1. Ta eo jemaroñ kõm̦m̦ane ñan kam̦õn̦õn̦õik Jeova

 PIJAIKL̦O̦K am̦ lel̦o̦k juon menin lel̦o̦k eaiboojoj im ewõr tokjãn ñan juon eo ejitõnbõro ippam̦. Kwõnaaj kar bũrom̦õj ñe armej eo ej kakon̦e ilo juon jikin im jab bar l̦õmn̦ak kake! Bõtab, kwõnaaj kar m̦õn̦õn̦õ ñe armej eo ej kõjerbale im kwal̦o̦k an kam̦m̦oolol kake. Ta mel̦el̦ein men in? Jeova ear ajetok Nejin kõn kõj. El̦ap an naaj Jeova m̦õn̦õn̦õ ñe jej kwal̦o̦k ad kam̦m̦oolol kõn menin letok eo an eaorõk im kõn yokwe eo an me ear kõm̦akũt e ñan letok katok in pinmuur eo!—Jon 3:16; Rom 5:​7, 8.

2. Ta ko jenaaj etali ilo katak in?

² Bõtab, el̦ak mootl̦o̦k iien, jemaroñ jino mel̦o̦kl̦o̦k aorõkin katok in pinmuur eo. Emaroñ ãinwõt ñe jej likũt menin letok eo an Anij ilo juon jikin kakkon̦kon̦. Jej m̦õn̦õn̦õ kake bõtab jej likũti ilo jikin en̦ojak. Ñan bõbrae men in jãn an wal̦o̦k, jej aikuj ekkeini ad kõl̦mãnl̦o̦kjen̦ kõn aolep men ko Anij im Jesus rar kõm̦m̦ani ñan kõj. Katak in enaaj jipañ kõj ñan kõm̦m̦ane men in. Jenaaj etale ewi wãween jemaroñ bõk tokjãn jãn katok in pinmuur eo kiiõ im ilju im jekl̦aj. Jenaaj bar etale ewi wãween jemaroñ kwal̦o̦k ad kam̦m̦oolol Jeova kõn yokwe eo an, el̦aptata ilo wiik ko m̦okta im ãlikin iien Kwõjkwõj eo.

WÃWEEN JEJ BÕK TOKJÃN KIIÕ

3. Ta juon iaan wãween ko jemaroñ bõk tokjãn kiiõ jãn katok in pinmuur eo?

³ Em̦õj kadede ad jino bõk tokjãn jãn katok in pinmuur eo an Christ. Ñan waanjoñak, ikijjeen katok in pinmuur eo, Jeova ej jol̦o̦k bõd ko ad. Ejjab juon men ej aikuj kõm̦m̦ane. Ak ekõn̦aan kõm̦m̦ane. Kõn an wõr an kam̦m̦oolol, juon ri-jeje sam ear al im ba: “Bwe Kwe Irooj [Jeova] Kwõj em̦m̦an, im kõn̦aan jol̦o̦k bõd.”—Sam 86:5; 103:​3, 10-13.

4. Jeova ear lel̦o̦k katok in pinmuur eo ñan wõn? (Luk 5:32; 1 Timote 1:15)

 ⁴ Jet iaad jemaroñ l̦õmn̦ak bwe ejjab tõllo̦kũn an Jeova jol̦o̦k bõd ko ad. Ilo m̦ool, ejjab tõllo̦kũn bwe en jol̦o̦k an aolep bõd. Rijjilõk Paul ear mel̦el̦e bwe ‘ejjab tõllo̦kũn bwe ren n̦aetan rijjilõk.’ Bõtab, ear wõnm̦aanl̦o̦k im ba: “Kõn wõt jouj eo el̦ap an Anij, ña ij juon rijjilõk.” (1 Kor. 15:​9, 10) Ñe jej ukel̦o̦k jãn bõd ko ad, Jeova ej jol̦o̦k ad bõd. Etke? Ejjab kõnke ej tõllo̦kid, ak kõnke ej yokwe kõj. Ñe jej inepata bwe ejjel̦o̦k tokjãd, keememej bwe Jeova ear jab lel̦o̦k katok in pinmuur eo ñan ro rewãnõk, ijoke ear lel̦o̦k ñan rijjerawiwi ro me rej ukel̦o̦k.—Riit Luk 5:32; 1 Timote 1:15.

5. Ekkar ke ñan bõk l̦õmn̦ak eo bwe ej tõllo̦kid ñan bõk tũriam̦o jãn Jeova? Jouj im kõmel̦el̦e.

⁵ Ejjel̦o̦k juon iaad ej aikuj bõk l̦õmn̦ak eo bwe ej tõllo̦kid ñan bõk tũriam̦o jãn Jeova meñe jaar jerbal ñan e ium̦win elõñ iiõ. Em̦ool bwe Jeova ej kam̦m̦oolol kõj kõn aolep men ko jaar kõm̦m̦ani ñan e ilo tiljek. (Hib. 6:10) Ear letok Nejin ãinwõt juon menin letok ejjel̦o̦k on̦ããn, ejjab ñan kõl̦l̦ãik kõj kõn jerbal ko ad. El̦aññe jaar bõk l̦õmn̦ak in bwe ear kõl̦l̦ãik kõj kõn jerbal eo jaar kõm̦m̦ane ñan e, ejjab jim̦we l̦õmn̦ak in. El̦aññe jej bõk l̦õmn̦ak in, ej mel̦el̦ein bwe ear ejjel̦o̦k tokjãn an Jesus mej.—Keidi Galetia 2:21.

6. Etke Paul ear kijejeto wõt ilo jerbal eo an Jeova?

⁶ Paul ear jel̦ã bwe jekdo̦o̦n ewi joñan an kar jerbal ñan Jeova ak ear jab maroñ bõk tũriam̦o jãn e. Innem, etke ear lukkuun kate an jerbal ñan Jeova? Ejjab ñan kam̦ool bwe ej tõllo̦kũn bwe Jeova en kwal̦o̦k jouj ñan e, ak ej ñan kwal̦o̦k an kam̦m̦oolol kõn jouj eo el̦ap jãn Jeova. (Eps. 3:7) Ãinwõt Paul, jej wõnm̦aanl̦o̦k im jerbal ilo kijejeto, ejjab ñan bõk tũriam̦o jãn Jeova, ak ñan kwal̦o̦k kam̦m̦oolol kake.

7. Bar ta wãween eo juon jej bõk tokjãn jãn katok in pinmuur eo kiiõ? (Rom 5:1; Jemes 2:23)

⁷ Bar juon wãween jej bõk tokjãn jãn katok in pinmuur eo kiiõ ej bwe emaroñ wõr juon ad jem̦jerã epaak ippãn Jeova. a Ãinwõt an kar kwal̦o̦k ilo katak eo lo̦k im̦aan, ke jaar l̦otak, kar ejjel̦o̦k ippãd juon jem̦jerã ippãn Anij. Ak ikijjeen katok in pinmuur eo, jemaroñ mour “ilo aenõm̦m̦an ippãn Anij” im jemaroñ epaakel̦o̦k e.—Riit Rom 5:1; Jemes 2:23.

8. Etke jej aikuj kam̦m̦oolol Jeova kõn jeraam̦m̦an eo kõn jar?

⁸ L̦õmn̦ak kõn juon iaan men ko me ej m̦õttan jem̦jerã eo ad ippãn Jeova—jeraam̦m̦an eo kõn jar. Jeova ej roñjake jar ko an armej ro ilo̦bwilej ñe rej kweilo̦k ippãn doon im bareinwõt ñe rej jar ippãer make. Jar emaroñ kaenõm̦m̦an bũruod im l̦õmn̦ak eo ad, bõtab ejjab tokjãn eo dein jej bõke ikijjeen jar. Emaroñ kam̦wilal̦l̦o̦k jem̦jerã eo ad ippãn Anij. (Sam 65:2; Jem. 4:8; 1 Jon 5:14) Ke Jesus ear pãd ijin ioon lal̦, eokkutkut an jar kõnke ear jel̦ã bwe Jeova ear roñjake im bwe jar ko an renaaj dãpij juon jem̦jerã ekajoor ippãn Jemãn. (Luk 5:16) El̦ap ad kam̦m̦oolol bwe, ikijjeen katok in pinmuur eo an Jesus, jemaroñ jerãik Jeova im kõnono ñan E ilo jar!

WÃWEEN JEMAROÑ BÕK TOKJÃN ILJU IM JEKL̦AJ

9. Ewi wãween an ri-karejar ro retiljek naaj bõk tokjãn jãn katok in pinmuur eo ilju im jekl̦aj?

⁹ Ewi wãween an ri-karejar ro retiljek naaj bõk tokjãn jãn katok in pinmuur eo ilju im jekl̦aj? Renaaj bõk mour indeeo. Elõñ armej rej l̦õmn̦ak bwe men in eban wal̦o̦k kõnke ium̦win to̦ujin iiõ ko ejjañin bõjrak an armej ro  mej. Bõtab, jãn jinoin, Jeova ear karõk bwe armej ro ren mour ñan indeeo. El̦aññe Adam ear jab jerawiwi, ejjel̦o̦k juon emaroñ l̦õmn̦ak bwe jeban mour ñan indeeo. Meñe epen ad pijaikl̦o̦k ad mour ñan indeeo kiiõ ak jemaroñ tõmak bwe jenaaj kõnke jejel̦ã bwe Jeova ear kõl̦l̦ãiki juon on̦ããn el̦ap kõn mour eo an Nejin ej make wõt bwe men in en tõprak.—Rom 8:32.

10. Ta eo rũkkapit ro im jiip ro jet rej reim̦aanl̦o̦k ñane?

¹⁰ Meñe mour indeeo ej juon jeraam̦m̦an enaaj wal̦o̦k ilo ilju im jekl̦aj, ak Jeova ekõn̦aan bwe jen l̦õmn̦ak kake kiiõ. Rũkkapit ro rej reim̦aanl̦o̦k ñan bõk juon mour el̦ap tokjãn ilañ ñe renaaj irooj im tõl iaolepen lal̦ ippãn Christ. (Rev. 20:6) Jiip ro jet rej reim̦aanl̦o̦k ñan mour ilo Pedetaij ioon lal̦ eo me ejjel̦o̦k eñtaan im bũrom̦õj ie. (Rev. 21:​3, 4) Kwõj ke juon iaan jiip ro jet me ej reim̦aanl̦o̦k im mour ñan indeeo ioon lal̦? Ãjinkõj in ejjab dikl̦o̦k jãn jeraam̦m̦an eo ñan mour ilo lañ. Jeova ear kõm̦anm̦an kõj bwe jen mour ioon lal̦, innem mour ñan indeeo ioon lal̦ enaaj lukkuun kam̦õn̦õn̦õik kõj.

11-12. Ta jet iaan jeraam̦m̦an ko jej kijooror in loi ilo Pedetaij? (Bar lale pija ko.)

¹¹ Pijaikl̦o̦k m̦õk kõn kain mour rot eo kwõnaaj loe ilo Pedetaij eo ioon lal̦. Kwõban inepata kõn am̦ nañinmej ak mej. (Ais. 25:8; 33:24) Jeova enaaj lewaj aolep men ko rekkar im kokõn̦aan. Ta men ko kokõn̦aan katak kaki? Menninmour ko? Al im kõjañjañ? Kokõn̦aan ke jiña? Ejjel̦o̦k pere bwe, jenaaj aikuji ro me rejel̦ã kõm̦m̦an bũl̦ããn in ekkal em̦, rũkkal ro, im ri-kallib ro. Im jenaaj aikuj armej ro ñan kaddek im kõm̦m̦an m̦õñã, kõm̦m̦an kein jerbal ko, im ekkat jikin kallib ko im kõjparoki. (Ais. 35:1; 65:21) Ñe kwõnaaj mour ñan indeeo, enaaj wõr iien ñan am̦ kõm̦m̦ani aolep men kein im elõñ im lõñ bar men ko jet.

¹² Enaaj juon iien ekalañlõñ ñan ad karwaineneik tok ro me renaaj jerkakpeje im mour! (Jrb. 24:15) Bar l̦õmn̦ake m̦õk kõn wãween  am̦ naaj kal̦apl̦o̦k am̦ jel̦ã kõn Jeova ikijjeen am̦ etale menin kõm̦anm̦an ko an rellõñ. (Sam 104:24; Ais. 11:9) Men eo em̦m̦antata, kwõjjãmin bar kõm̦m̦an jabdewõt bõd, innem kwõnaaj maroñ karejar ñan Jeova im kwõjjãmin bar aikuj kajjitõk ñan jol̦o̦k am̦ bõd! Kwõnaaj ke kar kõjekdo̦o̦n am̦ mour ilo Pedetaij im bõk mour eo ej kam̦õn̦õn̦õik kwe make kiiõ? (Hib. 11:25) Jaab ñan jidik! Mour eo jenaaj bõke tokãlik enaaj lukkuun em̦m̦anl̦o̦k jãn jabdewõt men jemaroñ bõke jãn lal̦ in kiiõ. Keememej, Pedetaij eo ijin ioon lal̦ eban baj juon kõjatdikdik wõt. Ej juon kõjatdikdik enaaj lukkuun m̦ool an jejjet kũtien. Men in eban kar wal̦o̦k el̦aññe ear jab l̦ap an Jeova yokwe kõj im letok Nejin ñan lo̦mo̦o̦ren kõj!

KWAL̦O̦K AM̦ KAM̦M̦OOLOL JEOVA KÕN YOKWE EO AN

13. Ewi wãween jemaroñ kwal̦o̦k ad kam̦m̦oolol Jeova kõn yokwe eo an? (2 Korint 6:1)

¹³ Ewi wãween ad maroñ kwal̦o̦k kam̦m̦oolol ñan Jeova kõn an kar letok katok in pinmuur eo? Ej ilo ad kõm̦m̦an bwe ad karejar ñane en men eo aorõktata ilo mour eo ad. (Matu 6:33) Ilo m̦ool Jesus ear mej “bwe ro rej mour ren jab bar mour ñan er make, ak bwe ren mour ñan eo ear mej kõn er im kar kõjerkake jãn mej.” (2 Kor. 5:15) Jejjab kõn̦aan kajejtokjãn jouj eo el̦ap an Anij.—Riit 2 Korint 6:1.

14. Ewi wãween ad maroñ kwal̦o̦k bwe jej lõke Jeova im l̦oor naanin tõl ko an?

¹⁴ Jemaroñ bareinwõt kwal̦o̦k ad kam̦m̦oolol Jeova kõn yokwe eo an ilo ad lõke im l̦oor naanin tõl ko an. Ewi wãween? Jej aikuj l̦õmn̦ak kõn ta eo Jeova ekõn̦aan bwe jen kõm̦m̦ane ñe jej kõm̦m̦an pepe ko, ãinwõt ewi joñan jel̦ãl̦o̦kjen̦ jãn jikuul̦ jej aikuji ak kain jerbal rot ko jenaaj kããlõti. (1 Kor. 10:31; 2 Kor. 5:7) Ñe jej jerbale tõmak eo ad, juon men ekabwilõñlõñ enaaj wal̦o̦k—tõmak eo ad im jem̦jerã eo ad ippãn Jeova enaaj kajoorl̦o̦k. Kõjatdikdik eo ad enaaj lukkuun l̦apl̦o̦k an m̦ool ñan kõj.—Rom 5:​3-5; Jem. 2:​21, 22.

15. Ewi wãween ad maroñ kwal̦o̦k ad kam̦m̦oolol ilo wiik ko m̦okta im ãlikin iien Kwõjkwõj eo?

¹⁵ Ebar wõr juon wãween me jemaroñ kwal̦o̦k ad kam̦m̦oolol Jeova kõn yokwe eo an. Ej ilo ad kõjerbal wiik ko m̦okta im ãlikin iien Kwõjkwõj eo ñan kwal̦o̦k ad kam̦m̦oolol kõn katok in pinmuur eo joñan wõt ad maroñ. Jemaroñ pepel̦o̦k im̦aan iien Kwõjkwõj eo ñan kũrtok armej ro jet ñan kobatok ippãd ilo iien Kwõjkwõj eo bareinwõt. (1 Tim. 2:4) Kõmel̦el̦e ñan ro im kwõj kũrtok er kõn ta ko renaaj wal̦o̦k ilo iien Kwõjkwõj eo. Kwõnaaj lo bwe elukkuun l̦ap an jipañ ñe kwõj kwal̦o̦k ñan er pijain alwõj ko ilo jw.org weepjait eo ãinwõt Etke Jesus Ear Mej? im Keememej Mej eo an Jesus. Em̦m̦aan ro rej lale eklejia rej aikuj kate er ñan kũrtok aolep ro rejjab ekkeini aer kwal̦o̦k naan. L̦õmn̦akel̦o̦k an naaj l̦ap lañlõñ ilañ im ilal̦ jim̦or ñe jet iaan jiip ko an Jeova rar  jebwãbwe rej bar jepl̦aaktok ñan doulul eo an! (Luk 15:​4-7) Ilo iien Kwõjkwõj eo, jen kõm̦m̦an bwe en juon ad mejãnkajjik ñan jab karwaineneik ro jeid im jatid wõt ak el̦aptata ñan ro rekããl ak ro eto aer jab kobatok ippãd. Jekõn̦aan kõm̦m̦an bwe ren eñjake aer ruwainene!—Rom 12:13.

16. Etke em̦m̦an ñan kal̦apl̦o̦k ijo kun̦aad ilo jerbalin kwal̦o̦k naan ilo wiik ko m̦okta im ãlikin iien Kwõjkwõj eo?

¹⁶ Kwõmaroñ ke kal̦apl̦o̦k am̦ kwal̦o̦k naan ilo wiik ko m̦okta im ãlikin iien Kwõjkwõj eo? Eñin ej juon wãween em̦m̦an ñan kwal̦o̦k ad kam̦m̦oolol kõn aolep men ko Anij im Jesus rar kõm̦m̦ani ñan kõj. Ñe jej kal̦apl̦o̦k ijo kun̦aad ilo jerbalin kwal̦o̦k naan, enaaj l̦apl̦o̦k ad lo an Jeova jipañ kõj. Im tokjãn men in, enaaj l̦apl̦o̦k ad lõke. (1 Kor. 3:9) Bareinwõt, kate eok ñan l̦oore jikejuul̦in riit Baibõl̦ ñan iien Kwõjkwõj eo me epãd ilo Liñõri Baibõl̦ Raan Otemjej ak ilo jaat eo me ej pãd ilo Jerbal eo Ad im Wãween Ad Mour—Kein Katak. Kwõmaroñ bareinwõt katak kõn jet iaan eoon kein ilo jikejuul̦ in ñe kwõj katak ippam̦ make.

17. Ta eo ej kam̦õn̦õn̦õik bũruon Jeova? (Bar lale bo̦o̦k eo etan “ Wãween Ad Maroñ Kwal̦o̦k Ad Kam̦m̦oolol Jeova kõn Yokwe eo An.”)

¹⁷ Bõlen kwõjjab maroñ kõm̦m̦ani aolep men ko jaar kõnono kaki ilo katak in kõn wõt wãween eo kwõj pãd ie. Bõtab em̦m̦an ñan keememej bwe Jeova ejjab keidi joñan men ko kwõj lil̦o̦k ñane ippãn ro jet. Elukkuun jel̦ã joñan am̦ yokwe E. El̦ap an m̦õn̦õn̦õ ñe ej lo am̦ kwal̦o̦k am̦ kam̦m̦oolol kõn menin letok eo jãne me ejejuwaan, katok in pinmuur eo.—1 Sa. 16:7; Mark 12:​41-44.

18. Etke el̦ap ad kam̦m̦oolol Jeova Anij im Jesus Christ?

¹⁸ Kõn wõt katok in pinmuur eo, Jeova emaroñ jeorl̦o̦k ad bõd, jemaroñ jem̦jerãiki, im ewõr ad kõjatdikdik ñan mour indeeo. Jen aolep iien kwal̦o̦k ad kam̦m̦oolol Jeova kõn yokwe eo an kõnke eñin men eo ear kõm̦akũti ñan kõm̦m̦an bwe jen maroñ bõk tokjãn jãn jeraam̦m̦an kein. (1 Jon 4:19) Jen bareinwõt kwal̦o̦k ad kam̦m̦oolol Jesus, eo me joñan an lukkuun yokwe kõj, ear mej kõn kõj!—Jon 15:13.