Ekkar ñan 1 Korint 15:8, Paul ear ba: “Ãliktata, ear wal̦o̦ktok ñan ña, ãinwõt ñe ña ij juon niñniñ eo ear l̦otak ak ejauñ an allõñ.” Ilo kar m̦okta, jaar kõmel̦el̦e im ba bwe Paul emaroñ kar kõnnaan kõn an kar lo an Jesus pãd ilañ ilo juon pijen. Ear ãinwõt ñe kar lel̦o̦k ñan Paul jeraam̦m̦an eo ñan bar l̦otak, ak jerkakpeje ñan mour ãinwõt juon jetõb elõñ bukwi iiõ ko m̦oktal̦o̦k jãn an kar wõr kain jerkakpeje rot in. Ijoke, ãlikin ad kar bar lukkuun katak im etale eoon in, alikkar bwe ej juon menin aikuj ñan kõm̦m̦an oktak ilo kõmel̦el̦e ko ad kõn eoon in.

Em̦ool bwe ilo ijin, Paul ear jitõñl̦o̦k ñan ta eo ear wal̦o̦k ilo iien eo ear oktak ñan kabuñ eo an Kũrjin ro ak ro rej l̦oor Christ. Bõtab ta mel̦el̦ein an kar ba bwe ear ãinwõt “juon niñniñ eo ear l̦otak ak ejauñ an allõñ”? Ewõr jejjo mel̦el̦e ko me emaroñ mel̦el̦ein men in me ear ba.

Iien eo ear oktak ñan kabuñ eo an Kũrjin ro ear wal̦o̦k ilo idiñ im ekailbõkbõk. Ekkã ad ilbõk ak wiwijet ñe juon niñniñ ej l̦otak ak ejauñ an allõñ. Ke Saul (eo me tokãlik kar n̦aetan Paul) ear jibadekl̦o̦k Damaskõs ñan an tõn kaeñtaan Kũrjin ro ijo, ear jab kõtmãne bwe enãj lo juon pijen me ej kwal̦o̦k Jesus ãlikin an kar jerkakpeje. An kar Paul oktak ñan kabuñ eo an Kũrjin ro ear jab baj kailbõkbõk im kabwilõñlõñ wõt ñan e make, ak ear bar kailbõk im kabwilõñ Kũrjin ro me ear pepe in tõn kaeñtaan er ilo jikin eo. Ejjab men in wõt, ak joñan ear kun an l̦aam̦ ium̦win jejjo iien.​—Jrb. 9:1-9, 17-19.

Ear oktak ñan kabuñ eo an Kũrjin ro ilo “juon iien ejjab jejjet.” Naanin Grik eo me kar ukote naan kein “eo ear l̦otak ak ejauñ an allõñ” emaroñ bar ukok ilo wãween in, “juon eo ejjab jejjet iien l̦otak eo an.” Baibõl̦ eo etan The Jerusalem Bible ej ukote naan kein ilo wãween in: “Ej ãinwõt ñe iar l̦otak ak ejjel̦o̦k ear kõtmãne bwe inaaj l̦otak.” Ilo iien eo Paul ear oktak ñan kabuñ eo an Kũrjin ro, em̦õj kadede an kar Jesus jepl̦aak ñan lañ. Paul ear jab ãinwõt ro me ear kõnono kake er ilo eoon ko m̦oktal̦o̦k kõnke ear jab maroñ lo Jesus ke ear jerkakpeje m̦okta jãn an wanlõñl̦o̦k ñan lañ. (1 Kor. 15:4-8) Bõtab an kar Jesus wal̦o̦kl̦o̦k ñan Paul ilo idiñ ak ilo ejjel̦o̦k kõtmãne, ear kõpel̦l̦o̦k juon jeraam̦m̦an ñan an Paul maroñ lo Jesus ãlikin an jerkakpeje, meñe iien in ear ãinwõt “juon iien ejjab jejjet.”

Ear kõnono kõn e make ilo juon wãween ettã. Ekkar ñan jet rimmãlõtlõt ro, naan ko me Paul ear kõjerbali emaroñ ãinwõt ñe ejjab em̦m̦an an kõnnaan kõn e make. Ñe eñin mel̦el̦ein naan ko an ilo ijin, innem alikkar bwe ej kwal̦o̦k bwe ejjab tõllo̦kũn an bõk jeraam̦m̦an eo me kar lel̦o̦k ñane. Im ilo m̦ool, ear wõnm̦aanl̦o̦k im ba: “Ña ittãtata iaan rijjilõk ro, im ejjab tõllo̦kũ bwe ren n̦aeta rijjilõk kõnke iar kaeñtaan eklejia eo an Anij. Meñe ãindein ak kõn wõt jouj eo el̦ap an Anij, ña ij juon rijjilõk.”—1 Kor. 15:9, 10.

Kõn men in, alikkar bwe Paul emaroñ kar kõnnaan kõn an kar Jesus wal̦o̦kl̦o̦k ñane ilo ejjel̦o̦k kõtmãne, an kar oktak ñan kabuñ eo an Kũrjin ro ilo idiñ, ak bwe ear juon eo ejjab tõllo̦kũn ñan an lo men eo ekabwilõñlõñ. Jekdo̦o̦n ewi wõt iaan mel̦el̦e kein ejim̦we, ak men eo el̦ap an alikkar ej bwe Paul ear lukkuun kaorõk wãween in me ear iioone. Men in ear lukkuun kam̦ool ñane bwe em̦õj an Jesus jerkak jãn mej. Kõn men in, jemaroñ mel̦el̦e etke ekkã an kar jitõñl̦o̦k ñan iien in eidiñ me ear wal̦o̦k ñane ñe ej kwal̦o̦k naan ñan ro jet kõn an kar Jesus jerkakpeje.​—Jrb. 22:6-11; 26:13-18.