1. Ewi wãween ad bõk tokjãn jãn ad kobal̦o̦k ilo Kwõjkwõjin Keememej Mej eo an Jesus kajjojo iiõ?

 EJJEL̦O̦K pere kwõj errã bwe katok in pinmuur eo ej juon menin letok elukkuun em̦m̦an im ejejuwaan! (2 Kor. 9:15) Kõn an Jesus kar katok kõn mour eo an, kwõmaroñ ejaak juon jem̦jerã epaak ippãn Jeova Anij. Bareinwõt ewõr ippam̦ kõjatdikdik eo ñan mour ñan indeeo. Elukkuun lõñ un ko unin ad kam̦m̦oolole Jeova, eo ear letok katok in pinmuur eo kõnke elukkuun yokwe kõj! (Rom 5:8) Bwe jen maroñ dãpij wõt ad kam̦m̦oolol kõn menin letok in im jab mel̦o̦kl̦o̦k men eo Jeova im Jesus rar kõm̦m̦ane ñan kõj, Jesus ear ejaake Kwõjkwõjin Keememej Mej eo an me jej kõm̦m̦ane kajjojo iiõ.—Luk 22:​19, 20.

2. Ta ko jenaaj etali ilo katak in?

² Ilo iiõ in, Kwõjkwõj eo enaaj wal̦o̦k ilo Jãdede, Eprõl̦ 12, 2025. Ejjel̦o̦k pere bwe jej aolep l̦õmn̦ak in pãd ilo naaj iien en̦. Em̦m̦an ñe kõj kajjojo ilo wiik ko m̦okta im ãlikin iien Kwõjkwõj eo, jen kõl̦mãnl̦o̦kjen̦ a kõn men ko Jeova im eo Nejin rar kõm̦m̦ani ñan kõj. Ilo katak in, jenaaj kõnono kõn ta eo katok in pinmuur eo ej katakin kõj kõn Jeova im eo Nejin. Ilo katak eo tok juon, jenaaj kajjioñ mel̦el̦e kõn wãween ad maroñ bõk tokjãn jãn katok in pinmuur eo im wãween ad maroñ kwal̦o̦k ad kam̦m̦oolol.

 MEN KO KATOK IN PINMUUR EO EJ KATAKIN KÕJ KÕN JEOVA

3. Ewi wãween an katok in mour eo an juon armej maroñ karõl̦o̦k elõñ milien armej ro jãn jerawiwi im mej? (Bar lale pija eo.)

³ Katok in pinmuur eo ej katakin kõj kõn an Jeova ekajet jim̦we. (Dut. 32:4) Ewi wãween? L̦õmn̦ak kõn men in: Kõn an kar Adam jab pokake, jaar jolõt jerawiwi im mej. (Rom 5:12) Ñan karõl̦o̦k kõj jãn jerawiwi im mej, Jeova ear karõk bwe Jesus en katok kõn mour eo an. Bõtab ewi wãween an katok in mour eo an juon armej eweeppãn maroñ karõl̦o̦k elõñ milien armej ro jãn jerawiwi im mej? Rijjilõk Paul ej kõmel̦el̦e im ba: “Kõn wõt an kar juon armej [Adam] jab pokake, ear kõm̦m̦an an elõñ armej jerawiwi. Ejja ãindeinl̦o̦k wõt, kõn wõt an juon armej [Jesus] pokake, naaj kõm̦m̦an bwe elõñ armej ren wãnõk.” (Rom 5:19; 1 Tim. 2:6) Mel̦el̦ein bwe kõn an kar juon em̦m̦aan eweeppãn jab pokake, kõj aolep jej kõm̦akoko ñan jerawiwi im mej. Kõn men in, bwe jen maroñ rõl̦o̦k jãn jerawiwi im mej, juon em̦m̦aan eweeppãn ear aikuj pokake Anij.

4. Etke Jeova ear jab kõtl̦o̦k bwe ro nejin Adam me em̦ool bũrueer ren kajju bõk mour indeeo?

⁴ Jesus ear ke aikuj mej bwe en maroñ lo̦mo̦o̦ren kõj? Etke Jeova ear jab kõtl̦o̦k bwe ro nejin Adam me em̦ool bũrueer ren kajju bõk mour indeeo? Ñan kõj armej ro me rejjab weeppãn, jemaroñ l̦õmn̦ak bwe ej juon men ejim̦we im ekkar. Bõtab men in ejjab errã ippãn wãween an Jeova kwal̦o̦k ekajet jim̦we. Kõnke Jeova ej juon eo ejim̦we an jerbal, eban kar kõjekdo̦o̦ne an Adam jab pokake.

5. Etke jemaroñ lõke bwe Jeova enaaj aolep iien kõm̦m̦ane men eo ejim̦we?

⁵ Ta el̦aññe Jeova ear jab letok katok in pinmuur eo im ear kõjekdo̦o̦ne ekajet jim̦we eo an ikijjeen an kõtl̦o̦k bwe ro nejin Adam ren kajju bõk mour indeeo? Eokwe, armej ren kar l̦õmn̦ak el̦aññe Anij enaaj bar kõjekdo̦o̦ne ekajet jim̦we eo an ilo wãween ko jet. Remaroñ pere el̦aññe Jeova enaaj kajejjet aolep kallim̦ur ko an. Ijoke, jejjab aikuj inepata kõn men in. Etke? Kõnke Jeova ear kõm̦m̦ane men eo ejim̦we meñe ear mel̦el̦ein bwe ear aikuj katok kõn eo ej make wõt Nejin. Kõn men in, jemaroñ lõke bwe enaaj aolep iien kõm̦m̦ane men eo ejim̦we.

6. Ta kadkad eo juon me ear kõm̦akũt Jeova ñan jilkintok eo Nejin? (1 Jon 4:​9, 10)

⁶ Katok in pinmuur eo ej katakin kõj kõn ekajet jim̦we eo an Jeova, ejjab men in wõt ak el̦apl̦o̦k an katakin kõj kõn ewi joñan an yokwe kõj. (Jon 3:16; riit 1 Jon 4:​9, 10.) Katok in pinmuur eo ej kaalikkar bwe Jeova ejjab baj kõn̦aan bwe jen bõk mour indeeo, ak ekõn̦aan bwe jen uwaan baam̦le eo an. L̦õmn̦ak kõn  men in: Ke Adam ear jerawiwi, Jeova ear kadiwõjl̦o̦ke jãn baam̦le eo An. Tokjãn men in, jel̦ak l̦otaktok jejjab uwaan baam̦le eo an Anij. Bõtab ikijjeen katok in pinmuur eo, Jeova ej jeorl̦o̦k jerawiwi ko ad im enaaj tokãlik kadel̦o̦ñtok aolep ro me rej kwal̦o̦k aer tõmak im rej pokake ñan ilowaan baam̦le eo an. Joñan ilo tõre in, emaroñ wõr juon ad kõtaan epaak ippãn Jeova im ippãn rũttõmak ro m̦õttad. Alikkar bwe Jeova ej lukkuun yokwe kõj!—Rom 5:​10, 11.

7. Kõnke Jesus ear eñtaan, ewi wãween an men in jipañ kõj mel̦el̦e ewi joñan an Jeova lukkuun yokwe kõj?

⁷ Emaroñ l̦apl̦o̦k ad mel̦el̦e kõn joñan an Jeova lukkuun yokwe kõj ñe jej kõl̦mãnl̦o̦kjen̦ kõn joñan an kar metak ke ear lo an eo Nejin eñtaan. Setan ej ba bwe aolep ri-karejar ro an Anij reban dãpij wõt aer tiljek ñan E ñe rej iioon wãween ko reppen. Ñan kam̦ool bwe Setan ej riab, Jeova ear kõtl̦o̦k bwe Jesus en eñtaan m̦okta jãn an kar mej. (Job 2:​1-5; 1 Pit. 2:21) Jeova ear lale an ri-tõlin kabuñ ro kõm̦m̦an kõjak kake Jesus, an rũttarin̦ae ro deñl̦o̦ke, im aer dilaiki ilo juon jurõn al̦al̦. Innem Jeova ear lale an eo Nejin me ejitõnbõro ippãn eñtaan m̦ae iien emej. (Matu 27:​28-31, 39) Ear wõr an Jeova kajoor im maroñ ñan kabõjrake aer kaeñtaan im m̦ane Jesus. Ñan waanjoñak, Jeova emaroñ kar kabõjrake ri-jum̦ae ro ilo iien eo rar ba: “El̦aññe Anij ej lukkuun kaorõke, eokwe en lo̦mo̦o̦rene.” (Matu 27:​42, 43) Ijoke, el̦aññe Anij en kar ãindein, Jesus eban kar kõl̦l̦ã kõn mour eo an im en kar ejjel̦o̦k ad kõjatdikdik. Kõn men in, Jeova ear kõtl̦o̦k bwe eo Nejin en eñtaan m̦ae iien ear jol̦o̦k kũtuon.

8. Jeova ear ke metak ke ear lo an eo Nejin eñtaan? Jouj im kõmel̦el̦e. (Bar lale pija eo.)

⁸ Jejjab aikuj bõk l̦õmn̦ak eo bwe kõnke Anij ej eo ekajoor bõtata, ejjel̦o̦k an eñjake. Jeova ear kõm̦anm̦an kõj bwe en wõr ad eñjake. Im kõnke Baibõl̦ ej ba bwe kar kõm̦anm̦an kõj ilo nemãmeen wõt E, alikkar bwe ebar wõr an Jeova eñjake. Baibõl̦ ej kõmel̦el̦e im ba bwe ewõr iien ko Jeova ear bũrom̦õj im metak. (Sam 78:​40, 41) Bareinwõt, l̦õmn̦ak kõn ta eo ear wal̦o̦k ñan Ebream im Aisak. Jeova ear ba ñan Ebream bwe en katok kõn l̦eo ej make wõt nejin. (Jen. 22:​9-12; Hib. 11:​17-19) Baj pijaikl̦o̦k m̦õk joñan an kar Ebream bũrom̦õj im inepata ke ear pojakin m̦ane l̦eo ej make wõt nejin. Eokwe, baj l̦õmn̦ak m̦õk kõn joñan an kar l̦apl̦o̦k an Jeova bũrom̦õj im metak ke armej ro rar lukkuun lãj ilo aer m̦ane eo Nejin!—Lale pijain alwõj eo etan Imitate Their Faith—Abraham, Part 2 ilo jw.org.

9. Ta eo Rom 8:​32, 38, 39 ej katakin kõj kõn yokwe eo an Jeova?

⁹ Katok in pinmuur eo ej katakin kõj bwe ejjel̦o̦k en̦ emaroñ yokwe kõj ãinwõt an Jeova  yokwe kõj—jekdo̦o̦n ro nukũd ak ro m̦õttad me jelukkuun epaake er. (Riit Rom 8:​32, 38, 39.) Ejjel̦o̦k pere bwe Jeova ej yokwe kõj el̦apl̦o̦k jãn ad yokwe kõj make. Kokõn̦aan ke mour ñan indeeo? Eokwe, el̦apl̦o̦k an Jeova kõn̦aan bwe kwõn mour indeeo. Kokõn̦aan ke bwe Jeova en jeorl̦o̦k am̦ bõd? Eokwe, el̦apl̦o̦k an Jeova kõn̦aan bwe en jeorl̦o̦k am̦ bõd. Men eo wõt ej kajjitõk jãn kõj ej bwe jen kwal̦o̦k ad kam̦m̦oolol kõn katok in pinmuur eo ikijjeen ad kwal̦o̦k ad tõmak ilo E im pokake E. Em̦ool bwe pinmuur eo ej lukkuun kwal̦o̦k yokwe eo an Anij. Im ilo lal̦ eo ekããl, jenãj kal̦apl̦o̦k ad jel̦ã kõn yokwe eo an Jeova ñan kõj.—Ekl. 3:11.

MEN KO KATOK IN PINMUUR EO EJ KATAKIN KÕJ KÕN JESUS

10. (1) Etke Jesus ear lukkuun bũrom̦õj ke kar liaakel̦o̦k ñan mej? (2) Ilo wãween et Jesus ear jojomare ãt eo etan Jeova? (Bar lale bo̦o̦k eo etan “ Jesus Ear Jojomare Etan Jeova Ikijjeen an kar Dãpij Wõt an Tiljek.”)

¹⁰ El̦ap an Jesus kea kõn wãween an ro jet watõk Jemãn. (Jon 14:31) Ke kar n̦aruon Jesus im ba bwe ear kõnono n̦ae Anij im jum̦ae kien, Jesus ear lukkuun bũrom̦õj kõnke men in enaaj kar kattoone ãt eo etan Jemãn. Eñin unin ear jar im ba: “Jema, ñe em̦m̦an, kwõn bõk cup in jãn ña.” (Matu 26:39) Ijoke, kõnke Jesus ear dãpij wõt an tiljek ñan Jeova m̦ae iien emej, ear maroñ jojomare etan Jeova ak kam̦ool bwe eriab men ko Setan ear ba kõn Jemãn.

11. Ewi wãween an kar Jesus kwal̦o̦k an lukkuun yokwe armej? (Jon 13:1)

¹¹ Katok in pinmuur eo ej bareinwõt katakin kõj bwe Jesus ej lukkuun kea kõn armej, el̦aptata ri-kal̦oor ro an. (JK. 8:​31, UBS; riit Jon 13:1.) Ñan waanjoñak, Jesus ear jel̦ã bwe enaaj lukkuun pen jet iaan men ko enaaj kar aikuj kõm̦m̦ani ijin ioon lal̦, el̦aptata an  naaj aikuj mej ilo juon wãween ekaeñtaanan. Bõtab Jesus ear kõm̦m̦ani men kein meñe relukkuun pen. Ear ãindein ejjab kõn wõt an kar Jeova jitõñe, ak men eo el̦aptata, ej kõnke elukkuun yokwe armej ro. Jesus ear lel̦o̦k aolepen an ilo an kar kwal̦o̦k naan, katakin, im jerbal ñan ro jet. Joñan, ilo raan eo ear pojakin mej, Jesus ear kwal̦ neen rijjilõk ro an im lel̦o̦k naanin kaenõm̦m̦an im naanin tõl ko ñan er. (Jon 13:​12-15) Innem, ke ear toto ilo jurõn al̦al̦ eo, Jesus ear jol̦o̦k jidik iien ñan lel̦o̦k an ri-nana eo iturin kõjatdikdik ikijjeen an ba ñane bwe enãj pãd ilo Pedetaij. Bareinwõt ear kajjitõk bwe Jon en lale im kõjparoke jinen. (Luk 23:​42, 43; Jon 19:​26, 27) Alikkar an kar Jesus lukkuun yokwe armej, ejjab ikijjeen wõt an kar mej ak bareinwõt ilo wãween an kar mour ijin ioon lal̦.

12. Ta ko Jesus ej wõnm̦aanl̦o̦k wõt im kõm̦m̦ani ñan kõj?

¹² Em̦ool bwe Christ ear mej “juon wõt alen,” ak ej wõnm̦aanl̦o̦k wõt im kõm̦m̦ani elõñ men ko ñan kõj. (Rom 6:10) Ewi wãween an kõm̦m̦ane men in? Ej wõnm̦aanl̦o̦k wõt im kõjerbal iien im maroñ ko an ñan jipañ kõj bõk elõñ jeraam̦m̦an ko ikijjeen katok in pinmuur eo. L̦õmn̦ak kõn ta ko ej poub kaki. Ej jerbal ãinwõt Kiiñ eo ad, Bũrij L̦apl̦ap, im bõran eklejia eo. (1 Kor. 15:25; Eps. 5:23; Hib. 2:17) Ej an eddo ñan aini rũkkapit ro im ro uwaan jar eo el̦ap, juon jerbal me enaaj dedel̦o̦k m̦okta jãn an jem̦l̦o̦k eñtaan eo el̦ap. b (Matu 25:32; Mark 13:27) Ej bareinwõt lale bwe en em̦m̦an an ri-karejar ro an retiljek bõk kijeer ilo kõkkar ilo raan kein ãliktata. (Matu 24:45) Im ium̦win Juon To̦ujin Iiõ ko in an Christ Irooj, enaaj wõnm̦aanl̦o̦k wõt im kõm̦m̦ani elõñ men ko ñan kõj. Lukkuun m̦ool bwe Jeova ear letok eo Nejin ñan kõj!

JAB BÕJRAK JÃN AM̦ KATAK

13. Ñe kwõj kõl̦mãnl̦o̦kjen̦ kõn eoon ko kwõj riiti, ewi wãween an men in maroñ jipañ eok ñan wõnm̦aanl̦o̦k wõt im katak kõn yokwe eo an Anij im Jesus ñan kõj?

¹³ Kwõmaroñ wõnm̦aanl̦o̦k wõt im katak kõn yokwe eo an Jeova Anij im Jesus Christ ñan kõj ñe kwõj wõnm̦aanl̦o̦k wõt im kõl̦mãnl̦o̦kjen̦ kake. Bõlen ilo wiik ko m̦okta im ãlikin iien Kwõjkwõj eo, kwõmaroñ riiti juon ak jet iaan bokin Gospel ko. Jab kajjioñ riiti elõñ eoon ko ilo juon wõt iien. Ijoke, kwõn bõk am̦ iien im lale un ko jet unin ad aikuj yokwe Jeova im Jesus. Im kwal̦o̦k ñan ro jet men ko kwõj katak kaki.

14. Ekkejell̦o̦k ippãn Sam 119:​97, ñe jej pukot mel̦el̦e ko, ewi wãween men in emaroñ jipañ kõj ñan wõnm̦aanl̦o̦k wõt im katak kõn katok in pinmuur eo im katak ko jet? (Bar lale pija eo.)

 ¹⁴ El̦aññe eto am̦ pãd ilo m̦ool eo, kwõmaroñ l̦õmn̦ak el̦aññe ej wõr wõt men ko rekããl kwõmaroñ katak kõn katak ko em̦õj am̦ jel̦ã kaki, ãinwõt ekajet jim̦we eo an Anij, yokwe eo an, im katok in pinmuur eo. Ilo m̦ool, eban jem̦l̦o̦k ad katak kõn men kein im katak ko jet. Innem, ta eo kwõmaroñ kõm̦m̦ane? Lukkuun kortokjãn mel̦el̦e ko ilo bok ko ad. Ñe ewõr juon eoon kwõjjab lukkuun mel̦el̦e kake, pukot mel̦el̦e ko ñan jipañ eok. Innem ilowaan raan eo, kõl̦mãnl̦o̦kjen̦ kake men ko rekããl kwaar katak kaki im kõn ta ko men kein rej katakin eok kõn Jeova, eo Nejin, im kõn yokwe eo aerro ñan kwe.—Riit Sam 119:97.

15. Etke eaorõk bwe jen wõnm̦aanl̦o̦k wõt im kappok katak ko rekããl ilo Baibõl̦?

¹⁵ Jab ebbweer ñe kwõjjab ellolo juon mel̦el̦e ekããl ak ekãitoktoklimo kajjojo iien kwõj riit ak pukot mel̦el̦e ko. Ilo juon wãween, kwõj ãinwõt juon armej me ej kappok gold. Armej ro rej kappok gold, ekkã aer kijenmej im jol̦o̦k elõñ awa im raan m̦ae iien rellolo juon gold jiddik. Meñe ãindein ak rej wõnm̦aanl̦o̦k wõt kõnke el̦ap an aorõk ippãer jabdewõt gold rej loe. Eokwe, el̦apl̦o̦k an aorõk kajjojo iaan katak ko rekããl jej loi ilo Baibõl̦! (Sam 119:127; JK. 8:​10, UBS) Kõn men in, kwõn kijenmej im eddãp wõt ñan jikejuul̦ eo am̦ ñan riiti Baibõl̦ eo.—Sam 1:2.

16. Ewi wãween jemaroñ anõke Jeova im Jesus?

¹⁶ Ñe kwõj katak, pukot wãween ko kwõmaroñ jerbali men ko kwõj katak kaki. Ñan waanjoñak, anõke an Jeova kwal̦o̦k ekajet jim̦we ikijjeen am̦ jab kalijekl̦o̦k ñan ro jet. Anõke yokwe eo an Jesus ñan Jemãn im ro jet ikijjeen am̦ m̦õn̦õn̦õ in eñtaan kõn etan Jeova im jipañ ro jet meñe jet iien emaroñ apañ ñan kwe. Bareinwõt, anõke Jesus ikijjeen am̦ kwal̦o̦k naan ñan ro jet bwe ren bar jel̦ã im bõk tokjãn jãn menin letok eo an Jeova ejejuwaan.

17. Ta ko jenaaj kõnono kaki ilo katak eo tok juon?

¹⁷ Ñe jej kal̦apl̦o̦k ad mel̦el̦e im kaorõk katok in pinmuur eo, enaaj l̦apl̦o̦k ad yokwe Jeova im eo Nejin. Tokjãn men in, enaaj l̦apl̦o̦k aerro yokwe kõj. (Jon 14:21; Jem. 4:8) Kõn men in, jen kortokjãn aolep men ko Jeova ej litok bwe jen maroñ wõnm̦aanl̦o̦k wõt im katak kõn katok in pinmuur eo. Ilo katak eo tok juon, jenaaj kõnono kõn jet iaan wãween ko jemaroñ bõk tokjãn jãn katok in pinmuur eo im kwal̦o̦k ad kam̦m̦oolol Jeova kõn yokwe eo an.