Ilo iien eo jej kõpooj kõj make ñan ad jino katak, jemaroñ kajjitõk ippãd make kajjitõk in, ‘Ta ko ij kõtmãne bwe inaaj katak kaki?’ Ijoke, jej aikuj keememej bwe meñe ewõr men ko jemaroñ kõtmãne bwe jenaaj katak kaki, ak emaroñ bar wõr men ko rekããl me Jeova ekõn̦aan bwe jen loi im katak kaki. Ewi wãween ad maroñ kile men ko rekããl Jeova ej kajjioñ katakin kõj?

Jar kõn mãlõtlõt. Kajjitõk ippãn Jeova bwe en jipañ eok ñan mel̦el̦e ta ko ekõn̦aan bwe kwõn jel̦ã im katak kaki kiiõ. (Jem. 1:5) En jab jubũruom̦ kõn men ko em̦õj am̦ kadede jel̦ã kaki.—JK. 3:​5, 6.

Kõtl̦o̦k bwe kajoor eo an Naanin Anij en jerbal ilo mour n̦e am̦. “Naanin Anij emour.” (Hib. 4:12) Kõn men in, kajjojo iien jej riit Baibõl̦, jemaroñ katak juon men ekããl im emaroñ jipañ kõj ilo mour ko ad ilo elõñ wãween ko. Bõtab jemaroñ bõk tokjãn jãn men kein el̦aññe jej kile bwe jej aikuj katak kõn men ko Anij ej katakin kõj.

Kwal̦o̦k am̦ kam̦m̦oolol kõn aolep ekkan ko ilo jetõb ilo tebõl̦ eo an Jeova. Ekkan ko ilo jetõb jãn Jeova rej ãinwõt juon “kwõjkwõjin men ko rematõk.” (Ais. 25:6) Kõjparok bwe kwõn jab kõjekdo̦o̦n ekkan ko ilo jetõb me kwõj l̦õmn̦ak bwe reban em̦m̦an ippam̦. Ilo am̦ ãindein, kwõnaaj kõtl̦o̦k an Anij jipañ eok bwe kwõn juon eo em̦m̦anl̦o̦k wãween ko ippãn, im enaaj lukkuun em̦m̦an ippam̦ katak!