jariot” emaroñ jitõñl̦o̦k ñan elõñ kain jariot ko. (Jrb. 8:​28, 29, 38) Ijoke, ri-Itiopia eo emaroñ kar uwe ilo juon jariot ekilep, im jab juon jariot edik me rekõn kõjerbale ilo iien tarin̦ae ko ak iãekwõj ko. L̦õmn̦ak kõn jet iaan un ko unin ad ba men in.

Ri-Itiopia eo ear juon ri-utiej me ear itok jãn juon jikin ettol̦o̦k. Em̦m̦aan in ear “juon iaan ri-utiej ro an Kandase, lerooj eo an ri-Itiopia. L̦ein ej lale aolep jããn ko an lerooj in.” (Jrb. 8:27) Ilo raan kein, aelõñin Itiopia in etto ej kiiõ pãd ilo aelõñin Sudan ekoba jet iaan jikin ko ilo iturõkin Egypt. Meñe ri-utiej in emaroñ kar jab uwe ilo ejja wa eo wõt jãn kar jinoin tũreep eo an, ak emaroñ kar lukkuun lõñ an m̦weiuk kõnke aetok ial̦ eo an. Ilo kar tõre ko an rijjilõk ro, jet iaan wa ko me rekõn kõjerbali ñan bõktok-bũktok armej ej jariot ko me emãn aer wiil̦ im ewõr aer bõrwaj. Ekkar ñan juon bokin kõmel̦el̦e kõn bokin Jerbal (Acts—An Exegetical Commentary), “jariot rot in emaroñ kar jipañ bwe en l̦apl̦o̦k jikin m̦weiuk ko aer, kõm̦m̦an bwe en em̦m̦an kõjeiier, im bõlen jipañ er bwe ren etal ñan jikin ko rettol̦o̦k.”

Ri-Itiopia eo ear riit ke Pilip ear kepaake jariot eo waan. Baibõl̦ ej kwal̦o̦k bwe “Pilip ear ettõr iturinl̦o̦k wa eo im ear roñ ainikien an ri-utiej eo riiti bok eo an ri-kanaan Aiseia.” (Jrb. 8:30) Jariot ko me kar kõjerbali ñan ito-itak rar jab maroñ kaiim̦. Innem kõnke ear rum̦wijl̦o̦k jariot in, ri-utiej eo ear maroñ riit im Pilip ear maroñ ettõrl̦o̦k im tõpar wa in.

Ri-Itiopia eo “ear kajjitõk ippãn Pilip bwe en uwe im jijet ippãn.” (Jrb. 8:31) Ñe en kar waan iãekwõj jariot in, innem ro rej uwe ie ren kar jutak. Bõtab ilo jariot ko me rekõn kõjerbali ñan ito-itak, en kar wõr an Pilip im ri-utiej eo jikin jijet.

Kõn wõt kõmel̦el̦e ko jej loi ilo bokin Jerbal jebta 8 im kein kam̦ool ko jãn ekkatak ko an rimmãlõtlõt ro, bok ko ad ilo raan kein rej kwal̦o̦k an ri-Itiopia eo uwe ioon juon jariot ekilep im jab juon jariot edik me rekõn kõjerbale ñan iien tarin̦ae ko im iãekwõj ko.