L̦õmn̦ak kõn wãween an Baibõl̦ uwaaki kajjitõk kein.

Jerbal 24:15 ej jiroñ kõj bwe enaaj wõr “juon iien jerkakpeje ñan ro rewãnõk im ro rejjab wãnõk jim̦or.” Ro rewãnõk ej ro rar pokake Anij m̦okta jãn aer kar mej, im em̦õj je etaer ilo bokin mour eo. (Mal. 3:16) Ro rejjab wãnõk ej kitibuj ro rar mej ak ear jab lukkuun bwe ak pel̦l̦o̦k iien ñan aer katak kõn Jeova, im kar jab je etaer ilo bokin mour eo.

Jon 5:28, 29 ej bar jitõñl̦o̦k ñan ejja kumi kein ruo wõt me Jerbal 24:15 ej kõnono kake er. Jesus ear ba bwe “ro rar kõm̦m̦an em̦m̦an renaaj jerkakpeje ñan mour, im ro rar kõm̦m̦ani men ko renana renaaj jerkakpeje ñan bõk ekajet.” Ro rewãnõk rar kõm̦m̦ani men ko rem̦m̦an m̦okta jãn aer kar mej. Renaaj jerkakpeje tok im mour kõnke etaer ej pãdwõt ilo bokin mour eo. Bõtab, ro rejjab wãnõk rar kõm̦m̦ani men ko renana m̦okta jãn aer kar mej. Renaaj jerkakpeje tok im bõk ekajet. Etaer ejjañin kar pãd ilo bokin mour eo, im enaaj juon iien ñan aer bõk ekajet ak naaj lale im etali men ko rej kõm̦m̦ani. Ilo iien en̦, enaaj pel̦l̦o̦k iien ñan aer katak kõn Jeova im kõm̦m̦an bwe etaer en jeje ilo bokin mour eo.

Revelesõn 20:12, 13 ej kwal̦o̦k bwe aolep ro renaaj jerkakpeje renaaj aikuj pokake “men ko kar jei ilo bok lemlem [ko],” mel̦el̦ein, kien ko rekããl me Anij enaaj litok ñan kõj ilo lal̦ eo ekããl. Ro me rejjab pokake naaj jol̦o̦k ak ko̦kkure er.​—Ais. 65:20, UBS.

Daniel 12:2 ej kanaan bwe jet iaan ro rar mej renaaj jerkak im “mour [ñan] indeeo,” im jet renaaj bõk “jook im menin jõjõik indeeo.” Eoon in ej kõnono kõn jem̦l̦o̦k eo me enaaj wal̦o̦k ñan rein—renaaj bõk “mour indeeo” ñe eaab, renaaj bõk “menin jõjõik indeeo.” Innem ilo naaj jem̦l̦o̦kin 1,000 iiõ ko, jet renaaj bõk mour indeeo; ro jet renaaj bõk ko̦kkure im jako ñan indeeo.​—Rev. 20:15; 21:3, 4.

L̦õmn̦ak kõn juon waanjoñak. Jemaroñ keidi wãween eo enaaj wal̦o̦k ñan kumi kein ruo me renaaj jerkakpeje ñan ruwamãejet ro me rekõn̦aan mour im jokwe ilo bar juon aelõñ. Ro rewãnõk rej ãinwõt ruwamãejet ro me kar kõm̦m̦ane juon aer visa me ej kõmaroñ er ñan jerbal ak jokwe ilo aelõñ eo rej itok ñane im bwe en bar wõr jidik aer anemkwõj ilo aer pãd ie. Ijo iturãjet, ro rejjab wãnõk rej ãinwõt ruwamãejet ro me kar kõm̦m̦an wõt aer temporary visa ak juon visa ñan aer lol̦o̦k wõt ak jam̦bo ñan jikin eo. Ruwamãejet rein renaaj aikuj kate er bwe en jab nana etaer m̦okta jãn aer maroñ lukkuun kõtl̦o̦k aer wõnm̦aanl̦o̦k im jokwe ilo aelõñ eo. Ejja ãindeinl̦o̦k wõt, ro rejjab wãnõk me renaaj jerkakpeje renaaj aikuj pokake kien ko an Jeova im kam̦ool bwe rekõn̦aan mour ilo wãnõk bwe ren maroñ mour im pãdwõt ilo Pedetaij eo. Im jekdo̦o̦n kain visa rot eo kajjojo ruwamãejet ro rej bõke ilo aer del̦o̦ñel̦o̦k aelõñ eo, jet remaroñ tokãlik oktak im jitijen ak ro jet remaroñ karo̦o̦l ak kadiwõjl̦o̦k er jãn aelõñ eo. Jem̦l̦o̦k eo enaaj pedped ioon l̦õmn̦ak im kõm̦m̦an ko aer ilo aelõñ in me rekããltok ñane. Ejja ãindeinl̦o̦k wõt jem̦l̦o̦k eo enaaj wal̦o̦k ñan ro renaaj jerkakpeje, enaaj pedped ioon tõmak im kõm̦m̦an ko aer ilo lal̦ eo ekããl.

Jeova ejjab baj Anij in tũriam̦o wõt ak ej bar Anij in ekajet jim̦we im ejim̦we an jerbal. (Dut. 32:4; Sam 33:5) Enaaj kwal̦o̦k yokwe eo an ikijjeen an kõjerkakpejeik ro rewãnõk im ro rejjab wãnõk jim̦or. Bõtab ilo ejja iien eo wõt, enaaj dãpij wõt kakien ko an kõn ta ko rejim̦we im ta ko rebõd. Ro wõt me renaaj kwal̦o̦k aer yokwe e im mour ekkar ñan kakien ko an renaaj maroñ wõnm̦aanl̦o̦k wõt im mour ilo lal̦ eo ekããl.