KATAK 3
AL 35 “Kom̦win Lukkuun Lale Ta ko Raorõkl̦o̦k”
Kõm̦m̦ani Jokãlõt ko Rej Kabuñbũruon Jeova
“Mijak Jeova, jinoin mãlõtlõt; im jel̦ã kõn Eo eokkwõjarjar, jel̦ãl̦o̦kjen̦.”—JK. 9:10.
UNIN KATAK IN
Kilen am̦ maroñ kõjerbal jel̦ãl̦o̦kjen̦, mel̦el̦e, im lol̦o̦kjen̦ ñan kõm̦m̦ani jokãlõt ko remãlõtlõt.
1. Ta men eo epen kõj aolep jej iioone?
AOLEP raan ewõr jokãlõt ko jej aikuj kõm̦m̦ani. Ewõr jokãlõt ko repidodo, ãinwõt ta eo kwõnaaj m̦õñã in jibboñ ak jete awa kwõnaaj kiki. Ijoke, ewõr jokãlõt ko jet me repenl̦o̦k jej aikuj kõm̦m̦ani. Jokãlõt kein remaroñ jelõt ãjmour eo ad, ad m̦õn̦õn̦õ, ro rejitõnbõro ippãd, ak ad kabuñ ñan Jeova. Jekõn̦aan bwe kõj im baam̦le eo ad jen bõk tokjãn jãn jokãlõt ko ad. Men eo eaorõktata, jej kõjatdikdik bwe pepe ko ad renaaj kabuñbũruon Jeova.—Rom 12:1, 2.
2. Ta buñtõn ne ko renaaj jipañ eok ñan kõm̦m̦ani jokãlõt ko remãlõtlõt?
2 Enaaj em̦m̦an jokãlõt eo kwõj kõm̦m̦ane ñe kwõj (1) bõk mel̦el̦e, (2) lale ta l̦õmn̦ak eo an Jeova kõn wãween eo kwõj iioone, im (3) kõl̦mãnl̦o̦kjen̦ kõn pepe ta eo em̦m̦antata. Katak in enaaj kõnono kõn buñtõn ne kein jilu, im enaaj bareinwõt jipañ kõj ñan lo wãween ad maroñ kammineneiki maroñ eo ad ñan kõjerbal lol̦o̦kjen̦.—JK. 2:11.
BÕK MEL̦EL̦E
3. Kwal̦o̦k juon waanjoñak kõn unin an aorõk bwe kwõn bõk mel̦el̦e m̦okta jãn am̦ kõm̦m̦ane juon pepe.
3 Buñtõn ne eo m̦oktata emaroñ jipañ eok ñan kõm̦m̦ane juon jokãlõt em̦m̦an ej: bõk mel̦el̦e ko. Etke eaorõk men in? Pijaikl̦o̦k an juon ri-nañinmej lol̦o̦k juon taktõ kõnke ewõr juon an nañinmej el̦ap. Taktõ eo enaaj ke kajju kwal̦o̦k wãween an nãj kõm̦adm̦õde nañinmej eo an ak ear jab m̦okta etale ri-nañinmej eo ak kwal̦o̦k kajjitõk ko im bõk mel̦el̦e? Alikkar eban. Ejja ãindeinl̦o̦k wõt, kwõnaaj kõm̦m̦an jokãlõt ko rem̦m̦an el̦aññe kwõj m̦okta bõk mel̦el̦e ko. Ewi wãween kwõmaroñ kõm̦m̦ane men in?
4. Ekkejell̦o̦k ippãn Jabõn Kõnnaan 18:13, ta eo kwõmaroñ kõm̦m̦ane bwe kwõn maroñ bõk mel̦el̦e? (Bar lale pija eo.)
4 Kwõmaroñ bõk mel̦el̦e ikijjeen am̦ kwal̦o̦k kajjitõk ko. Jen ba bwe kar kũr eok ñan juon iien iiãio. Kwõnãj ke kobal̦o̦k? El̦aññe kwõjaje kajjien armej eo ej loloodjake iien en̦ ak kwõjaje karõk ko ñan iien en̦, kwõnaaj aikuj kajjitõk ippãn kajjitõk kein: “Ia eo im ñããt eo naaj kõm̦m̦ane iien iiãio en̦? Jete armej im wõn ro renaaj pãd? Wõn eo ej bõk eddon iien en̦? Ta ko renaaj kõm̦m̦ani? Enaaj ke wõr dãnnin arkool̦?” Uwaak ko ñan kajjitõk kein renaaj jipañ eok ñan kõm̦m̦ane juon jokãlõt emãlõtlõt.—Riit Jabõn Kõnnaan 18:13.
Bõk mel̦el̦e ikijjeen am̦ kwal̦o̦k kajjitõk ko (Lale pãrokõrããp 4) a
5. Ta eo kwõj aikuj kõm̦m̦ane ãlikin am̦ bõk mel̦el̦e?
5 Men eo juon kwõmaroñ kõm̦m̦ane ãlikin am̦ bõk mel̦el̦e ej lukkuun kõl̦mãnl̦o̦kjen̦ kõn aolep men ko remaroñ wal̦o̦k bwe kwõn maroñ kõm̦m̦ane juon jokãlõt em̦m̦an. Ñan waanjoñak, ta el̦aññe kwõj roñ bwe ewõr ro me rejjab pokake naanin kakapilõk ko an Jeova renaaj pãd ilo iien en̦ ak bwe enaaj wõr dãnnin arkool̦ bõtab ejjel̦o̦k en̦ enaaj lale bwe en jab l̦e jãn joñan an armej ro idaak? Kwõl̦ak lale, armej ro ilo iien iiãio in remaroñ ke oktak im kõm̦m̦ani m̦anit ko renana? (1 Pit. 4:3) Bõtab, ta el̦aññe naaj kõm̦m̦ane iien iiãio in ilo ejja awa eo an iien kweilo̦k eo am̦ ak ilo iien eo em̦õj am̦ karõke ñan kwal̦o̦k naan? Ñe em̦õj am̦ kõl̦mãnl̦o̦kjen̦ kõn aolep wãween ko remaroñ wal̦o̦k ilo iien en̦, enaaj pidodol̦o̦k am̦ kõm̦m̦ane juon jokãlõt em̦m̦an. Bõtab ewõr bar juon men kwõj aikuj kõm̦m̦ane. Kiiõ kwõjel̦ã wãween am̦ l̦õmn̦ak kõn wãween eo kwõj iioone, ijoke ta l̦õmn̦ak eo an Jeova kõn men in?—JK. 2:6.
LALE TA L̦ÕMN̦AK EO AN JEOVA
6. Ekkar ñan Jemes 1:5, etke jej aikuj jar im kajjitõk jipañ jãn Jeova?
6 Kajjitõk ippãn Jeova bwe en jipañ eok ñan jel̦ã ta l̦õmn̦ak eo an kõn wãween eo kwõj iioone. Jeova ej kallim̦ur bwe enaaj letok mãlõtlõt bwe jen maroñ jel̦ã el̦aññe juon pepe enaaj kabuñbũruon ak jaab. Ilo m̦ool, “el̦ap an m̦õn̦õn̦õ in lel̦o̦k [mãlõtlõt] ñan aolep armej im ejjab kajook er.”—Riit Jemes 1:5.
7. Ewi wãween kwõmaroñ bõk l̦õmn̦ak eo an Jeova kõn wãween eo kwõj iioone? Kwal̦o̦k juon waanjoñak.
7 Ãlikin am̦ jar im kajjitõk bwe Jeova en jipañ eok, lukkuun lale ta uwaak eo an. Ñan waanjoñak, ñe kwõj jebwãbwe ilo am̦ ito-itak ilo juon jikin ekããl, kwõmaroñ kajjitõk jipañ ippãn juon iaan armej ro ilo jikin in. Bõtab kwõn kar ke kajju etal jãne m̦okta jãn an maroñ uwaake eok? Alikkar jaab. Kwõn kar lukkuun roñjake an kõmel̦el̦e. Ejja ãindeinl̦o̦k wõt, ãlikin am̦ kajjitõk ippãn Jeova bwe en lewaj mãlõtlõt, kajjioñ lale ta uwaak eo an ikijjeen am̦ etale ta kien ko im naanin kakapilõk ko ilo Baibõl̦ me remaroñ jipañ eok ilo wãween eo kwõj iioone. Ñan waanjoñak, ñe kwõj pepe el̦aññe kwõnaaj etal ñan iien iiãio eo me jaar kõnono kake m̦oktal̦o̦k, kwõmaroñ lale ta eo Baibõl̦ ej ba kõn iien iiãio ko robrak kõn m̦anit ko renana, kõm̦m̦ao ko renana, im ad aikuj likũt m̦oktata Aelõñ eo im̦aan kõn̦aan ko ad.—Matu 6:33; Rom 13:13; 1 Kor. 15:33.
8. Ta ko kwõmaroñ kõm̦m̦ani ñe kwõj aikuj jipañ ñan pukot mel̦el̦e ko me remaroñ jipañ eok kõn wãween eo kwõj iioone? (Bar lale pija eo.)
8 Ijoke, ewõr iien ko kwõmaroñ aikuj jipañ ñan pukot mel̦el̦e ko me remaroñ jipañ eok kõn wãween eo kwõj iioone. Kwõmaroñ bõk naanin kakapilõk jãn juon jeid im jatid me el̦ap imminene ippãn. Mekarta, kwõnaaj bareinwõt bõk tokjãn jãn am̦ make kõm̦m̦an research. Elukkuun lõñ mel̦el̦e ko kwõmaroñ loi ilo kein jerbal ko ad, ãinwõt ilo Bok in Jipañ Ri Kõnnaan ro an Jeova ñan Kappok Mel̦el̦e im Scriptures for Christian Living. Keememej mejãnkajjik eo am̦: ñan kõm̦m̦ane juon jokãlõt me enaaj kabuñbũruon Jeova.
Lale ta l̦õmn̦ak eo an Jeova (Lale pãrokõrããp 8) b
9. Ewi wãween ad maroñ jel̦ã el̦aññe jokãlõt eo ad enaaj kabuñbũruon Jeova? (Epesõs 5:17)
9 Ewi wãween ad maroñ jel̦ã el̦aññe jokãlõt eo ad enaaj kabuñbũruon Jeova? M̦oktata, jej aikuj in lukkuun jel̦ã kajjien Jeova. Baibõl̦ ej ba: “Jel̦ã kõn Eo eokkwõjarjar, [ej] jel̦ãl̦o̦kjen̦.” (JK. 9:10) Aet, m̦oolin jel̦ãl̦o̦kjen̦ ej itok jãn an juon jel̦ã kõn kadkad ko an Jeova, ankilaan, im men ko rem̦m̦an ippãn im men ko ediki. Kajjitõk ippam̦ make, ‘Ekkar ñan men ko ijel̦ã kõn Jeova, jokãlõt ta eo imaroñ kõm̦m̦ane me enaaj kabuñbũruon?’—Riit Epesõs 5:17.
10. Etke el̦apl̦o̦k an aorõk naanin kakapilõk ko ilo Baibõl̦ jãn imminene ko an baam̦le eo ad ak m̦anit ko ad?
10 Bwe jen maroñ kabuñbũruon Jeova, ewõr iien ko jenãj aikuj kabũrom̦õje ro me jepaake er. Ñan waanjoñak, kõn an jet jemãn im jinen yokwe ro nejier, remaroñ kõn̦aan bwe lio nejier en m̦areiki juon em̦m̦aan ak likao me em̦weiie meñe ejjab kajoor mourin jetõb eo an. Em̦ool bwe rũtto rein rekõn̦aan bwe en em̦m̦an an l̦eo kabwe aikuj ko an lio nejier ilo kanniõk, bõtab wõn eo enaaj jipañe lio ñan kõkajoorl̦o̦k jem̦jerã eo an ippãn Jeova? Ta l̦õmn̦ak eo an Jeova kõn men in? Jej lo uwaak eo ilo Matu 6:33. Ilo eoon in, ej rõjañ Kũrjin ro ñan “wõnm̦aanl̦o̦k wõt im pukot m̦okta Aelõñ eo.” Meñe jej kautiej ro jemãd im jined im armej ro rej jokwe ilo jikin eo jej pãd ie, ak men eo el̦apl̦o̦k an aorõk ippãd ej ñan kam̦õn̦õn̦õik Jeova.
KÕL̦MÃNL̦O̦KJEN̦ KÕN PEPE TA EO EM̦M̦ANTATA
11. Ekkar ñan Pilippai 1:9, 10, kadkad ta eo enaaj jipañ eok ñan lukkuun lale pepe ta eo em̦m̦an ñan kõm̦m̦ane?
11 Ãlikin am̦ etale naanin kakapilõk ko ilo Baibõl̦ me remaroñ jipañ eok kõn wãween eo kwõj iioone, kwõj aikuj lukkuun lale pepe ta eo em̦m̦antata. (Riit Pilippai 1:9, 10.) Kadkadin lol̦o̦kjen̦ enaaj jipañ eok ñan pijaikl̦o̦k ak kile ta ko remaroñ wal̦o̦k jãn kajjojo iaan pepe ko kwõj l̦õmn̦ak in kõm̦m̦ani. Jet iien emaroñ pidodo ñan kõm̦m̦ane juon pepe. Bõtab, ejjab aolep iien ealikkar pepe ta eo em̦m̦an ñan kõm̦m̦ane. Am̦ kõjerbal lol̦o̦kjen̦ enaaj jipañ eok ñan kõm̦m̦ane jokãlõt ko remãlõtlõt meñe kwõj iioone wãween ko relukkuun pen.
12-13. Ewi wãween an lol̦o̦kjen̦ maroñ jipañ eok ñan kõm̦m̦ane juon jokãlõt em̦m̦an ñe kwõj kappok juon jerbal?
12 Pijaikl̦o̦k waanjoñak in. Kwõj kappok juon am̦ jerbal bwe kwõn maroñ kabwe aikuj ko an baam̦le eo am̦. Ewõr ruo jerbal ko repel̦l̦o̦k. Kwõj etali mel̦el̦e ko, ãinwõt kain jerbal rot eo, jikejuul̦ eo, ewi ettol̦o̦kin jãn ijo kwõj jokwe ie, im men ko jet. Kwõl̦ak lale, jerbal kein ruo rejjab n̦ae naanin kakapilõk ko ilo Baibõl̦. Im bõlen em̦m̦anl̦o̦k juon iaan jerbal ko ippam̦ kõnke em̦m̦an ippam̦ jerbal eo im el̦apl̦o̦k on̦ããn. Bõtab, ebar wõr men ko jet kwõj aikuj l̦õmn̦ak kaki m̦okta jãn am̦ kããlõt jerbal ta eo kwõnaaj bõke.
13 Ñan waanjoñak, jerbal kein ruo renaaj ke idaaptõk ippãn iien kweilo̦k ko am̦? Bareinwõt, renaaj ke bõk iien ko kwõj aikuji ñan am̦ pãd ippãn baam̦le eo am̦ ñan jipañ er bwe ren m̦õn̦õn̦õ wõt im en epaak kõtaan eo aer ippãn Jeova? Am̦ kajjitõk ippam̦ make kajjitõk kein enaaj jipañ eok ñan likũt “[men] ko raorõkl̦o̦k”—ãinwõt am̦ kabuñ ñan Jeova im lale aikuj ko an baam̦le eo am̦—m̦okta jãn jããn im m̦weiuk. Ãlikin am̦ etale men kein, kiiõ kwõmaroñ kõm̦m̦ane juon jokãlõt me Jeova enaaj kõjeraam̦m̦ane.
14. Ewi wãween an lol̦o̦kjen̦ im yokwe jipañ kõj ñan kõjparok bwe jen jab kal̦õkatip ro jet?
14 Lol̦o̦kjen̦ ej bareinwõt kõm̦akũt kõj ñan lale ewi wãween an pepe eo ad maroñ jelõte ro jet bwe jen jab “kal̦õkatip” er. (Pil. 1:10) Elukkuun aorõk men in ñe jej pepe kõn wãween ad nuknuk ak tõrreejab. Ñan waanjoñak, bõlen em̦m̦an ippãd jet kain jitael̦ ak wãween tõrreejab. Bõtab, ta el̦aññe enaaj kal̦õkatip ro ilowaan im ilikin eklejia eo? Lol̦o̦kjen̦ enaaj jipañ kõj ñan kautiej l̦õmn̦ak im eñjake ko aer. Yokwe enaaj kõm̦akũt kõj ñan kõm̦m̦ani men ko me renaaj bõktok tokjãn ko ñan “ro jet” im ñan kõn̦ak nuknuk ko rekarbõb ak tõrreejab ilo juon wãween ekkar. (1 Kor. 10:23, 24, 32; 1 Tim. 2:9, 10) Ilo ad ãindein, jenaaj kõm̦m̦ane juon jokãlõt me ej kwal̦o̦k ad yokwe im kautiej ro jet.
15. Ta ko kwõj aikuj l̦õmn̦ak kaki m̦okta jãn am̦ em̦m̦akũt kõn juon pepe?
15 Ñe kwõj kõm̦m̦ane juon pepe el̦ap, l̦õmn̦ak kõn ta ko kwõnaaj aikuj kõm̦m̦ani bwe en maroñ tõprak pepe eo am̦. Jesus ear katakin kõj bwe m̦okta jãn ad kõm̦m̦ane juon pepe, jej aikuj ‘lale joñan eo jej aikuji.’ (Luk 14:28) Kõn men in lale joñan maroñ, iien, im jããn ko kwõnaaj aikuji bwe kwõn maroñ kajejjete pepe in am̦. Ewõr iien ko kwõmaroñ aikuj kõnono ippãn baam̦le eo am̦ ñan lale ta eo kajjojo iaaer rej aikuj kõm̦m̦ane bwe ren rejetake pepe eo. Etke eaorõk ñan kõm̦m̦ane men in? Kõnke emaroñ jipañ kaalikkar el̦aññe kwõj aikuj kõm̦m̦an jet ukoktak ak ñe ebar wõr juon pepe ak wãween em̦m̦anl̦o̦k. Im ñe kwõj kitibuji baam̦le eo am̦ im roñjake l̦õmn̦ak ko aer, enaaj kõm̦m̦an bwe ren m̦õn̦õn̦õ in kõm̦m̦ane ijo kun̦aaer im jipañ bwe en tõprak pepe eo am̦.—JK. 15:22.
KÕM̦M̦ANE JUON JOKÃLÕT EMÃLÕTLÕT IM LO TÕPRAK
16. Ta buñtõn ne ko renaaj jipañ eok ñan kõm̦m̦ane juon jokãlõt emãlõtlõt im lo tõprak? (Bar lale bo̦o̦k eo etan “ Kilen Kõm̦m̦ani Pepe ko Remãlõtlõt.”)
16 Ñe em̦õj am̦ l̦oore aolep buñtõn ne ko itulõñ, kwõpojakin kõm̦m̦ane juon jokãlõt emãlõtlõt. Em̦õj am̦ bõk mel̦el̦e im etali naanin kakapilõk ko me renaaj jipañ eok kõm̦m̦ane juon jokãlõt me Jeova enaaj m̦õn̦õn̦õ kake. Kiiõ, kwõmaroñ kajjitõk ippãn Jeova bwe en jipañ eok ñan lo tõprak ilo jokãlõt eo am̦.
17. Ta men eo eaorõk me enaaj jipañ eok ñan kõm̦m̦ani jokãlõt ko rem̦m̦an?
17 Meñe m̦oktal̦o̦k em̦õj am̦ kar kõm̦m̦ani jokãlõt ko remãlõtlõt im lo tõprak, ak keememej bwe men eo eaorõk me enaaj jipañ eok ñan kõm̦m̦ani jokãlõt ko rem̦m̦an, ejjab ilo am̦ atartar ioon imminene im jel̦ãl̦o̦kjen̦ eo am̦, ak ej ilo am̦ atartar ioon mãlõtlõt eo an Jeova. Emaroñ lewaj jel̦ãl̦o̦kjen̦, mel̦el̦e, im lol̦o̦kjen̦ eo em̦ool—jilu men ko raorõk me rej m̦õttan mãlõtlõt. (JK. 2:1-5, UBS) Jeova emaroñ jipañ eok kõm̦m̦ani jokãlõt ko rej kabuñbũruon.—Sam 23:2, 3.
AL 28 Jem̦jerãik Jeova
